Alma 1

Da Gideon, Alma, ken Nehor

Panangidepensa iti kinapudno kadagiti balikas ti Dios

Pinili dagiti Nephite ni Alma nga Ub-ubing nga agbalin a kangatuan nga ukomda. Ni Alma pay ti nangato a saserdote ti Simbaan.

Mosiah 29:41–44

Maysa a tao nga agnagan Nehor ti nangrugi a nangisuro kadagiti tao iti maysa a banag nga inawaganna iti balikas ti Dios. Ngem insurona dagiti tao a saanda a kasapulan ti agtulnog iti Dios wenno agbabawi.

Alma 1:2–4, 15

Adu a tattao ti nanggusto ken namati iti kinuna ni Nehor. Kayatna a mangted iti kuarta dagiti tao kenkuana ken mangdaydayaw kenkuana. Impagarupna a nasaysayaat isuna ngem iti dadduma a tattao. Inaramidna ti bukodna a simbaan, ken adu a tattao ti dimngeg kenkuana.

Alma 1:3, 5–6

Maysa nga aldaw, naam-ammo ni Nehor ti maysa a lakay nga agnagan iti Gideon. Maysa a mannursuro ni Gideon iti Simbaan ti Dios ken adu ti naimbag nga inaramidna. Kayat ni Nehor a pumanaw dagiti tao iti Simbaan, isu a nakisinuppiat ken ni Gideon. Inusar ni Gideon dagiti balikas ti Dios tapno ipakitana a saan nga isursuro ni Nehor ti kinapudno. Nagpungtot ni Nehor! Pinatayna ni Gideon iti espadana.

Alma 1:7–9, 13

Indatag dagiti tao ni Nehor ken ni Alma tapno maukom. Pinadas ni Nehor nga idepensa ti inaramidna. Saanna a kayat ti madusa.

Alma 1:10–11

Kinuna ni Alma a biddut dagiti pannursuro ni Nehor ken mabalin a mangdangran kadagiti tao. Sinurot ni Alma ti linteg. Gapu ta pinatay ni Nehor ni Gideon, napapatay ni Nehor.

Alma 1:12–15

Sakbay a natay, imbaga ni Nehor kadagiti tao a nagulbod. Saanna nga insuro ti balikas ti Dios. Nupay kinuna ni Nehor a nagbiddut, adu a tattao ti nangsurot iti pagwadanna. Nagulbodda kadagiti tao tapno makaalada iti pammadayaw ken kuarta. Ngem dimngeg dagiti dadduma a tao ken ni Alma. Inaywananda dagiti napanglaw ken tinungpalda dagiti bilin ti Dios.

Alma 1:15–16, 25–30