Larawan ni Cristo nga nagapakita sa mga Nefinhon, ni Andrew Bosley

Oktubre 14–20: “Mga Anak Kamo sang Kasugtanan”

3 Nefi 20–26

Kon mabatian mo ang mga tawo nga nagagamit sang mga tinaga pareho sang panimalay sang Israel, mabatyagan mo bala nga parte sa imo ang ila ginhambalan? Ang mga Nefinhon kag mga Lamanhon literal nga mga kaliwat sang Israel, “sanga sang kahoy sang Israel,” kag pamatyag nila sila “nadula gikan sa iya sini lawas” (Alma 26:36; tan-awa man sa 1 Nefi 15:12). Pero gusto sang Manluluwas nga mahibal-an nila nga wala sila nadula para sa Iya. “Iya kamo sang panimalay sang Israel,” siling Niya, “kag nalakip kamo sang kasugtanan” (3 Nefi 20:25). Mahimo nga magsiling Sia sa imo sang daw pareho sini sa karon nga panahon, bangud ang bisan sin-o nga ginbunyagan kag nagahimo sang mga kasugtanan sa Iya nalakip man sa panimalay sang Israel, “sang kasugtanan.” Buot silingon, kon maghambal si Jesus parte sa panimalay sang Israel, nagahambal Sia parte sa imo. Ang instruksyon nga bugayan “ang tanan nga mga kaliwatan sang duta” para sa imo (3 Nefi 20:27). Ang imbitasyon nga “magbugtaw liwat, kag isul-ob ang imo kusog” para sa imo (3 Nefi 20:36). Kag ang Iya bilidhon nga promisa, “Ang akon kaayo indi magtaliwan sa imo, ukon man ang kasugtanan sang akon paghidaet maghalin,” para sa imo (3 Nefi 22:10).

Mga Ideya sa Pagtuon sa Puluy-an kag sa Simbahan

3 Nefi 20–22

Sa ulihing mga adlaw, ang Dios magahikot sang makahalangyag nga buluhaton.

Sa 3 Nefi 20–22, nagpropesiya ang Manluluwas parte sa bwas-damlag sang Iya katawhan sa kasugtanan (tan-awa ilabi na gid sa 3 Nefi 20:30–32, 39–41; 21:9–11, 22–29). Samtang imo ginabasa ining mga bersikulo, dumduma ang ginhambal ni Pangulong Russell M. Nelson: “Nalakip kita sa katawhan sang kasugtanan sang Ginuo. Aton ang pribelihiyo nga personal nga magpasakop sa katumanan sining mga promisa. Daw ano kamakalilipay nga panahon para mabuhi!” (“The Gathering of Scattered Israel,” Liahona, Nob. 2006, 79). Ano nga mga propesiya ang nagapakunyag gid sa imo? Ano ang sarang mo himuon sa pagbulig nga matuman ang mga ini?

Magpangita sang nagainspirar nga mga tinaga kag mga dinalan. Mahimo nga makakita ka sang mga tinaga kag mga dinalan sa balaan nga mga kasulatan nga manamian mo, nga daw ginsulat gid para sa imo. Pamensara nga markahan ang mga ini sa imo balaan nga mga kasulatan ukon isulat ang mga ini sa isa ka sululatan sang mga tinun-an (study journal).

3 Nefi 22; 24

Maluluy-on ang Dios sa mga tawo nga nagabalik sa Iya.

Sa 3 Nefi 22 kag 24, nagasambit ang Manluluwas sang mga pulong halin kay Isaias kag Malaquias nga puno sang maathag nga mga imahe kag paanggid—mga baga sa kalayo, gin-ulay nga pilak, pag-asawahay, mga talamwaan sang langit (tan-awa ilabi na gid sa 3 Nefi 22:7–8, 10–17; 24:10–12, 17–18). Ano ang ginatudlo sining mga paanggid sa imo parte sa kaangtanan sang Dios sa Iya katawhan—kag sa Iya kaangtanan sa imo? Paano natuman ang mga promisa sa sining mga kapitulo sa imo kabuhi ukon sa kabuhi sang imo pamilya?

3 Nefi 23:6–13

Ang pagsulat sang espirituhanon nga mga eksperiyensya makabugay sa akon pamilya.

Ano ang nanamian mo sa inter-aksyon sang Manluluwas kay Nefi sa 3 Nefi 23:6–13? Kon tan-awon sang Manluluwas ang mga rekord nga ginatipigan mo, ano ayhan ang Iya ipamangkot sa imo? Ano nga importante nga mga hitabo ukon espirituhanon nga mga eksperiyensya ang dapat mo isulat? Ngaa importante ini himuon? (tan-awa sa 3 Nefi 26:2).

3 Nefi 23; 26:1–12

Gusto sang Manluluwas nga usisaon ko ang balaan nga mga kasulatan.

Samtang imo ginabasa ang 3 Nefi 20:10–12; 23; 26:1–12, binagbinaga kon ano ang balatyagon sang Manluluwas parte sa balaan nga mga kasulatan. Ano ang kinalain sang pag-usisa sang balaan nga mga kasulatan kag sang simple nga pagbasa sang mga ini? (tan-awa sa 3 Nefi 23:1).

3 Nefi 24:7–12

Ang pagbayad sang ikapulo nagabukas sang mga bintana sang langit.

Halin sadto ginsugo na sang Dios ang mga tawo nga magbayad sang ikapulo (tan-awa sa Genesis 14:17–20; Malaquias 3:8–11). Samtang ginatun-an mo ang 3 Nefi 24:7–12, hunahunaa kon ngaa ginapangayo sang Dios sa Iya katawhan nga magbayad sang ikapulo. Ining mga pamangkot makagiya sang imo pagtuon:

• Ano ang layi sang ikapulo? (Tan-awa sa Doktrina kag mga Kasugtanan 119. Ang “ganansya” sa sining rebelasyon nagakahulugan sang kita. Ang tanan nga miyembro nga may kita dapat magbayad sang ikapulo. Ano ang kinalain sang ikapulo sa iban pa nga klase sang mga donasyon?

• Ano ang ginagamitan sang ikapulo?   Sa ano nga mga paagi ka nabugayan tungod nagabayad ang mga miyembro sang Simbahan sang ikapulo?

• Ano nga mga bugay ang nagaabot sa mga tawo nga nagapangabuhi sang layi sang ikapulo? (Tan-awa sa 3 Nefi 24:7–12). Makita mo ang iban sini nga ginalaragway sa mensahe ni Elder David A. Bednar nga “Ang mga Bentana sang Langit” (Liahona, Nob. 2013, 17–20). Pangitaa, ilabi na gid ang mga bugay nga indi parte sa kuwarta. Paano mo nakita ining mga bugay sa imo kabuhi?

Pwede mo man basahon ang Marcos 12:41–44. Ano ang ginatudlo sining istorya sa imo?

3 Nefi 25:5–6

Ginpadala sang Ginuo si Elias agud lisuon ang akon tagipusuon sa akon mga katigulangan.

Sa aton panahon, ang aton mga tagipusuon “nagliso sa [aton] mga ginikanan” paagi sa buluhaton sa templo kag family history. Paano ini natabo sa imo? Samtang imo ginabasa ang 3 Nefi 25:5–6 kag Doktrina kag mga Kasugtanan 110:13–16, binagbinaga kon ngaa importante gid ini nga bahin sang plano sang Dios.

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

3 Nefi 23:1, 5

Sarang ko usisaon sing maid-id ang balaan nga mga kasulatan.

• Ang mga instruksyon sang Manluluwas sa 3 Nefi 23 nagapakita kon daw ano kaimportante sang balaan nga mga kasulatan para sa Iya. Para buligan ang imo kabataan nga diskubrehon ini, pwede mo basahon ang 3 Nefi 23:1, 5 sing matunog kag pangabaya sila nga pamatian ang tinaga nga ginsulit sing tatlo ka beses. Ano ang kinalain sang pagpangita sangsa simple lang nga pagbasa?

• Basi pwede ninyo isulat sang imo kabataan ang paborito ninyo nga bersikulo sa balaan nga kasulatan kag taguon ini. Dayon pwede kamo magbulos-bulos sa pagpangita sang gintago nga balaan nga kasulatan sang kada isa, basahon ini sing ululupod, kag hambalan kon ngaa makahulugan ining mga bersikulo.

3 Nefi 24:8–12

Ang pagbayad sang ikapulo nagabukas sang mga bintana sang langit.

• Buligi ang imo kabataan nga basahon ang 3 Nefi 24:8–12 sa pagpangita sang pamaagi nga kompletuhon ining dinalan: Kon magbayad ako sang ikapulo, ang Ginuo maga … . Pwede ka man mag-istorya sang eksperiyensya sang ginbugayan ka tungod nagbayad ka sang ikapulo. Kon makabulig, pamensara ang pagsulat sang pila ka kantidad sang kuwarta kag buligan ang imo kabataan nga sumahon kon pila ang ikapulo (10 porsyento) nga ihatag sa tagsa ka kantidad.

• Ang pahina para sa kahiwatan sini nga semana makabulig sa imo kabataan nga hambalan ang pila ka pamaagi nga ginagamit sang Ginuo ang ikapulo para bugayan ang mga miyembro sang Iya Simbahan. Basi pwede sila magdrowing sang mga litrato (ukon magpangita sang mga litrato sa mga magasin sang Simbahan) sang mga paagi nga ginabugayan sila sang ikapulo.

3 Nefi 25:5–6

Gusto sang Amay nga Langitnon nga tun-an ko ang parte sa akon mga katigulangan.

• Paano mo papagsikon ang imo kabataan nga pangitaon kag magtuon parte sa ila mga katigulangan? Paano mo paisugon ang imo kabataan nga hikuton ang mga ordinansa para sa ila mga katigulangan kon dalagko na sila? Pamensara ang pagbulig sa ila nga pangitaon sa 3 Nefi 25:5–6 ang butang nga matabo sa ulihing mga adlaw Ang mas magagmay nga kabataan pwede magbutang sang ila kamot sa ila dughan tagsa nga mabatian nila ang tinaga nga “tagipusuon” samtang ginabasa mo ining mga bersikulo. Pwede mo man basahon sa ila kon paano natuman ini nga propesiya sa Doktrina kag mga Kasugtanan 110:13–16 (tan-awa man sa Libro sang Larawan nga Pang-Ebanghelyo, num. 95). Sugiri ang imo kabataan kon paano nagliso ang imo tagipusuon sa imo mga katigulangan. Halimbawa, pwede mo iistorya sa ila ang bisan ano mo nga eksperiyensya sang ginatun-an mo ang parte sa imo mga katigulangan kag paghikot sang mga ordinansa sa templo para sa ila.

• Buligi ang imo kabataan nga maghimo sang family tree nga may mga ngalan sang ila mga ginikanan kag lolo/lola. Ano nga mga istorya ang pwede mo isugid parte sa isa sang imo mga katigulangan? Magpakita sang mga litrato kon may ara.  

Para sa dugang nga mga ideya, tan-awa sa isyu sang Abyan nga magasin sini nga bulan.

Bring Forth the Record [Dalha Diri ang Kasulatan], ni Gary L. Kapp