1 Kag natabo ini, sa ika-singkwenta’y kwatro nga tuig may madamo nga pag-ilinaway sa simbahan, kag may pagbinaisay man sa tunga sang katawhan, sa bagay nga may madamo nga pagpaagay sang dugo.

2 Kag ang rebelde nga bahin sang katawhan ginpamatay kag ginpanabog pagwa sa kadutaan, kag nagkadto sila sa hari sang mga Lamanhon.

3 Kag natabo ini nga nagtinguha sila sa pagsugyot sang mga Lamanhon agud magpakig-away batok sa mga Nefinhon; apang tan-awa, ang mga Lamanhon tuman nga nahadlok, sa bagay nga indi sila mamati sa mga pulong sang mga nagsilipak.

4 Apang natabo ini, sa ika-singkwenta’y sais nga tuig sang pagginahum sang mga hukom, may mga nagsilipak sa mga Nefinhon pakadto sa mga Lamanhon; kag nagmadinalag-on sila upod sang iban pa sa pagpukaw sa ila sa kaakig batok sa mga Nefinhon; kag sa bilog sina nga tuig naghanda sila para sa giyera.

5 Kag sa ika-singkwenta’y siyete nga tuig nagdulhog sila agud magpakig-away batok sa mga Nefinhon, kag ginsugdan nila ang buhat sang kamatayon; huo, sa bagay nga sa ika-singkwenta’y otso nga tuig sang pagginahum sang mga hukom nagmadinalag-on sila sa pag-angkon sang duta sang Zarahemla; huo, kag sang tanan man nga kadutaan, bisan tubtob sa duta nga malapit sa duta nga Bugana.

6 Kag ang mga Nefinhon kag ang mga kasoldadohan ni Moronias nagpalagyo bisan padulong sa duta nga Bugana;

7 Kag didto nagpamakod sila batok sa mga Lamanhon, halin sa dagat sa weste, bisan tubtob sa este; nga ini katumbas sa isa ka adlaw nga pagpanglakaton para sa isa ka Nefinhon, sa dulonan nga ila ginpamakuran kag ginpahamtangan sang ila mga kasoldadohan agud pangapinan ang ila norte nga rehiyon.

8 Kag gani naangkon sang mga nagsilipak sa mga Nefinhon, sa bulig sang tuman kadamo nga kasoldadohan sang mga Lamanhon, ang tanan nga ginapanag-iyahan sang mga Nefinhon nga yara sa duta pa-sur. Kag ini tanan nahimo sa ika-singkwenta’y otso kag nuebe nga mga tuig sang pagginahum sang mga hukom.

9 Kag natabo ini, sa ika-sisenta nga tuig sang pagginahum sang mga hukom, si Moronias nagmadinalag-on upod ang iya mga kasoldadohan sa pag-angkon sang madamo nga bahin sang kadutaan; huo, nabawi nila ang madamo nga siyudad nga nahulog sa mga kamot sang mga Lamanhon.

10 Kag natabo ini, sa ika-sisenta’y uno nga tuig sang pagginahum sang mga hukom nagmadinalag-on sila sa pagbawi bisan sang katunga sang tanan nila nga ginapanag-iyahan.

11 Karon ining dako nga pagkapierde sang mga Nefinhon, kag ang dako nga pagpamatay sa tunga nila, wala kuntani natabo kon indi tungod sang ila kalainan kag sang ila kangil-aran nga yara sa tunga nila; huo, kag yara man ini sa sinang mga nagpahayag nga mga miyembro sang simbahan sang Dios.

12 Kag ini tungod sang bugal sang ila mga tagipusuon, tungod sang ila tuman kadamo nga manggad, huo, ini tungod sang ila pagpamigos sang mga imol, nga nagadalok sang ila pagkaon sa mga ginagutom, nga nagadalok sang ila biste sa mga hublas, kag nagapanampa sang ila mapainubuson nga mga kauturan sa guya, nga nagayaguta sinang sagrado, nga nagapanghiwala sang espiritu sang propesiya kag sang rebelasyon, nga nagapamatay, nagapangagaw, nagabinutig, nagapangawat, nagapanglahi, nagakapukaw sa dako nga mga pagbinaisay, kag nagasipak padulong sa duta sang Nefi, sa tunga sang mga Lamanhon—

13 Kag tungod sining ila dako nga kalainan, kag sang ila mga paghinambog sa ila kaugalingon nga kusog, ginpabay-an sila sa ila kaugalingon nga kusog; gani wala sila nag-uswag, kundi nga ginpaantos kag ginsakit, kag ginpanabog sa atubang sang mga Lamanhon, tubtob nga nadula sa ila ang pagpanag-iya sang halos tanan nila nga kadutaan.

14 Apang tan-awa, si Moronias nagwali sang madamo nga butang sa katawhan tungod sang ila kalainan, kag sanday Nefi man kag Lehi, nga mga anak ni Helaman, nagwali sang madamo nga butang sa katawhan, huo, kag nagpropesiya sang madamo nga butang sa ila parte sa ila mga kalainan, kag kon ano ang matabo sa ila kon indi sila maghinulsol sang ila mga sala.

15 Kag natabo ini nga naghinulsol sila, kag sa bagay nga naghinulsol sila nagsugod sila sa pag-uswag.

16 Kay sang nakita ni Moronias nga naghinulsol sila nagpasimpalad sia sa pagpanguna sa ila sa tagsa ka lugar, kag sa tagsa ka siyudad, bisan tubtob nga nabawi nila ang katunga sang ila pagkabutang kag ang katunga sang tanan nila nga kadutaan.

17 Kag gani natapos ang ika-sisenta’y uno nga tuig sang pagginahum sang mga hukom.

18 Kag natabo ini, sa ika-sisenta’y dos nga tuig sang pagginahum sang mga hukom, nga si Moronias indi na makaangkon sing dugang pa nga mga pagkabutang halin sa mga Lamanhon.

19 Gani gintalikdan nila ang ila plano nga angkonon ang nabilin sang ila mga kadutaan, kay sa pagkadamo sang mga Lamanhon sa bagay nga indi na mahimo para sa mga Nefinhon ang mag-angkon pa sing dugang nga gahum sa ila; gani gingamit ni Moronias ang tanan niya nga kasoldadohan sa pag-amlig sinang mga bahin nga iya nabawi.

20 Kag natabo ini, tungod sang tuman nga kadamuon sang mga Lamanhon dako ang kahadlok sang mga Nefinhon kay basi nga dag-on sila, kag tasakon, kag pamatyon, kag ubuson.

21 Huo, nagsugod sila sa pagdumdum sang mga propesiya ni Alma, kag amo man sang mga pulong ni Mosias; kag nahangpan nila nga nangin batinggilan sila nga katawhan, kag ginbale-wala nila ang mga kasugoan sang Dios;

22 Kag ginliwat nila kag gintasak sang ila mga tiil ang mga layi ni Mosias, ukon inang ginsugo sa iya sang Ginuo nga ihatag sa katawhan; kag nahangpan nila nga ang ila mga layi nangin tiko, kag nangin malain sila nga katawhan, sa bagay nga nangin malain sila bisan pareho sa mga Lamanhon.

23 Kag tungod sang ila kalainan ang simbahan nagsugod nga magluya; kag nagsugod sila nga indi magpati sa espiritu sang propesiya kag sa espiritu sang rebelasyon; kag ang mga paghukom sang Dios nagatulok sa ila sa nawong.

24 Kag nahangpan nila nga nangin maluya sila, pareho sang ila mga kauturan, ang mga Lamanhon, kag ang Espiritu sang Ginuo wala na nagaamlig sa ila; huo, nagbiya ini sa ila tungod ang Espiritu sang Ginuo wala nagapuyo sa di-balaan nga mga templo—

25 Gani ang Ginuo nag-untat sa pag-amlig sa ila paagi sa iya milagroso kag wala’y tupong nga gahum, kay nahulog sila sa kahimtangan sang pagkawala’y pagtuo kag makahaladlok nga kalainan; kag nakita nila nga ang mga Lamanhon mas tuman kadamo sangsa ila, kag luwas lang nga magkapyot sila sa Ginuo nga ila Dios pat-od gid nga madula sila.

26 Kay tan-awa, nahangpan nila nga ang kusog sang mga Lamanhon pareho sang ila kusog, bisan lalaki sa lalaki. Kag gani nahulog sila sa sining dako nga kalapasan; huo, gani nangin maluya sila, tungod sang ila kalapasan, sa sulod sang indi madamo nga tinuig.