“Septiembre 23–29: ‘Bumangon ket Umaykayo Kaniak.’ 3 Nephi 8–11,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2023)
“Septiembre 23–29. 3 Nephi 8–11,” Umaykayo, Sumurot Kaniak—Para iti Pagtaengan ken Simbaan: 2024 (2023)
Siak ti Silaw ti Lubong, ni James Fullmer
Septiembre 23–29: “Bumangon ket Umaykayo Kaniak”
3 Nephi 8–11
“Adtoy, siak ni Jesucristo, a pinaneknekan dagiti propeta nga umayto ditoy lubong” (3 Nephi 11:10). Addaan kadagitoy a balikas, inyam-ammo ti nagungar a Mangisalakan ti Bagina, a mangipatpatungpal iti 600 a tawen kadagiti padto iti Libro ni Mormon. “Dayta a panagparang ken dayta a pakdaar,” insurat ni Elder Jeffrey R. Holland, “ti nangbukel iti kapatgan a punto, ti kadayagan a kanito, iti intero a pakasaritaan ti Libro ni Mormon. Daytoy ti panangiparangarang ken ti paulog a nangipakaammo ken nangparegta iti tunggal propeta a Nephite. … Tunggal maysa ket nagsarita maipapan kenkuana, nagkanta maipapan kenkuana, nagtagainep maipapan kenkuana, ken inkararaganda ti panagparangna—ngem adtoy isu a talaga dayta. Ti aldaw dagiti aldaw! Dimtengen ti Dios a mamagbalin ti nasipnget a rabii a silaw ti agsapa” (Christ and the New Covenant [1997], 250–51).
Kitaen met iti “Jesus Christ Appears in the Ancient Americas” (video), Gospel Library.
Jesus Christ Appears in the Ancient Americas | 3 Nephi 8–11
Ominous destruction comes upon the people of Ancient America. Hope returns as survivors gather and witness the Resurrected Christ descend from Heaven.
Dagiti Kapanunotan iti Panagsursuro iti Pagtaengan ken iti Simbaan
Ni Jesucristo ti Silaw ti Lubong.
Mabalin a madlawyo a dagiti tema nga adda pakainaiganna iti sipnget ken lawag ket naulit iti intero a 3 Nephi 8–11. Ania ti masursuroyo manipud kadagitoy a kapitulo maipapan iti naespirituan a sipnget ken lawag? (kitaen, kas pagarigan, iti 3 Nephi 8:19–23; 9:18; 10:9–13). Ania ti mangisangbay iti sipnget iti biagyo? Ania ti mangisangbay iti lawag? Apay iti panagkunayo nga inyam-ammo ti Mangisalakan ti Bagina a kas “ti silaw ken ti biag ti lubong”? (3 Nephi 9:18; 11:11).
Dagiti pasamak a nailadawan iti 3 Nephi 9–11 ket maibilang a kasagraduan iti Libro ni Mormon. Basaenyo dagitoy a nainnayad, ken utobenyo a nasayaat. Dagitoy ti sumagmamano a saludsod a makatulong kadakayo. Ibilangyo ti panangisurat kadagiti impresion nga umay kadakayo.
-
Kasano koma ti nariknak no maysaak kadagitoy a tao?
-
Ania ti makaawis riknak maipapan iti Mangisalakan kadagitoy a kapitulo?
-
Kasano nga ammok a ni Jesucristo ti Mangisalakanko?
-
Kasano a nagbalin Isuna a silaw iti biagko?
Kitaen met iti Sharon Eubank, “Christ: The Light That Shines in Darkness,” Liahona, Mayo 2019, 73–76.
Isuratyo dagiti impresion. No isuratyo dagiti naespirituan nga impresion a maawatyo, dakdakkel ti posibilidad nga ad-adu ti maawatyo.
Aggagar ni Jesucristo a mamakawan.
Kinuna ni Elder Neil L. Andersen, “Paneknekak a kabaelan ken aggagar ti Mangisalakan a mangpakawan kadagiti basoltayo” (“Repent … That I May Heal You,” Liahona, Nob. 2009, 40). Sukisoken ti 3 Nephi 9–10 para iti pakakitaan ti asi ni Cristo ken ti kinagagarna a mamakawan. Ania ti masarakanyo iti 3 Nephi 9:13–22; 10:1–6 a mangtulong kadakayo a mangrikna iti ayat ken asina? Kaano a nariknayo nga “inummong” ken “tinarakennakayo”? (kitaen iti 3 Nephi 10:4).
Kasapulan ti Apo ti “nasneban a puso ken napnuan babawi nga espiritu.”
Sakbay ti yaay ti Mangisalakan, dagiti daton nga animal ket simbolo ti sakripisio ni Jesucristo (kitaen iti Moises 5:5–8). Ania a baro a bilin ti inted ti Mangisalakan iti 3 Nephi 9:20–22? Kasano nga itudonatayo Kenkuana ken iti sakripisiona?
Ania ti kayat a sawen ti mangidaton iti sakripisio nga addaan iti nasneban a puso ken napnuan babawi nga espiritu? Ania ti mariknayo a kayat ti Mangisalakan iti daytoy a sakripisio manipud kadakayo?
Masursurok a denggen ken maawatan ti timek ti Dios.
Kasano ti pannakaammoyo no makisarsarita ti Dios kadakayo? Nalabit a makatulong kadakayo ti padas dagiti tao iti 3 Nephi 11:1–8 a makaawat iti sumagmamano a pagbatayan ti panagdengngeg ken pannakaawat iti timek ti Dios. Mabalin nga isuratyo dagiti sagudayen ti timek ti Dios a nangngegan dagiti tao ken no ania ti inaramidda tapno maawatanda a nasaysayaat daytoy.
Mabalin met a makatulong ti panangsukisok kadagiti dadduma pay a nasantuan a kasuratan a mangiladawan iti timek ti Dios wenno ti impluensia ti Espirituna. Adtoy ti sumagmamano. Nalabit, kalpasan ti panangbasam kadagitoy, mabalinyo ti agsurat iti sumagmamano a pagannurotan iti panangbigbig iti paltiing: 1 Ar-ari 19:11–12; Taga Galacia 5:22–23; Alma 32:27–28, 35; Helaman 10:2–4; Ether 4:11–12; Doktrina ken Katulagan 9:7–9; 11:11–14.
Mabalinyo pay a pagimbagan no dumngeg kadagiti mammadto, apostol, ken dadduma pay a lider ti Simbaan ita nga addaan iti padas a makangngeg ken mangsurot iti timek ti Dios. Sumagmamano kadakuada ti mangibinglay kadagiti kapadasanda iti “Hear Him!” video collection iti Gospel Library. Ibilangyo ti agbuya iti maysa wenno ad-adu pay.
Kasano a yaplikaryonto ti nasursuroyo tapno mangngeg ken mabigbigyo ti timek ti Dios a nalawag?
Kitaen met iti Russell M. Nelson, “Hear Him,” Liahona, May 2020, 88–92; “This Is My Beloved Son,” Children’s Songbook, 76; Gospel Topics, “Personal Revelation,” Gospel Library.
Saggaysa, ni Walter Rane
Awisennak ni Jesucristo a manggun-od iti bukod a pammaneknek maipapan Kenkuana.
Adda agarup 2,500 a tattao ti nagummong idiay Bountiful idi nagparang ni Jesucristo (kitaen iti 3 Nephi 17:25). Iti baet daytoy dakkel a bilang, inawis ti Mangisalakan ida a “maysa-maysa” wenno saggaysa tapno riknaenda dagiti marka ti lansa kadagiti ima ken dapanna (3 Nephi 11:14–15). Bayat ti panagbasayo, panunotenyo no kasano koma ti rikna ti kaadda sadiay. Iti ania a wagwagas nga awisennakayo ti Mangisalakan a “bumangon ket umaykayo” Kenkuana? (3 Nephi 11:14).
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti kapanunotan para iti Panangisuro kadagiti Ubbing
Gapu ta daytoy a Domingo ket maikalima a Domingo ti bulan, maparegta dagiti mannursuro iti Primary a mangusar kadagiti aktibidad iti panagadal iti “Apendiks B: Panangisagana kadagiti Ubbing para iti Tungpal Biag iti Dana ti Katulagan ti Dios.”
No addaak iti kasipngetan, mabalin a silawko ni Jesucristo.
-
Tapno matulongan dagiti annakyo a manginaig kadagiti padas a nailadawan iti 3 Nephi 8–9, mabalinyo a saritaen manen wenno dumngeg iti rekording dagiti paset dagitoy a kapitulo iti maysa a nasipnget a siled. Ilawlawag no ania koma ti mabalin a rikna ti adda iti kasipngetan iti tallo nga aldaw. Kalpasanna mabalinyo nga isarita ti maipapan ken ni Jesucristo no apay a Silaw ti Lubong ni Jesucristo (kitaen iti 3 Nephi 9:18). Ania ti inyawis ni Jesus nga aramiden dagiti tao, ken aramidentayo, tapno makapagbalin Isuna a silawtayo? (kitaen iti 3 Nephi 9:20–22).
Salakniban ni Jesus dagiti taona a kas iti panangsalaknib ti maysa nga upa kadagiti piekna.
-
Ti ladawan ti maysa nga upa a manok a mangum-ummong kadagiti piekna ket mabalin a nabileg a ramit a pangisuro a makatulong kadagiti ubbing a makaawat iti kababalin ken mision ti Mangisalakan. Mabalinyo a basaen ti 3 Nephi 10:4–6 bayat ti panangkita ti pamiliayo iti ladawan ti maysa nga upa a manok ken dagiti piek. Apay a masapul nga ummongen ti upa a manok dagiti piekna? Apay a tarigagayan ti Mangisalakan nga ummongennatayo a yasideg Kenkuana? Kasano a makaumaytayo Kenkuana para iti kinatalged?
Awisennak ni Jesucristo nga umay Kenkuana.
-
Kasano a matulonganyo dagiti annakyo a makarikna iti Espiritu bayat ti panagbasayo iti 3 Nephi 11:1–15 nga aggigiddan? Nalabit a mabalinyo nga idawat kadakuada a mangibaga kadakayo no masarakanda ti maysa a banag kadagitoy a bersikulo a mangtulong kadakuada a makarikna iti ayat ti Dios. Mabalinyo met nga aramiden kadagiti ladawan iti daytoy a balabala wenno iti video nga “Jesus Christ Appears at the Temple” (Gospel Library). Isaritayo kadagiti ubbing maipapan no kasano ti riknayo no basaen ken utobenyo dagitoy a pasamak. Paibinglayyo met kadakuada dagiti riknada.
5:40Jesus Christ Appears at the Temple | 3 Nephi 11:1–17
The people of Ancient America come to Bountiful and gather. They hear the voice of God the Father introduce His Son. They witness Jesus descending from heaven and testify He is the Savior of the world.
Makisao kaniak ti Dios iti naalumamay, bassit a timek.
-
Nalabit a mabalinyo a basaen ti sumagmamano kadagitoy a bersikulo iti naalumamay, “bassit a timek” (3 Nephi 11:3). Wenno mabalinyo ti agpatokar iti maysa a recording ti maysa a kanta a “This Is My Beloved Son” (Children’s Songbook, 76) a siaalumamay tapno narigat daytoy a mangngeg. Ania ti nasken nga aramiden dagiti tao tapno maawatanda ti timek manipud iti langit? (kitaen dagiti bersikulo 5–7). Ania ti masursurotayo manipud iti padasda?
Kayat ni Jesucristo a mabuniaganak.
-
Basaenyo ti 3 Nephi 11:21–26, ket mabalinyo nga awisen dagiti annakyo a tumakder tunggal mangngeganda ti balikas a buniag. Ania ti insuro ni Jesus maipapan iti panagbuniag? No nakakita idin dagiti annakyo iti panagbuniag, awisenyo ida a mangiladawan no ania ti nakitada. Apay a kayat ni Jesus nga agpabuniagtayo?
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Maysa a Pastor, ni Howard Lyon