I Am the Light of the World [Ako ang Kapawa sang Kalibutan], ni James Fullmer

Septyembre 23–29: “Bangon kag Magpalapit sa Akon”

3 Nefi 8–11

“Yari karon, ako si Jesucristo, nga ang mga manalagna nagsaksi nga magaabot sa kalibutan” (3 Nefi 11:10). Sa sining mga tinaga, ginpakilala sang nabanhaw nga Manluluwas ang Iya Kaugalingon, nga nagatuman sang masobra 600 katuig nga mga propesiya sa Libro ni Mormon. “Inang pagpakita kag inang deklarasyon,” ginsulat ni Elder Jeffrey R. Holland, “amo ang pinakaimportante nga tion, ang pinakamataas nga hitabo, sa bilog nga kasaysayan sang Libro ni Mormon. Amo ato ang pagpakita kag ang deklarasyon nga nagpahibalo kag nag-inspirar sang tagsa ka Nefinhon nga propeta. … Ang tanan naghambal parte sa iya, nagkinanta parte sa iya, nagdamgo parte sa iya, kag nagpangamuyo para sa iya pagpakita—kag ari na gid sia. Ang adlaw sang mga adlaw! Ang Dios nga nagabaylo sang tagsa ka madulom nga gab-i sa kasanag sang aga nag-abot na” (Christ and the New Covenant [1997], 250–51).

Jesus Christ Appears in the Ancient Americas | 3 Nephi 8–11

Ominous destruction comes upon the people of Ancient America. Hope returns as survivors gather and witness the Resurrected Christ descend from Heaven.

Mga Ideya sa Pagtuon sa Puluy-an kag sa Simbahan

3 Nefi 8–11

Si Jesucristo amo ang Kapawa sang Kalibutan.

Mahimo nga matalupangdan mo nga ang mga tema parte sa kadulom kag kasanag ginasulit-sulit sa bilog nga 3 Nefi 8–11. Ano ang matun-an mo sa sining mga kapitulo parte sa espirituhanon nga kadulom kag kasanag? (tan-awa halimbawa, sa 3 Nefi 8:19–23; 9:18; 10:9–13). Ano ang nagadala sang kadulom sa imo kabuhi? Ano ang nagadala sang kasanag? Ngaa sa banta mo nga ginpakilala sang Manluluwas ang Iya Kaugalingon bilang “ang kapawa kag ang kabuhi sang kalibutan”? (3 Nefi 9:18; 11:11).

Ang mga hitabo nga ginlaragway sa 3 Nefi 9–11 nalakip sa pinakasagrado sa Libro ni Mormon. Basaha ini sing mahinay, kag binagbinaga sing maayo. Ari ang pila ka mga pamangkot nga makabulig sa imo. Pamensara nga isulat ang mga panghunahuna nga nagaabot sa imo.

• Ano ayhan ang akon nabatyagan kon upod ako sining mga tawo?

• Ano ang nanamian ko sa Manluluwas sa sining mga kapitulo?

• Paano ko mahibal-an nga si Jesucristo amo ang akon Manluluwas?

• Paano Sia nangin kasanag sa akon kabuhi?

Tan-awa man sa Sharon Eubank, “Si Cristo: Ang Kapawa Nga Nagasiga sa Kadudulman,” Liahona, Mayo 2019, 73–76.

Isulat ang mga panghunahuna. Kon isulat mo ang espirituhanon nga mga panghunahuna nga imo mabaton, labanlaban nga makabaton ka pa sing dugang.

3 Nefi 9–10

Si Jesucristo nalangkag gid nga magpatawad.

Si Elder Neil L. Andersen nagsiling, “Nagapamatuod ako nga ang Manluluwas makasarang kag nalangkag sa pagpatawad sang aton mga sala” (“Repent … That I May Heal You,” Liahona, Nob. 2009, 40). Pangitaa sa 3 Nefi 9–10 ang ebidensya sang kahanda ni Cristo nga magpatawad. Ano ang imo makita sa 3 Nefi 9:13–22; 10:1–6 nga nagabulig sa imo nga mabatyagan ang Iya pagpalangga kag kaluoy? Sang san-o mo nabatyagan nga “gintipon” kag “ginsagod” ka Niya (tan-awa sa 3 Nefi 10:4).

3 Nefi 9:19–22

Ang Ginuo nagapangayo sang “isa ka masinulub-on nga tagipusuon kag isa ka mahinulsulon nga espiritu.”

Antes sang pag-abot sang Manluluwas, ang halad nga mga sapat simbolo sang sakripisyo ni Jesucristo (tan-awa sa Moises 5:5–8). Ano ang bag-o nga kasuguan nga ginhatag sang Manluluwas sa 3 Nefi 9:20–22? Paano kita sini ginatudlo sa Iya kag sa Iya sakripisyo?

Ano ang buot silingon sa imo sang maghalad sang masinulub-on nga tagipusuon kag mahinulsulon nga espiritu? Ngaa sa pamatyag mo nga ginapangayo ini sang Manluluwas nga sakripisyo halin sa imo?

3 Nefi 11:1–8

Matun-an ko nga pamatian kag intiendihon ang tingug sang Dios.

Paano mo mahibal-an kon nagahambal sa imo ang Dios? Siguro makabulig sa imo ang eksperiyensya sang katawhan sa 3 Nefi 11:1–8 nga maintiendihan ang pila ka mga prinsipyo sang pagpamati kag pag-intiendi sang tingug sang Dios. Pwede mo pat-inan ang mga kinaiya sang tingug sang Dios nga nabatian sang mga tawo kag kon ano ang ila ginhimo para mas maintiendihan ini.

Basi makabulig man ang magpangita sang iban nga balaan nga mga kasulatan nga nagalaragway sang tingug sang Dios ukon sang impluwensya sang Iya Espiritu. Ari ang pila sini: Basi pagkatapos nga basahon ini, pwede mo isulat ang mga giya sa pagkilala sang rebelasyon: 1 Mga Hari 19:11–12; Mga Taga-Galacia 5:22–23; Alma 32:27–28, 35; Helaman 10:2–4; Eter 4:11–12; Doktrina kag mga Kasugtanan 9:7–9; 11:11–14.

Makabenepisyo ka man sa pagpamati sa mga propeta, apostoles, kag iban pa nga mga lider sang Simbahan sa karon nga panahon nga nakaeksperiyensya sang pagpamati kag pagsunod sa tingug sang Dios.

Paano mo ipangabuhi ang imo natun-an nga magpamati kag mas kilalahon sing mas maathag ang tingug sang Dios?

Tan-awa man sa Russell M. Nelson, “Pamatii Sia,” Liahona, Mayo 2020, 88–92.

One by One [Tinag-isaisa], ni Walter Rane

3 Nefi 11:8–17

Ginaimbitar ako ni Jesucristo nga mag-angkon sang personal nga saksi parte sa Iya.

Mga 2,500 ka tawo ang nagtipon sa templo sang Bugana sang magpakita si Jesucristo (tan-awa sa 3 Nefi 17:25). Wala sapayan sining kadamuon sang tawo, gin-imbitar sila sang Manluluwas nga “tinag-isaisa” nga hikapon ang mga agi sang lansang sa Iya mga kamot kag mga tiil (3 Nefi 11:14–15). Samtang nagabasa ka, pamensara kon daw ano ayhan kon ato ka didto. Sa ano nga mga paagi ka ginaimbitar sang Manluluwas nga “magbangon kag magpalapit sa” Iya? (3 Nefi 11:14).

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Tungod ini nga Domingo ikalima nga Domingo sang bulan, ang mga titser sa Primary ginapaisog nga gamiton ang aktibidades sa pagtuon sa “Appendix B: Paghanda sang Kabataan sa Bug-os-Kabuhi nga Paglakat sa Dalan sang Kasugtanan sang Dios.”

3 Nefi 8–9

Kon ara ako sa kadulom, si Jesucristo ang akon mangin kasanag.

• Para buligan ang imo kabataan nga maintiendihan ang mga eksperiyensya nga ginalaragway sa 3 Nefi 8–9, pwede mo isaysay liwat ukon pamatian ang ginrekord nga mga parte sining mga kapitulo sa madulom nga kwarto. Hambali kon daw ano ayhan nga ara kamo sa kadulom sing tatlo ka adlaw. Dayon pwede ninyo hambalan kon ngaa gintawag ni Jesucristo ang Iya Kaugalingon nga Kapawa sang Kalibutan (tan-awa sa 3 Nefi 9:18). Ano ang gin-agda ni Jesus sa mga tawo, kag sa aton, nga himuon para mangin kasanag naton Sia? (tan-awa sa 3 Nefi 9:20–22).

3 Nefi 10:4–6

Ginaprotektahan ni Jesus ang Iya katawhan pareho sang pagprotekta sang munga sa iya mga piso.

• Ang larawan sang isa ka munga nga nagapanipon sang iya mga piso isa ka mabaskog nga kasangkapan sa pagtudlo para buligan ang mga kabataan nga maintiendihan ang karakter kag misyon sang Manluluwas. Pwede mo basahon ang 3 Nefi 10:4–6 samtang nagatan-aw ang imo pamilya sa litrato sang munga kag mga piso. Ngaa kinahanglan tipunon sang munga ang iya mga piso? Ngaa gusto sang Manluluwas nga tipunon kita palapit sa Iya? Paano kita magpalapit sa Iya para mangin hilway sa katalagman?

3 Nefi 11:1–15

Ginaagda ako ni Jesucristo nga magpalapit sa Iya.

• Paano mo buligan ang imo kabataan nga mabatyagan ang Espiritu samtang inyo ginabasa ang 3 Nefi 11:1–15 sing ululupod? Basi pwede mo sila pangabayon nga hambalon ka kon may makita sila sa sining mga bersikulo nga nagabulig sa ila nga mabatyagan ang pagpalangga sang Dios. Ihambal sa imo kabataan kon ano ang imo nabatyagan kon ginabasa kag ginabinagbinag mo ining mga hitabo. Tugoti man sila nga maghambal sang ila mga nabatyagan.

  Jesus Christ Appears at the Temple | 3 Nephi 11:1–17

  The people of Ancient America come to Bountiful and gather. They hear the voice of God the Father introduce His Son. They witness Jesus descending from heaven and testify He is the Savior of the world.

3 Nefi 11:1–8

Ang Dios nagahambal sa akon sa malulo, mahinay nga tingug.

• Basi pwede mo basahon ang pila sining mga bersikulo sa malulo, “diutay nga tingug” (3 Nefi 11:3). Ano ang kinahanglan himuon sang mga tawo para maintiendihan ang tingug halin sa langit? (tan-awa sa mga bersikulo 5–7). Ano ang aton matun-an sa ila eksperiyensya?

3 Nefi 11:21–26

Gusto ni Jesucristo nga magpabunyag ako.

• Samtang imo ginabasa ang 3 Nefi 11:21–26, pwede mo hagaron ang imo kabataan nga magtindog tagsa nga mabatian nila ang tinaga nga bunyag. Ano ang gintudlo ni Jesus parte sa bunyag? Kon nakakita na ang imo kabataan sang pagbunyag sang una, pangabaya sila nga ilaragway ang ila nakita. Ngaa nga gusto ni Jesucristo nga magpabunyag kita?

Para sa dugang nga mga ideya, tan-awa sa isyu sang Abyan nga magasin sini nga bulan.

One Shepherd [Isa ka Manugpahalab], ni Howard Lyon