“Septyembre 2–8: ‘Dumduma ang Ginuo.’ Helaman 7–12,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)
“Septyembre 2–8. Helaman 7–12,” Dali, Magsunod sa Akon—Para sa Puluy-an kag Simbahan: 2024 (2023)
Larawan ni Nefi nga nagapangamuyo sa tore sang hardin, ni Jerry Thompson
Septyembre 2–8: “Dumduma ang Ginuo”
Helaman 7–12
Ang tatay ni Nefi nga si Helaman, nagapangabay sa iya mga anak nga lalaki nga “dumduma, dumduma.” Gusto niya nga ila dumdumon ang ila mga kalolohan, dumdumon ang mga pulong sang mga propeta, kag labi sa tanan “ang aton Manunubos, nga si Cristo” (tan-awa sa Helaman 5:5–14). Maathag nga nakadumdum si Nefi tungod amo man ini ang mensahe nga iya ginpahayag sa katawhan sa nagsunod nga mga tinuig “nga wala sing kakapoy” (Helaman 10:4). “Paano nga nalimtan ninyo ang inyo Dios?” pamangkot niya (Helaman 7:20). Ang tanan nga pagpangabudlay ni Nefi—ang pagwali, pagpangamuyo, paghikot sang mga milagro, kag pagpangayo sa Dios sang tiggulutom—gintuyo para buligan ang mga tawo nga magliso sa Dios kag dumdumon Sia. Sa madamo nga paagi, ang pagkalipat sa Dios mas dako nga problema sangsa indi pagkakilala sa Iya. Kag mahapos nga malipat sa Iya kon ang aton mga kaisipan natuon sa “wala’y pulos nga mga butang sining kalibutan” kag nakulapan sang sala (Helaman 7:21; tan-awa man sa Helaman 12:2). Pero, sa ginapakita sa pag-alagad ni Nefi, indi pa ulihi nga magdumdom kag “magdangop … sa Ginuo nga inyo Dios” (Helaman 7:17).
Mga Ideya sa Pagtuon sa Puluy-an kag sa Simbahan
Ang mga propeta nagapahayag sang pagbuot sang Dios sa katawhan.
Ang Helaman 7–11 isa ka maayo gid nga lugar sa pagtuon kon ano ang ginahimo sang mga propeta. Samtang imo ginabasa ining mga kapitulo, tutoki ang mga aksyon, panghunahuna, kag mga inter-aksyon ni Nefi sa Ginuo. Paano ka ginabuligan sang pag-alagad ni Nefi nga maintiendihan ang papel sang mga propeta? Ari ang pila ka mga halimbawa: Ano pa ang imo nakita?
-
Helaman 7:17–22: Ang mga propeta nagawali sang paghinulsol kag nagapaandam sa mga konsikwensya sang sala.
Base sa imo ginbasa, paano mo ilaragway kon ano ang propeta kag kon ano ang iya ginahimo? Pamensara nga maghimo sang malip-ot nga paathag.
Natalupangdan mo bala kon daw ano kaisog kay Nefi sa Helaman 7:11–29? Ngaa sa pamatyag mo kon kaisa kinahanglan sang mga propeta nga maghambal nga may kaisog pareho kay Nefi? Pamensara ang pagpangita sang mga sabat sa seksyon nga ginatig-ulohan nga “Indi Makibot” sa mensahe ni Elder Neil L. Andersen nga “Ang Propeta sang Dios” (Liahona, Mayo 2018, 26).
Nga ginatandaan ining tanan nga kamatuoran, binagbinaga kon paano ka ginbugayan sang Ginuo paagi sa pag-alagad sang Iya mga propeta. Ano ang Iya gintudlo sa imo sining karon lang paagi sa aton buhi nga propeta? Ano ang imo ginahimo para mamati kag sundon ang direksyon sang Ginuo?
Ang akon pagtuo kay Jesucristo kinahanglan matukod sa masobra pa sangsa mga senyales kag mga milagro.
Kon bastante na ang mga senyales ukon mga milagro para bag-uhon ang tagipusuon sang isa ka tawo, kuntani ang tanan nga Nefinhon nahaylo na sang dalagko nga mga senyales nga ginhimo ni Nefi sa Helaman 9. Pero wala ina matabo. Tandai ang lainlain nga mga reaksyon sang mga tawo sa milagro sa Helaman 9–10. Halimbawa, pwede mo ikumparar ang mga sabat sang lima ka lalaki kag sang mga punong hukom sa Helaman 9:1–20 (tan-awa man sa Helaman 9:39–41; 10:12–15). Ano ang imo matun-an sa sining mga eksperiyensya kon paano mo tukuron ang imo pagtuo kay Jesucristo?
Tan-awa man sa 3 Nefi 1:22; 2:1–2.
Ang Ginuo nagahatag sang gahum sa mga tawo nga nagapangita sang Iya pagbuot kag nagatinguha sa pagtuman sang Iya mga kasuguan.
Samtang ginatun-an mo ang Helaman 10:1–12, tandai kon ano ang ginhimo ni Nefi para makuha ang pagsalig sang Ginuo. Paano niya ginpakita nga ginatinguhaan niya nga sundon ang pagbuot sang Ginuo sangsa iya pagbuot? Ano ang ginainspirar sang eksperiyensya ni Nefi nga imo himuon?
Ang pagbinagbinag sang pulong sang Dios nagaimbitar sang rebelasyon.
Kon nakabatyag ka nga daw ginapigos, nagakabalaka, ukon ginaligban, mahimo nga may matun-an ka nga importante nga leksyon sa ehemplo ni Nefi sa Helaman 10:2–4. Ano ang iya ginhimo sang sia “nagakasubo”? (bersikulo 3).
Ginpaathag ni Pangulong Henry B. Eyring, “Kon nagabinagbinag kita, ginaagda naton ang rebelasyon paagi sa Espiritu” (“Mag-alagad upod ang Espiritu,” Liahona, Nob. 2010, 60). Paano mo himuon nga pangginawi ang pagbinagbinag?
Gusto sang Ginuo nga dumdumon ko Sia.
Paano mo ginatandaan ang importante nga impormasyon—pareho sang kaadlawan sang isa ka miyembro sang pamilya ukon impormasyon para sa isa ka test? Sa ano ini nangin pareho sa pagtinguha nga kinahanglanon sa “pagdumdom sang Ginuo”? (Helaman 12:5). Paano ini nangin lain?
Ang Helaman 12 nagalaragway sang pila ka butang nga nangin rason nga nagakalipat ang mga tawo sa Ginuo. Basi pwede mo ini ilista kag binagbinagon kon bala ginapalayo sini ang imo atensyon sa Iya. Ano ang nagabulig sa imo nga madumduman si Jesucristo? Ano ang ginainspirar sa imo nga imo himuon base sa imo natun-an?
Tan-awa man sa Doktrina kag mga Kasugtanan 20:77-79.
Maggamit sang mga leksyon gamit ang isa ka bagay. Ang Manluluwas masami nagaangot sang mga prinsipyo sang ebanghelyo sa adlaw-adlaw nga mga butang nga pamilyar sa mga tawo. Kon magtuon ukon magtudlo parte sa Helaman 12:1–6, pwede mo ikumparar ang “pagkamabaylo-bayluhon … sang tawo” sa mabatyagan naton kon nagatinguha kita nga mag-balanse sa isa lang ka tiil. Paano kita magpabilin nga mapag-on sa espirituhanon?
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Mga Ideya para sa Pagtudlo sang mga Kabataan
Gusto sang Ginuo nga dumdumon ko Sia.
-
Para magsugod sang diskusyon parte sa pagdumdom sa Ginuo, pwede mo sugiran ang imo kabataan parte sa tion nga may nalimtan ka. Tugoti sila nga mag-istorya man sang pareho nila nga eksperiyensya. Dayon pwede ninyo basahon ang Helaman 7:20–21 sing ululupod kag pamangkuton ang imo kabataan kon ano sa banta nila ang buot silingon sang kalimtan ang Dios. Basi pwede nga magdrowing ang imo kabataan sang litrato sang mga butang nga nagapalipat sa aton sa Ginuo kag gamiton ining mga drowing para tabunan ang litrato ni Jesus. Dayon pwede sila magpanumdom sang mga butang nga pwede nila himuon para dumdumon Sia. Samtang ginahambal nila ang ila mga panghunahuna, pwede nila kakason tag-isaisa ang mga drowing hasta nga kitaon na ang litrato sang Manluluiwas.
Ang mga propeta nagapamatuod parte kay Jesucristo.
-
Buligi ang imo kabataan nga pangitaon sa Helaman 8:13–23 ang mga ngalan sang mga propeta nga nagtudlo parte kay Jesucristo. Basi pwede nila ipasa-pasa ang litrato ni Jesus tagsa nga may makita sila. Ano ang gintudlo sang aton buhi nga propeta parte sa Manluluwas?
-
Paano kita ginagiyahan sang pagsunod sa propeta padulong kay Jesucristo?
Ang pagbinagbinag sang mga pulong sang Dios nagaimbitar sang rebelasyon.
-
Ano ang iban nga mga tinaga nga pareho sa pagbinagbinag? Basi pwede ninyo basahon ang Helaman 10:1–3 sing ululupod kag islan ang tinaga nga pagbinagbinag sinang iban pa nga mga tinaga. Hambali upod sang imo kabataan ang mga paagi para himuon ang pagbinagbinag nga bahin sang ila pagtuon sang balaan nga mga kasulatan.
Tumanon ko ang Amay nga Langitnon.
-
Gintuman ni Nefi ang Amay nga Langitnon bisan pa nga nagakahulugan ini sang paghimo sang butang nga mabudlay. Para sa mga halimbawa sini, pwede ninyo basahon sang imo kabataan ang Helaman 10:2, 11–12. Basi pwede nga drama-dramahon sang imo kabataan ang ginhimo ni Nefi—maglakat pakadto sa isa ka kilid sang kuwarto (nga daw nagapauli sila), magpundo, magliso, kag maglakat sa pihak nga bahin sang kuwarto (nga daw nagabalik sila para tudloan ang mga tawo). Ano ang pila ka mga butang nga gusto sang Amay nga Langitnon nga himuon naton?
Para sa dugang nga mga ideya, tan-awa sa isyu sang Abyan nga magasin sini nga bulan.
Paagi sa dulot sang propesiya, nasolbar ni Nefi ang pagpatay sang punong hukom.
© The Book of Mormon for Young Readers, Seantum—The Murderer Is Discovered [Si Seantum—Ang Manugpatay-tawo Nadiskubrehan, ni Briana Shawcroft; indi pwede kopyahon