“Da Jacob ken Sherem,” Dagiti Estoria iti Libro ni Mormon (2023)
Da Jacob ken Sherem
Ti pammaneknek ti maysa a propeta maipapan ken ni Jesucristo
Maysa a propeta ni Jacob a nakakita ken ni Jesucristo. Kayatna a mamati dagiti tao ken ni Jesus. Sinuruan ni Jacob dagiti tao nga agtungpal kadagiti bilin ti Dios. Inkarigatanna a sinuruan dagiti tao maipapan ken ni Jesus.
2 Nephi 11:2–3; Jacob 1:1–8, 17–19
Maysa nga aldaw, rinugian ti maysa a tao nga agnagan iti Sherem ti nangisuro kadagiti tao. Ngem insuro ni Sherem a saan a pudno ni Jesus. Nalaing ni Sherem iti pannakisao, ket adu a Nephite ti namati iti insaona. Gapu kenkuana, adu a tattao ti nagsardeng a mamati ken ni Jesus. Kayat pay ni Sherem nga isardeng ni Jacob ti panangpati ken ni Jesus.
Kinuna ni Sherem nga awan ti maysa a makaammo no ania ti mapasamak iti masakbayan. Kinunana a kayat a sawen daytoy nga awan ti maysa a makaammo no pudno ni Jesus, gapu ta saan pay nga immay ni Jesus ditoy daga. Ngem kinuna ni Jacob nga insuro dagiti nasantuan a kasuratan ken amin a propeta ti maipapan ken ni Jesus. Impakita ti Dios ken ni Jacob nga umayto ni Jesus ditoy daga.
Saan latta a mamati ni Sherem. Kayatna nga ipakita kenkuana ni Jacob ti maysa a tanda a pudno ni Jesus.
Kinuna ni Jacob nga ammo ni Sherem nga umay ni Jesus ket saanna a kasapulan ti maysa a tanda. Ngem kinuna ni Jacob a pagtalimudawen ti Dios ni Sherem tapno maipakita nga adda bileg ti Dios ken pudno ni Jesus.
Kellaat, a nagsakit ni Sherem ket nadalupo iti daga. Kalpasan ti adu nga aldaw, ammona a matayen. Imbagana kadagiti tao nga inallilaw isuna ni Satanas. Kinunana a nagulbod isuna iti Dios. Ammona iti amin a panawen a pudno ni Jesus. Kalpasanna natay ni Sherem. Nagbasa dagiti tao iti nasantuan a kasuratan ken namatida ken ni Jesus.