21–27 ni Okotova: “E Sega ni Dua na Matatamata Mamarau Cake”

3 Nifai 27–4 Nifai

Na ivakavuvuli i Jisu Karisito era sega walega ni dua na vakasama totoka me ra vakasamataki vakatitobu. Era sa kena inaki me vakauqeti keda meda vakataki Koya. Na ivola ni 4 Nifai e vakaraitaka na taucoko ni nona kosipeli na iVakabula e rawa ni veisautaka na tamata. Ni oti na veiqaravi vakalekaleka nei Jisu, sa mai oti kina na veisenijiuri ni veileti ena kedra maliwa na Nifaiti kei na Leimanaiti. E rua na veimatanitu e kilai kina na veileti kei na viavialevu sa yaco me ra “sa duavata ga, era sa luvei Karisito” (4 Nifai 1:17), ka sa tekivu me ra “taukena vata na ka kecega ena kedra maliwa” (4 Nifai 1:3). Ni “sa tiko e lomadra na tamata … na loloma ni Kalou,” ka “sa sega ni dua na matatamata mamarau cake ena kedra maliwa na tamata kecega sa bulia na liga ni Kalou” (4 Nifai 1:15–16). Oqo na sala a veisautaka kina na ivakavuvuli ni iVakabula na nodra bula na Nifaiti kei na Leimanaiti. Era sa veisautaki iko tiko vakacava?

Vakasama eso ni Vuli e Vale kei na Lotu

3 Nifai 27:1–12

Na Lotu i Jisu Karisito sa vakatokai ena Yacana.

Me vaka e ratou sa tauyavutaka na tisaipeli ni iVakabula na Nona Lotu ena vanua taucoko, a sa tarogi kina e dua na ka, vei ira eso, e rairai vaka e dua na tikina lailai—na cava me yaca ni Lotu? (raica 3 Nifai 27: 1–3). Na cava o sa vulica me baleta na bibi ni yaca oqo mai na isaunitaro ni iVakabula ena 3 Nifai 27:4–12

A vakatakila na iVakabula na yaca ni Nona Lotu nikua ena Vunau kei na Veiyalayalati 115:4. Vakasamataka vakatitobu na vosa yadua ena yaca o ya. Ena vukei keda vakacava na veivosa yadua me da kila kina o cei o keda, na veika eda vakabauta, kei na sala meda vakaitovo kina?

Raica talega Russell M. Nelson, “Na Yaca Dodonu ni Lotu,” Liaona, Nove. 2018, 87–89; “E Vakaraitaka o Jisu Karisito na Yaca ni Nona Lotu kei na Nona iVunau” (vidio), Valenivola ni Kosipeli.

3 Nifai 27:10–22

Na Lotu i Jisu Karisito e tarai cake ena Nona kosipeli.

Ni vakamacalataka oti ni Nona Lotu e dodonu me “tarai cake ena [Nona] kosipeli” (3 Nifai 27:10), qai vakamacalataka na iVakabula na cava na Nona kosipeli. O na vakalekalekataka vakacava na ka a kaya ena 3 Nifai 27:13–22? Yavutaki ena ivakamacala oqo, na cava na kena ibalebale na Lotu—kei iko—mo tara cake ena Nona kosipeli?

Vola na veika o sa vulica tiko. Raica na veika a vakavulica na iVakabula vei ira na Nona tisaipeli ena 3 Nifai 27:23–26. Na cava na vuna e bibi kina me da vola toka na veika vakayalo eda sotava? Na cava o vakauqeti mo vola ena nomu vulica na cakacaka ni iVakabula ena 3 Nifai?

3 Nifai 28:1–11

“Na cava o gadreva?”

Na cava o na kaya kevaka a taroga na iVakabula, ni a tarogi iratou na nona tisaipeli, “Na cava na ka dou sa gadreva mai vei au?” (3 Nifai 28:1). Vakasamataka na veitaro oqo ni o wilika na 2 Nifai 28:1–11 Na cava o vulica me baleta na gagadre ni lomadra na tisaipeli mai na isau ni Nona taro? E sa veisau vakacava na nomu gagadre ni ko bulataka tiko na kosipeli i Jisu Karisito?

E dau vakaraitaka na serenilotu na gagadre mai vu ni yaloda—“Meu Savasava Tu” e dua na ivakaraitaki vinaka (Serenilotu, naba 73). Vakasamataka mo kunea e dua na serenilotu e tautauvata kei na nomu gagadre.

3 Nifai 29–30

Na iVola i Momani e dua na ivakatakilakila ni sa vakayacori taucoko na cakacaka ni Kalou edaidai.

Vakasamataka mada na ivakatakilakila eso o na kila kina ni na yaco e dua na ka. Me ivakaraitaki, o kila vakacava ni sa lako tiko mai na uca se sa veisau na draki? Me vaka na 3 Nifai 29:1–3, o kila vakacava na cakacaka ni Kalou ni vakasoqoni ira vata mai na Nona tamata “sa tekivu vakayacori”? (raica talega na 3 Nifai 21:1–7). E rawa talega ni o kila, ena 3 Nifai 29:4–9, na veika era na cakitaka na tamata ena noda gauna oqo. E vaqaqacotaka vakacava na nomu vakabauta na veika oqo ena iVola i Momani?

4 Nifai 1:1–18

Na vakamuri ni ivakavuvuli i Jisu Karisito e veimuataki ki na duavata kei na marau.

E rawa beka ni o raitayalotaka ena vakacava tu beka meda bula voli ena veiyabaki ka tarava mai na nona veisiko na iVakabula? Ni o vulica na 4 Nifai 1:1–18, vakasamataka mo vola na veivakalougatataki era sa ciqoma na tamata. Sa rawa talega mo makataka se raica na digidigi era a cakava ka a vukea na kena muataki ki na bula kalougata oqo. Na cava a vakavulica vei ira o Jisu ka rawa ni vakauqeta na nodra digidigi dodonu? Oqo eso na kena ivakaraitaki, ia o na kunei ira talega na tani: 3 Nifai 11:28–30; 12:8–9, 21–24, 40–44; 13:19–21, 28–33; 14:12; 18:22–25.

Vakasamataka vakatitobu na cava o rawa ni cakava me vukea na nomu matavuvale, tabanalevu, se itikotiko raraba me ra bula, vakalevu cake ena duavata kei na marau. Na cava o rawa ni cakava mo vukea na kena ulabaleti na veiwasewase ka yaco vakaidina me “duabau” kei ira tale eso na luve ni Kalou? Na ivakavuvuli cava i Jisu Karisito e vukei iko mo rawata na lalawa oqo?

E ka ni rarawa, ni o ira na kai Saioni e vakamacalataki tiko ena 4 Nifai era a qai lutu ki na caka ca. Ni o wilika na 4 Nifai 1:19 – 49, vakaraica na ivakarau kei na itovo ka vakavuna na koro oqo me kasura. Na cava o rawa ni cakava mo vukea me tagutuvi na ivakarau se itovo oqo?

Raica talega na Mosese 7:18; D. Todd Christofferson, “Veiraurau vei ira na iLawalawa,” Liaona, Nove. 2020, 32–35; Reyna I. Aburto, “Sa Lomavata,” Liaona, Me 2018, 78–80; Ulutaga ni Kosipeli, “Ciqociqo ena Lotu i Jisu Karisito,” Valenivola Vakosipeli.

Me baleta na vakasama tale eso, raica na ilavelave ni vula oqo ni Liaona kei na Me iSakisaki ni iTabagone ni mekasini.

Vakatutu baleta Nodra Tuberi na Gonelalai

3 Nifai 27:3–8

Au lewena na Lotu i Jisu Karisito.

• Mo vakamacalataka na bibi ni yaca ni Lotu i Jisu, veitalanoa kei ira na luvemuni me baleta na yacadra. Na cava e bibi kina na yacada? Mo ni qai wilika vata na 3 Nifai 27:3 ka vaqara na taro era a taroga na tisaipeli i Jisu. Vukei ira na luvemu me ra kunea na kena isau ena 3 Nifai 27:5–8. Na cava e bibi kina vei iko na yaca ni Lotu?

• Vukei ira na gone mera vakasamataka na ilawalawa duidui era lewena, me vaka nodra matavuvale se kalasi ena Lalai. Kerei ira me ra tukuna vei iko na veika era taleitaka baleta na ilawalawa yadua oqori. Sa rawa mo ni lagata vata na “Au Lewe ni Lotu i Jisu Karisito” (iVolanisere ni Gonelalai, 48) ka veivosakitaka na vuna o vakavinavinakataka kina na nomu lewena na Lotu ni iVakabula.

3 Nifai 27:13–16

Na Lotu i Jisu Karisito e tarai cake ena Nona kosipeli.

• Na iVakabula e vakalekalekataka na Nona kosipeli ena 3 Nifai 27. E rawa ni o vakamacalataka vei ira na luvemu ni vosa na kosipeli e kena ibalebale na “itukutuku vinaka.” Na itukutuku vinaka cava eda kunea ena 3 Nifai 27:13–16? Vakayagataka na tabana ni itaviqaravi ni macawa oqo mo vakavulica kina ni sa tara cake na Lotu ni iVakabula ena Nona kosipeli.

3 Nifai 27:30–31

E marau na Tamada Vakalomalagi ni ra lesu tale Vua na Luvena.

• Vakasamataka mo qitora e dua na qito ka vunia kina e dua ka so tale era tovolea me kunei koya. Oqo ena rawa ni veimuataki ki na dua na veitalanoa me baleta na reki eda vakila ni dua sa yali. Ni wiliki oti na 3 Nifai 27:30–31, sa rawa mo veivosakitaka na sala mo veivukei kina meda tiko volekata na Tamada Vakalomalagi me “kakua ni dua era sa yali.”

4 Nifai

Na muri Jisu Karisito e kauta mai vei au na reki.

• Me vukei ira na luvemu me ra vulica na nodra marau na tamata e vakamacalataki ena 4 Nifai, e rawa ni o vakaraitaka vei ira na kedra iyaloyalo na tamata mamarau. Oti, ni o ni wilika vata na tikina e tikina 2–3 kei na 15–17 (se “Wase 48: Na Vakacegu e Amerika,” iTalanoa ni Vola i Momani, 136–37), e rawa ni ra dusia na iyaloyalo ni o yaco ki na dua na ka ena italanoa e kauta mai na marau.

• Me vukei ira na gone me ra vakatovotovotaka na veika a vakavulici tiko ena 4 Nifai 1:15–16, solia vei ira na ituvaki eso ka ra veicudruvi tiko kina vakai ira na tamata. Sureti ira me ra matana-taka na ituvaki cava ena yaco kevaka e tu vei keda na “loloma ni Kalou” e lomada.

Me baleta na vakasama tale eso, raica na ilavelave ni vula oqo ena mekasini ni iTokani .

Na Karisito vata kei na Tolu na Tisaipeli ni Nifai,, mai vei Gary L. Kapp