“Dagiti Kayo ti Olibo,” Dagiti Estoria iti Libro ni Mormon (2023)
Dagiti Kayo ti Olibo
Ayat ti Dios para kadagiti taona
Maysa a propeta ti Dios ni Jacob. Kayatna nga isuro dagiti Nephite maipapan iti no kasano ti kadakkel ti ayat ti Dios kadagiti taona. Insarita ni Jacob kadakuada ti maysa nga estoria maipapan iti bangkag dagiti kayo nga olibo. Nagtitinnulong a nagtrabaho ti Apo ti bangkag ken dagiti katulonganna a mangaywan iti bangkag.
Adda naisangsangayan a kayo ti olibo ti Apo a nagbunga iti nasayaat a bunga. Kinuna ni Jacob a maipada daytoy a kayo iti tattao ti Dios, wenno ti balay ti Israel. Maipada ti bunga kadagiti aramid ti tattao. Inaywanan a nasayaat ti Apo daytoy a kayo. Tinulonganna daytoy a dumakkel babaen ti panangtaraonna kadagiti ramutna ken panangpukis kadagiti sangana. Intedna ti kasapulanna tapno agbiag.
Kalpasan ti apagbiit, nangrugin a matay ti naisangsangayan a kayona. Adda laeng dagiti manmano a nasalun-at a sanga. Daytoy ti namagladingit iti Apo. Kinayatna met daytoy nga agtalinaed nga agbunga iti nasayaat a bunga.
Tapno maisalakan dagiti nasalun-at a sanga, inikkat ti Apo ida ket insilpona ida kadagiti sabali a kayo. Kalpasanna, sinukatanna ida kadagiti nasalun-at a sanga a naggapu kadagiti sabali a kayo.
Nabayag a panawen ti napalabas. Masansan nga umay ti Apo ken ti katulonganna iti bangkag. Inaywananda ti naisangsangayan a kayo ti Apo. Inaywananda pay dagiti naisangsangayan a sanga a naiwaras kadagiti kayo iti amin nga intero a bangkag. Nasayaat ti kaaduan a bunga a dimmakkel. Ti nasayaat a bunga ti nangparagsak iti Apo ken ti katulonganna.
Kalpasan ti sumagmamano a panawen, ad-adu ti naibunga ti tunggal maysa kadagiti kayo. Ngem ita dakes amin dagiti bunga. Nagladingit unay ti Apo. Saanna a kayat a mapukaw ti bangkagna wenno bunga ti kayo! Inkarigatanna ti nagtabaho a mangtulong kadagiti kayona. Napanunotna no ania pay ti maaramidanna. Kinasaona ti katulongan ket pinilina nga agtultuloy iti panangikagumaan.
Tapno maisalakan ti bagkagna, kinuna ti Apo nga urnongen dagiti sanga nga inikkatna manipud iti naisangsangayan a kayo. Kinunana nga isilpona manen ida iti naisangsangayan a kayo.
Daytoy ti maudi a gundaway nga agtrabaho ti Apo iti bangkagna. Inayabanna dagiti dadduma a katulongan a tumulong. Nagtitinnulong ti tunggal maysa a mangummong ken mangisilpo kadagiti sanga.
Inaywananda ti amin a kayo. Inikkatda dagiti dakes a sanga ken pinagtalinaedda dagiti nasayaat a sanga. Kalpasan ti apagbiit, nagbunga manen iti nasayaat a bunga ti naisangsangayan a kayo ti Apo. Nagbunga met dagiti dadduma a kayo iti nasayaat a bunga a kas iti bunga ti naisangsangayan a kayo. Naragsakan ti Apo. Naisalakan dagiti kayona! Nagbungada amin iti kayatna a bunga a maaddaanda.
Nagyaman ti Apo kadagiti katulongan. Imbagana kadakuada a nabendisionanda gapu iti panagtrabahoda a sireregta ken panangtungpalda kadagiti bilinna. Imbinglayna kadakuada ti bunga, ket daytoy ti nangparagsak unay kadakuada. Iti nabayag a panawen, sinagrap unay ti Apo ti bunga.
Inleppas ni Jacob ti estoria dagiti kayo ti olibo Insurona kadagiti tao nga ay-aywanan ida ti Dios a kas iti panangaywan ti Apo ti bangkag kadagiti kayona. Kiniddaw ni Jacob iti tunggal maysa nga agbabawi ken umas-asidegda iti Dios. Sinuruanna ida nga agayat ken agserbi iti Dios gapu ta kanayon a tulongan ida ti Dios.