“Septiembre 9–15: ‘Naragsak a Damag ti Naindaklan a Rag-o.’ Helaman 13–16,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2023)
“Septiembre 9–15. Helaman 13–16,” Umaykayo, Sumurot Kaniak—Para iti Pagtaengan ken Simbaan: 2024 (2023)
Ni Samuel a Lamanite iti Rabaw ti Pader, ni Arnold Friberg
Septiembre 9–15: “Naragsak a Damag ti Naindaklan a Rag-o”
Helaman 13–16
Iti umuna a gundaway a pinadas nga imbinglay ni Samuel a Lamanite ti “naragsak a damag” iti Zarahemla (Helaman 13:7), saan nga inawat isuna ken pinapanaw dagiti natangken ti panagpuspusona a Nephite. Mabalinyo nga isao a kasla nangipasdekda iti di madupir a pader iti lawlaw ti puspusoda a manglapped kadakuada nga umawat iti mensahe ni Samuel. Naawatan ni Samuel ti kinapateg ti mensahe nga imburayna ken nangipakita iti pammati babaen ti panagtulnogna kadagiti bilin ti Dios, “a nasken nga agsubli manen, ket agipadto” (Helaman 13:3). Kas iti inaramid ni Samuel, maipasangotayo amin kadagiti pader bayat ti “panangisaganatayo iti dalan ti Apo” (Helaman 14:9) ken agkagumaantayo a mangsurot kadagiti propetana. Ket kas ken ni Samuel, maiburaytayo met ti pammaneknektayo ken ni Jesucristo, “nga awan duadua nga umayto,” ket awisenna amin a “mamati iti naganna” (Helaman 13:6; 14:13). Saanto a dumngeg ti amin, ket mabalin a sumagmamano ti naregget a mangsuppiat kadatayo. Ngem dagiti tao a mamati iti daytoy a mensahe nga addaan iti pammati ken ni Cristo ket makitada nga agpayso daytoy a mensahe ti “naragsak a damag ti naindaklan a rag-o” (Helaman 16:14).
Dagiti Kapanunotan iti Panagsursuro iti Pagtaengan ken iti Simbaan
Mangyeg ti Apo kadagiti ballaag babaen dagiti propetana.
Kadagiti nasantuan a kasuratan, no dadduma maidasig dagiti propeta kadagiti agwanawan iti rabaw ti pader wenno torre nga agiballaag kadagiti pagpeggadan (kitaen iti Isaias 62:6; Ezequiel 33:1–7). Bayat ti panagadalyo kadagiti balikas ni Samuel iti Helaman 13, ibilangyo no kasano a kasla maysa nga agwanawan para kadakayo. Ania ti kinunana a kasla mainaig iti aldawtayo? (kitaen nangnangruna dagiti bersikulo 8, 21–22, 26–29, 31, ken 38). Kas pagarigan, ania ti insuro ni Samuel maipapan iti panagbabawi? maipapan iti panagpakumbaba ken kinabaknang? Maipapan iti panagkalikagum iti ragsak “iti panagaramid iti basol”?
Mabalinmo pay ti mangsukisok kadagiti kallabes a mensahe ti komperensia para kadagiti umasping a ballaag nga inted ti Apo babaen kadagiti moderno a propeta. Ania ti mariknam a makaparegta nga aramiden maipapan kadagitoy a ballaag?
Agsapul kadagiti pagtuladan. Ti pagtuladan ket maysa a plano wenno modelo a mabalin nga aramaten a kas maysa a pangiwanwan tapno maipatungpal ti maysa nga aramiden. Kadagiti nasantuan a kasuratan, masarakantayo dagiti pagtuladan a mangipakita no kasano nga ipatungpal ti Apo ti aramidna, kas iti panangibaonna kadagiti katulonganna a mangballaag kadagiti tao.
No dumngegtayo kadagiti propeta, iturongdatayto ken ni Jesucristo.
Awisennak ti Dios nga agbabawi.
Dagiti ballaag ni Samuel maipapan kadagiti panangukom ti Dios nagtultuloy a nangiraman iti naasi nga awis nga agbabawi. Sapulenyo dagitoy nga awis iti unos ti Helaman 13–15 (kitaen nangnangruna iti Helaman 13:6–11; 14:15–19; 15:7–8). Ania ti masursuroyo manipud kadagitoy a bersikulo maipapan iti panagbabawi? Makita ti sumagmamano a tao ti panagbabawi a kas nainget a pannusa—maysa a banag a liklikan. Iti panagkunayo, kasano a kinayat ni Samuel a makita dagiti Nephite ti panagbabawi?
Bayat ti panagsaganayo a mangisuro, ibilangyo ti panagadal iti mensahe ni Presidente Russell M. Nelson “We Can Do Better and Be Better” (Liahona, Mayo 2019, 67). Kasano nga ilawlawagna ti panagbabawi? Ania dagiti bendision ti napudno a panagbabawi a masarakanyo iti mensahena? Mabalinyo pay a sapulen dagiti masinunuo a banag nga inyawis kadatayo ti propeta a balbaliwantayo. Ania ti ibagbaga ti Espiritu Santo kadakayo a kasapulanyo ti agbalbaliw? Ibilangyo ti panangisurat iti bukod a paltiing a maawatyo.
Kasano a naiduma ti panagbabawi ngem iti panangbalbaliw laeng iti ugaliyo? Apay a napateg nga awatentayo ti awis ti Dios nga agbabawi? Bayat ti panangutobyo iti daytoy, ibilangyo ti agkanta wenno dumngeg iti himno a mangyebkas iti daytoy nga awis, kas iti “How Gentle God’s Commands” (Hymns, no. 125).
Kitaen met iti “Jesus Christ Will Help You,” For the Strength of Youth: A Guide for Making Choices, 6–9; “Repentance: A Joyful Choice,” “Principles of Peace: Repentance” (videos), Gospel Library; Gospel Topics “Repentance,” Gospel Library.
Nangibaon ti Dios kadagiti pagilasinan ken datdatlag a mangpaneknek iti pannakayanak ken ipapatay ti Mangisalakan.
Iti Helaman 14, inlawlawag ni Samuel a nangipaay ti Apo kadagiti pagilasinan ti pannakayanak ken ipapatay ti Mangisalakan tapno dagiti tao “maammuanda ti … yaayna” ken “mamatida iti naganna” (Helaman 14:12). Bayat ti panagadalyo iti Helaman 14, kitaen dagiti pagilasinan ti pannakayanak ti Mangisalakan kadagiti bersikulo 1–8 ken dagiti pagilasinan ti ipapatayna kadagiti bersikulo 20–28. Apay iti panagkunayo nga agbalin a nasamay a wagas dagitoy a pagilasinan a mangipasimudaag iti pannakayanak ken ipapatay ni Jesucristo?
Makatulong kadakayo a “mamati iti nagan [ti Mangisalakan]” ti dadduma pay a naperpersonal ken saan unay a napateg a pagilasinan.” Ania ti inaramidna a mangpapigsa iti pammatiyo Kenkuana?
Ania ti patigmaan a naited maipapan kadagiti pagilasinan iti Helaman 16:13–23? Kasano a maliklikanyo ti galad dagiti tao a nailadawan kadagitoy a bersikulo?
Kitaen met iti Alma 30:43–52; Ronald A. Rasband, “By Divine Design,” Liahona, Nob. 2017, 55–57.
Maysa a pagilasinan ti ayat ti Apo ti pannakadusa.
Naglaon dagiti balikas ni Samuel iti adu a naiget a pannusa, ngem mangted kadatayo ti Helaman 15:3 iti pannirigan iti pannakadusa manipud iti Apo. Kasano a makapagbalin ti pannusa a maysa a pagilasinan ti ayat ti Apo? Ania ti makitam a pammaneknek iti ayat ken asi ti Apo kadagiti padto ken ballaag ni Samuel?
Ibilang ti panangadal iti mensahe ni Elder D. Todd Christofferson nga “As Many as I Love, I Rebuke and Chasten” (Liahona, Mayo 2011, 97–100), nga agsapsapul iti tallo a panggep ti nadiosan a pannakadusa. Kasano a nakitamon ti Dios kadagitoy a wagas iti biagyo?
Dagiti propeta ti mangitudo kaniak ken ni Jesucristo.
Iti Helaman 16, ania ti masursuroyo manipud kadagiti immawat kadagiti pannursuro ni Samuel? Ania ti masursuroyo manipud kadagiti saan nga immawat kenkuana? Panunoten maipapan iti no kasano a nakatulong kadakayo ti panangsurot kadagiti sibibiag a propeta nga umas-asideg ken ni Jesucristo.
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti kapanunotan para iti Panangisuro kadagiti Ubbing
Makasaonak ti Dios iti pusok.
-
Kasano a maisuroyo dagiti annakyo a makisarita ti Dios iti pusotayo, kas iti inaramidna ken ni Samuel? Nalabit mabalinyo a kiddawen kadakuada nga ipakitada kadakayo ti nadumaduma a wagas ti pannakisarita nga awan dagiti balikas (kas iti tignay wenno ekspresion ti rupa). Mabalin a mangiturong daytoy iti panaglilinnawag maipapan kadagiti nadumaduma a wagas a pannakisarita kadatayo ti Nailangitan nga Ama. Kas paset daytoy a panaglilinnawag, mabalinyo ken dagiti annakyo ti mangkita iti ladawan ni Samuel a Lamanite (addaan dua daytoy a balabala) ket basaen ti Helaman 13:2–5 bayat ti panagdengngeg dagiti annakyo no kasano nga imbaga ti Dios ken ni Samuel no ania ti isaona.
-
Adu kadatayo—nangruna kadagiti ubbing—ti agkasapulan iti tulong nga agsursuro tapno mabigbig no kasano ken no kaano a makisarsarita ti Dios kadatayo. Mabalinyo nga isarita kadagiti annakyo maipapan iti panawen idi tinulongannakayo ti Espiritu Santo a maammuanyo iti pusoyo no ania ti kayat iti Dios nga aramiden wenno isaoyo. Ilawlawag no kasano nga ammoyo a makisarsarita kadakayo ti Dios. Nalabit a mabalin nga ibinglay dagiti annakyo dagiti kasta met la padas a napasaranda.
Isuro dagiti propeta ti maipapan ken ni Jesucristo.
-
Ti aggigiddan a panangkanta iti “Samuel Tells of the Baby Jesus” (Children’s Songbook, 36) mabalin a nasayaat a wagas a panangisuro kadagiti annakyo no ania ti insuro ni Samuel maipapan ken ni Jesucristo. Ti panangibinglay iti “Kapitulo 40: Isarita ni Samuel a Lamanite maipapan ken ni Jesucristo” (Dagiti Estoria iti Libro ni Mormon, 111–13) ti sabali pay. Ania ti insuro ni Samuel maipapan iti Mangisalakan? Nalabit a mabalinyo pay nga ibinglay no ania ti isuro dagiti agdama a propeta maipapan Kenkuana. Kasano a mangbangon iti pammatitayo Kenkuana dagiti balikasda?
Mabendisionannak no surotek ti propeta.
-
Mapabilegyo ti panagtalek dagiti annakyo iti propeta babaen ti panangipakitayo kadakuada kadagiti pagwadan dagiti tao a napudno. Masarakan ti sumagmamano kadagitoy iti Helaman 16:1, 5. Bayat ti panangbasayo, mabalin dagiti ubbing ti tumakder no mangngeganda ti maysa a banag nga inaramid dagiti tao idi namatida kadagiti balikas ni Samuel. Kalpasanna, bayat ti panagbasayo kadagiti bersikulo 2 ken 6, mabalin dagiti ubbing ti agtugaw no mangngeganda ti maysa a banag nga inaramid dagiti tao no saanda a mamati. Kasano a maipakitatayo a patientayo dagiti balikas ti sibibiag a propeta? Isaritayo kadagiti ubbing no kasano a naparaburankayo bayat ti panangsurotyo iti balakad ti Apo babaen kadagiti propetana.
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ni Samuel a Lamanite, ni Lester Yocum.