The Light of His Countenance Did Shine upon Them [Ang Kasanag sa Iya Nawong Nagsilak sa Ila], ni Gary L. Kapp

Oktubre 7–13: “Tan-awa, Nalubos ang Akon Kalipay”

3 Nefi 17–19

Si Jesucristo bag-o lang nakatapos sang bilog nga adlaw nga pag-alagad sa duta sang Bugana, nga nagatudlo sang Iya ebanghelyo, nga nagatugot sa mga tawo nga makita kag mahikap ang mga marka sa Iya nabanhaw nga lawas, kag nagapamatuod nga Sia amo ang ginpromisa nga Manluluwas. Karon oras na nga maghalin. “Ang akon tion malapit na,” siling Niya (3 Nefi 17:1). Malakat na Sia pabalik sa Iya Amay, kag nahibal-an Niya nga kinahanglan sang katawhan sang tiyempo para binagbinagon ang Iya ginpanudlo. Gani, nga nagapromisa nga magbalik sa madason nga adlaw, ginpapauli Niya ang kadam-an sa ila mga puluy-an. Pero wala sing may naghalin. Wala sila nagahambal sang ila nabatyagan, pero nasat-uman ini ni Jesus: nagalaum sila nga Sia “magpabilin sing diutay pa gid upod sa ila” (3 Nefi 17:5). May iban pa Sia nga importante nga himuon, pero ang pagpakita sang kaluoy sa mga anak sang Dios mataas gid nga prayoridad para sa Iya. Gani nagtiner-tiner si Jesus. Ang nagsunod nga hitabo mahimo nga amo ang pinakamakatalandog nga halimbawa sang pag-alagad nga nasulat sa balaan nga mga kasulatan. Ang ara didto nakasiling lamang nga indi ini malaragway (tan-awa sa 3 Nefi 17:16–17). Si Jesus Mismo ang naghambal sa malip-ot sang wala ginplano nga espirituhanon nga pagbubo sa sining simple kag mabaskog nga mga tinaga: “Karon tan-awa, nalubos ang akon kalipay” (3 Nefi 17:20).

Mga Ideya sa Pagtuon sa Puluy-an kag sa Simbahan

3 Nefi 17; 18:24–25, 30–32

Ang Manluluwas amo ang akon perpekto nga ehemplo sang pag-alagad.

Mga 2,500 ka tawo ang ara sang magpakita ang Manluluwas, pero nakakita Sia sang paagi nga mag-alagad sa ila sing tag-isaisa. Ano ang imo natalupangdan sa paagi nga nag-alagad Sia sa 3 Nefi 17; 18:24–25, 28–32? Ano nga mga panginahanglan ang Iya gintatap? Ano nga mga kinaiya ang naghimo sang Iya pag-alagad nga epektibo? Pwede mo man hunahunaon kon paano Sia nagaalagad sa imo. Paano mo sundon ang Iya ehemplo? (Tan-awa man sa 3 Nefi 18:24–25 kag 28–32.)

3 Nefi 17:13–22; 18:15–25; 19:6–9, 15–36

Ang Manluluwas nagtudlo sa akon kon paano mangamuyo.

Hunahunaa kon daw ano ayhan nga mabatian ang Manluluwas nga nagapangamuyo para sa imo. Paano magaapekto sa imo pagpangamuyo ang amo sini nga eksperiyensya? Binagbinaga ini samtang imo ginatun-an ang 3 Nefi 17:13–22; 18:15–25; kag 19:6–9, 15–36. Ano ang imo matun-an sa ehemplo kag pinanudlo ni Jesucristo parte sa pangamuyo? Pamensara ang pagpangita sang mga ideya kon paano, san-o, diin, para kay sin-o, kag kon ngaa mangamuyo kita. Ano pa nga mga ideya ang imo maagom sa sining mga bersikulo?

Tan-awa man sa Doktrina kag mga Kasugtanan 10:5.

3 Nefi 18:1–12

Pwede ako mapuno sang Espiritu samtang nagaambit ako sang sakramento.

Kon himuon naton pirme ang isa ka butang, mahimo na ini nga kinaandan ukon kaswal. Kon kaisa ginahimo na lang naton ini nga wala ginapamensar. Paano mo likawan nga matabo ini sa semanal nga ordinansa sang sakramento? Samtang imo ginabasa ang 3 Nefi 18:1–12, binagbinaga kon paano ka “mapuno” sa espirituhanon tagsa nga mag-ambit ka sang sakramento (tan-awa man sa 3 Nefi 20:1–9). Suno sa mga bersikulo 5–7, 11, ano ang pila ka mga butang nga dapat “pirme” mo himuon? Pwede mo man binagbinagon kon ngaa ginhatagan kita ni Jesus sang ordinansa sang sakramento—kag kon bala ang sakramento nagatuman sang Iya mga katuyuan sa imo kabuhi. Ngaa sagrado ang sakramento sa imo?

Sa iya mensahe “Dalayon nga Magdumdom sa Iya” (Liahona, Peb. 2018, 4–6), si Pangulong Henry B. Eyring naghatag sang “tatlo ka mga panugyan kon ano ang sarang ninyo panumdumon tagsa ka semana samtang nagaambit kamo sang balaan nga mga simbolo sang sakramento.” Ano ang nagtatak gid sa imo sa iya mga ginpanugyan? Ano ang sarang mo himuon para pauswagon ang imo pagsimba sa tion sang sakramento kag sa bilog nga semana?

Ano pa ang pwede mo himuon para mas makahulugan nga magsimba? Pwede mo pamangkuton ang imo kaugalingon sang pareho sini: “Paano nakaimpluwensya ang sakripisyo sang Manluluwas sa akon adlaw-adlaw nga pagpangabuhi?” “Ano ang ginahimo ko sing maayo bilang Iya disipulo, kag ano ang pwede ko pa pauswagon?”

Tan-awa man sa Mateo 26:26–28; Jeffrey R. Holland, “Tan-awa ang Kordero sang Dios,” Liahona, Mayo 2019, 44–46.

Maghatag sang oras sa pagbinagbinag: Kon kaisa, ang pagtuon sang balaan nga mga kasulatan nangin kombinasyon sang pagbasa, pagpangamuyo, kag pagbinagbinag. Kon maghatag ka sang tiyempo sang kalinong para magbinagbinag kag makighambal sa Dios parte sa imo ginatun-an, mapadako mo ang gahum sang Iya pulong sa imo kabuhi.

3 Nefi 18:22–25

Sarang ko “ipataas” ang kasanag ni Jesucristo.

Kuno abi may abyan ka nga wala sing nahibal-an parte kay Jesucristo magluwas nga isa ka Niya ka sumulunod. Ano ang mahambal sang imo abyan parte sa Iya, base sa imo mga gawi? Ano ang buot silingon sa imo sang “ipataas ang inyo mga suga agud mag-iwag ini sa kalibutan”? (3 Nefi 18:24). Ano pa nga mga imbitasyon ang ginhatag sang Manluluwas sa 3 Nefi 18:22–25 nga nagabulig sa imo nga ipataas ina nga kasanag?

3 Nefi 18:36–37; 19:6–22

Ang mga disipulo ni Jesucristo nagahandum sang regalo sang Balaan nga Espiritu.

Hunahunaa ang imo mga pangamuyo sining karon lang. Ano ang ginatudlo sa imo sang imo mga pangamuyo parte sa imo pinakahugot nga mga handum? Pagkatapos nga magtiner sa presensya sang Manluluwas sang isa ka adlaw, ang kadam-an “nagpangamuyo para sa sinang ila labing ginahandum”—ang [regalo] sang Balaan nga Espiritu (3 Nefi 19:9). Ngaa kanami gid sang regalo sang Balaan nga Espiritu? Samtang imo ginabasa ining mga dinalan, binagbinaga ang imo kaugalingon nga handum para sa pagpakig-upod sang Balaan nga Espiritu. Paano mo sinsero nga handumon ina nga pagpakig-upod?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

3 Nefi 17:7, 20–25

Palangga sang Manluluwas ang tagsa ka anak sang Amay nga Langitnon.

• Pwede ka maggamit sang litrato pareho sang ari sa sining outline para buligan ang imo kabataan nga mapanan-aw ang kasaysayan sa 3 Nefi 17. Pamensara nga basahon ang mga dinalan ukon mga bersikulo sa 3 Nefi 17 nga nagapatalupangod sang pagpalangga sang Manluluwas sa mga tawo (pareho sang mga bersikulo 7 kag 20–25). Dayon pwede ang imo kabataan magdrowing sang litrato sang ila mga kaugalingon nga upod si Jesus. Samtang ginahimo nila ini, buligi sila sa pagpanumdom sang mga paagi nga ginpakita ni Jesus ang Iya pagpalangga sa ila.

Behold Your Little Ones [Tuloka ang Inyo Magagmay nga mga Anak], ni Gary L. Kapp

3 Nefi 18:1–12

Sarang ko panumdumon si Jesus samtang nagaambit ako sang sakramento.

• Basi pwede mo hagaron ang imo kabataan nga sugiran ka kon ano ang nagakatabo sa oras sang sakramento. Dayon pwede mo basahon ang 3 Nefi 18:1–12 kag pangabayon ang imo kabataan nga alsahon ang ila kamot kon may mabatian sila nga pareho sang ginahimo naton sa karon nga panahon. Ano ang gusto ni Jesucristo nga aton dumdumon ukon hunahunaon sa oras sang sakramento? (tan-awa sa 3 Nefi 18:7, 11).

3 Nefi 18:15–24; 19:6–9, 15–36

Gintudloan ako ni Jesus kon paano magpangamuyo.

•   Pwede ninyo basahon sang imo kabataan ang 3 Nefi 18:18–21 kag hambalan kon ano ang gintudlo ni Jesus parte sa pangamuyo. Ang paghagad sang imo kabataan nga ihambal kon ano ang ila nabatyagan kon magpangamuyo sila makabulig sa ila nga magpaambit sang ila testimonya parte sa pangamuyo.

• Basi masadya para sa mga kabataan nga magpangita sang pila ka malahalon nga mga bugay sang pangamuyo. Pwede mo isulat ang masunod nga mga balasahon sa balaan nga mga kasulatan sa magagmay nga papel kag taguon ini: 3 Nefi 18:15; 3 Nefi 18:20; 3 Nefi 18:21; 3 Nefi 19:9; kag 3 Nefi 19:23. Dayon pwede nga pangitaon sang imo kabataan ang mga papel kag basahon ang mga bersikulo, nga ginapangita ang mga butang nga gintudlo ni Jesucristo ukon sang Iya mga disipulo parte sa pangamuyo.

Para sa dugang nga mga ideya, tan-awa sa isyu sang Abyan nga magasin sini nga bulan.

Angels Ministered unto Them [Ang Mga Anghel Nag-alagad sa Ila], ni Walter Rane