Samuel, Wan Man blong Leman Antap long wan Wol, i kam long Arnold Friberg

9–15 Septemba: “Ol Gudnius blong Bigfala Glad”

Hileman 13–16

Fas taem we Samuel, Man blong Leman i bin traem blong serem “ol gudnius” long Sarahemla (Hileman 13:7), Ol Man blong Nifae we hat blong olgeta i strong tumas oli no bin wantem lisin long hem mo oli sakemaot hem. Bae yu talem se i olsem se oli bin bildim wan bigfala wol we man i no save gotru raon long hat blong olgeta, we i mekem se oli no save akseptem mesej blong Samuel. Samuel i bin andastanem hamas mesej we hem i tekem i bin impoten, mo hem i bin soem fet blong hem taem hem i bin folem komanmen blong God blong “gobak bakegen, mo profesae” (Hileman 13:3). Semmak olsem we Samuel i bin fesem, yumi evriwan i fesem ol wol taem yumi stap “mekem rere rod blong Lod” (Hileman 14:9) mo traehad blong folem ol profet blong Hem. Mo olsem Samuel, yumi tu, yumi talem witnes blong yumi abaot Jisas Kraes, “we i tru se bae hem i kam long wol” mo invaetem yumi evriwan blong “biliv long nem blong hem” (Hileman 13:6; 14:13). I no evriwan we bae i lisin, mo sam bae oli wok strong blong agensem yumi. Be olgeta we oli bilivim mesej ia wetem fet long Kraes, oli faenem se, i tru, i wan “gudnius blong bigfala glad” (Hileman 16:14)

Ol aedia blong Lanem Samting long Hom mo long Jos

Hileman 13

Lod bae i givim ol woning tru long ol profet blong Hem.

Insaed long ol skripja, samtaem oli komperem ol profet long ol gadman antap long wan wol, o taoa, we i stap givim woning abaot ol denja we oli stap (luk long Aesea 62:6; Esikel 33:1–7) Taem yu stap stadi ol toktok blong Samuel insaed long Hileman 13, tingting long olsem wanem hem i wan wajman blong yu. ?Wanem hem i talem i gud blong dei blong yumi tedei? (luk long, speseli ol ves 8, 21–22, 26–29, 31, mo 38). Eksampol, ?Wanem nao Samuel i stap tijim abaot fasin blong sakem sin?, ?Abaot fasin blong putum tingting i stap daon mo fasin blong kam rij?

Maet yu wantem blong lukaotem ol mesej blong konfrens we i jes stap pas, blong ol luk ol semmak woning we i Lod i givim long ol profet blong tedei. ?Wanem insperesen nao i kam long yu abaot ol woning ia?

Lukaotem sam paten we i stap. Wan paten, i wan plan, o wan eksampol we oli save yusum olsem wan gaed blong mekem wan wok. Insaed long ol skripja, yumi faenem ol paten we oli soem olsem wanem Lod i stap mekem wok blong Hem i kamtru, olsem blong sendem ol wokman blong Hem blong givim woning long ol pipol.

Taem we yumi lisin long ol profet, bae oli poenem yumi i go long Jisas Kraes

Hileman 13–15

God i invaetem mi blong sakem sin.

Ol woning blong Samuel abaot jajmen blong God oltaem i tekem tu wan sore invitesen ia blong sakem sin. Lukaotem ol invitesen ia long Hileman 13–15 (luk speseli long Hileman 13:6– 11; 14:15–19; 15:7–8). ?Wanem nao yumi lanem long ol ves ia abaot fasin blong sakem sin? Sam pipol oli luk fasin blong sakem sin olsem wan strong panismen—samting oli wantem ronwe long hem. Long tingting blong yu, ?wanem nao Samuel i wantem blong Ol Man blong Nifae oli luksave abaot fasin blong sakem sin?

Blong mekem stadi blong yu i kam moa gud, yu save ridim mesej blong Presiden Russel M. Nelson: “Yumi Save Mekem Gud Moa mo Stap Gud MoaLiahona,Mei 2019, 67–69). ?Olsem wanem hem i eksplenem fasin blong sakem sin? ?Wanem ol blesing blong sakem sin wetem tru hat, we yu faenem long mesej ia? Maet yu wantem lukaotem wan spesel samting we profet i invaetem yumi blong mekem yumi jenis. ?Wanem nao Tabu Spirit i stap talem long yu se yu nidim blong yu jenisim? Tingting blong raetemdaon revelesen blong yuwan we yu bin kasem.

?Olsem wanem nao fasin blong sakem sin i defren bitim blong yu jenisim nomo fasin blong yu? ?From wanem hem i impoten blong akseptem invitesen blong God blong sakem sin? Taem yu stap tingting hevi long hemia, tingting blong singsing o lisin long wan hym we i talemaot invitesen ia, olsem “How Gentle God’s Commands” (Hym, namba 125).

Luk tu long “Jesus Christ Will Help You,” For the Strength of Youth: A Guide for Making Choices, 6–9; “Repentance: A Joyful Choice,” “Principles of Peace: Repentance” (videos), Gospel Library; Gospel Topics “Repentance,” Gospel Library.

Hileman 14, 16:13–23

God i sendem ol saen mo ol sapraes blong oli testifae abaot taem we Sevya i bon i kam long wol mo taem we Hem i ded.

Long Hileman 14, Samuel i bin eksplenem se Lod i bin givim ol saen blong taem we Sevya i bon i kam long wol, mo ol saen blong ded blong Hem mekem se ol pipol “oli save … taem we bae hem i kam” mo “biliv long nem blong hem” (Hileman 14:12). Taem yu stap stadi long Hileman 14, luk se ol saen blong taem we Sevya bae i bon i kam long wol oli stap long ol ves 1–8 mo ol saen blong ded blong Hem, oli stap long ol ves 20–28. ?Long tingting blong yu, from wanem nao ol saen ia oli ol wei we i wok blong soemaot taem we Jisas Kraes i bon i kam long wol, o taem we Hem i ded?

Sam moa saen blong yuwan mo ol saen we i no bigwan tumas we i save helpem yu “biliv long nem blong [Sevya].” ?Wanem nao Hem i bin mekem blong yu we i mekem bilif blong yu i kam moa strong long Hem?

?Wanem woning nao oli givim abaot ol saen insaed long Hileman 16:13–23? ?Olsem wanem yu save stap longwe long ol kaen fasin ia blong ol pipol we oli tokbaot long ol ves ia?

Luk tu long Alma 30:43-52; Ronald A. Rasband, “Tru long Tabu Plan blong God,” Liahona, Novemba 2017, 55–57

Hileman 15:3

Taem Lod i stretem yumi, i wan saen blong lav blong Hem long yumi

Ol toktok blong Samuel, oli gat ol strong toktok blong stretem man, be Hileman 15:3 i givim wan lukluk we i wan speselwan long saed blong fasin blong Lod blong stretem man. ?Olsem wanem nao, taem Lod i stretem yumi, i wan saen blong lav blong Hem long yumi? ?Wanem pruf nao bae yu luk long lav mo sore blong Lod long ol profesi mo ol woning blong Samuel?

Tingting blong stadi long mesej blong Elda D. Todd Christofferson “As Many as I Love, I Rebuke and Chasten” (Liahona, May 2011, 97–100), lukaotem tri stamba tingting blong tabu fasin blong stretem man. ?Wetaem yu bin luk God i wok long ol wei ia long laef blong yu?

Hileman 16

Ol profet oli poenem rod long mi i go long Jisas Kraes.

Long Hileman 16, ?wanem nao yumi lanem long olgeta ia we oli bin akseptem ol tijing blong Samuel? ?Wanem nao yumi lanem long olgeta we oli sakemaot hem? Tingbaot olsem wanem nao blong folem ol profet we oli stap laef i helpem yu blong kam moa kolosap long Jisas Kraes.

Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.

Sam Tingting blong Tijim Ol Pikinini

Hileman 13:2–5

God i save toktok long mi long hat blong mi.

• ?Olsem wanem nao yu save tijim pikinini blong yu se God i save toktok long hat blong yumi, olsem we Hem i bin mekem long Samuel? Maet yu save askem olgeta blong soem ol defren wei blong save storian be i nogat toktok (olsem muvmuv han o mekem saen long fes). Hemia i save lidim yumi storian abaot ol defren wei we Papa long Heven i toktok long yumi. Olsem pat blong storian ia, yu mo ol pikinini blong yu save lukluk pikja blong Samuel, wan Man blong Leman (lesenbuk ia i gat tu pikja) mo ridim Hileman 13:2–5 taem ol pikinini blong yu oli lisin long hao God i talem long Samuel wanem blong talem.

• Plante long yumi—speseli ol pikinini—oli nidim help blong luksave olsem wanem mo wetaem God i toktok long yumi. Maet yu wantem talem long pikinini blong yu abaot wan taem we Tabu Spirit i bin helpem yu blong save insaed long hat blong yu wanem nao God i bin wantem yu blong mekem o talem. Eksplenem olsem wanem God i stap toktok wetem yu. Maet ol pikinini blong yu oli save serem eni semmak eksperiens olsem we oli bin gat.

Hileman 14:2–7, 20–25

Ol profet oli tij abaot Jisas Kraes.

• Tugeta, singsing “Samuel Tells of the Baby Jesus” (Children’s Songbook, 36) maet bae hem i wan gud wei blong tijim ol pikinini blong yu wanem Samuel i tijim abaot Jisas Kraes. Serem “Japta 40: Samuel, wan Man blong Leman I Stap Talem Abaot Jisas Kraes” (Ol Stori long Buk blong Momon, 111–13) i wan narawan. ?Wanem nao Samuel i stap tijim yumi abaot Sevya? Maet yu wantem serem wanem ol profet blong tedei i tijim abaot Hem. ?Olsem wanem nao ol toktok blong olgeta i bildim fet blong yumi long Hem?

Hileman 16:1–6

Mi kasem blesing taem mi folem profet.

• Yu save bildim tras blong ol pikinini blong yu long ol profet taem yu soem long olgeta ol eksampol blong ol pipol we oli fetful. Sam long olgeta ia i stap insaed long Hileman 16:1, 5. Taem yu stap ridim, askem ol pikinini blong stanap taem oli harem wan samting we ol pipol oli bin stap mekem taem oli bin bilivim ol toktok blong Samuel. Afta, ridim ol ves 2 mo 6, mo askem ol pikinini blong sidaon taem oli harem wan samting we oli save se ol pipol oli mekem taem oli no stap biliv. ?Olsem wanem nao yumi save soem se yumi bilivim ol toktok blong profet we i stap laef? Talem long ol pikinini, olsem wanem yu bin kasem blesing taem yu folem kaonsel blong Lod tru long ol profet blong Hem.

Blong kasem moa aedia, luk long magasin blong Fren long manis ia.

Samuel, Wan Man blong Leman, i kam long Briana Shawcroft.