“Da Teancum ken Moroni,” Dagiti Estoria iti Libro ni Mormon (2023)
Da Teancum ken Moroni
Mangipakpakita iti dakkel a kinatured
Kalpasan ti ipapatay ni Amalickiah, nagbalin ti kabsatna a ni Ammoron nga ari dagiti Lamanite. Nagtultuloy ni Ammoron iti pannakiranget kadagiti Nephite. Nagpaut ti gubat iti adu a tawen. Nangrugi a nangabak dagiti Nephite, isu a nagtaray dagiti amin a buyot dagiti Lamanite a nagturong iti maysa a siudad. Nagmartsa da Moroni, Teancum, ken sabali pay a kapitan a Nephite a simmurot kadagiti Lamanite a kakuyogda dagiti buyotda.
Alma 52:3–4; 54:16–24; 62:12–35
Nagpungtot ni Teancum ta da Amalickiah ken Ammoron ti nakaigapuan daytoy dakkel, napaut a gubat. Gapu iti gubat, adu a tattao ti natay ken nakisang unay ti taraon. Kayat ni Teancum a gibusan ti gubat. Napan iti siudad iti rabii tapno sapulenna ni Ammoron.
Kimmalay-at ni Teancum iti pader ti siudad. Nagakar-akar kadagiti lugar iti siudad agingga a nasarakanna ti pagturogan ni Ammoron.
Impuruak ni Teancum ti pika ken ni Ammoron. Naitudok daytoy iti asideg ti pusona. Ngem riniing ni Ammoron dagiti katulonganna sakbay a natay.
Kinamat dagiti katulongan ni Ammoron ni Teancum ket pinapatayda. Nagladingit unay dagiti dadduma a lider a Nephite a natay ni Teancum. Nakiranget a situtured para iti wayawaya dagiti taona.
Nupay natayen, tinulongan ni Teancum dagiti Nephite a nangabak iti gubat. Inaramidna a mapukaw ti lider dagiti Lamanite. Kabigatanna, nakiranget ni Moroni kadagiti Lamanite ket nangabak. Pimmanaw dagiti Lamanite iti daga dagiti Nephite, ket naggibus ti gubat.
Adda kappia iti kamaudiananna. Inkarigatan ni Moroni a nagpatalinaed a nataltalged dagiti daga dagiti Nephite manipud kadagiti Lamanite. Kalpasanna nagawid ni Moroni ket nagbiag iti kappia. Insuro dagiti propeta ti ebanghelio ken indauluanda ti Simbaan ti Dios. Nagtalek dagiti tao iti Apo ket nabendisionanda.