Alma 59–62

Da Kapitan Moroni ken Pahoran

Pigsa manipud iti Dios

Nakigubgubat dagiti Nephite ken Lamanite. Ni Moroni ti kapitan dagiti buyot dagiti Nephite. Saan a nangipatulod dagiti lider ti Nephite iti umdas a soldado wenno taraon. Nakapungtot ni Moroni ket nagsurat ken ni Pahoran, ti lider dagiti Nephite.

Alma 59:3–13; 60:1, 3–5

Iti suratna, dinamag ni Moroni ken ni Pahoran no apay a saan a nangibaon iti tulong. Impagarup ni Moroni a saan a maseknan ni Pahoran kadagiti tao ken kayatna laeng ti bileg. Kayat ni Moroni a mawayawayaan dagiti taona.

Alma 60

Naladingitan ni Pahoran ta awan ti tulong dagiti buyot. Kayatna a tulongan ni Moroni, ngem dina kabaelan. Sumagmamano kadagiti Nephite ti makilablaban kenkuana.

Alma 61:1–4

Dagitoy a Nephite ket naawagan a tattao ti ari. Kayatda ti maaddaan iti bileg para iti bagbagida ken mangituray kadagiti tattao. Inagawda ti gobierno manipud ken Pahoran.

Alma 51:5; 61:3–5, 8

Kayat ni Pahoran nga itultuloy nga idauluan dagiti Nephite tapno matulonganna ida. Kas ken Moroni, kayatna a suroten dagiti Nephite ti Dios ken pagtalinaedenda ti wayawayada. Tinarigagayanna a dida koma kasapulan ti makiranget iti asinoman. Ngem situtulok a makiranget no makatulong dayta tapno natalged dagiti tattaona.

Alma 61:9–14, 19–20

Kiniddaw ni Pahoran kadagiti Nephite a tulonganda isuna a makiranget tapno masalakniban dagiti pamiliada, ti wayawayada, ken ti karbenganda nga agdayaw iti Dios. Ammona a kaduada ti Espiritu ti Dios no pilienda ti makiranget para iti umiso. Adu a Nephite ti immay a tumulong ken ni Pahoran a mangidepensa iti pagilianda.

Alma 61:5–7, 14–15

Nagsurat ni Pahoran ken ni Moroni. Saan a nakapungtot ken Moroni. Imbagana ken ni Moroni ti amin a mapaspasamak. Kiniddawna ken ni Moroni nga umay tumulong kenkuana a manglaban kadagiti tattao ti ari. Ammo ni Pahoran a no surotenda ti Dios, saanda a kasapulan ti agbuteng. Salakniban ken tulongan ida ti Dios.

Alma 61:9, 14–21

Napno ni Moroni iti namnama gapu iti pammati ni Pahoran. Ngem naladingitan ta ti dadduma a Nephite makilablabanda kadagiti bukodda a tao ken saanda nga agtulnog iti Dios. Nangala ni Moroni iti buyot ket napan timmulong ken ni Pahoran. Intag-ayna ti titulo ti wayawaya iti sadinoman a papananna. Rinibu a Nephite ti nangikeddeng a makiranget tapno salaknibanda ti wayawayada.

Alma 62:1–5

Inabak da Moroni ken Pahoran dagiti tattao ti ari a kaduada dagiti buyotda. Nagbalin manen ni Pahoran a lider dagiti Nephite. Nangibaon ni Moroni iti adu a lallaki a tumulong kadagiti buyot dagiti Nephite. Nangipatulod met iti taraon dagiti buyot. Ita ta nagkaykaysa dagiti Nephite, nangabakda iti adu a gubat. Adu a siudad dagiti Nephite ti innalada manipud kadagiti Lamanite.

Alma 62:6–32