“Agosto 12–18: ‘Magtindog sing Malig-on sa Pagtuo kay Cristo.’ Alma 43–52,” Dali, Magsunod sa Akon—Para sa Puluy-an kag Simbahan: Libro ni Mormon 2024 (2023)
“Agosto 12–18. Alma 43–52,” Dali, Magsunod sa Akon—Para sa Puluy-an kag Simbahan: 2024 (2023)
For the Blessings of Liberty [Para sa mga Bugay sang Kahilwayan], ni Scott M. Snow
Agosto 12–18: “Magtindog sing Malig-on sa Pagtuo kay Cristo”
Alma 43–52
Kon basahon naton ining mga pulong sa puno sang Alma kapitulo 43—“Kag karon magabalik ako sa isa ka kasaysayan sang mga inaway sa tunga sang mga Nefinhon kag mga Lamanhon”—natural lang nga matingala ka kon ngaa gindala pa ni Mormon ining mga istorya sang giyera nga limitado ang iya espasyo sa mga lamina (tan-awa sa Mga Pulong ni Mormon 1:5). Matuod nga may ara man kita sang mga inaway sa ulihing mga adlaw, pero may balor sa iya mga tinaga nga masobra pa sangsa mga paglaragway sang stratehiya kag trahedya sang giyera. Ginahanda man kita sang iya mga tinaga para sa giyera nga sa diin kita tanan dapat makigbahin, ang giyera nga aton ginaaway kada adlaw batok sa pwersa sang kalainan. Matuod kaayo ining giyera, kag ang resulta nagaapekto sa aton mga kabuhi sa wala katapusan. Pareho sang mga Nefinhon, inspirado kita tungod sa balaan nga kawsa—“sang aton Dios, sang aton relihiyon, kag kahilwayan, kag sang aton paghidaet, sang aton mga asawa, kag sang aton mga anak”—nga gintawag ni Moroni nga “ang kawsa sang mga Cristohanon” (Alma 46:12, 16).
Mga Ideya sa Pagtuon sa Puluy-an kag sa Simbahan
Mabuligan ako ni Jesucristo sa akon espirituhanon nga pagpakig-away.
Sa imo pagbasa sang Alma 43–52, tandai kon ano ang ginhimo sang mga Nefinhon nga nagmadinalag-on sila (ukon napiyerdi). Dayon pamensara kon paano mo magamit ang imo matun-an para mabuligan ka nga magdaog sa imo espirituhanon nga mga giyera. Irekord ang imo mga panghunahuna sa idalom:
-
Alma 43:19: Ang mga Nefinhon naghanda nga may panaming. (Pwede ko ihanda ang akon kaugalingon nga may espirituhanon nga panaming.)
-
Alma 43:23–24; Ginpangayo nila ang giya sang propeta.
Tan-awa man kon ano ang imo matun-an sa mga pagpaninguha sang mga kaaway sang mga Nefinhon. Binagbinaga kon paano ka atakehon ni Satanas sa pareho nga pamaagi.
-
Alma 43:8; Gintinguhaan ni Zerahemna nga paakigon ang iya katawhan para mapaidalom sila sa iya gahum. (Mahimo nga tentaron ako ni Satanas nga maggiho sa kaakig.)
Minerva Teichert (1888–1976), Defense of a Nephite City [Depensa sang Nefinhon nga Siyudad]1935, oil sa masonite, 36 x 48 pulgada. Brigham Young University Museum of Art, 1969.
“Magtindog sing malig-on sa pagtuo kay Cristo.”
Gusto mo bala nga mabuhinan ang gahum sang kaaway sa imo kabuhi? Isa ka paagi amo ang pagsunod sa laygay sa Alma 48:17 nga mangin “amo kay Moroni.” Pamensara nga ilista ang mga tinaga nga nagalaragway kay Moroni samtang imo ginabasa ang Alma 46:11–28; 48:7–17. Ano ang imo matun-an kay Moroni parte sa “[pag]tindog sing malig-on sa pagtuo kay Cristo”? Alma 46:27
Pwede mo man tun-an kon paano ginpapagsik ni Moroni ang iban sa “kawsa sang mga Cristohanon” (tan-awa sa Alma 46:11–22). Paano mo ilaragway ina nga kawsa? Ano ang pwede mo himuon para magpartisipar man diri? Paano mo papagsikon ang iban nga magpartisipar man?
Isa sa ginhimo ni Moroni para papagsikon ang iban amo ang paghimo sang bandera sang kahilwayan, nga nagapatalupangod sang mga prinsipyo para mainspirar ang mga Nefinhon (tan-awa sa bersikulo 12). Ano nga mga prinsipyo ang ginapatalupangod sang aton mga lider sa Simbahan sa karon nga panahon? Pwede mo ini pangitaon sa Para sa Kusog sang mga Lamharon: Giya sa Paghimo sang mga Pagpili (booklet, 2022), “Ang Panimalay: Isa ka Proklamasyon sa Kalibutan,” mga tema sang Young Women kag Aaronic Priesthood Quorum, ukon sa mga mensahe sang bag-o lang nga pangkabilogan nga komperensya. Pwede mo isulat sa malip-ot kon ano ang ginatudlo sang mga ini sa simple lang nga mga pahayag para maghimo sang imo kaugalingon nga bandera sang kahilwayan—butang nga magapadumdom sa imo nga mangin tampad sa Manluluwas kag sa Iya ebanghelyo.
Si Satanas nagatentar kag nagapanginto sing amat-amat.
Nakahibalo si Satanas nga laban-laban indi ka gusto maghimo sang dalagko nga mga sala ukon magpati sa maathag nga kabutigan. Gani, nagagamit sia sang indi hilmunon nga mga kabutigan kag ginagmay nga tentasyon—kutob sa pamatyag niya batunon mo—para ipalayo ka sa kasigurohan sang matarong nga pagpangabuhi.
Pangitaa ini nga pamaagi sa Alma 47, kag binagbinagan kon paano ka ayhan ginatinguhaan ni Satanas nga intuon. Pamensara ining mga punto ni Elder Robert D. Hales:
“Ang traydor nga Amalikia nagpangabay kay Lehonti nga ‘magdulhog’ kag tabuon sia sa kunsaran sang bukid. Pero sang nagpanaog si Lehonti, ginhiloan sia ‘sing amat-amat’ hasta nga mapatay sia, kag ang iya mga soldado nahulog sa mga kamot ni Amalikia (tan-awa sa Alma 47). Paagi sa pagbinaisay kag pag-akusaray, ginapaonan kita sang pila ka mga tawo nga magpanaog halin sa mataas nga lugar. Ang mataas nga lugar amo ang kon diin ang kasanag. … Amo ini ang hilway nga lugar” (“Christian Courage: The Price of Discipleship,” Liahona, Nob. 2008, 74).
Tan-awa man sa Nehemias 6:3; 2 Nefi 26:22; 28:21–22.
Ang paghiliusa nagadala sang kahilwayan sa katalagman.
Wala sapayan sang mga panaming kag pagpamakod sang mga Nefinhon, wala madugayi nasakop sang mga Lamanhon ang madamo sa ila mga siyudad (tan-awa sa Alma 51:26–27). Paano ina natabo? Magpangita sang mga sabat samtang imo ginabasa ining mga kapitulo (tan-awa labi na sa Alma 51:1–12). Pamensara kon ano nga mga paandam ang ari sa sining kasaysayan para sa imo kag sa imo pamilya.
Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.
Mga Ideya para sa Pagtudlo sang mga Kabataan
Alma 43:17–21; 48:7–8; 49:1–5; 50:1–6
Makakita ako sang espirituhanon nga proteksyon sa ebanghelyo ni Jesucristo.
-
Samtang imo ginabasa ang parte sa panaming sang mga Nefinhon sa Alma 43:19, pwede mo ikumparar ang mga panaming nga nagaprotekta sa aton mga lawas sa mga butang nga ginhatag sa aton sang Dios para protektahan ang aton mga espiritu. Basi pwede kamo magdrowing sang imo kabataan sang litrato sang bata kag dugangan sang isa ka bahin sang panaming ang litrato sa tagsa nga malawag sang imo kabataan ang mga nagaprotekta sa aton sa espirituhanon.
-
Ini nga mga bersikulo nagalaragway sang mga pamakod nga ginpatindog sang mga Nefinhon: Alma 48:7–9; 49:1–9; 50:1–6. Pagkatapos nga basahon ining mga bersikulo sing ululupod, basi masadyahan ang imo kabataan sa pagpatindog sang mga pamakod halin sa mga gamit pareho sang bangko kag mga habol.
Alma 46:11–16; 48:11–13, 16–17
Sarang ko nga mangin “malig-on sa pagtuo kay Cristo” pareho kay Kapitan Moroni.
-
Pwede nga tan-awon sang imo mga kabataan ang mga litrato sa sining outline para isugid ang istorya sang bandera sang kahilwayan (tan-awa sa Alma 46:11–16. Ano ang gusto ni Moroni nga dumdumon sang mga tawo (tan-awa sa bersikulo 12)? Ano ang gusto sang Amay nga Langitnon nga dumdumon naton? Basi pwede nga magdisenyo ang imo kabataan sang ila kaugalingon nga “mga bandera sang kahilwayan” nga may mga dinalan ukon litrato nga magabulig sa ila nga madumduman ining mga butang.
-
Para tudloan ang imo kabataan nga mangin “malig-on sa pagtuo kay Cristo” pareho kay Moroni (tan-awa sa Alma 48:13), pwede mo sila buligan nga magpangita kag maghikap sang butang nga malig-on. Ano ang kinahanglanon para ang pagtuo mangin “malig-on”? Basaha sing ululupod ang Alma 48:11–12 para hibaluon kon ano ang nagpalig-on sang pagtuo ni Moroni kay Cristo. Ano ang pwede naton himuon para mangin “malig-on sa pagtuo kay Cristo”?
Si Satanas nagatentar kag nagapanginto sa aton sing amat-amat.
Basaha sing ululupod ang pinili nga mga bersikulo sa Alma 47:4–19. Ano ayhan ang natabo kon ginhambalan ni Amalikia si Lehonti kon ano ang ginaplano niya nga himuon sa sugod pa lang? Ano ang ginatudlo sining mga bersikulo sa aton kon paano kita ginatinguhaan ni Satanas nga intuon?
Buligi ang imo kabataan nga magpatubo sang kumpiyansa. Basi pamatyag sang iban nga kabataan nga indi nila masarangan nga magtuon sang ebanghelyo nga sila lang. Isa ka paagi para patubuon ang ila kumpiyansa amo nga dayawon sila kon magpartisipar sila sa pagtuon. Diin mo pwede gamiton ini nga panugyan sa mga aktibidades sa sining outline?
Para sa dugang nga mga ideya, tan-awa sa isyu sang Abyan nga magasin sini nga bulan.
Title of Liberty [Bandera sang Kahilwayan], ni Larry Conrad Winborg.
© 2018 kay Larry Conrad Winborg