O Jisu Karisito a se qai veiqaravi oti ga ena siga oya ena vanua ko Vanuasautu, ni vakavulica tiko na Nona kosipeli, ka solia tiko vei ira na tamata e dua na gauna me ra raica ka vakila na kena ivakatakilakila ena yagona sa tucaketale, ka vakadinadinataka tiko ni sai Koya na iVakabula sa yalataki tu. Sa kena gauna sara me ratou sa gole yani. “Sa yaco mai na noqu gauna,” a kaya o Koya (3 Nifai 17:1). E gadreva o Koya me sa lesu tale vei Tamana, ka kila tu ni ra gadreva na tamata na gauna me ra vakasamataka vakatitobu na veika a vakatavuvulitaka o Koya. Ni yalataka oti o Koya me lesu tale mai ena siga ka tarava, a vakasukai ira na lewevuqa ki na nodra veivale. Ia a sega ni dua e lako. Era a sega ni tukuna na veika era a vakila, ia ko Jisu e a vakila rawa: era a nuitaka tu ni na “tiko ga vakalailai tale vei ira” o Koya (3 Nifai 17:5). E tu tale eso na ka bibi me cakava, ia na vakaraitaki ni yalololoma vei ira na luve ni Kalou e dau vakaliuci Koya tikoga. A mani tiko tale vakalailai o Jisu. Na ka a yaco tarava e a dua beka na ivakaraitaki vakaciriloloma duadua ni veiqaravi ka volai tu ena ivolanikalou. O ira era a tiko e kea era rawa walega ni kaya sa sega ni vakamacalataki rawa (raica na 3 Nifai 17:16–17). A vakamacalataka o Jisu Vakaikoya na veisovaraki vakayalo oya ena malanivosa rawarawa oqo: “Raica oqo, sa vuabale na noqu marau” (3 Nifai 17:20
Na iVakabula sa noqu ivakaraitaki uasivi ni veiqaravi.
E rauta ni 2,500 na tamata era tiko ena gauna a rairai kina na iVakabula, ia a kunea e dua na sala me veiqaravi vei ira yadudua. Na cava o raica me baleta na sala a veiqaravi kina o Koya ena 3 Nifai 17; 18:24–25, 28–32? Na gagadre cava soti a veiqaravi kina o Koya? Na ivakarau cava soti a mana kina na Nona veiqaravi? O na rairai vakasamataka talega na sala e veiqaravi kina vei iko o Koya. O na rawa ni muria vakacava na Nona ivakaraitaki? (Raica talega na 3 Nifai 18:24–25 kei na 28–32.)
Raica talega na “Sa Yalololoma ka Vakabulai Ira na Tamata o Jisu Karisito” (vidio), Valenivola ni Kosipeli.
Na iVakabula a vakavulici keda ena ivakarau ni masu.
Raitayaloyalotaka mada se na vakacava beka mo rogoca na iVakabula ni masulaki iko. Ena vakayaco-ka vakacava ki na ka o sotava oqori ena nomu masu? Vakasamataka vakatitobu oqo ni o vulica na 3 Nifai 17:13–22; 18:15–25; kei na 19:6–9, 15–36. Na cava o vulica mai na ivakaraitaki kei na ivakavuvuli i Jisu Karisito me baleta na masu? Navuca mo vakaraica na veivakararamataki me baleta na sala, na gauna, evei, o cei, kei na vuna mo masu kina. Na veivakararamataki cava tale o rawata mai na veitikina oqo?
Au rawa ni vakasinaiti ena Yalo niu vakayagataka na sakaramede.
Ni da cakava vakawasoma e dua na ka, e rawa ni yaco me kena ivakarau se vakawaleni. Ena so na gauna eda sega mada ga ni vakasamataka. E rawa vakacava ni o maroroya oqori mai na cakacaka vakalotu vakamacawa ni sakaramede? Ni o wilika na 3 Nifai 18:1–12, vakasamataka vakatitobu na sala o rawa ni “vakasinaiti kina vakayalo” ena veigauna kece o vakayagataka kina na sakaramede (raica talega na 3 Nifai 20:1–9). Me vaka na tikina e 5–7, 11, na cava soti eso na ka e dodonu mo dau “cakava” tikoga? E rawa talega ni o vakasamataka vakatitobu na vuna e solia kina vei keda o Jisu na cakacaka vakalotu ni sakaramede—ia kevaka sa rawata tiko na sakaramede na Nona inaki ena nomu bula. Na cava e bibi kina vei iko na sakaramede?
Ena nona itukutuku “Dau Nanumi Koya Tikoga” (Liaona, Fepe. 2018, 4–6), a solia kina o Peresitedi Henry B. Eyring “e tolu na vakatutu me baleta na veika e rawa ni o nanuma ena veimacawa ni o vakayagataka na ivakatakarakara tabu ni sakaramede.” Na cava e matata tu vei iko me baleta na nona vakatutu? Na cava o rawa ni cakava mo vakatorocaketaka kina na nomu sokalou ena gauna ni sakaramede kei na loma ni macawa?
Na cava tale o rawa ni cakava mo sokalou vakaibalebale cake kina? E rawa ni o tarogi iko ena taro vakaoqo: “E veivakayarayarataki vakacava na solibula ni iVakabula ki na noqu bula e veisiga?” “Na cava au sa cakava vinaka tiko vaka Nona tisaipeli, kei na cava au rawa ni vakavinakataka?”
Raica talega na Maciu 26:26–28; Jeffrey R. Holland, “Raica na Lami ni Kalou,” Liaona, Me 2019, 44–46; “Ni Da Taura Nikua na Sakaramede,” Sere ni Lotu, naba 169; “Vakatakila o Jisu Karisito na Sakaramede” (vidio), Valenivola ni Kosipeli; Ulutaga vakosipeli, “Sakaramede,” Valenivola ni Kosipeli.
Taura na gauna mo dau tugana. Ena so na gauna, na vulici ni ivolanikalou sa yaco me dua na veimataqali wiliwili, masumasu, kei na vakasama titobu. Ni o vakatara na gauna vakanomodi mo vakananuma ka vosa vua na Kalou me baleta na veika o sa vulica tiko, sa rawa mo vakalevutaka cake na kaukauwa ni Nona vosa ena nomu bula.
Au rawa ni “dulaka cake” na rarama i Jisu Karisito.
Nanuma ni tiko e dua na nomu itokani ka sega ni kila e dua na ka me baleti Jisu Karisito vakavo ga ni o dua vei ira na dau muri Koya. Na cava beka ena tinia o nomu itokani me baleti Koya, ka yavutaki ena nomu ivalavala? Na cava na kena ibalebale vei iko mo “dulaka cake na nomudou rarama me cilavi vuravura”? 3 Nifai 18:24 Na veisureti cava tale a solia na iVakabula ena 3 Nifai 18:22–25 e vukei iko mo dulaka cake na rarama o ya?
Raica talega na Bonnie H. Cordon, “Me Ra Raica,” Liaona, Me 2020, 78–80.
Vakasaqara na isolisoli ni Yalo Tabu o ira na tisaipeli i Jisu Karisito.
Vakasamataka mada na nomu masu wale tikoga oqo. Na cava e vakavulica vei iko na nomu masu me baleta na nomu gagadre titobu? Ni oti nodra tiko vata kei na iVakabula ena dua na siga o ira na lewevuqa era “sa masulaka na ka era sa gadreva sara vakalevu”—na isolisoli ni Yalo Tabu (3 Nifai 19:9). Cava na vuna e gadrevi vakalevu kina na isolisoli ni Yalo Tabu? Ni ko wilika na tikina oqo, vakasamataka vakatitobu na nomu gagadre me baleta na veitokani ni Yalo Tabu. O na vakasaqara vagumatua vakacava na veitokani oqori?
Me baleta na vakasama tale eso, raica na ilavelave ni vula oqo ni Liaona kei na mekasini ni Me iSakisaki ni iTabagone .
Na iVakabula e lomani ira yadua na luvei Tamada Vakalomalagi.
Sa rawa mo vakayagataka e dua na iyaloyalo me vakataki ira ena ituvatuva oqo se na vidio “Masu o Jisu Karisito ka Qaravi Ira na Gone na Agilosi” (Valenivola ni Kosipeli) me vukei ira na luvemu mera raitayaloyalotaka na itukutuku ena 3 Nifai 17. Wilika na malanivosa se tikina eso mai na 3 Nifai 17 ka vakabibitaka na loloma ni iVakabula vei ira na tamata (me vaka na tikina e 7 kei na 20–25). Me ra qai droinitaka na luvemuni e dua na kedra iyaloyalo kei Jisu. Ni ra cakava oqori, vukei ira mera vakasamataka eso na sala e vakaraitaka kina o Jisu na Nona loloma ena vukudra.
Au rawa ni vakasamataki Jisu ni’u vakayagataka na sakaramede.
Sureti ira na gone me ra tukuna vei iko na cava e yaco ena gauna ni sakaramede. Mo qai wilika na 3 Nifai 18:1–12 ka kerei ira na luvemu mera laveta e dua na liga ni ra rogoca e dua na ka e tautauvata kei na ka eda cakava nikua. Na cava e vinakata o Jisu Karisito meda “nanuma” se vakasamataka ena gauna ni sakaramede? (raica na 3 Nifai 18:7, 11).
Ni lagati vata e dua na sere baleta na masu, me vaka na “Tamaqu Mai Lagi” (Nodra iVolanisere na Lalai, 6), e dua na sala vinaka me ra vukei kina na luvemu me ra vakasamataka na vuna eda masu kina. E rawa ni dou qai wilika vata kei ira na luvemudou na 3 Nifai 18:18–21 ka veivosakitaka na veika a vakatavulica o Jisu me baleta na masu. Sureti ira na luvemu me ra tukuna vei iko na veika era vakila ni ra masu e rawa ni vukei ira me ra wasea na nodra ivakadinadina ni masu.
E rawa ni ka marautaki vei ira na gone me ra vaqara eso na veivakalougatataki vakamareqeti ni masu. Sa rawa mo vola na tiki ni pepa eso oqo ka vunitaka: 3 Nifai 18:15; 3 Nifai 18:20; 3 Nifai 18:21; 3 Nifai 19:9; kei 3 Nifai 19:23. Mera qai raica na luvemu na pepa ka wilika na veitikina, ka vaqara na veika e vakavulica o Jisu Karisito se Nona tisaipeli me baleta na masu.
Me baleta na vakasama tale eso, raica na ilavelave ni vula oqo ena mekasini na iTokani .
iVakatakilakila
era wavoliti Jisu kei ira na gone ni Nifai na agilosi