1 Tan-awa, karon natabo ini, sa ika-sisenta’y nuebe nga tuig sang pagginahum sang mga hukom sa katawhan sang mga Nefinhon, nga si Nefi, nga anak ni Helaman, nagbalik sa duta sang Zarahemla halin sa duta sa norte.

2 Kay didto sia naghalin sa katawhan nga yara sa duta sa norte, kag nagwali sang pulong sang Dios sa ila, kag nagpropesiya sang madamo nga butang sa ila;

3 Kag ginsikway nila ang tanan niya nga pulong sa bagay nga indi sia makapabilin upod sa ila kundi nga nagbalik liwat sa duta nga iya natawhan.

4 Kag pagkakita niya sa katawhan sa kahimtangan sang makahaladlok nga kalainan, kag sa mga tulisan ni Gadianton nga nagakapot sang mga hukom-lingkuranan—nga nag-agaw sang gahum kag awtoridad sang kadutaan; nga ginapahigad ang mga kasugoan sang Dios, kag wala sing pinakadiutay nga katarong sa iya atubang; nga wala nagahimo sing hustisya sa mga anak sang katawhan;

5 Nga ginakondenar ang matarong tungod sang ila pagkamatarong; nga ginapabay-an nga indi masilotan ang may sala kag ang malain tungod sang ila kwarta; kag dugang pa sina ang magkapot sang palangakoan sa ulohan sang gobyerno, agud magdumala kag maghimo suno sa ila mga kabubut-on, agud nga makaangkon sila sing manggad kag himaya sang kalibutan, kag, dugang pa sina, agud mahimo nila sing mas mahapos ang magpanglahi, kag magpangawat, kag magpatay, kag maghimo suno sa ila kaugalingon nga mga kabubut-on—

6 Karon ining dako nga kalainan nag-abot sa mga Nefinhon sa sulod sang indi madamo nga tinuig; kag sang nakita ini ni Nefi, ang iya tagipusuon napuno sang kasubo sa sulod niya; kag nagsinggit sia sa kasakit sang iya kalag:

7 O, kon mahimo lamang kuntani nga ang akon mga adlaw nangin sa mga adlaw sadto nga kon san-o ang akon amay nga si Nefi una nga naggwa halin sa duta sang Jerusalem, agud nga nagkasadya kuntani ako upod sa iya sa duta nga ginpanaad; sadto ang iya katawhan mahapos nga pangabayon, malig-on sa pagtuman sang mga kasugoan sang Dios, kag mahinay madala sa paghimo sang kalainan; kag maabtik sila sa pagpamati sa mga pulong sang Ginuo—

8 Huo, kon ang akon mga adlaw kuntani nangin sa sadtong mga adlaw, ang akon kalag nakaangkon kuntani sing kalipay sa pagkamatarong sang akon mga kauturan.

9 Apang tan-awa, gintalana ako nga magkabuhi sa sining mga adlaw, kag ang akon kalag pagapun-on sang kasubo tungod sini nga kalainan sang akon mga kauturan.

10 Kag tan-awa, karon natabo ini nga didto ini sa ibabaw sang isa ka tore, nga yara sa hardin ni Nefi, nga yara sa tupad sang mayor nga dalan nga nagapadulong sa mayor nga merkado, nga yara sa siyudad sang Zarahemla; gani, si Nefi nagluhod kag nagduko sa ibabaw sang tore nga yara sa iya hardin, nga ang amo nga tore malapit man sa ganhaan sang hardin nga ginalabyan sang mayor nga dalan.

11 Kag natabo ini nga may pila ka mga lalaki nga nagalabay kag nakita si Nefi samtang nagabubo sia sang iya kalag sa Dios sa ibabaw sang tore; kag nagdalagan sila kag ginsugiran ang katawhan sang ila nakita, kag ang mga tawo tingob nga nag-abot nga sa pagkadamo agud mahibal-an nila ang kabangdanan sang sa pagkadako nga pagkalisud tungod sang kalainan sang katawhan.

12 Kag karon, sang nagtindog si Nefi nakita niya ang kadam-an sang katawhan nga nagtililipon.

13 Kag natabo ini nga ginbuksan niya ang iya baba kag nagsiling sa ila: Tan-awa, ngaa nagtililipon kamo sang inyo mga kaugalingon? Agud bala sugiran ko kamo sang inyo mga kalainan?

14 Huo, tungod nagsaka ako sa ibabaw sang akon tore agud mabubo ko ang akon kalag sa akon Dios, tungod sang tuman nga kasubo sang akon tagipusuon, nga gintuga sang inyo mga kalainan!

15 Kag tungod sang akon pagkalisud kag panalambiton nagtililipon kamo sang inyo mga kaugalingon, kag nagakatingala; huo, kag may dako kamo nga panginahanglan nga matingala; huo, dapat kamo nga magkatingala tungod nagpadaug kamo sa bagay nga ang yawa nakaangkon sang sa pagkadako nga kapyot sa inyo mga tagipusuon.

16 Huo, paano nga nagpadaug kamo sa mga pagpangganyat niya nga nagahangad sa paghaboy sang inyo mga kalag sa wala’y katubtuban nga kalisud kag nagapadayon nga kasubo?

17 O maghinulsol kamo, maghinulsol kamo! Ngaa mapatay kamo? Magdangop kamo, magdangop kamo sa Ginuo nga inyo Dios. Ngaa ginpabay-an niya kamo?

18 Ini tungod kay ginpatig-a ninyo ang inyo mga tagipusuon; huo, indi kamo magpamati sa tingug sang maayong manugpahalab; huo, ginhangkat ninyo sia sa pagkaakig batok sa inyo.

19 Kag tan-awa, imbes nga panipunon kamo, luwas lang kon maghinulsol kamo, tan-awa, palaptahon niya kamo agud nga mangin karne kamo para sa mga ido kag mabangis nga mga sapat.

20 O, paano nga nalipatan ninyo ang inyo Dios sa adlaw gid mismo nga ginluwas niya kamo?

21 Apang tan-awa, ini para mag-angkon sang manggad, para dayawon sang mga tawo, huo, kag agud nga makaangkon kamo sing bulawan kag pilak. Kag ginpahamtang ninyo ang inyo mga tagipusuon sa mga manggad kag sa wala’y pulos nga mga butang sining kalibutan, nga para sa sini kamo nagapamatay, kag nagapangagaw, kag nagapangawat, kag nagasaksi sing di-matuod batok sa inyo isigkatawo, kag nagahimo sang tanan nga sari sang kalainan.

22 Kag sa sini nga kabangdanan ang kasulub-on magaabot sa inyo luwas lang nga maghinulsol kamo. Kay kon indi kamo maghinulsol, tan-awa, ining dako nga siyudad, kag amo man ang tanan nga dalagko nga mga siyudad nga yara sa palibot, nga yara sa duta nga aton ginapanag-iyahan, pagakuhaon agud nga wala na kamo sing lugar sa mga ini; kay tan-awa, ang Ginuo indi na maghatag sa inyo sing kusog, pareho sang iya ginhimo sang una, agud magbato sa inyo mga kaaway.

23 Kay tan-awa, amo ini ang siling sang Ginuo: Indi ako magpakita sang akon kusog sa mga malain, sa isa labaw sangsa isa, luwas lang nga ini sa sinang mga nagahinulsol sang ila mga sala, kag nagapamati sa akon mga pulong. Karon gani, luyag ko nga inyo tamdon, mga kauturan ko, nga mangin mas maayo pa para sa mga Lamanhon sangsa para sa inyo luwas lang nga maghinulsol kamo.

24 Kay tan-awa, mas matarong pa sila sangsa inyo, kay wala sila nakasala batok sa sinang dako nga ihibalo nga inyo nabaton; gani ang Ginuo mangin maluluy-on sa ila; huo, palawigon niya ang ila mga adlaw kag padamuon ang ila kaliwatan, bisan lubos kamo nga malaglag luwas lang kon maghinulsol kamo.

25 Huo, kalisud sa inyo tungod sinang dako nga kangil-aran nga nag-abot sa inyo; kag nakig-isa kamo sang inyo mga kaugalingon sa sini, huo, sa sinang sekreto nga guban nga gintukod ni Gadianton!

26 Huo, magaabot sa inyo ang kalisud tungod sa sinang bugal nga inyo gintugotan nga magsulod sa inyo mga tagipusuon, nga nag-alsa sa inyo sing lampas sa sinang maayo tungod sang inyo tuman kadako nga mga manggad!

27 Huo, kalisud sa inyo tungod sang inyo kalainan kag mga kangil-aran!

28 Kag luwas lang nga maghinulsol kamo magakalamatay kamo; huo, bisan ang inyo mga kadutaan pagakuhaon sa inyo, kag pagalaglagon kamo halin sa ibabaw sang duta.

29 Tan-awa karon, wala ako nagasiling nga ining mga butang mangin amo sini, sa akon kaugalingon, tungod indi sa akon kaugalingon nga nahibal-an ko ining mga butang; kundi tan-awa, nahibal-an ko nga ining mga butang matuod tungod ang Ginuong Dios nagpahibalo sang mga ini sa akon, gani nagasaksi ako nga matabo ang mga ini.