Third Nephi: These Twelve Whom I Have Chosen [Ikatlong Nefi: Ining Dose nga Akon Ginpili], ni Gary L. Kapp

Septyembre 30–Oktubre 6: “Ako ang Layi, kag ang Kapawa”

3 Nefi 12–16

Pareho sa mga disipulo ni Jesus nga nagtililipon para mamati sang Wali sa Bukid sa Galilea, ang katawhan nga nagtililipon sa templo sa Bugana nagpangabuhi sang layi ni Moises. Ginsunod nila ini tungod kay ginatudlo sila sini kay Cristo (tan-awa sa Jacob 4:5), kag karon nagatindog si Cristo sa ila atubangan, nga nagapahayag sang mas mataas nga layi. Pero bisan kita nga wala nagpangabuhi sang layi ni Moises makahangop nga ang talaksan nga ginpahamtang ni Jesus para sa Iya mga disipulo mas mataas. “Luyag ko nga kamo mangin [perpekto],” gindeklarar Niya (3 Nefi 12:48). Kon ginapabatyag sini sa imo ang imo kakulangan, tandai nga nagsiling man si Jesus nga, “Bulahan ang mga kubos sa espiritu nga nagakari sa akon, kay ila ang ginharian sang langit” (3 Nefi 12:3). Ang mas mataas nga layi isa ka imbitasyon—isa ka paagi sa pagsiling nga “Magkari kamo sa akon kag maluwas” (3 Nefi 12:20). Pareho sang layi ni Moises, ining layi nagatudlo sa aton padulong kay Cristo—ang Nagaisahanon nga makaluwas kag makaperpekto sa aton. “Yari karon,” siling Niya, “Ako ang layi, kag ang kapawa. Magtulok sa akon, kag magpadayon tubtob sa katapusan, kag kamo magakabuhi” (3 Nefi 15:9).

Mga Ideya sa Pagtuon sa Puluy-an kag sa Simbahan

3 Nefi 12–14

Sarang ko nga mangin matuod nga disipulo ni Jesucristo.

Ari ang isa ka paagi para tun-an kag ipangabuhi ang gintudlo sang Manluluwas sa 3 Nefi 12–14: Magpili sang grupo sang mga bersikulo, kag tilawi kon pwede mo palip-uton ang ginatudlo sang mga bersikulo sa isa ka pulong nga nagaumpisa sa “Ang matuod nga mga disipulo ni Jesucristo …” Halimbawa, ang pagpalip-ot sang 3 Nefi 13:1–8 pwede nga “Ang matuod nga mga disipulo ni Jesucristo wala nagahandum sang pagdayaw sang publiko para sa maayong binuhatan.” Tilawi ini sa sining mga dinalan:

• 12:3–16:

• 12:38–44:

• 13:19–24:

• 14:1–5:

• 14:21–27:

• Iban pa nga mga dinalan nga nagainspirar sa imo

Pagkatapos nga basahon ining mga bersikulo, ano ang nabatyagan mo nga dapat mo himuon para sundon si Jesucristo?

Ang kasuguan sa 3 Nefi 12:48 daw kabudlay himuon—daw imposible pa gani.   Suno sa Moroni 10:32–33, paano mangin posible ang mangin perpekto pareho sang Manluluwas?

Maggamit sang mga leksyon gamit ang isa ka bagay. Ang Manluluwas nagpanudlo sang dalagko nga mga kamatuoran paagi sa pagtumod sa pamilyar nga mga butang. Pwede ka maghimo sang pareho sini samtang nagatuon ukon nagatudlo ka parte sa 3 Nefi 12. Ang pagtan-aw ukon pag-uyat sang asin, kandila, ukon kunop pwede magpauswag sang diskusyon parte sa wala katapusan nga mga kamatuoran nga gintudlo sang Manluluwas.

3 Nefi 12:1–2; 15:23–24; 16:1–6

Bulahan yadtong mga nagapati nga wala makakita.

Pila lang gid sa mga anak sang Dios ang nakakita sa Manluluwas kag nakabati sang Iya tingug, pareho sang katawhan sa Bugana. Ang kalabanan sa aton daw pareho sa mga tawo nga ginlaragway sa 3 Nefi 12:2; 15:23; kag 16:4–6. Ano ang mga ginpangako sa amo nga mga tawo sa sining mga bersikulo? Paano natuman ining mga promisa sa imo kabuhi?

Tan-awa man sa Juan 20:26–29; 2 Nefi 26:12–13; Alma 32:16–18.

3 Nefi 12:21–30; 13:1–8, 16–18; 14:21–23

Mahimo ko matinguhaan nga tinluan ang mga handum sang akon tagipusuon.

Isa ka tema nga mahimo imo natalupangdan sa sining mga kapitulo amo ang imbitasyon sang Manluluwas sa pagpangabuhi sang mas mataas nga layi—nga mangin matarong indi lamang sa panggwa nga mga aksyon kundi pati man sa aton mga tagipusuon. Pangitaa ining tema sang maghambal ang Manluluwas parte sa pagbinaisay (3 Nefi 12:21–26), imoralidad (3 Nefi 12:27–30), pangamuyo (3 Nefi 13:5–8), kag pagpuasa (3 Nefi 13:16–18). Ano pa ang iban nga mga halimbawa nga imo nakita? Ano ang pwede mo obrahon para tinloan ang mga handum sang imo tagipusuon?

3 Nefi 14:7–11

Hatagan ako sang Amay nga Langitnon sang maayo nga mga butang kon magpangayo, magpangita, kag magpanuktok ako.

Samtang imo ginabasa ang imbitasyon sang Manluluwas sa 3 Nefi 14:7–11 nga magpangayo, magpangita, kag magpanuktok, binagbinaga kon ano nga “maayo nga mga butang” ang gusto Niya nga pangayuon nimo. Ang masunod nga dugang nga balaan nga mga kasulatan makabulig sa imo nga maintiendihan kon paano magpangayo, magpangita, kag magpanuktok. Basi makabulig man ini paathag kon ngaa ang iban nga mga pangamuyo wala ginasabat sa paagi nga imo ginapaabot: Isaias 55:8–9; Helaman 10:4–5; Moroni 7:26–27, 33, 37; kag Doktrina kag mga Kasugtanan 9:7–9; 88:64. Paano makaapekto ining mga bersikulo sa imo pamaagi sa pagpangayo, pagpangita, kag pagpanuktok?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

3 Nefi 12:14–16

Mangin maayo ako nga halimbawa paagi sa pagsunod kay Jesucristo.

• Kon kaisa wala makahibalo ang mga kabataan kon paano bugayan sang ila nga halimbawa ang iban nga tawo. Gamita ang 3 Nefi 12:14–16 para paisugon sila nga pasigahon ang ila kasanag. Halimbawa, kon mabasa mo ang “inyo” ukon “ninyo” sa sining mga bersikulo, pangabaya ang imo kabataan nga itudlo ang ila kaugalingon. Sugiri ang mga kabataan parte sa kasanag nga imo makita sa ila kon ginasunod nila si Jesucristo kag kon paano ka sini ginainspirar nga sundon man Sia.  

• Para paisugon ang imo kabataan nga indi pagtaguon ang ila kasanag (tan-awa sa 3 Nefi 12:15), pabulos-bulosa sila sa pagtago ukon pagtabon sang suga ukon sang iban pa nga kasanag. Pwede nila buksan ang suga tagsa nga mahambal nila ang butang nga pwede nila himuon para mangin maayo nga ehemplo sa iban.

3 Nefi 13:19–21

“Magtipon para sa inyo mga kaugalingon sang mga bahandi sa langit.”

• Ang pagbasa sining mga bersikulo mahimo nga magbukas sang paghinambalanay parte sa mga butang nga malahalon para sa aton. Basi pwede mo pangunahan ang imo kabataan sa isa ka treasure hunt para magpangita sang mga butang nga nagapadumdom sa ila sang mga manggad nga wala katapusan ang bili.

3 Nefi 14:7–11

Ginasabat sang Amay nga Langitnon ang akon mga pangamuyo.

• Samtang inyo ginabasa ang 3 Nephi 14:7, pwede nga maghimo ang imo mga kabataan sang aksyon nga nagasimbolo sang tagsa ka imbitasyon sang Manluluwas sa sining bersikulo. Halimbawa, pwede nila alsahon ang ila mga kamot (magpamangkot), maghimo sang teleskopyo gamit ang ila mga kamot (magpangita), ukon kuno-abi magpanuktok sa pwertahan (magpanuktok). Buligi ang imo kabataan nga magpanumdom sang mga butang nga ila ihambal kag pangayuon sa ila mga pangamuyo.

• Basi masadyahan ang imo kabataan sang hampang nga magpangayo sang isa ka butang kag pagkatapos makabaton sang lain nga butang. Sa 3 Nefi 14:7–11, ano ang gusto sang Manluluwas nga mahibal-an naton parte sa aton Amay sa Langit?

3 Nefi 14:21–27; 15:1

Gusto sang Manluluwas nga mabatian ko kag himuon ang Iya ginatudlo.

• Magpamensar sang mga paagi nga mabuligan mo ang imo kabataan nga mapanan-aw ang paanggid sa sining mga bersikulo. Basi pwede sila magdrowing sang mga litrato, maghimo sang mga aksyon, ukon magpatindog sang mga bagay sa mabakod kag balason nga mga pundasyon. Pwede nila islan sang ila ngalan ang “mainandamon nga tawo” samtang ila ginabasa ang 3 Nefi 14:24–27. Ukon pwede sila magtindog tagsa nga mabatian nila ang tinaga nga “nagahimo” sa 3 Nefi 14:21–27 kag 15:1.

• Ari ang leksyon gamit ang bagay nga pwede mo tilawan: pangabaya ang imo kabataan nga hunahunaon nga ang isa nila ka tiil nagasimbolo sang pagpamati sa mga pulong sang Manluluwas kag ang isa nagasimbolo sang paghimo sang gintudlo sang Manluluwas. Hagara ang imo kabataan nga tilawan nga magbalanse sa “pagpamati” nila nga tiil. Ano ang matabo kon maghuyop ang mabaskog nga hangin sa kuwarto? Dayon pwede kamo sang imo kabataan magpangita sang partikular nga mga butang nga gintudlo sang Manluluwas nga aton himuon: tan-awa sa 3 Nefi 12:3–12, 21–26; 13:5–8.

Para sa dugang nga mga ideya, tan-awa sa isyu sang Abyan nga magasin sini nga bulan.

The Savior’s Visit to the People in America [Ang Pagbisita sang Manluluwas sa Katawhan sa Amerika], ni Glen S. Hopkinson.