Agosto 26–Septyembre 1: “Ang Bato sang Aton Manunubos”

Helaman 1–6

Ang libro ni Helaman nagarekord sang mga kadalag-an kag mga trahedya sa tunga sang mga Nefinhon kag mga Lamanhon. Nagasugod ini nga may “grabe nga kabudlayan sa tunga sang katawhan sang mga Nefinhon” (Helaman 1:1), kag nagasige abot ang mga kabudlayan sa bilog nga kasaysayan. Mabasahan naton diri ang parte sa intriga sa politika, mga grupo sang mga kawatan, pagsikway sa mga propeta, kag bugal kag kawala sing pagtuo sa bilog nga kadutaan. Pero makita man naton ang mga ehemplo pareho kay Nefi kag Lehi kag ang “mas mapainubuson nga bahin sang katawhan,” nga wala lang naglampuwas kundi nag-uswag sa espirituhanon (Helaman 3:34). Paano nila nahimo ini? Paano sila nagpabilin nga mabakod samtang ang ila sibilisasyon nagsugod sa pag-usmod kag pagkawasak? Sa pareho man nga paagi nga ang bisan sin-o sa aton nagapabilin nga mabakod sa “mabaskog nga dalimuos” nga ginapadala sang yawa sa “pagtupa sa [aton]”—paagi sa pagtukod sang aton mga kabuhi “sa bato sang aton Manunubos, nga amo si Cristo, ang Anak sang Dios, … isa ka [pundasyon] nga kon diin ang mga tawo magapasad indi sila [matumba]” (Helaman 5:12).

Mga Ideya sa Pagtuon sa Puluy-an kag sa Simbahan

Helaman 1–6

Ang bugal nagaseparar sa akon sa Espiritu kag kusog sang Dios.

Samtang imo ginabasa ang Alma 1–6, mahimo mga makatalupangod ka sang siklo sa pamatasan sang mga Nefinhon. Kon matarong sila, ginabugayan sila sang Dios, kag nagaasenso sila. Pagligad sang tiyempo, nagabugalon kag nagalain sila, nga nagahimo sang mga pagpili nga nagapadulong sa pagkaguba kag pag-antos. Tapos nagapaubos sila kag nagakainspirar nga maghinulsol, kag bugayan naman sila liwat sang Dios. Ining siklo nagasulit-sulit pirme nga ang pila ka mga tawo nagatawag sini nga “pagtiyog sang bugal.”

Ang “pagtiyog sang bugal”

Pangitaa ang mga halimbawa sining pagtiyog samtang ginabasa mo ang Helaman 1–6. Ari ang pila sa mga pamangkot para buligan ka nga maintiendihan ini nga siklo.

• Ano nga ebidensya sang bugal ang imo nakita sa mga Nefinhon? (tan-awa halimbawa, sa Helaman 3:33–34; 4:11–13). Makita mo bala ang pareho nga ebidensya sang bugal sa imo kaugalingon?

• Ano ang mga konsikwensya sang bugal kag kalautan? (tan-awa sa Helaman 4:23–26). Ano ang mga konsikwensya sang pagpaubos kag paghinulsol? (tan-awa sa Helaman 3:27–30, 35; 4:14–16).

• Ano ang gusto ni Helaman nga tandaan sang iya mga anak? (tan-awa sa Helaman 5:4–12). Sa ano nga mga paagi nga ang pagdumdom sining mga kamatuoran makabulig sa imo nga makalikaw nga mangin bugalon?

Helaman 3:24–35

Ang pagtuo kay Cristo nagapuno sang akon kalag sang kalipay.

Sa Helaman 3, ginlaragway ni Mormon ang tion sang pagkasadya sang ang Simbahan ginbugayan sing dako nga bisan ang mga lider nakibot. Base sa imo nabasahan sa mga bersikulo 24–32, ano sa banta mo ang ginhalinan sinang malipayon nga kahimtangan? Ugaling indi tanan nga mga miyembro nagpadayon sa kalipay. Tandai ang mga kinalain sa mga tawo nga ginlaragway sa mga bersikulo 33–35. Ano ang imo matun-an sa ila mga halimbawa?

Pangitaa kon paano mo ini magamit sa personal nga pangabuhi. Gingamit sang propeta nga si Mormon ang dinalan nga “mahimo naton nga makita” para ipatalupangod ang importante nga mga kamatuoran samtang ginapalip-ot niya ang Libro ni Mormon. Halimbawa, ano ang gusto niya nga makita naton sa Helaman 3:27–30? Samtang imo ginatun-an ang balaan nga mga kasulatan, pwede ka magpundo kadali para kumpletuhon ang dinalan nga “kag mahimo naton nga makita” parte sa imo ginabasa.

Helaman 5:6–7

Sarang ko tahuron ang ngalan sang Manluluwas.

Ang pagbasa sang Helaman 5:6–7 mahimo nga makainspirar sa imo nga pamensaron ang mga ngalan nga ginhatag sa imo, dala na ang mga apelyido. Ano ang kahulugan sining mga ngalan sa imo? Paano mo ini tahuron? Mas importante, pamensara kon ano ang buot silingon sang dalhon ang ngalan sang Manluluwas (tan-awa sa Moroni 4:3). Paano mo tahuron ina nga sagrado nga ngalan?

Helaman 5:12–52

Kon himuon ko si Jesucristo nga akon pundasyon, indi ako matumba.

Ano ang kahulugan para sa imo sang “magpasad sang inyo sadsaran” sa “bato sang aton Manunubos”? (Helaman 5:12). Paano ka nangin hilway sa katalagman sa mga unos sang kabuhi kay Jesucristo? Samtang imo ginabasa ang Helaman 5:12–52, pangitaa kon paano ginbugayan sanday Nefi kag Lehi tungod ginpasad nila ang ila pagtuo sa bato sang ila Manunubos.

Ang iban nga tawo mas makatuon kon ginapanan-aw nila ang ila ginatun-an. Para ilarawan ang Helaman 5:12, pwede ka magpatindog sang gamay nga istraktura sa lainlain nga klase sang mga pundasyon. Pwede kamo dayon maghimo sang “mabaskog nga dalimuos” paagi sa pag-spray sang tubig kag paggamit sang electric fan para maghimo sang hangin. Ano ang mga ideya ang ginahatag sini sa imo parte sa pagpatindog sang imo pundasyon kay Jesucristo?    

Ang bersikulo 50 nagasambit sang “kadako sang mga ebidensya” nga nabaton sang mga Lamanhon. Ang pagbasa sang Helaman 5:12–52 mahimo nga makapadumdom sa imo sang mga ebidensya nga ginhatag sang Dios sa imo. Halimbawa, siguro ang “hutik” halin sa Espiritu nagpabakod sang imo pagtuo sa Manluluwas (Helaman 5:30; tan-awa man sa Doktrina kag mga Kasugtanan 88:66). Ukon basi ara ka sa kadulom kag nagpangayo ka sa Dios sang mas dako nga pagtuo (tan-awa sa Helaman 5:40–47). Ano ang iban pa nga mga eksperiyensya nga nakabulig sa imo tukod sang imo pundasyon kay Jesucristo?

Tan-awa man sa Russell M. Nelson, “Ang Templo kag ang Inyo Espiritwal nga Pundasyon,” Liahona, Nob. 2021, 93–96.

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Helaman 3:24, 33–34; 4:11–15

Gusto sang Amay nga Langitnon nga mangin mapainubuson ako.

• Pamensara nga hagaron ang imo kabataan nga idrowing ang ila bersyon sang “pagtiyog sang bugal”, base sa diagram sa ibabaw. Dayon, samtang ginabasa ninyo sing ululupod ang Helaman 3:24, 33–34 kag 4:11–15, pwede nila itudlo ang mga parte sang siklo nga ginalarawan sining mga bersikulo. Paano naton pilion nga magpaubos—kag magpabilin nga amo sina?

Helaman 5:12

Tukuron ko ang akon pundasyon kay Jesucristo.

• Pamensara nga maggamit sang litrato sang templo para umpisahan ang diskusyon kon ngaa kinahanglan sang mga bilding ang mabakod nga mga pundasyon. Ukon pwede ninyo tan-awon ang pundasyon sang inyo balay ukon bilding sang Simbahan. Para ipatalupangod ang kusog sang bato nga pundasyon, pwede nga tilawan sang imo kabataan nga huypon ang bato para mag-isdog. Samtang ginabasa ninyo sing ululupod ang Helaman 5:12, pamangkuta ang imo kabataan kon ngaa si Jesucristo amo ang “pat-od nga sadsaran” sang aton mga kabuhi. Paano naton tukuron ang aton mga kabuhi sa Iya? (tan-awa sa Helaman 3:27–29, 35 kag Mga Artikulo sang Pagtuo 1:4).

• Hagara ang imo kabataan nga magpatindog sang tore gamit ang mga bloke ukon iban pa nga materyales sa lainlain nga klase sang mga pundasyon (pareho sang algodon ukon tapan nga bato). Paano makumparar ang solido nga pundasyon kay Jesucristo? Pwede nila dugangan sang bloke ang istraktura sa tagsa ka ideya nga ila ihambal kon paano nila Sia sundon.

Helaman 5:21–52

Ang Balaan nga Espiritu nagahutik sa mahinay, diutay nga tingug.

• Ang tingug nga ginalaragway sa Helaman 5:29–30, 45–47 nagatudlo sa aton sang isa ka paagi kon paano nagahambal sa aton ang Balaan nga Espiritu.   Kon maghambal ka parte sa tingug nga nabatian sang mga tawo, maghambal sa mahinay nga tingug. Sulita ang istorya sing pila ka beses, kag hagara ang kabataan nga maghutik upod sa imo. Buligi sila sa pagpanumdom sang iban pa nga mga paagi nga nagahambal sa aton ang Balaan nga Espiritu.  

Helaman 5:20–52

Ginaislan sang paghinulsol ang espirituhanon nga kadulom sang kasanag.

• Para ipatalupangod ang ginatudlo sang Helaman 5:20–41 parte sa kadulom kag kasanag, tilawi nga basahon ukon palip-uton ining mga bersikulo sa dulom, nga nagagamit sang flashlight bilang suga. Pwede nga pamatian sang imo kabataan kon ano ang kinahanglan himuon sang mga tawo para madula ang kadulom. Dayon pasigaha ang mga suga, kag basahon ang mga bersikulo 42–48 sing ululupod. Ano ang ginatudlo sa aton sining mga bersikulo parte sa paghinulsol?

Para sa dugang nga mga ideya, tan-awa sa isyu sang Abyan nga magasin sini nga bulan.

Bisan sa prisuhan, si Nefi kag Lehi ginprotektahan paagi sa gahum sang Dios.

© The Book of Mormon for Young Readers, Nephi and Lehi Encircled by a Pillar of Fire [Si Nefi kag Lehi Ginapalibutan sang Haligi sang Kalayo], ni Briana Shawcroft; indi pwede kopyahon