Maikatlo a Nephi: Dagitoy Sangapulo-ket-dua a Napilik, ni Gary L. Kapp

Septiembre 30–Oktubre 6: “Siak ti Paglintegan, ken ti Silaw”

3 Nephi 12–16

Kas kadagiti disipulo ni Jesus a naguummong tapno dumngeg iti Sermon iti Bantay iti Galilea, nagbiag dagiti naguummong a tao iti templo iti Bountiful iti babaen ti paglintegan ni Moises. Sinurotda daytoy agsipud ta inturongna dagiti kararuada ken ni Cristo (kitaen iti Jacob 4:5), ket ita nagtakder ni Cristo iti sanguananda, a mangipakpakdaar iti nangatngato a paglintegan. Ngem uray kadatayo a di pay pulos nagbiag iti paglintegan ni Moises ket mailasintayo a maysa a nangato.ti pagrukodan nga intuding ti Jesus para kadagiti disipulona. “Kayatko a naan-anaykayo a kas kaniak,” impakdaarna (3 Nephi 12:48). No daytoy ti mangiparikna kadakayo nga adda pagkuranganyo, laglagipen a kinuna pay ni Jesus, “Nagasat dagiti napanglaw iti espiritu a kumamang kaniak, ta kukuadanto ti pagarian ti langit” (3 Nephi 12:3). Daytoy nangatngato a paglintegan ti maysa nga awis—maysa a wagas ti panangisao iti “Umaykayo kaniak ket maisalakankayo” (3 Nephi 12:20). Kas iti paglintegan ni Moises, iturongnatayo daytoy a paglintegan ken ni Cristo—ti kakaisuna a Maysa a makaisalakan ken makapaan-anay kadatayo. “Adtoy,” kinunana, “ Siak ti paglintegan, ken ti silaw. Kitaendak, ken agituredkayo agingga iti panungpalan, ket agbiagkayto” (3 Nephi 15:9).

Dagiti Kapanunotan iti Panagsursuro iti Pagtaengan ken Simbaan

3 Nephi 12–14

Makapagbalinak a pudno a disipulo ni Jesucristo.

Adtoy ti maysa a wagas tapno agadal ken yaplikar no ania ti insuro ti Mangisalakan iti 3 Nephi 12–14: Pumili iti maysa a ragup dagiti bersikulo, ket kitaen no magupgopyo dagitoy iti maysa a binatog a mangrugi iti “Dagiti pudno a disipulo ni Jesucristo …” Kas pagarigan, maysa a pakagupgopan ti 3 Nephi 13:1–8 ket mabalin a kastoy “Dagiti pudno a disipulo ni Jesucristo ket saan nga agkalikagum iti pammadayaw ti kaaduan gapu iti panangaramidda iti naimbag.” Padasen kadagitoy a binatog:

• 12:3–16:

• 12:38–44:

• 13:19–24:

• 14:1–5:

• 14:21–27:

• Dadduma pay a binatog a mangparegta kadakayo

Kalpasan ti panangbasayo kadagitoy a bersikulo, ania ti mariknayo a makaparegta nga aramiden a mangsurot ken ni Jesucristo?

Ti bilin iti 3 Nephi 12:48 ket mabalin a kasla makatalipupos—uray pay imposible. Ania ti masursuroyo iti mensahe ni Elder Jeffrey R. Holland iti “Be Ye Therefore Perfect—Eventually” (Liahona, Nob. 2017, 40–42) a makatulong kadakayo a makaawat kadagiti balikas ti Mangisalakan iti daytoy a bersikulo? Segun iti Moroni 10:32–33, ania ti mamagbalin a posible ti agbalin a naan-anay a kas iti Mangisalakan?

Kitaen met iti Dallin H. Oaks, “The Challenge to Become,” Ensign, Nob. 2000, 32–34; Gospel Topics, “Become like Jesus Christ,” Gospel Library; “Lord, I Would Follow Thee,” Hymns, no. 220; “Jesus Christ Teaches How to Live the Higher Law” (video), Gospel Library.

Agaramat kadagiti adalen a banag [object lesson]. Insuro ti Mangisalakan dagiti napapateg a kinapudno babaen ti panangibasar kadagiti pamiliar a banag. Mabalinyo nga aramiden ti maysa kasta met laeng a banag bayat ti panangbasa wenno panangisuroyo maipapan iti 3 Nephi 12. Ti panangkita wenno panangiggem iti sumagmamano nga asin, maysa a kandela, wenno amerikana ket mabalin a mangpasayaat iti panaglilinnawag maipapan kadagiti agnanayon a kinapudno nga insuro ti Mangisalakan.

3 Nephi 12:1–2; 15:23–24; 16:1–6

Nagasat dagiti mamati a saanda a makita.

Manmano unay kadagiti annak ti Dios a nakakita iti Mangisalakan ken nakangngeg iti timekna, a kas iti naaramid dagiti tao iti Bountiful. Kaaduan kadatayo ti ad-adda a kas kadagiti tao a nailadawan iti 3 Nephi 12:2; 15:23; ken 16:4–6. Ania dagiti kari a naaramid kadagiti kasta a tao kadagitoy a bersikulo? Kasano a naipatungpal dagitoy a kari iti biagyo?

Kitaen met iti Juan 20:26–29; 2 Nephi 26:12–13; Alma 32:16–18.

3 Nephi 12:21–30; 13:1–8, 16–18; 14:21–23

Maikagumaanak a dalusan dagiti tarigagay ti pusok.

Maysa a tema a mabalin a madlawyo kadagitoy a kapitulo ket ti awis ti Mangisalakan nga agbiag iti maysa a nangatngato a paglintegan—tapno agbalin a nalinteg a saan laeng kadagiti akinruar a tignaytayo ngem kadagiti pay puspusotayo. Sapulen daytoy a tema idi agsao ti Mangisalakan maipanggep iti panagsusuppiat iti (3 Nephi 12:21–26), kinarugit iti dayaw (3 Nephi 12:27–30), kararag (3 Nephi 13:5–8), ken panagayuno (3 Nephi 13:16–18). Ania dagiti dadduma pay a pagarigan a masarakanyo? Ania ti maaramidyo a mangpatarnaw kadagiti tarigagay ti pusoyo?

3 Nephi 14:7–11

Ikkannakto ti Nailangitan nga Ama kadagiti nasayaat a banag no agdawat, agsapul, ken agtuktokak.

Bayat ti panangbasayo iti awis ti Mangisalakan iti 3 Nephi 14:7–11 nga agdawat, agsapul, ken agtuktok, utobenyo no ania dagiti “nasayaat a bambanag” a mabalin a kayatna a dawatenyo. Dagiti sumaganad a mainayon a nasantuan a kasuratan ket mabalin a mangtulong kadakayo a makaawat no kasano ti agdawat, agsapul, ken agtuktok. Makatulongda pay a mangilawlawag no apay a di masungbatan dagiti sumagmamano a kararag iti wagas a namnamaenyo: Isaias 55:8–9; Helaman 10:4–5; Moroni 7:26–27, 33, 37; ken Doktrina ken Katulagan 9:7–9; 88:64. Kasano nga aringan dagitoy a binatog ti wagas a panagdawat, panagsapul, ken panagtuktokyo?

Kitaen met iti Milton Camargo, “Ask, Seek, and Knock,” Liahona, Nob. 2020, 106–8.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti kapanunotan para iti Panangisuro kadagiti Ubbing

3 Nephi 12:14–16

Makapagbalinak a nasayaat a pagwadan babaen ti panangsurot ken ni Jesus.

• No dadduma mabalin a saan a maamiris dagiti ubbing no kasano ti kadakkel ti panagparabur dagiti pagwadanda iti dadduma. Usarenyo ti 3 Nephi 12:14–16 a mangparegta kadakuada a mangparaniag iti silawda. Kas pagarigan, no mabasayo ti “sika” wenno “kenka” kadagitoy a bersikulo, kiddawem kadagiti annakyo a mangitudo iti bagbagida. Isarita kadagiti ubbing maipapan iti silaw a makitayo kadakuada no surotenda ni Jesucristo ken no kasano a paregtaennakayo a sumurot met Kenkuana. Mabalinyo ti aggigiddan nga agkansion iti maysa a kanta a mangparegta kadagiti ubbing nga agraniag a kas iti maysa a silaw, kas iti “I Am like a Star” (Children’s Songbook, 163).

• Tapno maparegta dagiti annakmo a saan a mangilemmeng iti lawagda (kitaen iti 3 Nephi 12:15), bay-am ida nga agsisinnublat nga aglemmeng wenno mangabbong iti maysa a pagsilawan wenno sabali pay a silaw. Mabalinda nga ikkaten ti abbong ti silaw iti tunggal kanito a manginaganda iti maysa a banag a mabalinda nga aramiden tapno agbalin a nasayaat a pagwadan iti dadduma.

3 Nephi 13:19–21

“Agurnongkayo kadagiti gameng idiay langit.”

• Ti panangbasa kadagitoy a bersikulo ket mabalin a mangyallukoy iti panaglilinnawag maipapan kadagiti banag nga ipategtayo. Nalabit a mabalinyo nga idauluan dagiti annakyo iti panagbirok iti gameng tapno agsapul kadagiti banag a mangipalagip kadakuada kadagiti gameng nga addaan iti agnanayon a pateg.

3 Nephi 14:7–11

Sungbatan ti Nailangitan nga Ama dagiti kararagko.

• Bayat ti panangbasam iti 3 Nephi 14:7, mabalin dagiti annakyo nga agaramid kadagiti tignay a mangibagi iti tunggal maysa kadagiti awis ti Mangisalakan iti daytoy a bersikulo. Kas pagarigan, mabalinda nga ingato dagiti imada (agdawat), pagbalinenda a kas largabista dagiti imada (agsapul), wenno agpammarangda nga agtuktok iti ridaw (agtuktok). Tulonganyo dagiti annakyo a mangpanunot kadagiti banag a mabalinda nga isao ken saludsoden kadagiti kararagda.

• Mabalin a magustuan dagiti annakyo ti maysa nga ay-ayam a pagdawatanda iti maysa a banag ken pangawatanda iti maysa a banag a naan-anay ti pakaidumaanna. Iti 3 Nephi 14:7–11, ania ti kayat ti Mangisalakan a maammuantayo maipapan iti Amatayo idiay Langit?

3 Nephi 14:21–27; 15:1

Kayat ti Mangisalakan a denggek ken aramidek no ania ti isurona.

• Mangpanunot kadagiti wagas a pakatulonganyo kadagiti annakyo a mangiladawan iti panunotda ti pangngarig kadagitoy a bersikulo. Nalabit a mabalin nga agdrowingda kadagiti ladawan, agaramid kadagiti tignay, wenno agbangon kadagiti banag iti rabaw dagiti solido ken nadarat a pundasion. Mabalinda pay a sukatan ti naganda iti “masirib a tao” bayat ti panagbasada iti 3 Nephi 14:24–27 wenno panagkantada iti “The Wise Man and the Foolish Man” (Children’s Songbook, 281). Wenno mabalinda ti tumakder tunggal mangngegda ti balikas nga “agaramid” iti 3 Nephi 14:21–27 ken 15:1.

• Adtoy ti maysa a banag nga adalen a mabalinmo a padasen: kiddawem kadagiti annakmo a mangpanunot a ti maysa kadagiti sakada ket ibagina ti panagdengngeg kadagiti balikas ti Mangisalakan ken ibagi ti sabali pay ti panangaramid iti insuro ti Mangisalakan. Awisenyo dagiti annakyo a mangpadas a mangtimbeng laeng iti “mangngeg” a sakada. Ania ti mapasamak no maysa a napigsa nga angin ti agpuyupoy iti siled? Kalpasanna mabalinyo ken dagiti annakyo ti agsapul kadagiti maitudo a banag nga insuro ti Mangisalakan nga aramidentayo: kitaen iti 3 Nephi 12:3–12, 21–26; 13:5–8.

Para iti ad-adu pay a kapanunotan, kitaen ti isyu ti magasin a Friend iti daytoy a bulan.

Ti Isasarungkar ti Mangisalakan kadagiti Tao iti America, ni Glen S. Hopkinson