Agosto 19–25: “Nataginayon babaen ti Datdatlag a Bilegna.” Alma 53–63
“Agosto 19–25: ‘Nataginayon babaen ti Datdatlag a Bilegna.’ “Alma 53–63,” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2024 (2023)
“Agosto 19–25. Alma 53–63,” Umaykayo, Sumurot Kaniak—Para iti Pagtaengan ken Simbaan: 2024 (2023)
Ladawan
dua ribu nga agtutubo a mannakigubat
Dua Ribu nga Agtutubo a Mannakigubat, ni Arnold Friberg
Agosto 19–25: “Nataginayon babaen ti Datdatlag a Bilegna”
No maidasig kadagiti buyot a Lamanite, awan koma ti gundaway nga agballigi ti “bassit a buyot” ni Helaman (Alma 56:33) nga agtutubo a lallaki. Malaksid iti bassit a bilangda, dagiti soldado ni Helaman ket “nakaub-ubbingda amin,” ken “pulos a dida nakiranget” (Alma 56:46–47). Iti sabali a wagas, mabalin a kasla pamiliar ti situasionda kadatayo a no dadduma mariknatayo a basbassittayo ken maabaktayo iti pannakirangettayo iti ud-udina nga aldaw a maibusor ken ni Satanas ken dagiti puersa ti dakes ditoy lubong.
Ngem adda dagiti sumagmamano a pagsayaatan ti buyot ni Helaman kadagiti Lamanite nga awan pakainaiganna iti kaadu ti bilang dagiti soldado wenno paglaingan iti militar. Pinilida ni Helaman, maysa a propeta, a mangidaulo kadakuada (kitaen iti Alma 53:19); “insuro ida dagiti innada a no saanda nga agduadua, isalakan ida ti Dios” (Alma 56:47); ket addaanda iti “aglaplapusanan a pammati iti dayta a naisuro kadakuada.” Kas bungana, nasalaknibanda babaen iti “nakaskasdaaw a bileg ti Dios” (Alma 57:26). Isu a no maipasangotayo kadagiti gubat iti biag, makapaturedtayo. Isuronatayo ti buyot ni Helaman nga “adda nalinteg a Dios, ket asino man a di agduadua, taginayonento ida ti datdatlag a bilegna” (Alma 57:26).
Dagiti Kapanunotan iti Panagsursuro iti Pagtaengan ken iti Simbaan
Ti kaadda ti pammati iti Dios tulongannak a mangparmek iti buteng.
No saan a gapu iti pammatida, adda koma nasayaat a rason dagiti agtutubo a soldado ni Helaman a makarikna iti buteng. Ngem gapu iti pammatida, ad-adu pay ti rasonda nga agbalin a natured. Bayat ti panangbasayo iti Alma 53:17–58, sapulenyo dagiti banag a makatulong kadakayo a mangsango iti butengyo nga addaan pammati ken ni Cristo. Ibilang ti panangipamaysa kadagiti sumaganad a bersikulo: Alma 53:10–22; 56:43–49, 55–56; 57:20–27; 58:39–40. Makatulong daytoy a tsart a mangisurat no ania ti masarakam.
Dagiti kababalin dagiti agtutubo a soldado ni Helaman:
Dagiti posible a rason a napigsa unay ti pammatida ken Cristo:
Ania ti inaramidda tapno maaramat ti pammatida ken Cristo:
Kasano a binendisionan ida ti Dios:
Tapno mangabaktayo kadagiti naespirituan a dangadangtayo, kasapulantayo met ti bileg ni Jesucristo. Kasano a magun-odyo ti bilegna? Sapulenyo dagiti sungbat iti mensahe ni President Russell M. Nelson a “Drawing the Power of Jesus Christ into Our Lives” (Liahona, Mayo 2017, 39–42). Mabalinyo nga idilig ti balakadna kadagiti banag nga inaramid dagiti soldado ni Helaman.
Kalpasan ti panagadalyo kadagitoy a banag, panunotenyo dagiti bukodyo a naespirituan a dangadang. Isuratyo no ania ti mariknayo a makaparegta nga aramiden a mangaramat iti pammatiyo ken ni Jesucristo.
Kitaen met iti Neil L. Andersen, “Wounded,” Liahona, Nob. 2018, 83–86; “True to the Faith,” Hymns, no. 254; “Drawing upon the Power of God in Our Lives” (video), Gospel Library; Gospel Topics, “Faith in Jesus Christ,” Gospel Library.
Ladawan
dagiti agtutubo a lallaki a soldado a kadua ti inada
Saan a nalaka a mapasakitan dagiti pasurot ni Jesucristo.
Addaan da Helaman ken Pahoran kadagiti rason a gapu tapno mapasakitan. Saan nga umaw-awat ni Helaman iti umdas a suporta para kadagiti buyotna, ken sibibiddut a pinabasol ni Moroni ni Pahoran iti panangpengdanna iti dayta a suporta (kitaen iti Alma 58:4–9, 31–32; 60). Ania ti makaawis iti riknam maipapan kadagiti reaksionda iti Alma 58:1–12, 31–37 ken Alma 61? Apay a mariknayo a nagrespondeda iti kastoy?
Intudo ni Elder David A. Bednar ni Pahoran kas pagwadan ti kinaemma ken insurona a “dagiti kaindaklanan ken kapapatgan a pagarigan ti kinaemma ket masarakan iti biag ti Mangisalakan Mismo” (“Meek and Lowly of Heart,” Liahona, May 2018, 32). Panunotenyo no kasano nga impakita ti Mangisalakan ti kinaemma. Kitaen, kas pagarigan, iti Mateo 27:11–26; Lucas 22:41–42; Juan 13:4–17. Kasano a masurotyo ti pagwadanna?
Addaanak iti pagrebbengan a mangitag-ay dagiti adda iti aglawlawko.
Insurat ni Moroni a pagsungbatento ti Dios ni Pahoran no ammona a binay-anna dagiti kasapulan dagiti buyot a Nephite. Ania ti masursurotayo manipud iti Alma 60:7–14 maipapan iti panangtrato kadagiti tao nga agkasapulan? Ania ti maaramidyo tapno agbalinkayo a mannakaammo ken maipaayyo dagiti kasapulan ti dadduma?
No napakumbabaak, dagiti rigat ti mabalin a mangiturong iti pusok iti Apo.
Ikabil ti maysa a di pay naluto nga itlog ken maysa a patatas iti agburburek a danum a mangtulong kadakayo a mangpanunot no kasano a pilienyo ti agbalin a “napalukneng” wenno “napatangken” gapu kadagiti pannubokyo. Idinto a malutluto ti itlog ken patatasyo, adalenyo ti Alma 62:39–51, ket kitaenyo no kasano ti reaksion dagiti tao iti panagministro ni Helaman kalpasan ti napaut a pannakigubatda kadagiti Lamanite. Mabalinyo ngarud nga idilig daytoy iti no kasano ti reaksionda iti panangasabana iti 13 a tawen kasakbayna (kitaen iti Alma 45:20–24). Kasano a naiduma ti pannakaapekto dagiti Nephite kadagiti isu met laeng a rigrigat? No naan-anay a naluton ti itlog ken patatas, buraken ti itlog ken iwaen ti patatas. Kasano a naiduma ti epektona kadakuada ti agburburek a danum? Ania dagiti masursuroyo maipapan no kasano a pilientayo ti agtignay iti rigat? Kasano a makaasidegkayo iti Dios kabayatan dagiti rigrigatyo?
Agusar kadagiti padas iti pagtaengan. No mangisurokayo iti klase ti Simbaan, kiddawenyo kadagiti miembro ti klase a mangibinglay no ania ti nasursuroda iti pagtaengan. Kas pagarigan, ammuenyo no ania ti nasursuroda maipapan kadagiti rigat ken kinapakumbaba manipud kadagiti agburburek nga itlog ken patatas.
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Makapagbalinak a napudno iti Dios kas kadagiti agtutubo a soldado ni Helaman.
Mabalinyo nga usaren ti adu a resources tapno maibinglay ti estoria dagiti soldado ni Helaman, agraman dagiti ladawan iti daytoy a balabala ken “Kapitulo 34: Helaman ken dagiti 2,000 nga Agtutubo a Mannakigubat” (Dagiti Estoria iti Libro ni Mormon, 93–94). Ti panid ti aktibidad itoy a lawas ti makatulong kadagiti annakyo nga agpanunot kadagiti wagas a makapagbalinda a kas iti buyot ni Helaman. Ibilangyo ti panangibinglay iti sumagmamano kadagiti galad dagiti agtutubo a soldado manipud iti Alma 53:20–21 tapno makarugida. Aggigiddan a kantaen ti “We’ll Bring the World His Truth” (Children’s Songbook, 172–73).
Makapagbalinak a napudno iti no ania ti isuro dagiti nagannakko iti kinalinteg.
Kimmita dagiti agtutubo a soldado ni Helaman iti pammati dagiti innada idi naipasangoda iti dakkel a karit. Nalabit a mabalinyo a basaen ti Alma 56:46–48 kadagiti annakyo ken awisem ida a dumngeg no ania ti insuro dagiti inna dagitoy nga agtutubo a lallaki maipapan iti pammati. Mabalinyo a damagen kadakuada no ania ti nasursuroda kadagiti dadakkelda—wenno iti dadduma pay a napudno a nataengan—maipapan iti Mangisalakan. Apay a napateg nga agtungpaltayo “nga awan kurangna”? (Alma 57:21).
Kasano a masiguradoyo—kas iti inna dagiti soldado a mannakigubat—nga ammo dagiti annakyo ti pammatiyo iti Dios? Maysa a wagas ket ti panangibinglay no kasano nga apektuan ti pammatiyo ti biagyo. Kas pagarigan, kasano nga “inispalnakayo” idi “saankayo a nagduadua”?
Makapagtungpalak kadagiti katulagak iti Nailangitan nga Ama.
Mabalin a kabaelan nga isarita dagiti annakyo maipapan iti panawen nga adda nagaramid ken nagtungpal iti kari kadakuada. Ania ti nariknada idi natungpal ti kari? Mabalinyo a basaen ti Alma 53:10–18 ket awisenyo dagiti annakyo a mangsapul no kasano nga inaramid ken tinungpal ni Helaman, dagiti tao ni Ammon, ken dagiti annak dagiti tao ni Ammon dagiti kari, wenno dagiti katulaganda. Mabalinyo nga ibinglay no kasano a bendisionannakayo ti Nailangitan nga Ama bayat ti panagtungpalyo kadagiti katulaganyo.
Ibilangyo ti panangawisyo kadagiti annakyo a mangpanunot maipapan iti panawen idi napabasolda a nagaramid iti maysa a banag a saanda nga inaramid. Ibagam kadakuada no kasano a napasamak daytoy ken ni Pahoran (kitaen iti Alma 60–61; kitaen met iti “Kapitulo 35: Ni Kapitan Moroni ken ni Pahoran,” Dagiti Estoria iti Libro ni Mormon, 95–97). Tapno masursuro ti maipapan iti no kasano ti reaksion ni Pahoran, agsisinnublat a mangbasa kadagiti bersikulo manipud iti Alma 61:3–14. Ania ti inaramid ni Pahoran idi pinabasol isuna ni Moroni? (kitaen iti Alma 61:2–3, 8–9). Ania dagiti masursurotayo maipapan iti pammakawan manipud iti pagwadan ti Mangisalakan? (kitaen iti Lucas 23:34).
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ladawan
dua ribu nga agtutubo a mannakigubat
Pudno, Sir, Addada Amin ken Agsungbatda, ni Clark Kelley Price