Ang Libro ni Helaman

1 Kag karon tan-awa, natabo ini, sa pagsugod sang ika-kwarenta nga tuig sang pagginahum sang mga hukom sa katawhan ni Nefi, may nagsugod nga grabe nga kabudlayan sa katawhan sang mga Nefinhon.

2 Kay tan-awa, si Pahoran napatay na, kag naglakat na sa alagyan sang bug-os nga duta; gani may nagsugod nga malubha nga pagbinaisay parte sa kon sin-o ang dapat magbulos sa hukom-lingkuranan sa mga mag-ulutod nga mga anak nga lalaki ni Pahoran.

3 Karon amo ini ang ila mga ngalan nga nagpaindis-indis para sa hukom-lingkuranan, nga nagtuga man sang paindis-indis sang katawhan: sanday Pahoran, Paanquias, kag Pacumeni.

4 Karon indi lamang ini ang mga anak nga lalaki ni Pahoran (kay madamo ang iya anak), apang amo ini sila ang nagpaindis-indis para sa hukom-lingkuranan; gani nagtuga sila sang tatlo ka pagbinahin-bahin sa katawhan.

5 Apang, natabo ini nga si Pahoran ginpili paagi sa tingug sang katawhan nga mangin puno nga hukom kag gobernador sa katawhan ni Nefi.

6 Kag natabo ini nga si Pacumeni, sang nakita niya nga indi niya makaptan ang hukom-lingkuranan, nakig-isa sia sa tingug sang katawhan.

7 Apang tan-awa, si Paanquias, kag inang bahin sang katawhan nga nagahandum nga sia ang ila mangin gobernador, tuman nga naakig; gani, nagahana na sia kuntani nga intuon ang katawhan nga mag-alsa sa pagrebelde batok sa ila mga kauturan.

8 Kag natabo ini, samtang nagahana sia sa paghimo sini, tan-awa, gindakop sia, kag ginbista suno sa tingug sang katawhan, kag ginpamatbatan sang kamatayon; kay nag-alsa sia sa pagrebelde kag nagtinguha nga gub-on ang kahilwayan sang katawhan.

9 Karon sang nakita sinang mga tawo nga nagahandum nga sia ang ila mangin gobernador nga ginpamatbatan sia sang kamatayon, gani naakig sila, kag tan-awa, ginpadala nila ang isa nga si Kiskumen, bisan sa hukom-lingkuranan ni Pahoran, kag ginpatay si Pahoran samtang nagapungko sia sa hukom-lingkuranan.

10 Kag ginlagas sia sang mga alagad ni Pahoran; apang tan-awa, sa pagkadasig sang pagpalagyo ni Kiskumen sa bagay nga wala sing tawo nga makalab-ot sa iya.

11 Kag nagkadto sia sa mga nagsugo sa iya, kag sila tanan nagsulod sa isa ka kasugtanan, huo, nga nagasumpa sa ila wala’y katubtuban nga Tagtuga, nga indi sila magsugid sa bisan kay sin-o nga si Kiskumen ang nagpatay kay Pahoran.

12 Gani, si Kiskumen wala makilal-i sang katawhan ni Nefi kay nagpakunokuno sia sa tion nga ginpatay niya si Pahoran. Kag si Kiskumen kag ang iya guban, nga nagpakighisugot upod sa iya, nagpakigsimpon sang ila mga kaugalingon sa katawhan, sa isa ka paagi nga sila tanan indi matukiban; apang ang tanan nga natukiban ginpamatbatan sang kamatayon.

13 Kag karon tan-awa, si Pacumeni ginpili, suno sa tingug sang katawhan, nga mangin isa ka puno nga hukom kag isa ka gobernador sang katawhan, nga maggahum bulos sa iya utod nga si Pahoran; kag ini suno sa iya kinamatarong. Kag ini tanan ginhimo sa ika-kwarenta nga tuig sang pagginahum sang mga hukom; kag nagtapos ini.

14 Kag natabo ini, sa ika-kwarenta’y uno nga tuig sang pagginahum sang mga hukom, nga ang mga Lamanhon nagpanipon sang di-maisip nga kasoldadohan nga mga lalaki, kag gin-armasan sila sing mga espada, kag sing mga sundang kag sing mga pana, kag sing mga baslay, kag sing mga panaming sa ulo, kag sing mga taming sa dughan, kag sing tanan nga sari sang mga taming sang tagsa ka sahi.

15 Kag nagdulhog sila liwat agud masugdan nila ang inaway batok sa mga Nefinhon. Kag ginpangunahan sila sing isa ka lalaki nga ang ngalan amo si Coriantumer; kag isa sia ka kaliwat ni Zarahemla; kag isa sia nga nagsipak halin sa mga Nefinhon; kag isa sia ka dako kag isa ka makusog nga lalaki.

16 Gani, ang hari sang mga Lamanhon, nga ang ngalan amo si Tubalot, nga anak ni Ammoron, nga nagahunahuna nga si Coriantumer, nga isa ka makusog nga lalaki, makatindog batok sa mga Nefinhon, paagi sa iya kusog kag paagi man sa iya dako nga kaalam, sa bagay nga paagi sa pagpadala sa iya makaangkon sia sing gahum sa mga Nefinhon—

17 Gani ginsugyot niya sila nga maakig, kag ginpanipon niya ang iya mga kasoldadohan, kag ginpili niya si Coriantumer nga mangin ila lider, kag ginsugo nga maglakat sila padulhog sa duta sang Zarahemla agud magpakig-away batok sa mga Nefinhon.

18 Kag natabo ini nga tungod sang tuman nga pagbinaisay kag tuman nga kabudlayan sa gobyerno, nga wala sila nakabutang sang igo nga mga bantay sa duta sang Zarahemla; kay naghunahuna sila nga ang mga Lamanhon indi mangisog nga magsulod sa sentro nga bahin sang ila mga kadutaan agud salakayon inang dako nga siyudad sang Zarahemla.

19 Apang natabo ini nga si Coriantumer naglakat pasulong sa unahan sang iya tuman kadamo nga kasoldadohan, kag nagsalakay sa mga pumuluyo sang siyudad, kag nangin tuman kadasig sang ila pagsulong sa bagay nga wala na sing tion pa agud matipon sang mga Nefinhon ang ila mga kasoldadohan.

20 Gani ginpamatay ni Coriantumer ang mga bantay sa tupad sang entrada sang siyudad, kag nagsulong upod ang iya bug-os nga kasoldadohan pasulod sa siyudad, kag ginpamatay nila ang tanan-tanan nga nagbalabag sa ila, sa bagay nga naagaw nila ang bug-os nga siyudad.

21 Kag natabo ini nga si Pacumeni, nga amo ang puno nga hukom, nagpalagyo kay Coriantumer, bisan tubtob sa mga pader sang siyudad. Kag natabo ini nga gin-atake sia ni Coriantumer dapit sa pader, sa bagay nga napatay sia. Kag gani natapos ang mga inadlaw ni Pacumeni.

22 Kag karon sang nakita ni Coriantumer nga sia na ang nagapanag-iya sang siyudad sang Zarahemla, kag nakita nga ang mga Nefinhon nagpinalagyo sa ila atubang, kag ginpamatay, kag ginpangdakop, kag ginpanghunong sa bilanggoan, kag nakuha na niya ang pinakamalig-on nga pamakod sa bug-os nga kadutaan, nagpakaisog sia sa bagay nga naghana na sia sa pagsulong batok sa bug-os nga kadutaan.

23 Kag karon wala sia nagpabilin sa duta sang Zarahemla, kundi naglakat sia pasulong upod ang dako nga kasoldadohan, bisan padulong sa siyudad sang Bugana; kay determinado sia sa pagsulong kag pagpakig-away paagi sa espada, agud maangkon niya ang norte nga mga bahin sang duta.

24 Kag, kay nagahunahuna nga ang ila pinakadako nga kusog yara sa sentro sang duta, gani naglakat sia pasulong, nga wala na sila sing tion pa sa pagtipon sang ila mga kaugalingon luwas lang nga ini sa ginagmay nga mga grupo; kag sa sini nga paagi ginsalakay nila sila kag ginpamatay sila.

25 Apang tan-awa, ining paglakat ni Coriantumer patabok sa sentro sang kadutaan naghatag kay Moronias sang dako nga bentaha sa ila, sa pihak sang dako nga kadamuon sang mga Nefinhon nga nagkalamatay.

26 Kay tan-awa, si Moronias naghunahuna nga ang mga Lamanhon indi mangisog sa pagsulod sa sentro sang kadutaan, kundi nga magasalakay sila sa mga siyudad sa palibot sa mga dulonan pareho sang ila ginhimo halin sadto; gani ginpahanabo ni Moronias nga ang ila mabakod nga mga kasoldadohan mag-amlig sinang mga bahin sa palibot malapit sa mga dulonan.

27 Apang tan-awa, ang mga Lamanhon wala nahadlok suno sa iya luyag, kundi nga ginsulod nila ang sentro sang kadutaan, kag gin-agaw ang kapital nga siyudad nga amo ang siyudad sang Zarahemla, kag nagalakat patabok sa pinakaimportante nga mga bahin sang kadutaan, nga ginapamatay ang katawhan sa isa ka dako nga pagpamatay, pareho mga lalaki, mga babayi, kag mga kabataan, nga ginaangkon ang madamo nga siyudad kag ang madamo nga pamakod.

28 Apang sang natukiban ini ni Moronias, ginpadala niya gilayon si Lehi upod ang kasoldadohan nga maglibot agud unahan sila antes sila makaabot sa duta nga Bugana.

29 Kag amo ini ang iya ginhimo; kag gin-unahan niya sila antes sila makaabot sa duta nga Bugana, kag nakig-away sa ila, sa bagay nga nagsugod sila sa pag-isol pabalik sa duta sang Zarahemla.

30 Kag natabo ini nga gin-unahan sila ni Moronias sa ila pag-isol, kag nakig-away sa ila, sa bagay nga nangin isa ini ka tuman kaduguon nga inaway; huo, madamo ang nagkalamatay, kag upod sa mga nagkalamatay si Coriantumer nakita man.

31 Kag karon, tan-awa, ang mga Lamanhon indi makaisol sa diin man nga alagyan, bisan sa norte, kag sa sur, kag sa este, kag sa weste, kay napalibutan sila sa tanan nga kiliran sang mga Nefinhon.

32 Kag gani ginduso ni Coriantumer ang mga Lamanhon sa tunga sang mga Nefinhon, sa bagay nga yara sila sa gahum sang mga Nefinhon, kag sia mismo napatay, kag gin-ampo sang mga Lamanhon ang ila mga kaugalingon sa mga kamot sang mga Nefinhon.

33 Kag natabo ini nga nabawi liwat ni Moronias ang siyudad sang Zarahemla, kag ginpahanabo nga ang mga Lamanhon nga ginpangbihag maggwa sa kadutaan sing matawhay.

34 Kag gani natapos ang ika-kwarenta’y uno nga tuig sang pagginahum sang mga hukom.