Agosto 26–Septiembre 1: “Ti Bato ti Mannubbottayo”

Helaman 1–6

Naisurat iti libro ni Helaman dagiti agpadpada a panagballigi ken trahedia kadagiti Nephite ken Lamanite. Nangrugi daytoy iti “maysa a nadagsen a kasasaad dagiti tao ni Nephite” (Helaman 1:1), ket nagtultuloy a dimteng dagitoy a kinarigat iti unos ti kasuratan. Ditoy a mabasatayo maipapan iti problema ti politika, bunggoy dagiti mannanakaw, saan a panangawat kadagiti propeta, ken kinapannakkel ken kinaawan pammati iti intero a daga. Ngem makitatayo pay dagiti pagarigan kas kada Nephi ken Lehi ken “ti ad-adu a napakumbaba a paset dagiti tao,” a saanda laeng a nagbiag ngem dimmur-asda a naespirituan (Helaman 3:34). Kasano nga inaramidda daytoy? Kasano a nagtalinaedda a napigsa kabayatan ti panangrugi a marpuog ken matnag ti sibilisasionda? Iti kasta met la a wagas nga agtalinaed a napigsa ti asino man kadatayo iti “nabileg a bagyo” a yeg ti sairo a “sumaplit [kadatayo]”—babaen iti panangbangon iti biagtayo “babaen ti bato ti Mannubbottayo, nga isu ni Cristo, ti Anak ti Dios, … ti pamuon a pangbangonan dagiti tao a saanda a matuang” (Helaman 5:12).

Dagiti Kapanunotan iti Panagsursuro iti Pagtaengan ken iti Simbaan

Helaman 1–6

Isinanak ti kinapannakkel manipud iti Espiritu ken bileg ti Dios.

Bayat ti panagbasayo iti Helaman 1–6, mabalin a makitayo ti maysa a pagtuladan iti ugali dagiti Nephite. No nalintegda, bendisionan ida ti Dios, ket rumang-ayda. Kalpasan ti maysa a panawen, agbalinda napannakkel ken nadangkes, nga agar-aramidda kadagiti pili a mangiturong kadakuada iti pannakadadael ken panagsagaba. Kalpasanna napakumbaba ken naparegtada nga agbabawi, ket bendisionan manen ti Dios ida. Masansan a maulit mismo ti pagtuladan gapu ta aw-awagan ti sumagmamano daytoy iti “siklo ti kinapalangguad.”

Ti “siklo ti kinapalangguad”

Sapulenyo dagiti pagarigan daytoy a siklo bayat ti panagbasayo iti Helaman 1–6. Dagitoy dagiti sumagmamano a saludsod a makatulong kadakayo a makaawat iti daytoy a pagtuladan:

• Ania dagiti pakakitaan ti kinapannakkel a makitayo kadagiti Nephite? (kitaen, kas pagarigan, iti, Helaman 3:33–34; 4:11–13). Makitayo kadi dagiti kasta met la a pakakitaan ti kinapannakkel iti bagiyo?

• Ania dagiti bunga ti kinapannakkel ken kinadangkes? (kitaen iti Helaman 4:23–26). Ania dagiti bunga ti kinapakumbaba ken panagbabawi? (kitaen iti Helaman 3:27–30, 35; 4:14–16).

• Ania ti kayat ni Helaman a malagip dagiti annakna a lallaki? (kitaen iti Alma 5:4–12). Kasano a ti pananglaglagip kadagitoy a kinapudno ket matulongannakayo a mangliklik iti panagbalin a napannakkel?

Kitaen met iti “Chapter 18: Beware of Pride,” Teachings of Presidents of the Church: Ezra Taft Benson (2014], 229–40; “I Need Thee Every Hour,” Hymns, no. 98.

Helaman 3:24–35

Ti pammati ken ni Cristo punnuenna ti kararuak iti rag-o.

Iti Helaman 3, inladawan ni Mormon ti panawen ti panagrag-o idi nabendisionan unay ti Simbaan a namagsiddaaw kadagiti lider. Batay iti no ania ti nabasayo kadagiti bersikulo 24–32, ania ti panagkunayo a nangiturong iti dayta a naragsak a kasasaad? Saan a nagtultuloy iti rag-o ti amin a miembro, nupay kasta. Kitaen dagiti pagdumaan dagiti tao a nailadawan kadagiti bersikulo 33–35. Ania ti masursuroyo manipud iti pagwadanda?

Sapulen ti personal a panangyaplikar. Inusar ni propeta Mormon ti ragup ti balikas a “kasta ti pannakakitatayo” a mangyunay-unay kadagiti napateg a kinapudno bayat ti panangyababana iti Libro ni Mormon. Kas pagarigan, ania ti kayatna a makitatayo iti Helaman 3:27–30? Bayat ti panagadalyo iti nasantuan a kasuratan, mabalinyo ti agsardeng sagpaminsan a mangileppas iti ragup ti balikas a “kasta ti pannakakitatayo” maipanggep iti no ania ti nabasayo.

Helaman 5:6–7

Madayawko ti nagan ti Mangisalakan.

Ti panangbasa iti Helaman 5:6–7 mabalin a mangparegta kadakayo a mangibilang kadagiti nagan a naited kadakayo, agraman dagiti apeliedo. Ania ti kayat a sawen dagitoy a nagan kadakayo? Kasano a madayawyo dagitoy? Napatpateg pay, ibilang no ania ti kaipapanan ti panangikut iti nagan ti Mangisalakan (kitaen Moroni 4:3). Kasano ti panangdayawyo iti dayta sagrado a nagan?

Helaman 5:12–52

No aramidek ni Jesucristo a pamuonko, saanak a matuang.

Ania ti kayat a sawen kadakayo ti “bangonenyo ti pamuonyo” iti “bato ti Mannubbottayo”? (Helaman 5:12). Kasano a nasarakanyo ti kinatalged manipud kadagiti bagyo ti biag ken ni Jesucristo? Bayat ti panangbasayo iti Helaman 5:12–52, lasinenyo no kasano a naparaburan da Nephi ken Lehi gapu iti panangibangonda iti pammatida iti bato ti Mannubbotda.

Makita ti sumagmamano a tao a makatulong daytoy no iladawanda iti panunotda ti ad-adalenda. Tapno mailadawan ti Helaman 5:12, mabalinmo ti mangbangon iti bassit nga estruktura iti nadumaduma a kita ti pundasion. Kalpasanna mabalinyo ti mangparnuay iti “napigsa a bagyo” babaen iti panangisumpit iti danum iti daytoy ken panangusar ti paypay wenno hair dryer tapno makaparnuay iti angin. Ania dagiti nalawag a pannakaammo ken pannakaawat nga ited daytoy kadakayo maipapan iti panangbangon iti pundasionyo ken ni Jesucristo? Ania pay ti masursuroyo manipud iti video nga “A Secure Anchor”? (Gospel Library).

Ti bersikulo 50 dakamatenna ti “kinabileg dagiti pammaneknek” nga inawat dagiti Lamanite. Ti panangbasa iti Helaman 5:12–52 mabalin a mangipalagip kadakayo kadagiti pammaneknek nga inted ti Dios kadakayo. Kas pagarigan, mabalin a ti “maysa nga arasaas” manipud iti Espiritu Santo ti nangpabileg iti pammatiyo iti Mangisalakan (Helaman 5:30; kitaen met iti Doktrina ken Katulagan 88:66). Wenno nalabit addakayon iti sipnget ket nagpukkawkayo iti Dios para iti dakdakkel a pammati (kitaen iti Helaman 5:40–47). Ania dagiti dadduma pay a padas a nakatulong kadakayo a nangbangon iti pundasionyo ken ni Jesucristo?

Kitaen met iti Russell M. Nelson, “The Temple and Your Spiritual Foundation,” Liahona, Nob. 2021, 93–96; Sean Douglas, “Facing Our Spiritual Hurricanes by Believing in Christ,” Liahona, Nob. 2021, 109–11; Gospel Topics, “Faith in Jesus Christ,” Gospel Library.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Helaman 3:24, 33–34; 4:11–15

Kayat ti Nailangitan nga Ama nga agbalinak a napakumbaba.

• Ibilangyo ti panangawis kadagiti annakyo a mangidrowing iti bukodda a bersion ti “siklo ti kinapannakkel,” a naibatay iti diagram iti ngato. Kalpasanna, bayat ti aggigiddan a panagbasayo iti Helaman 3:24, 33–34 ken 4:11–15, mabalinda ti mangitudo iti nadumaduma a paset ti siklo nga iladawan dagitoy a bersikulo. Kasano a mapilitayo ti agpakumbaba—ken agtalinaed iti kasta a wagas?

Helaman 5:12

Bangonekto ti pundasionko ken ni Jesucristo.

• Ibilangyo ti panangusar iti ladawan ti templo a mangirugi iti saritaan maipapan no apay a kasapulan dagiti pasdek ti natibker a pundasion. Wenno mabalinyo a kitaen ti pundasion ti pagtaenganyo wenno pasdek ti Simbaan. Tapno mayunay-unay ti pigsa ti maysa a kasla bato a natibker a pundasion, mabalin a padasen dagiti annakyo a yakar ti bato babaen ti panangpuyotda iti daytoy. Aggigiddan a basaen ti Helaman 5:12, ken saludsoden kadagiti annakyo no apay nga iti panangkunada nga “awan duadua a pamuon” ni Jesucristo iti biagtayo. Kasano a mabangontayo ti biagtayo Kenkuana? (Kitaen iti Helaman 3:27–29, 35 ken Pagannurotan ti Pammati 1:4).

• Awisenyo dagiti annakyo a mangbangon iti maysa a sinan-torre babaen iti panangusar iti bloke wenno sabali a pay a material iti nadumaduma a kita ti pundasion). Kasano a maipada daytoy natibker a pundasion ken ni Jesucristo? Mabalinda nga inayon ti bloke iti estruktura para iti tunggal kapanunotan nga ibinglayda maipapan iti no ania ti maaramidda tapno makasurotda Kenkuana.

Helaman 5:21–52

Agarasaas ti Espiritu iti naalumamay, bassit a timek.

• Ti timek a nailadawan iti Helaman 5:29–30, 45–47 isuronatayo iti maysa a wagas a pannakisao ti Espiritu Santo kadatayo. Tapno matulongan dagiti annakyo a makaawat iti daytoy a kinapudno, ibilangyo ti panangbasa iti “Kapitulo 37: Da Nephi and Lehi iti Pagbaludan” (Dagiti Estoria iti Libro ni Mormon, 99–102). No isaritayo ti maipapan iti timek a nangngegan dagiti tao, agsaritakayo iti naalumamay a timek. Ulitenyo ti estoria iti sumagmamano a gundaway, ken awisenyo dagiti ubbing nga agarasaas kadakayo. Tulongam ida a mangpanunot iti dadduma pay a wagas a mabalin a pakisaritaan ti Espiritu Santo kadatayo. Tapno mapatibker daytoy a pagbatayan, mabalinyo ti aggigiddan nga agkanta iti “The Still Small Voice” (Children’s Songbook, 106–7).

Helaman 5:20–52

Ti panagbabawi ti mangsukat iti naespirituan a sipnget iti lawag.

• Tapno mayunay-unay no ania ti isuro ti Helaman 5:20–41 maipapan iti sipnget ken lawag, padasen a basaen wenno gupgopen dagitoy a bersikulo iti sipnget, nga agusar laeng iti flashlight para iti lawag. Mabalin a dumngeg dagiti annakyo no ania ti kasapulan nga aramiden dagiti tao tapno maikkat ti sipnget. Kalpasanna sindian ti silaw, ken basaen dagiti bersikulo 42–48 nga aggigiddan. Ania ti isuro kadatayo dagitoy a bersikulo maipapan iti panagbabawi?

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Uray iti pagbaludan, nasalakniban da Nephi and Lehi babaen iti bileg ti Dios.

© The Book of Mormon for Young Readers, Da Nephi ken Lehi a Linawlaw ti Adigi ti Apoy, ni Briana Shawcroft; saan a mabalin a kopiaen