Samuel the Lamanite on the Wall [Si Samuel nga Lamanhon sa Pader], ni Arnold Friberg

Septyembre 9–15: “Malipayon nga Balita sang Dako nga Kalipay”

Helaman 13–16

Sang una nga bes nga gintinguhaan ni Samuel nga Lamanhon nga ipaambit ang “malipayon nga balita” sa Zarahemla (Helaman 13:7), ginsikway sia kag gintabog sang matig-a sing tagipusuon nga mga Nefinhon. Masiling mo nga daw nagpatindog sila sang pader nga indi gid malutsan sa palibot sang ila mga tagipusuon nga nagpugong sa ila sa pagbaton sang mensahe ni Samuel. Naintiendihan ni Samuel ang importansya sang mensahe nga iya ginapaambit kag ginpakita ang pagtuo paagi sa pagsunod sang kasuguan sang Dios nga “dapat sia magbalik liwat, kag magpanagna” (Helaman 13:3). Pareho kay Samuel, tanan kita makasugata sang mga pader samtang aton “ginahanda ang dalanon sang Ginuo” (Helaman 14:9) kag ginatinguhaan nga sundon ang Iya mga propeta. Kag pareho kay Samuel, kita man nagasaksi parte kay Jesucristo, “nga pat-od gid nga magakari sa kalibutan,” kag imbitahon ang tanan nga “magpati sa iya ngalan” (Helaman 13:6; 14:13). Indi tanan magapamati, kag ang iban mahimo nga aktibo nga magkontra sa aton. Pero ang mga nagapati sa sini nga mensahe nga may pagtuo kay Cristo makakita nga matuod gid ini nga mensahe sang “malipayon nga balita sang dako nga kalipay” (Helaman 16:14).

Mga Ideya sa Pagtuon sa Puluy-an kag sa Simbahan

Helaman 13

Ang Ginuo nagapaandam paagi sa Iya mga propeta.

Sa balaan nga mga kasulatan, ang mga propeta kon kaisa ginakumparar sa mga manugbantay sa ibabaw sang pader ukon tore nga nagapaandam sa mga katalagman (tan-awa sa Isaias 62:6; Ezequiel 33:1–7). Samtang ginatun-an mo ang mga pulong ni Samuel sa Helaman 13, pamensara kon paano sia nangin pareho sang manugbantay para sa imo. Ano ang iya ginhambal nga daw magamit sa aton nga panahon? (tan-awa ilabi na gid sa mga bersikulo 8, 21–22, 26–29, 31, kag 38). Halimbawa, ano ang gintudlo ni Samuel parte sa paghinulsol? parte sa pagpaubos kag manggad? parte sa paghangad sang kalipayan “sa paghimo sang kalautan”?

Pwede ka man magpangita sa nagligad lang nga mga mensahe sa pangkabilogan nga komperensya sang pareho nga mga paandam nga ginhatag sang Ginuo paagi sa moderno nga mga propeta. Ano ang ginapabatyag sa imo nga imo himuon parte sa sining mga paandam?

Magpangita sang mga sulundan. Ang sulundan isa ka plano ukon modelo nga pwede gamiton nga giya sa pagtapos sang isa ka buluhaton. Sa balaan nga mga kasulatan, makakita kita sang mga sulundan nga nagapakita kon paano ang Ginuo nagatapos sang Iya buluhaton, pareho sang pagpadala sang Iya mga alagad sa pagpaandam sa katawhan.

Kon nagapamati kita sa mga propeta, itudlo nila kita padulong kay Jesucristo.

Helaman 13–15

Ginaagda ako sang Dios nga maghinulsol.

Ang mga paandam ni Samuel parte sa mga paghukom sang Dios may dala gid pirme nga maluluy-on nga imbitasyon nga maghinulsol. Pangitaa ining mga imbitasyon sa bilog nga Helaman 13–15 (tan-awa ilabi na gid sa Helaman 13:6–11; 14:15–19; 15:7–8). Ano ang imo matun-an sa sining mga bersikulo parte sa paghinulsol? Ang iban nga tawo ginakabig ang paghinulsol nga mapintas nga silot—butang nga dapat likawan. Sa imo opinyon, paano gusto ni Samuel nga kabigon sang mga Nefinhon ang paghinulsol?

Para pasangkaron ang imo pagtuon, pwede mo basahon ang mensahe ni Pangulong Russell M. Nelson nga “Sarang Kita Maghimo sing Mas Maayo kag Mangin Mas Maayo” (Liahona, Mayo 2019, 67). Paano niya ginpaathag ang paghinulsol? Ano nga mga bugay sang sinsero nga paghinulsol ang imo makita sa iya mensahe? Pwede ka man magpangita sang partikular nga mga butang nga gin-agda sang propeta nga aton bag-uhon. Ano ang ginasiling sang Balaan nga Espiritu sa imo nga kinahanglan mo bag-uhon? Pamensara ang pagsulat sang personal nga rebelasyon nga imo mabaton.

Ano ang kinalain sang paghinulsol sa pagliwat lamang sang imo batasan? Ngaa importante nga batunon ang imbitasyon sang Dios nga maghinulsol?  

Tan-awa man sa “Buligan Ka ni Jesucristo,” Para sa Kusog sang mga Lamharon: Giya sa Paghimo sang mga Pagpili, 6–9.

Helaman 14; 16:13–23

Nagapadala ang Dios sang mga senyales kag mga katingalahan sa pagpamatuod sa pagkabun-ag kag kamatayon sang Manluluwas.

Sa Helaman 14, ginpaathag ni Samuel nga ang Ginuo nagahatag sang mga senyales sang pagkabun-ag kag kamatayon sang Manluluwas para ang mga tawo “[makahibalo] sang … iya pagkari” kag “magpati kamo sa iya ngalan” (Helaman 14:12). Sa imo pagtuon sang Helaman 14, tandai ang mga senyales sang pagkabun-ag sang Manluluwas sa mga bersikulo 1–8 kag ang mga senyales sang Iya kamatayon sa mga bersikulo 20–28. Ngaa sa banta mo nga ining mga senyales epektibo nga mga tanda sang pagkabun-ag kag kamatayon ni Jesucristo?

Ang iban nga mas personal kag indi gawa talalupangdon nga mga senyales makabulig sa imo nga “magpati sa ngalan sang [Manluluwas].” Ano ang Iya ginhimo para pabakuron ang imo pagtuo sa Iya?

Ano nga paandam ang ginhatag parte sa mga senyales sa Helaman 16:13–23? Paano mo malikawan ang pamatasan sang mga tawo nga ginlaragway sa sining mga bersikulo?

Tan-awa man sa Alma 30:43–52.

Helaman 15:3

Ang silot halin sa Ginuo isa ka tanda sang Iya pagpalangga.

Ang mga pulong ni Samuel nagaunod sang madamo nga istrikto nga mga pagsaway, pero ang Helaman 15:3 nagahatag sa aton sang perspektibo parte sa pagsilot halin sa Ginuo. Paano ang silot halin sa Ginuo isa ka tanda sang Iya pagpalangga? Ano ang nakita mo nga ebidensya sang pagpalangga kag kaluoy sang Ginuo sa mga propesiya kag paandam ni Samuel?

  San-o mo nakita ang Dios nga nagahikot sa sini nga mga paagi sa imo kabuhi?

Helaman 16

Ang propeta nagatudlo sa akon kay Jesucristo.

Sa Helaman 16, ano ang imo matun-an sa mga nagbaton sang mga pinanudlo ni Samuel? Ano ang imo matun-an sa mga nagsikway sa iya? Hunahunaa kon paano ka ginbuligan sang pagsunod sa buhi nga mga propeta nga mas mangin malapit kay Jesucristo.

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Helaman 13:2–5

Ang Dios mahimo nga maghambal sa akon tagipusuon.

• Paano mo tudloan ang imo kabataan nga ang Dios pwede maghambal sa aton tagipusuon, pareho sang Iya ginhimo para kay Samuel? Basi pwede mo sila pangabayon nga ipakita sa imo ang lainlain nga mga pamaagi sa pagpakighambal nga wala nagagamit sang mga tinaga (pareho sang kompas sang kamot ukon ekspresyon sang guya). Pwede ini magresulta sa paghambalanay parte sa lainlain nga paagi nga nagapakighambal sa aton ang Amay nga Langitnon. Bilang parte sining diskusyon, pwede kamo nga magtan-aw sang imo kabataan sa litrato ni Samuel nga Lamanhon (may duha sa sining outline) kag basahon ang Helaman 13:2–5 samtang ginapamatian sang imo kabataan kon paano ginhambal sang Dios kay Samuel ang dapat ihambal.

• Madamo sa aton—labi na gid ang kabataan—nagakinahanglan sang bulig nga magtuon sa pagkilala kon paano kag san-o nagahambal sa aton ang Dios. Pwede mo sugiran ang imo kabataan parte sa tion nga ginbuligan ka sang Balaan nga Espiritu nga mahibal-an sa imo tagipusuon kon ano ang gusto sang Dios nga imo himuon ukon ihambal. Ipaathag kon paano mo nahibal-an nga nagapakighambal ang Dios sa imo. Basi pwede man ang imo kabataan nga mag-istorya sang pareho nila nga mga eksperiyensya.

Helaman 14:2–7, 20–25

Ang mga propeta nagatudlo parte kay Jesucristo.

•     Ano ang gintudlo ni Samuel parte sa Manluluwas? Basi pwede mo man iistorya kon ano ang ginatudlo sang moderno nga mga propeta parte sa Iya. Paano ginapatubo sang ila mga pulong ang aton pagtuo sa Iya?

Helaman 16:1–6

Ginabugayan ako kon magsunod ako sa propeta.

• Pwede mo pabakuron ang pagsalig sang imo kabataan sa propeta paagi sa pagpakita sa ila sang mga halimbawa sang mga tawo nga nangin tampad. Ang iban sini sa ila makita sa Helaman 16:1, 5. Samtang nagabasa ka, pwede magtindog ang imo kabataan tagsa nga makabati sila sang ginhimo sang mga tawo sang nagpati sila sa mga pulong ni Samuel. Dayon, samtang ginabasa mo ang mga bersikulo 2 kag 6, pwede magpungko ang imo kabataan kon mabatian nila ang ginhimo sang mga tawo sang wala sila nagapati. Paano naton ipakita nga nagapati kita sa mga pulong sang buhi nga propeta? Sugiri ang imo kabataan kon paano ka ginabugayan kon ginasunod mo ang laygay sang Dios paagi sa Iya mga propeta.

Para sa dugang nga mga ideya, tan-awa sa isyu sang Abyan nga magasin sini nga bulan.

Samuel the Lamanite [Si Samuel nga Lamanhon], ni Lester Yocum