Alma 43–44

Da Kapitan Moroni ken Zerahemnah

Maysa a gubat ken kari nga agbiag iti kappia

Ni Zerahemnah ti lider dagiti buyot ti Nephite. Kayatna nga iturayan dagiti Nephite ken aramidenna ida nga agserbi kadagiti taona. Indauluan ni Zerahemnah dagiti buyotna a mangdarup kadagiti Nephite.

Alma 43:3–8

Kayat dagiti Nephite a salakniban dagiti pagtaengan, pamilia, ken relihionda. Ammoda a saanda a makapagdayaw iti Apo no iturayan ida dagiti Lamanite. Pinili dagiti Nephite ti makiranget kadagiti kabusorda.

Alma 43:9–10, 14–15

Maysa a tao nga agnagan iti Moroni ti kapitan dagiti buyot dagiti Nephite. Sinigurado ni Moroni a nakasagana dagiti buyotna a makiranget.

Alma 43:16–17

Nangitugot dagiti soldado ni Moroni kadagiti armas, ket inikkan ni Moroni ida iti napigsa a kabal ken kalasag a mangsalaknib kadakuada.

Alma 43:18–19

Inkuyog ni Moroni dagiti buyotna a mangranget kadagiti Lamanite. Ngem idi nakita dagiti Lamanite nga adda kabal ken kalasag dagiti Nephite, nagbutengda a makiranget. Naingpis laeng ti kawes dagiti Lamanite ken awan ti kabal a mangsalaknib kadakuada.

Alma 43:19–21

Pimmanaw dagiti Lamanite. Pinadasda ti naglemmeng iti sabali a daga dagiti Nephite. Impagarupda a saan nga ammo ni Moroni no sadino ti napananda.

Alma 43:22

Ngem apaman a pimmanaw dagiti Lamanite, nangibaon ni Moroni kadagiti espia a sumurot kadakuada.

Alma 43:23

Kalpasanna, nangipatulod ni Moroni iti mensahe ken ni propeta Alma. Kayatna a damagen ni Alma iti Apo no ania ti plano nga aramiden dagiti Lamanite. Imbaga ti Apo ken ni Alma nga agplanplano dagiti Lamanite a rauten ti nakapuy a daga a maawagan iti Manti. Dimngeg ni Moroni ken ni Alma. Indauluana dagiti buyotna a mangranget kadagiti Lamanite.

Alma 43:23–33

Nagririnnanget dagiti buyot. Napigsa ken makapungtot unay dagiti Lamanite. Nagbuteng dagiti Nephite kadagiti Lamanite ket nagtartarayda nga umadayo. Ngem impalagip ni Moroni kadakuada dagiti pamilia ken pammatida, isu nga intultuloyda ti nakiranget.

Alma 43:34–37, 43–48

Nagkararag dagiti Nephite iti tulong ti Apo. Sinungbatan ti Apo dagiti kararagda ken inikkanna ida iti naindaklan a bileg. Ita nagbuteng dagiti Lamanite. Napupokdan ket saanda a makalibas. Idi nakita ni Moroni a mabuteng dagiti Lamanite, imbagana kadagiti soldadona nga isardengdan ti panagranget. Saan a kayat ni Moroni a patayen dagiti Lamanite.

Alma 43:49–53; 44:1–2

Imbaga ni Moroni ken ni Zerahemnah a mawayawayaan dagiti Lamanite no ikarida a saandanton a makiranget manen kadagiti Nephite. Nagpungtot ni Zerahemnah ket pinadasna nga ituloy ti pannakiranget, ngem saanna a maatiw dagiti soldado ni Moroni. Kalpasanna inkari ni Zerahemnah ken dagiti buyotna nga agbiagda a sitatalna, ket winawayaan ida ni Moroni.

Alma 44:1–20