1 Kag karon, natabo ini nga may madamo nga nakabati sang mga pulong ni Samuel, ang Lamanhon, nga iya ginhambal sa ibabaw sang mga pader sang siyudad. Kag ang tanan nga nagpati sa iya pulong naglakat kag nagpangita kay Nefi; kag sang nakalakat sila kag nakita sia nagkumpisar sila sa iya sang ila mga sala kag wala naghimutig, nga nagapangabay nga mabunyagan sila para sa Ginuo.

2 Apang ang tanan nga wala nagpati sa mga pulong ni Samuel naakig sa iya; kag ginhaboy nila sia sang mga bato sa ibabaw sang pader, kag madamo man ang nagpana sa iya samtang nagatindog sia sa ibabaw sang pader; apang ang Espiritu sang Ginuo yara sa iya, sa bagay nga indi nila sia maigo sang ila mga bato ukon man sang ila mga baslay.

3 Karon sang nakita nila nga indi nila sia maigo, may madamo pa gid nga nagpati sa iya mga pulong, sa bagay nga naglakat sila pakadto kay Nefi agud magpabunyag.

4 Kay tan-awa, si Nefi nagapangbunyag, kag nagapropesiya, kag nagawali, nga nagapadasig sang katawhan sa paghinulsol, nga nagapakita sang mga tanda kag mga katilingalahan, nga nagahikot sang mga milagro sa katawhan, agud mahibal-an nila nga ang Cristo pat-od gid nga madali na lang nga magkari—

5 Nga ginasugiran sila sang mga butang nga pat-od gid nga madali na lang mag-abot, agud mahibal-an nila kag madumduman sa tion sang katumanan sang mga ini nga ginpahibalo na ngadaan ang mga ini sa ila, sa tinutuyo nga basi pa lang nga magpati sila; gani ang tanan nga nagpati sa mga pulong ni Samuel nagkadto sa iya agud magpabunyag, kay nagkadto sila nga nagahinulsol kag nagakumpisar sang ila mga sala.

6 Apang ang kalabanan sa ila wala nagpati sa mga pulong ni Samuel; gani sang nakita nila nga indi nila sia maigo sang ila mga bato kag sang ila mga baslay, nagsinggit sila sa ila mga kapitan nga nagasiling: Dakpa ini nga tawo kag gapusa sia, kay tan-awa may yawa sia; kag tungod sang gahum sang yawa nga yara sa iya indi naton sia maigo sang aton mga bato kag sang aton mga baslay; gani dakpa sia kag gapusa sia, kag ipalayo sia.

7 Kag sang nagpalapit sila agud ipadapat ang ila mga kamot sa iya, tan-awa, ginhabyog niya ang iya kaugalingon paidalom halin sa pader, kag nagpalagyo pagwa sa ila mga kadutaan, huo, bisan tubtob sa iya kaugalingon nga pungsod, kag nagsugod sa pagwali kag pagpropesiya sa iya kaugalingon nga katawhan.

8 Kag tan-awa, wala na gid sia nabatian pa sa mga Nefinhon; kag gani amo ini ang kahimtangan sang katawhan.

9 Kag gani natapos ang ika-otsenta’y sais nga tuig sang pagginahum sang mga hukom sa katawhan ni Nefi.

10 Kag gani natapos man ang ika-otsenta’y siyete nga tuig sang pagginahum sang mga hukom, nga ang kalabanan sang katawhan nagapabilin sa ila bugal kag kalainan, kag ang mas diutay nga bahin nagalakat sing mas mainandamon sa atubang sang Dios.

11 Kag amo man ini ang mga kahimtangan, sa ika-otsenta’y otso nga tuig sang pagginahum sang mga hukom.

12 Kay may diutay gid lamang nga pagbag-o sa mga kahimtangan sang katawhan, luwas lang nga ang katawhan nagsugod nga mas nagtig-a sa kalainan, kag nagahimo sing dugang kag dugang pa gid sinang batok sa mga kasugoan sang Dios, sa ika-otsenta’y nuebe nga tuig sang pagginahum sang mga hukom.

13 Apang natabo ini, sa ika-nobenta nga tuig sang pagginahum sang mga hukom, may dalagko nga mga tanda nga ginhatag sa katawhan, kag mga katilingalahan; kag ang mga pulong sang mga propeta nagsugod nga matuman.

14 Kag ang mga anghel nagpakita sa mga tawo, maalam nga mga tawo, kag nagpahayag sa ila sang maayong balita sang dako nga kalipay; gani sa sini nga tuig ang balaan nga mga kasulatan nagsugod nga matuman.

15 Apang, ang katawhan nagsugod sa pagpatig-a sang ila mga tagipusuon, tanan luwas lang sa labing nagapati nga bahin nila, pareho mga Nefinhon kag mga Lamanhon, kag nagsugod sa pagsandig sa ila kaugalingon nga kusog kag sa ila kaugalingon nga kaalam nga nagasiling:

16 Pila ka mga butang sa kadamuon mahimo nga napakot nila sing husto; apang tan-awa, nakahibalo kita nga tanan sining dalagko kag dalayawon nga mga buhat nga ginpanghambal indi matabo.

17 Kag nagsugod sila sa pagrason kag pagbinaisay sa tunga nila nga nagasiling:

18 Nga indi rasonable nga ang isa ka sahi sang persona pareho sing isa ka Cristo magakari; kon amo, kag sia ang Anak sang Dios, ang Amay sang langit kag sang duta, pareho sang ginhambal, ngaa indi niya pag-ipakita ang iya kaugalingon sa aton kag sa ila nga mangin yara sa Jerusalem?

19 Huo, ngaa indi niya pag-ipakita ang iya kaugalingon sa sini nga duta kag sa duta sang Jerusalem?

20 Apang tan-awa, nakahibalo kita nga isa ini ka malain nga tradisyon, nga ginpasa sa aton sang aton mga amay, agud papatihon kita sa pila ka dalagko kag dalayawon nga butang nga matabo, apang indi sa aton, kundi sa isa ka duta nga tama kalayo, isa ka duta nga wala naton mahibal-i; gani mahimo nila kita nga mahuptan sa pagkaignorante, kay indi naton masaksihan sa aton kaugalingon nga mga mata nga ang mga ini matuod.

21 Kag sila, paagi sa tuso kag sa misteryoso nga mga taktika sing isa nga malain, magahikot sang pila ka dalagko nga misteryo nga indi naton mahangpan, nga magahupot sa aton sa idalom nga mangin mga alagad sa ila mga pulong, kag mga alagad man sa ila, kay nagasandig kita sa ila sa pagtudlo sa aton sang pulong; kag gani pagahuptan nila kita sa pagkaignorante kon itugyan naton ang aton mga kaugalingon sa ila, sa tanan nga adlaw sang aton mga kabuhi.

22 Kag madamo pa nga mga butang ang ginhunahuna sang katawhan sa ila mga tagipusuon, nga mga binuang kag wala’y pulos; kag tuman sila nga natublag, kay ginsugyot sila ni Satanas sa paghimo sang kalainan sing dalayon; huo, naglibot sia nga nagapalapnag sang mga hinuring-huring kag mga pagbinaisay sa bug-os nga ibabaw sang kadutaan, agud nga mapatig-a niya ang mga tagipusuon sang katawhan batok sa sinang maayo kag batok sa sinang magaabot.

23 Kag sa pihak sang mga tanda kag mga katilingalahan nga ginhikot sa katawhan sang Ginuo, kag sang madamo nga milagro nga ila ginhimo, si Satanas nakaangkon sing mabakod nga kapyot sa mga tagipusuon sang katawhan sa bug-os nga ibabaw sang kadutaan.

24 Kag gani natapos ang ika-nobenta nga tuig sang pagginahum sang mga hukom sa katawhan ni Nefi.

25 Kag gani natapos ang libro ni Helaman suno sa kasulatan ni Helaman kag sang iya mga anak.