Laa’in lix saqen li ruchich’och’, xb’aan laj James Fullmer

23–29 septiembre: “Waklinqex ut chalqex wikʼin”

3 Nefi 8–11

“Kʼehomaq reetal, laaʼin li Jesukristo, li keʼxchʼolobʼ chaq xyaalal li profeet naq taachalq saʼ li ruchichʼochʼ” (3 Nefi 11:10). Rik’ineb’ li aatin a’an, li Kolonel li waklijenaq chi yo’yo kixk’ut rib’, ut kixtz’aqob’resiheb’ ru li proofetil aatin yeeb’il sa’ lix Hu laj Mormon chiru 600 chihab’. “Naq kixk’ut rib’ ut kixye li aatin a’an,” kixtz’iib’a li Elder Jeffrey R. Holland, “a’an li tz’aqal jayalihom, li xnimal ru hoonal, sa’ chixjunil li resilal lix Hu laj Mormon. A’an li k’utb’esihom ut li yehom li ke’xtaw wi’ xna’leb’eb’ ut ke’musiq’aak wi’ chixjunjunqaleb’ li profeet aj Nefita. … Chixjunileb’ ak ke’xye resil a’an, ke’b’ichan chirix a’an, ke’matk’ek chirix a’an, ut ke’tijok re naq tixk’ut rib’—ut aran kiwan chi yaal. K’a’jo’ xnimal ru li kutan a’an! Li Dios li naxjaltesi chixjunileb’ li aak’ab’ ruhil q’ojyin sa’ saqen ruhil eq’la, ak kik’ulun” (Christ and the New Covenant [1997], 250–251).

Chi’ilmanq ajwi’ “Jesucristo se aparece en la antigua America” (video), Biblioteca del Evangelio.

Jesus Christ Appears in the Ancient Americas | 3 Nephi 8–11

Ominous destruction comes upon the people of Ancient America. Hope returns as survivors gather and witness the Resurrected Christ descend from Heaven.

Li na’leb’ re tzolok sa’ li ochoch ut sa’ li iglees

3 Nefi 8–11

Li Jesukristo a’an lix saqen li ruchich’och’.

Maare taak’e reetal naq eb’ li na’leb’ chirix li aak’ab’ ut li saqen yeeb’ileb’ resil chi k’iilasutinb’il sa’ 3 Nefi 8–11. K’a’ru nakatzol sa’eb’ li ch’ol a’in chirix li musiq’ejil aak’ab’ ut li musiq’ejil saqen? (chi’ilmanq, jo’eetalil, 3 Nefi 8:19–23; 9:18; 10:9–13). K’a’ru naxk’am chaq li aak’ab’ sa’ laa yu’am? K’a’ru naxk’am chaq li saqen? K’a’ut naq li Kolonel kixye naq a’an “lix saqen ut lix yu’am li ruchich’och’”? (3 Nefi 9:18; 11:11).

Eb’ li hoonal yeeb’il resil sa’ 3 Nefi 9–11 a’an junjunq reheb’ li hoonal q’axal loq’eb’ sa’ lix Hu laj Mormon. Ileb’ chi timil timil, ut tz’ileb’ rix sa’ laa k’a’uxl. Wahe’ wiib’ oxib’ li patz’om naru nakate’xtenqa’. Naru nakatz’iib’a li na’leb’ nakak’ul.

• K’a’ raj ru kiweek’a wi ta kinwan sa’ xyanqeb’ li kristiaan a’an?

• K’a’ru nawulak chiwu chirix li Kolonel sa’eb’ li ch’ol a’in?

• Chan ru ninnaw naq li Jesukristo a’an laj Kolol we?

• Chan ru naq wanjenaq a’an jo’ saqen sa’ lin yu’am?

Chi’ilmanq ajwi’ Sharon Eubank, “Li Kristo: Li saqen li nalemtz’un sa’ q’ojyin,” Jolomil ch’utub’aj-ib’ re abril 2019.

Tz’iib’aheb’ li na’leb’ nakak’ul. Naq nakatz’iib’a li musiq’ejil na’leb’ nakak’ul, ak re naq taak’ul xkomon chik.

3 Nefi 9–10

Li Jesukristo naraj xkuyb’al qamaak.

Li Elder Neil L. Andersen kixye, “Ninch’olob’ xyaalal naq li Kolonel naru ut naraj xkuyb’al li qamaak” (“Arrepentíos … para que yo os sane,” Liahona, noviembre 2009, 40). Sik’ sa’ 3 Nefi 9–10 reetalil li rajom li Kristo re kuyuk maak. K’a’ru nakataw sa’ 3 Nefi 9:13–22 ut 10:1–6 li nakatxtenq’a chireek’ankil lix rahom ut li ruxtaan? Jo’q’e aaweek’ahom naq a’an “xatxch’utub’” ut “xatxch’oolani” laa’at (chi’ilmanq 3 Nefi 10:4).

3 Nefi 9:19–22

Li Qaawa’ naxpatz’ “jun yotʼbʼil chʼoolej ut jun tuulanil musiqʼej.”

Naq maji’ kichal li Kolonel, li xmayejankil li xul a’an reetalil lix mayej li Jesukristo (chi’ilmanq Moises 5:5–8). K’a’ru li ak’ taqlahom kixk’e li Kolonel sa’ 3 Nefi 9:20–22? Chan ru naq nokoxb’eresi rik’in a’an ut lix mayej?

K’a’ru naraj naxye choq’ aawe li mayej re jun yot’b’il ch’oolej ut jun tuulanil musiq’ej? K’a’ut naq li Kolonel naraj naq taak’e li mayej a’an?

3 Nefi 11:1–8

Naru tintzol rab’inkil ut xtawb’al ru lix yaab’ xkux li Dios.

Chan ru naru nakanaw naq yoo chi aatinak aawik’in li Dios? Maare li ke’xk’ul li kristiaan sa’ 3 Nefi 11:1–8 naru tatxtenq’a chixtawb’al ru junjunq na’leb’ chirix rab’inkil ut xtawb’al ru lix yaab’ xkux li Dios. Naru nakak’e reetal chan ru lix yaab’ xkux li Dios li ke’rab’i li kristiaan, ut li k’a’ru ke’xb’aanu re xtawb’al ru chi chaab’il.

Maare us ajwi’ rilb’aleb’ jalan chik li raqal sa’eb’ li loq’laj hu li neke’xch’olob’ chan ru xyaab’ xkux li Dios malaj xwankil lix Musiq’. Wahi’keb’ wiib’ oxib’ li raqal. Chirix rilb’aleb’ a’in, naru nakatz’iib’a chan ru nak’eeman reetal li k’utb’esinb’il na’leb’: 1 Reyes 19:11–12; Galatas 5:22–23; Alma 32:27–28, 35; Helaman 10:2–4; Eter 4:11–12; Tzol’leb’ ut Sumwank 9:7–9; 11:11–14.

Us ajwi’ rab’inkil li neke’xye li profeet, li apostol, ut xkomoneb’ chik aj b’eresinel re li Iglees sa’ li kutan a’in li neke’xnaw chan ru rab’inkil ut xtaaqenkil lix yaab’ xkux li Dios. Wankeb’ junjunq reheb’ li neke’xwotz lix na’leb’ sa’eb’ li video re “Escúchalo” sa’ li Biblioteca del Evangelio. Naru nakawil jun malaj wiib’ oxib’.

Chan ru taak’anjela li xatzol re rab’inkil ut xk’eeb’al reetal lix yaab’ xkux li Dios chi saqen wi’chik ru?

Chi’ilmanq ajwi’ Russell M. Nelson, “Chawab’i A’an,” Jolomil ch’utub’aj-ib’ re abril 2020; “Li Walal raaro inb’aan,” B’ichleb’aal choq’ reheb’ li Kok’al, 140; Temas del Evangelio, “Revelación,” Biblioteca del Evangelio.

Chi junjunqil, xb’aan laj Walter Rane

3 Nefi 11:8–17

Li Jesukristo nikinxb’oq chixk’ulb’al injunes xnawom inch’ool chirix a’an.

Ke’wan tana 2,500 kristiaan ch’utch’uukeb’ chaq chirix li santil ochoch aran Naab’alil naq kixk’ut rib’ li Jesukristo (chi’ilmanq 3 Nefi 17:25). Us ta k’iheb’ li tenamit, li Kolonel kixkanab’ “li junjunq” chixch’e’b’al xk’ob’olal li klawx sa’ ruq’ ut sa’ roq (3 Nefi 11:14–15). Naq yooqat chirilb’al, k’e reetal chan raj ru li wank aran. Chan ru nakatxb’oq li Kolonel chi “wakliik ut chi chalk rik’in a’an”? (3 Nefi 11:14).

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Xb’aan naq a’an a’in li ro’ domingo re li po, us raj naq eb’ laj k’utunel sa’ li Tzoleb’aal reheb’ li Kok’al te’roksi li kok’ k’anjel sa’ “Xtiqb’al li aatin B: Xkawresinkileb’ li kok’al re te’kanaaq chiru chixjunil li yu’am sa lix b’ehileb’ li sumwank re li Dios.”

3 Nefi 8–9

Naq wankin sa’ aak’ab’, li Jesukristo naru nawan choq’ insaqen.

• Re xtenq’ankileb’ laa kok’al chixtawb’al ru li k’a’ru yeeb’il sa’ 3 Nefi 8–9, naru nakaseraq’i wi’chik eb’ li ch’ol a’in, malaj naru nekerab’i li raatinuleb’ li ch’ol chi chapb’il chiru ch’iich’, sa’ jun na’ajej q’ojyin ru. Aatinanqex chirix chan raj ru li wank sa’ aak’ab’ chiru oxib’ kutan. Chirix a’an naru neketz’il rix k’a’ut naq li Jesukristo kixye naq a’an lix saqen li ruchich’och’” (3 Nefi 9:18). K’a’ru ke’b’oqe’ li tenamit, ut laa’o ajwi’, chixb’aanunkil re naq li Jesus taawanq choq’ qasaqen? (chi’ilmanq 3 Nefi 9:20−22).

3 Nefi 10:4–6

Li Jesus naxkol rix lix tenamit jo’ jun li kaxlan naxkoleb’ rix li ral.

• Jun xjalam-uuch jun li xan kaxlan li yoo chixch’utub’ankileb’ li kok’ kaxlan rub’el xxik’ naru tixtenq’aheb’ li kok’al chixtawb’al ru chan ru li Kolonel ut k’a’ru lix k’anjel. Naru nakawil 3 Nefi 10:4–6 naq laa junkab’al yookeb’ chirilb’al xjalam-uuch li xan kaxlan ut lix kok’ kaxlan. K’a’ut naq jun xan kaxlan naxch’utub’eb’ lix kok’ kaxlan? K’a’ut naq li Kolonel naraj qach’utub’ankil chi nach’ rik’in? Chan ru nokochal rik’in a’an re xtawb’al xkolb’al qix?

3 Nefi 11:1–15

Li Jesukristo nikinixb’oq chi chalk rik’in.

• Chan ru taatenq’aheb’ laa kok’al chireek’ankil li Musiq’ej naq nekeril 3 Nefi 11:1–15? Naru nakapatz’ reheb’ naq te’xye aawe naq te’xtaw jun na’leb’ sa’eb’ li raqal li naxtenq’aheb’ chireek’ankil lix rahom li Dios. Naru nakab’aanu ajwi’ a’an rik’ineb’ li jalam-uuch sa’ li tusleb’ aatin a’in malaj rik’in li video “Jesucristo se aparece en el templo” (Biblioteca del Evangelio). Ye reheb’ laa kok’al k’a’ru nakaweek’a laa’at naq nakawileb’ ut nakak’oxlaheb’ li seraq’ a’an. Kanab’eb’ chixwotzb’al ajwi’ li neke’reek’a.

  Jesus Christ Appears at the Temple | 3 Nephi 11:1–17

  The people of Ancient America come to Bountiful and gather. They hear the voice of God the Father introduce His Son. They witness Jesus descending from heaven and testify He is the Savior of the world.

3 Nefi 11:1–8

Li Dios nikinraatina chi q’un xyaab’ xkux.

• Naru nakawil junjunq reheb’ li raqal a’in chi “ka’ch’in xyaab’ aakux” (3 Nefi 11:3). Malaj naru nakak’e chi b’ichamank junaq li chapb’il b’ich jo’ “Li Walal raaro inb’aan” (B’ichleb’aal choq’ reheb’ li Kok’al, 140) chi kub’enaq xyaab’ re naq ch’a’aj rab’inkil chi us. K’a’ru ke’xb’aanu li kristiaan re xtawb’al ru li xyaab’ kuxej kichal chaq sa’ choxa? (che’ilmanq li raqal 5–7). K’a’ru naqatzol rik’in li k’a’ru ke’xk’ul?

3 Nefi 11:21–26

Li Jesukristo naraj naq taakub’eeq inha’.

• Naq yooqat chirilb’al 3 Nefi 11:21−26, naru nakapatz’ reheb’ laa kok’al naq te’xaqliiq rajlal sut naq te’rab’i li aatin kub’sink ha’. K’a’ru kixk’ut li Jesus chirix li kub’iha’? Wi eb’ laa kok’al ak rilomeb’ jun kub’iha’, patz’ reheb’ naq te’xye resil li xe’ril. K’a’ut naq li Jesus naraj naq taakub’eeq qaha’?

Re xtawb’al xkomon chik li na’leb’, chi’ilmanq li hu Amigos re li po a’in.

Jun aj Ilol karneer, xb’aan laj Howard Lyon