Ginuyugoy ti ama ni Nephi, a ni Helaman, dagiti annakna a lallaki a “manglagip, manglagip.” Tinarigagayanna a lagipenda dagiti kapuonanda, lagipenda dagiti sao dagiti propeta, ken kangrunaan iti amin lagipenda “ti Mannubbottayo, a ni Cristo” (kitaen iti Helaman 5:5–14). Nalawag a nanglagip ni Nephi gapu ta daytoy ti isu met la a mensahe nga impakdaarna kadagiti sumaruno a tawen “nga awanan pannakabannog” kadagiti tao (Helaman 10:4). “Kasano a nalipatamon ti Diosmo?” sinalusodna (Helaman 7:20). Amin dagiti panagkagumaan ni Nephi—panangaskasaba, panagkarkararag, panagaramid kadagiti milagro, ken panagdawdawatna iti Dios para iti maysa a panagbisin—ket gandat a mangtulong kadagiti tao nga umasideg iti Dios ken manglagip Kenkuana. Iti adu a wagas, ti pananglipat iti Dios ket dakdakkel a problema ngem iti saan a panangammo Kenkuana. Ken nalaklaka ti manglipat Kenkuana no mariribukan dagiti panunottayo “iti awan kaes-eskanna a banag iti daytoy a lubong” ken makullaapan iti basol (Helaman 7:21; kitaen met iti Helaman 12:2). Ngem, kas ipakita ti panagministro ni Nephi, saan pay a pulos a naladaw ti manglagip ket “agsublikayo … iti Apo a Diosyo” (Helaman 7:17).
Dagiti Kapanunotan iti Panagsursuro iti Pagtaengan ken iti Simbaan
Ipalgak dagiti propeta ti pagayatan ti Dios kadagiti tao.
Helaman 7–11 ti nangnangruna a nasayaat a lugar a pakasursuruan maipapan iti ar-aramiden dagiti propeta. Bayat ti panangbasayo kadagitoy a kapitulo, ikasoyo dagiti tignay, pampanunoten, ken pannakipulapol ni Nephi iti Apo. Kasano a matulongannakayo ti panagministro ni Nephi tapno maawatanyo ti akem dagiti propeta? Adtoy ti sumagmamano a pagarigan. Ania pay dagiti masarakanyo?
Helaman 7:17–22: Yararaw dagiti propeta ti panagbabawi ken iballaagda dagiti bunga ti basol.
Batay iti no ania ti masarakanyo, kasano nga iladawanyo no ania ti maysa a propeta ken no ania ti aramidenna? Ibilang ti panangisurat iti ababa a depinision. Kalpasanna kitaen no ania ti inayonyo iti depinisionyo kalpasan a basaenyo ti entry para iti “Propeta” iti Pangiwanwan iti Nasantuan a Kasuratan (Gospel Library) wenno “Follow the Living Prophet” (Teachings of Presidents of the Church: Ezra Taft Benson [2014], 147–55).
Nadlawyo kadi no kasano ti kinatured ni Nephi iti Helaman 7:11–29? Apay a mariknayo a no dadduma a nasken nga agsarita dagiti propeta a situtured a kas iti inaramid ni Nephi? Ibilangyo ti panangsapul kadagiti sungbat iti benneg a napauluan iti “Dika Masdaaw” iti mensahe ni Elder Neil L. Andersen “The Prophet of God” (Liahona, Mayo 2018, 26).
Iti panangpanunotyo kadagitoy a kinapudno, utobenyo no kasano a binendisionannakayo ti Apo babaen ti panagministro dagiti propetana. Ania ti insurona kadakayo itay nabiit babaen iti sibibiag a propetatayo? Ania ti ar-aramidem tapno dumngeg ken sumurot iti panangiturong ti Apo?
Kitaen met iti Gospel Topics, “Prophets,” Gospel Library.
Nasken a mabangon ti pammatik ken ni Jesucristo iti ad-adda pay ngem dagiti pagilasinan ken milagro.
No umdasen dagiti pagilasinan wenno milagro a mangbalbaliw iti puso ti maysa a tao, napasurot koma ti amin a Nephite babaen kadagiti nakaskasdaaw a pagilasinan nga impakita ni Nephi iti Helaman 9. Ngem saan a napasamak dayta. Kitaen dagiti nadumaduma a wagas ti panagtignay dagiti tao iti milagro iti Helaman 9–10. Kas pagarigan, mabalinyo nga idilig ti sungbat dagiti lima a lallaki ken dagiti kangrunaan nga ukom iti Helaman 9:1–20 (kitaen met iti Helaman 9:39–41; 10:12–15). Ania ti masursuroyo manipud kadagitoy a padas maipapan iti no kasano a pagtalinaedenyo a mabangon ti pammatiyo ken ni Jesucristo?
Mangted ti Apo iti bileg kadagiti tao nga agkalikagum a manggun-od iti pagayatanna ken agkagumaan nga agtungpal kadagiti bilinna.
Bayat ti panagadalyo iti Helaman 10:1–12, kitaen no ania ti inaramid ni Nephi a manggun-od iti panangtalek iti Apo. Kasano nga inladawan ni Nephi a sinapulna ti pagayatan ti Apo ngem iti bukodna a pagayatan? Ania ti iparegta nga aramidenyo ti padas ni Nephi?
Ti panangutob iti balikas ti Dios ti mangawis iti paltiing.
No nakariknakayo idin iti pannakaikuspil, pannakadanag, wenno pannakatikaw, mabalinyo a sursuruen ti maysa a napateg a leksion manipud iti pagwadan ni Nephi iti Helaman 10:2–4. Ania ti inaramidna idi nariknana ti “pannakauppapay”? (bersikulo 3).
Inlawlawag ni Presidente Henry B. Eyring, “No agutobtayo, awisentayo ti paltiing babaen iti Espiritu”(“Serve with the Spirit,” Liahona, Nob. 2010, 60). Kasano a maaddaankayo iti galad a managutob?
Kasano a malagipyo dagiti napateg nga impormasion—kas iti panagkasangay ti maysa a miembro ti pamilia wenno impormasion para iti eksamen? Kasano a maipada daytoy iti panagkagumaan a kasapulan a “manglagip iti Apo” (Helaman 12:5). Kasano a maiduma daytoy?
Helaman 12 iladawanna ti sumagmamano a banag a pakaigapuan ti pananglipat dagiti tao iti Apo. Nalabit a mabalinyo nga ilista dagitoy ken utobenyo no makasinga dagitoy kadakayo manipud Kenkuana. Ania ti mangtulong kadakayo a manglagip ken ni Jesucristo? Ania ti mangparegta kadakayo nga agaramid maibatay iti no ania ti nasursuroyo?
Agaramat kadagiti adalen a banag [object lesson]. Masansan nga innaig ti Mangisalakan dagiti pagbatayan ti ebanghelio kadagiti inaldaw a banag a pamiliar dagiti tao. No panagsursuro ken panangisuro maipapan iti Helaman 12:1–6, mabalinyo nga idilig ti “ti pannakaidna … dagiti tattao” iti wagas a mariknatayo a mangikagkagumaan a mangtimbeng iti maysa a luppo. Kasano a makapagtalinaedtayo a natalged a naespirituan?
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Tapno mangirugi iti saritaan maipapan iti pananglaglagip iti Apo, mabalinyo nga ibaga kadagiti annakyo maipapan iti maysa a panawen idi nalipatanyo ti maysa a banag. Paibinglayyo kadakuada dagiti isu met a bukodda a padas. Aggigiddan a basaen ti Helaman 7:20–21 ken kiddawen kadagiti annakyo no ania ti panagkunada a kaipapanan ti manglipat iti Dios. Nalabit a makadrowing dagiti annakyo kadagiti ladawan dagiti banag a mabalin a pakaigapuan ti pananglipattayo iti Apo ken usaren dagiti drowingda a mangabbong iti maysa a ladawan ni Jesus. Kalpasanna mabalinda ti agpanunot kadagiti banag a mabalinda nga aramiden a manglagip Kenkuana. Bayat iti panangibinglayda kadagiti kapanunotanda, saggaysa nga ikkatenda dagiti drowing agingga a maipakita ti ladawan ti Mangisalakan.
Tulonganyo dagiti annakyo a mangsukisok iti Helaman 8:13–23 a mangsapul iti nagnagan dagiti propeta a nangisuro maipapan ken ni Jesucristo. Nalabit a mabalinda nga ipasa iti aglawlaw ti maysa a ladawan ni Jesus tunggal makasarakda iti maysa. Ania ti insuro ti sibibag a propeta maipapan iti Mangisalakan?
Mabalinyo pay nga aggigigddan nga agkansion iti maysa a kanta maipapan kadagiti propeta, a kas iti “Follow the Prophet” (Children’s Songbook, 110–11). Mabalinyo ken dagiti annakyo ti pumili iti maysa a kangrunaan a ragup ti balikas manipud iti kanta, ket isurat ti maysa a balikas manipud iti ragup ti balikas iti tunggal maysa ti sumagmamano a sinan-tugot ti saka a papel. Kalpasanna mabalinyo nga ikabil dagiti sinantugot ti saka iti suelo nga agturong iti ladawan ti Mangisalakan, ket mabalin a suroten dagiti annakyo dagiti tugot ti saka nga agturong iti ladawan. Ilawlawag a ti panangsurot iti propeta ti mangiturong kadatayo ken ni Jesucristo?
Ti panangutob kadagiti balikas ti Dios ti mangyawis iti paltiing.
Tapno matulonganyo dagiti annakyo a makaawat no ania ti kayat a sawen ti agutob, mabalinyo nga aggigiddan a basaen ti “Utoben” iti Pangiwanwan ti Nasantuan a Kasuratan (Gospel Library). Ania ti sumagmamano a dadduma pay a balikas a maipada iti utoben? Nalabit a mabalinyo a basaen ti Helaman 10:1–3 nga aggigiddan ken sukatanyo ti balikas nga utoben kadagita a dadduma pay a balikas. Kasaritayo dagiti annakyo maipapan kadagiti wagas a paset ti panagadalda iti nasantuan a kasuratan ti panangutob.
Nagtulnog ni Nephi iti Nailangitan nga Ama uray no kaipapananna ti panagaramid iti maysa a banag a narigat. Kas maysa a pagarigan daytoy, mabalinyo ken dagiti annakyo ti agbasa iti Helaman 102. Nalabit a mabalin a yakem dagiti annakyo ti inaramid ni Nephi—magna nga agturong iti maysa a bangir ti siled (a kasla agawidda iti pagtaengan), agsardeng, agpusipos, ken magna nga agturong iti sabali pay a bangir ti siled (a kasla agsublida a mangisuro kadagiti tao). Ania dagiti sumagmamano a banag a tarigagayan ti Nailangitan nga Ama nga aramidentayo?
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ladawan
Natakuatan a mammapatay ni Seantum
Babaen ti sagut ti padto, narisut ni Nephi ti pannakapapatay ti panguluen nga ukom.