1 Kag natabo ini, sa ika-kwarenta’y dos nga tuig sang pagginahum sang mga hukom, pagkatapos nga mapaluntad liwat ni Moronias ang paghidaet sa tunga sang mga Nefinhon kag mga Lamanhon, tan-awa wala sing magakapot sang hukom-lingkuranan; gani may nagsugod nga pagbinaisay liwat sa tunga sang katawhan parte sa kon sin-o ang dapat magkapot sang hukom-lingkuranan.

2 Kag natabo ini nga si Helaman, nga anak ni Helaman, ginpili nga magkapot sang hukom-lingkuranan paagi sa tingug sang katawhan.

3 Apang tan-awa, si Kiskumen, nga nagpatay kay Pahoran, tago nga naghulat agud patyon man si Helaman; kag ginsakdag sia sang iya guban, nga nagsulod sa isa ka kasugtanan nga wala sing isa nga dapat makahibalo sang iya kalainan.

4 Kay may isa nga Gadianton, nga tuman kasagad sa madamo nga pulong, kag amo man sa iya katusohan, agud magpatuman sang sekreto nga buluhaton sang pagpamatay kag sang pagpangawat; gani nangin lider sia sang guban ni Kiskumen.

5 Gani gin-into niya sila, kag amo man si Kiskumen, nga kon ibutang nila sia sa hukom-lingkuranan itugot niya sa sinang mga katapo sang iya guban nga ipahamtang sila nga may gahum kag awtoridad sa katawhan; gani si Kiskumen nagtinguha sa pagpatay kay Helaman.

6 Kag natabo ini, samtang nagalakat sia padulong sa hukom-lingkuranan agud patyon si Helaman, tan-awa isa sang mga alagad ni Helaman, nga naggwa sang gab-i, kag, paagi sa pagpakunokuno, nakakuha sang impormasyon parte sa mga plano nga ginpahamtang sining guban agud patyon si Helaman—

7 Kag natabo ini nga nakigkita sia kay Kiskumen, kag ginhatagan niya sia sing isa ka tanda; gani ginpahibalo ni Kiskumen sa iya ang tuyo sang iya handum, nga nagapangabay sa iya nga updan sia sa hukom-lingkuranan agud mapatay niya si Helaman.

8 Kag sang nahibal-an sang alagad ni Helaman ang tanan nga yara sa tagipusuon ni Kiskumen, nga tuyo niya nga magpamatay, kag tuyo man sang tanan nga katapo sang iya guban nga magpamatay, kag magpangawat, kag mag-angkon sing gahum, (kag amo ini ang ila sekreto nga plano, kag ang ila pagkunsabo) ang alagad ni Helaman nagsiling kay Kiskumen: Malakat kita sa hukom-lingkuranan.

9 Karon nagpalipay ini sing tuman kay Kiskumen kay naghunahuna sia nga matuman na niya ang iya plano; apang tan-awa, samtang nagalakat sila padulong sa hukom-lingkuranan, ginbuno si Kiskumen sang alagad ni Helaman, bisan sa tagipusuon, amo nga natumba sia nga patay nga wala makaugayong. Kag nagdalagan sia kag ginsugiran si Helaman sang tanan nga butang nga iya nakit-an, kag nabatian, kag ginhimo.

10 Kag natabo ini nga nagpasugo si Helaman agud dakpon ining guban sang mga tulisan kag sekreto nga mga manugpatay-tawo, agud nga masilotan sila sang kamatayon suno sa layi.

11 Apang tan-awa, sang natukiban ni Gadianton nga wala makabalik si Kiskumen hinadlokan sia nga basi patyon sia; gani ginsugo niya ang iya guban nga magsunod sa iya. Kag nalagyo sila pagwa sa kadutaan, paagi sa isa ka sekreto nga alagyan, padulong sa kamingawan; kag gani sang nagpasugo si Helaman agud dakpon sila indi sila makit-an bisan diin.

12 Kag dugang pa parte sining Gadianton ang pagahambalan pagkatapos sini. Kag gani natapos ang ika-kwarenta’y dos nga tuig sang pagginahum sang mga hukom sa katawhan ni Nefi.

13 Kag tan-awa, sa katapusan sini nga libro makita ninyo nga ining Gadianton ang kabangdanan sang kalaglagan, huo, halos sang lubos nga pagkalaglag sang katawhan ni Nefi.

14 Tan-awa indi ko buot silingon ang katapusan sang libro ni Helaman, kundi ang buot ko silingon ang katapusan sang libro ni Nefi, kon diin ko ginkuha ang tanan nga kasaysayan nga akon ginsulat.