Kalkalpas ni Jesucristo a nangbubos iti aldaw a panagministrona iti daga ti Bountiful, panangisuro iti ebangheliona, panangted kadagiti tao ti gundaway a mangkita ken mangrikna kadagiti marka iti nagungar a bagina, ken panangipaneknek nga Isu ti naikari a Mangisalakan. Ita orasen para Kenkuana tapno pumanaw. “Dimtengen ti kanitok,” kinunana (3 Nephi 17:1). Orasen nga agsubli iti Amana, ket ammona a kasapulan dagiti tao ti oras a mangutob iti no ania ti insurona. Isu nga, iti panagsublina iti sumaruno nga aldaw, pinagawidna ti ummong kadagiti pagtaenganda. Ngem awan ti pimmanaw. Saanda nga imbaga no ania ti marikriknada, ngem narikna ni Jesus daytoy: ninamnamada ti “panagbayagna pay bassit kadakuada” (3 Nephi 17:5). Adda pay dadduma a napapateg a banag nga aramidenna, ngem ti panangipakita iti pannakipagrikna kadagiti annak ti Dios ket kanayon a nangato a prioridad Kenkuana. Isu a nagtalinaed pay iti nabaybayag bassit ni Jesus. Ti simmaruno ket ti nalabit a kapintasan a pagwadan ti ministering a naisurat iti nasantuan a kasuratan. Ti la makuna dagidi nakaimatang idi ket maysa dayta a saan a mailadawan (kitaen iti 3 Nephi 17:16–17). Ginupgop ni Jesus mismo ti saan a naplano a pannakaibukbok ti espiritu kadagitoy simple ken nabileg a balikas: “Ket ita adtoy, naan-anay ti ragsakko” (3 Nephi 17:20).
Dagiti Kapanunotan iti Panagsursuro iti Pagtaengan ken iti Simbaan
Ti Mangisalakan ti naan-anay a pagwadak iti ministering.
Agarup 2,500 a tattao ti adda idi nagparang ti Mangisalakan, ngem nakasapul ti Mangisalakan iti wagas a makapagministro kadakuada a saggaysa. Ania dagiti mensahe ti namnama a masarakanyo iti 3 Nephi 17; 18:24–25, 28–32? Ania dagiti kasapulan iti panagministrona? Ania dagiti kababalin a namagbalin nga epektibo ti panagministrona? Mabalinyo pay a panunoten no kasano ti panagministrona kadakayo. Kasano a masurotyo ti pagwadanna? (Kitaen met iti 3 Nephi 18:24–25 ken 28–32.)
Kitaen met iti “Jesus Christ Has Compassion and Heals the People” (video), Gospel Library.
Sinuruannak ti Mangisalakan no kasano ti agkararag.
Panunotenyo no ania koma ti kayarigan ti pannakangngeg iti Mangisalakan a mangikarkararag kadakayo? Kasano a makaapekto ti kasta a padas iti no kasano ti panagkararagyo? Utobenyo daytoy bayat ti panagadalyo iti 3 Nephi 17:13–22; 18:15–25; ken 19:6–9, 15–36. Ania ti masursuroyo manipud iti pagwadan ken pannursuro ni Jesucristo maipapan iti kararag? Ibilangyo ti panagsapul kadagiti nalawag a pannakaammo ken pannakaawat maipapan iti no kasano, kaano, sadino, para iti siasino, ken apay nga agkararag. Ania dagiti dadduma pay a nalawag a pannakaammo ken pannakaawat a magun-odyo manipud kadagitoy a bersikulo?
Mabalin a mapnuanak iti Espiritu bayat ti pannakiranudko iti sakramento.
No masansan nga aramidentayo ti maysa a banag, makapagbalin a rutina wenno kasual daytoy. Agtungpaltayo no dadduma iti panangaramid iti daytoy a saan a pampanunoten. Kasano a malapdanyo dayta manipud iti pannakapasamak ti linawas nga ordinansa ti sakramento? Bayat ti panangbasayo iti 3 Nephi 18:1–12, utobenyo no kasano a naespirituan a “mabsogkayo” iti tunggal pannakiranudyo iti sakramento (kitaen met iti 3 Nephi 20:1–9). Segun kadagiti bersikulo 5–7, 11, ania ti sumagmamano a banag a nasken a “kanayon” nga aramidenyo? Mabalinyo pay a panunoten no apay nga inted ni Jesus kadatayo ti ordinansa ti sakramento—ken no ipatungpal ti sakramento dagiti panggepna iti biagmo. Apay a sagrado ti sakramento kadakayo?
Iti mensahena nga “Always Remember Him” (Liahona, Peb. 2018, 4–6), inted ni Presidente Henry B. Eyring ti “tallo a singasing maipapan no ania ti malagipyo iti tunggal lawas no makiranudkayo kadagiti sagrado nga emblem ti sakramento.” Ania dagiti napateg kadakayo maipapan kadagiti singasingna? Ania ti maaramidanyo tapno mapasayaat ti panagdaydayawyo bayat ti sakramento ken iti intero a lawas?
Ania pay ti maaramidyo tapno ad-adda a napatpateg ti panagdaydayaw? Mabalinyo nga isaludsod iti bagiyo dagiti saludsod a kas kadagitoy: “Kasano nga impluensiaan ti sakripisio ti Mangisalakan ti inaldaw a panagbiagko?” “Ania ti nasayaat nga ar-aramidek kas maysa a disipulona, ken ania ti mapasayaatko?”
Kitaen met iti Mateo 26:26–28; Jeffrey R. Holland, “Behold the Lamb of God,” Liahona, Mayo 2019, 44–46; “As Now We Take the Sacrament,” Hymns, no. 169; “Jesus Christ Introduces the Sacrament” (video), Gospel Library; Gospel Topics, “Sacrament,” Gospel Library.
Maaddaan iti panawen nga agutob. No dadduma, ti panagadal kadagiti nasantuan a kasuratan ket agbalin a panaglaok ti panagbasa, panagkararag, ken panagutob. No ipalubosyo ti naulimek a panawen nga agutob ken makisarita iti Dios maipapan iti no ania ti masursuroyo, mabalinyo a padakkelen ti bileg ti balikasna iti biagyo.
Ipapanyo nga adda gayyemyo nga awan ti ammona maipapan ken ni Jesucristo malaksid a maysakayo kadagiti pasurotna. Ania ti konklusion ti gayyemyo maipapan Kenkuana, maibatay kadagiti aramidyo? Ania ti kayatna a sawen kadakayo ti “itag-aymo ti lawagmo tapno agsilnag iti lubong”? (3 Nephi 18:24). Ania dagiti dadduma pay nga awis nga inted ti Mangisalakan iti 3 Nephi 18:22–25 a mangtulong kadakayo a mangitag-ay iti dayta a lawag?
Kitaen met iti Bonnie H. Cordon, “That They May See,” Liahona, Mayo 2020, 78–80.
Kalikaguman a gun-oden dagiti disipulo ni Jesucristo ti sagut ti Espiritu Santo.
Panunotenyo maipapan kadagiti kallabes a kararagyo. Ania ti isuro kadakayo dagiti kararagyo maipapan kadagiti kaunggan a tarigagayyo? Kalpasan ti panangbubosda iti maysa nga aldaw iti sidong ti Mangisalakan, ti ummong “inkararaganda ti kaskenan kadakuada”—ti sagut ti Espiritu Santo (3 Nephi 19:9). Apay a makaay-ayo unay ti sagut ti Espiritu Santo? Bayat ti panagbasayo kadagitoy a binatog, utobenyo ti bukodyo a tarigagay para iti panangkadkadua ti Espiritu Santo. Kasano a sipapasnek a kalikagumanyo dayta a pannakikadua?
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Ay-ayaten ti Mangisalakan ti tunggal maysa kadagiti annak ti Nailangitan nga Ama.
Mabalinmo nga usaren ti ladawan a kas kadagiti adda iti daytoy a balabala wenno ti video a “Jesus Christ Prays and Angels Minister to the Children”(Gospel Library) tapno matulonganyo dagiti annakyo a mangiladawan iti panunotda ti pakaammuan iti 3 Nephi 17. Ibilang ti panangbasa kadagiti ragup ti balikas wenno bersikulo manipud iti 3 Nephi 17 a mangyunay-unay iti ayat ti Mangisalakan para kadagiti tao (kas kadagiti bersikulo 7 ken 20–25). Kalpasanna mabalin dagiti annakyo a mangidrowing iti maysa a ladawan ti bagbagida a kaduada ni Jesus. Bayat ti panangaramidda, tulonganyo ida nga agpanunot kadagiti wagas a nangipakitaan ni Jesus iti ayatna para kadakuada.
Ladawan
Bendisionan ni Jesus dagiti ubbing
Adtoy dagiti Babassit nga Annakyo, ni Gary L. Kapp
Mapanunotko ti maipapan ken ni Jesus no umawatak iti sakramento.
Nalabit a mabalinyo nga awisen dagiti annakyo a mangisarita kadakayo no ania ti mapaspasamak kabayatan ti sakramento. Kalpasanna mabalinyo a basaen ti 3 Nephi 18:1–12 ken kiddawenyo kadagiti annakyo a mangingato iti imada no mangngegda ti maysa a banag a kapada ti ar-aramidentayo ita. Ania ti kayat ni Jesucristo a lagipen wenno panunotentayo kabayatan ti sakramento? (kitaen iti 3 Nephi 18:7, 11).
Ti panagkanta a sangsangkamaysa iti kanta a maipapan iti kararag, kas iti “A Child’s Prayer” (Children’s Songbook, 12–13), ket nasayaat a wagas tapno matulonganyo dagiti annakyo a mangpanunot no apay nga agkararagtayo. Kalpasanna mabalinyo ken dagiti annakyo ti mangbasa iti 3 Nephi 18:18–21 ken pagsaritaan ti insuro ni Jesus maipapan iti kararag. Ti panangawis kadagiti annakyo a mangibaga kadakayo no ania ti mariknada no agkararagda ket makatulong kadakuada a mangiburay iti pammaneknekda maipapan iti kararag.
Mabalin a makaparagsak para kadagiti ubbing ti mapan aganup iti sumagmamano kadagiti ipatpateg a bendision ti kararag. Mabalinmo nga isurat dagiti sumaganad a reperensia ti nasantuan a kasuratan kadagiti papel ket ilemmengmo dagitoy: 3 Nephi 18:15; 3 Nephi 18:20; 3 Nephi 18:21; 3 Nephi 19: 9; ken 3 Nephi 19:23. Kalpasanna mabalin a sapulen dagiti annakyo dagiti papel ken basaenda dagiti bersikulo, nga agsapsapul kadagiti banag nga insuro ni Jesucristo wenno dagiti disipulona maipapan iti kararag.
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ladawan
dagiti anghel a manglawlawlaw ken ni Jesus ken dagiti ubbing a Nephite
Nagministro dagiti Anghel Kenkuana, ni Walter Rane.