Ether 1–4; 6

Ni Jared ken ti Pamiliana

Maysa a panagdaliasat nga indauluan ti Apo

Nagnaed ni Jared ken ti pamiliana idiay Babel rinibu a tawen sakbay a nayanak ni Jesucristo. Tinungpalda iti Apo. Ngem saan a nagtungpal iti Apo ti kaaduan a tattao idiay Babel. Rinugian dagita a tao ti panangbangon iti torre a mangpadas a dumanon iti langit. Binalbaliwan ti Apo ti pagsasao dagiti tao isu a dida maawatan ti maysa ken maysa.

Genesis 11:4–9; Ether 1:33

Adda lalaki a kabsat ni Jared. Nagtalek ti Apo iti lalaki a kabsat ni Jared. Indawat ni Jared iti kabsatna nga agkararag para iti tulong ti Apo. Iti kararagna, indawat ti kabsat ni Jared iti Apo a saanna a baliwan ti pagsasao ti pamiliana ken gagayyemna. Iti dayta a wagas, agkikinnaawatanda pay laeng.

Ether 1:33–36

Naayat ken naasi ti Apo. Saanna a binalbaliwan ti pagsasao ti pamilia ken gagayyem ni Jared. Idi agangay, imbaga ti Apo iti kabsat ni Jared nga insaganana ti naisangsangayan a daga para kadakuada. Kinuna ti Apo nga iturongna ida sadiay.

Ether 1:35–42

Inummong da Jared ken ti kabsatna dagiti pamiliada ken gagayyemda. Inummongda met dagiti ayupda ken ti amin a kita dagiti bukbukel. Kalpasanna, pinanawanda dagiti pagtaenganda ket nagdaliasatda iti let-ang. Inturong ida ti Apo babaen ti pannakisaritana kadakuada manipud iti ulep.

Ether 1:40–43; 2:1–6

Kalpasan ti napaut a panagdaliasatda, dimtengda iti maysa a baybay. Nagindegda iti igid ti baybay iti uneg ti uppat a tawen. Nabayag a tiempo a saan a nagkararag iti Apo ti kabsat ni Jared.

Ether 2:13–14

Imbaga ti Apo iti lalaki a kabsat ni Jared nga agkararag manen. Nagbabawi ken nagkararag ti lalaki a kabsat ni Jared iti Apo. Pinakawan isuna ti Apo.

Ether 2:14–15

Insuro ti Apo iti lalaki a kabsat ni Jared nga agaramid kadagiti barko a maawagan iti bilog. Mabalin nga agsakay dagiti pamiliada kadagiti bilog a bumallasiw iti baybay nga agturong iti naikari a daga.

Ether 2:15–17

Ti lalaki a kabsat ni Jared ken ti pamiliana ti nangaramid kadagiti bilog. Nakitana nga awan ti silaw iti uneg dagiti bilog. Dinamagna iti Apo no masapul a ballasiwenda ti baybay iti kasipngetan. Imbaga ti Apo iti lalaki a kabsat ni Jared a mangpanunot iti wagas tapno adda silaw dagiti barko.

Ether 2:16–19, 22–25

Nangaramid ti lalaki a kabsat ni Jared iti 16 a babassit, nalawag a bato. Indawatna iti Apo a sagidenna ida ken pagsilnagenna ida. Inyunnat ti Apo ti imana ket sinaggaysana a sinagid dagiti bato babaen ti ramayna. Nakita ti kabsat ni Jared ti ramay ti Apo. Nasdaaw ta adda bagi ti Apo a kas kenkuana.

Ether 3:1–8

Kinuna ti Apo a dakkel ti pammati ti lalaki a kabsat ni Jared. Kalpasanna, nagparang ti Apo ket impakitana ti espiritu a bagina iti kabsat ni Jared. Kinuna ti Apo, “Siak ni Jesucristo.” Kinunana nga Isu ket napili nga agbalin a Mangisalakan. Adu pay ti insurona iti kabsat ni Jared.

Ether 3:9–20, 25–27

Nagsubli ti kabsat ni Jared iti pamiliana ken gagayyemna. Insuratna dagiti nasursurona bayat ti kaaddana iti Apo. Inkabilna met dagiti bato kadagiti bilog. Addaanda itan iti silaw iti panagdaliasatda.

Ether 4:1; 6:2–3

Naglugan dagiti pamilia kadagiti bilog tapno bumallasiwda iti baybay. Nagtalekda iti Apo a mangaywan kadakuada. Adu dagiti bagyo ken dalluyon. No dadduma, naan-anay a naabbongan ti danum dagiti bilog. Ngem nagkararagda, ket insubli manen ida ti Apo iti rabaw ti danum. Adu a kanta ti panagyamanda iti Apo.

Ether 6:4–10

Kalpasan ti dandani makatawen, nakadanonda iti daga nga inkari ti Apo kadakuada. Nagsangitda gapu iti rag-o ken nagyamanda Kenkuana.

Ether 6:11–12