Two Thousand Young Warriors [Duha ka Libo ka Lamharon nga mga Hangaway], ni Arnold Friberg

Agosto 19–25: “Gin-amligan sang Iya Makahalangyag nga Gahum”

Alma 53–63

Kon ikumparar sa Lamanhon nga mga soldado, wala sang ibato ang “diutay nga kasuldadohan” ni Helaman (Alma 56:33) nga mga pamatan-on. Magluwas nga diutay lang sila, ang mga soldado ni Helaman “tanan … tuman pa kalamharon,” kag “wala pa gid sila makapakig-away” (Alma 56:46–47). Sa pila ka aspeto, ang ila sitwasyon daw pamilyar sa pila sa aton nga kon kaisa daw mapierde sa kadamuon kag ginapangluyahan sa aton pagpakig-away kay Satanas kag sa mga pwersa sang kalainan sa kalibutan sa ulihing mga adlaw.

Pero ang mga soldado ni Helaman may pila ka bentaha sa mga Lamanhon nga wala sing koneksyon sa kadamuon ukon sa ikasarang sa pagpakig-away. Ginpili nila si Helaman, nga isa ka propeta, agud manguna sa ila (tan-awa sa Alma 53:19); “gintudloan sila sang ila mga iloy, nga kon indi sila magduhaduha, pagaluwason sila sang Dios” (Alma 56:47); kag sila may “tuman nga pagtuo sa sinang gintudlo sa ila.” Bilang resulta, gin-amligan sila paagi sa “milagroso nga gahum sang Dios” (Alma 57:26). Gani kon nagaatubang sa mga giyera sang kabuhi, sarang kita magpakaisog. Ang mga soldado ni Helaman nagatudlo sa aton nga “may isa ka matarong nga Dios, kag kon sin-o man ang wala nagaduhaduha, sila pagaamligan sang iya makahalangyag nga gahum” (Alma 57:26).

Mga Ideya sa Pagtuon sa Puluy-an kag sa Simbahan

Alma 53:10–22; 56:43–49, 55–56; 57:20–27; 58:39–40

Ang pag-angkon sang pagtuo sa Dios nagabulig sa akon nga mapakigbatuan ang kahadlok.

Kon indi tungod sa ila pagtuo, dako ang rason sang lamharon nga mga soldado ni Helaman nga mahadlok. Pero tungod sang ila pagtuo, mas may rason sila nga mangin maisog. Samtang imo ginabasa ang parte sa ila sa Alma 53–58, pangitaa ang mga butang nga nagabulig sa imo nga atubangon ang imo mga kahadlok nga may pagtuo kay Cristo. Pamensara nga magtutok sa masunod nga mga bersikulo: Alma 53:10–22; 56:43–49, 55–56; 57:20–27; kag 58:39–40. Ang ini nga tsart makabulig sa imo nga marekord ang imo makita.

Mga kinaiya sang lamharon nga mga soldado ni Helaman:
Posible nga mga rason nga ang ila pagtuo kay Cristo tama gid kabakod:
Ano ang ila ginhimo para ipakita ang pagtuo kay Cristo:
Paano sila ginbugayan sang Dios:

Para magdaog sa aton espirituhanon nga mga giyera, kinahanglan man naton ang gahum ni Jesucristo. Paano mo malab-ot ang Iya gahum? Magpangita sang mga sabat sa mensahe ni Pangulong Russell M. Nelson “Ang Pagkuha sang Gahum ni Jesucristo Pasulod sa Aton Mga Kabuhi” (Liahona, Mayo 2017, 39–42). Pwede mo man ikumparar ang iya laygay sa mga butang nga ginhimo sang mga soldado ni Helaman.

Pagkatapos nga tun-an ining mga butang, hunahunaa ang imo kaugalingon nga espirituhanon nga mga giyera. Isulat ang nabatyagan mo nga imo himuon para ipakita ang imo pagtuo kay Jesucristo.

They Did Not Doubt [Wala Gid Sila Nagduda], ni Joseph Brickey

Alma 58:1–12, 31–37; 61

Ang mga sumulunod ni Jesucristo indi madali masaklaw.

Si Helaman kag Pahoran pareho nga may mga rason para masaklaw. Wala si Helaman nakabaton sang suporta para sa iya mga soldado, kag si Pahoran gin-akusar ni Moroni nga nagdinalok sinang suporta (tan-awa sa Alma 58:4–9, 31–32; 60). Ano ang nanamian mo sa ila mga reaksyon sa Alma 58:1–12, 31–37 kag Alma 61? Ngaa sa banta mo amo sadto ang ila mga reaksyon?

Gintumod ni Elder David A. Bednar si Pahoran bilang halimbawa sang pagpailob kag nagtudlo nga “ang pinakahalangdon kag makahulugan nga ehemplo sang pagpailob ara sa kabuhi Mismo sang Manluluwas” (“Meek and Lowly of Heart,” Liahona, Mayo 2018, 32). Binagbinaga kon paano ginpakita sang Manluluwas ang pagpailob. Tan-awa halimbawa, sa Mateo 27:11–26; Lucas 22:41–42; Juan 13:4–17. Paano mo sundon ang Iya ehemplo?

Alma 60:7–14

May responsibilidad ako nga paisugon ang mga tawo sa akon palibot.

Ginsulat ni Moroni nga pasabton sang Dios si Pahoran kon hungod niya nga ginapatumbayaan ang mga panginahanglan sang kasoldadohan nga Nefinhon. Ano ang imo matun-an sa Alma 60:7–14 parte sa pag-atipan sang mga tawo nga nagakinahanglan? Ano ang pwede mo himuon para mangin mas nakahibalo kag mas makasabat sa mga panginahanglan sang iban?

Alma 62:39–51

Kon mapainubuson ako, ang mga hangkat sang kabuhi magaliso sang akon tagipusuon sa Ginuo.

Magbutang sang hilaw nga itlog kag patatas sa nagabukal nga tubig para buligan ka sa pagpanumdom nga pwede ka magpili nga “maghumok” ukon “magtig-a” tungod sang imo mga pagtilaw. Samtang ginapabukalan ang itlog kag patatas, tun-i ang Alma 62:39–51, kag tandai kon ano ang reaksyon sang mga tawo sa pag-alagad ni Helaman pagkatapos sang malawig nila nga giyera sa mga Lamanhon. Dayon pwede mo ini ikumparar sa ila reaksyon sa iya pagpanudlo 13 katuig antes (tan-awa sa Alma 45:20–24). Ano ang kinalain sang epekto sa mga Nefinhon sang pareho nga mga pag-antos? Kon luto na ang itlog kag patatas, buk-a ang itlog kag hiwaa ang patatas. Ano ang kinalain sang epekto sang nagabukal nga tubig sa ila? Ano ang imo matun-an parte sa kon paano naton pilion ang aton reaksyon sa pag-antos? Paano ka magliso sa Dios sa oras sang imo mga pag-antos?

Hunahunaa ang mga eksperiyensya sa balay. Kon nagatudlo ka sang klase sa Simbahan, pangabaya ang mga miyembro sang klase sa pag-istorya sang ila natun-an sa balay. Halimbawa, hibaloa kon ano ang ila natun-an parte sa mga pag-antos kag pagpaubos halin sa paglaga sang itlog kag patatas.

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Alma 53:20–21; 56:47–48

Sarang ko mangin tampad sa Dios pareho sang lamharon nga mga soldado ni Helaman.

•   Ang pahina para sa kahiwatan sini nga semana makabulig sa imo kabataan nga magpanumdom sang mga paagi nga mangin pareho sila sa mga soldado ni Helaman. Pamensara ang pagpaambit sang pila ka mga kalidad sang lamharon nga mga soldado sa Alma 53:20–21 para buligan sila nga magsugod.  

Alma 56:45–48; 57:21

Sarang ko mangin tampad sa mga ginatudlo sang akon mga ginikanan sa pagkamatarong.

• Nangin inspirasyon sang lamharon nga mga soldado ni Helaman ang pagtuo sang ila mga nanay sang nagpangatubang sila sang dako nga hangkat. Basi pwede ninyo basahon ang Alma 56:46–48 upod sa imo kabataan kag hagara sila nga pamatian kon ano ang gintudlo sang mga nanay sining mga lamharon sa ila parte sa pagtuo. Pwede mo man sila pamangkuton kon ano ang ila natun-an sa ila mga ginikanan—ukon sa iban nga matinuohon nga mga hamtong—parte sa Manluluwas. Ngaa importante nga magtuman nga “may pagkasibo” (with exactness)? (Alma 57:21).

• Paano mo siguruhon—pareho sang mga nanay sang lamharon nga mga soldado—nga ang imo kabataan nakahibalo sang imo pagtuo sa Dios? Isa ka paagi amo nga ipakita kon ano ang epekto sang imo pagtuo sa imo kabuhi. Halimbawa, paano ka Niya “ginaluwas” kon “wala [ka] nagaduhaduha”?

Seed of Faith [Binhi sang Pagtuo], ni Jay Ward

Alma 53:10–18

Sarang ko tumanon ang akon mga kasugtanan sa Amay nga Langitnon.

• Basi makaistorya man ang imo kabataan sang tion sang may naghimo kag nagtuman sang isa ka promisa sa ila. Ano ang ila nabatyagan sang gintuman ang ini nga promisa? Pwede mo basahon ang Alma 53:10–18 kag hagaron ang imo kabataan nga pangitaon kon paano si Helaman, ang katawhan ni Amon, kag ang mga anak sang katawhan ni Amon naghimo kag nagtuman sang ila mga promisa, ukon mga kasugtanan. Pwede mo iistorya kon paano ka ginabugayan sang Amay nga Langitnon kon ginatuman mo ang imo mga kasugtanan.

Alma 61:3–14

Pwede ko pilion nga indi magpangakig.

Pamensara nga hagaron ang imo kabataan sa pagpanumdom sang tion sang ginpasibangdan sila nga naghimo sang butang nga wala nila ginhimo. Iistorya sa ila kon paano ini natabo kay Pahoran, (tan-awa sa Alma 60–61). Para tun-an kon ano ang reaksyon ni Pahoran, magbulos-bulos sa pagbasa sang mga bersikulo sa Alma 61:3–14. Ano ang ginhimo ni Pahoran sang ginpasibangdan sia ni Moroni? (tan-awa sa Alma 61:2–3, 8–9). Ano ang aton matun-an parte sa pagpatawad sa ehemplo sang Manluluwas? (tan-awa sa Lucas 23:34).

Para sa dugang nga mga ideya, tan-awa sa isyu sang Abyan nga magasin sini nga bulan.

It’s True, Sir, All Present and Accounted For [Matuod Ina, Sir, Ara ang Tanan kag Naisip Na], ni Clark Kelley Price.