Alma 53; 56–57

Ti Agtutubo a Buyot

Annak a nagtalek iti Dios

Nakigubgubat dagiti Nephite kadagiti Lamanite ket kasapulanda ti tulong. Kayat ti tumulong dagiti Anti-Nephi-Lehi. Ngem nagkarida ken Apo a saanda a makiranget. Dua ribu kadagiti agtutubo nga annakda a lallaki ti saan a nangaramid iti dayta a kari. Ketdi, inkari dagiti annak a lallaki a makirangetda tapno masalaknibanda dagiti pamiliada. Naawagan dagitoy nga annak a lallaki iti agtutubo a soldado.

Alma 53:8, 13–18, 22; 56:1–8

Pinili dagiti agtutubo a soldado ni propeta Helaman a mangidaulo kadakuada. Bassitda a grupo no idilig iti dakkel a buyot dagiti Lamanite. Ngem ammo ni Helaman a napudno, natured, ken matalek dagiti agtutubo a soldado. Iti panangidaulo ni Helaman kadakuada, napanda tinulongan dagiti Nephite.

Alma 53:19–22; 56:9–10, 17, 19

Nabannogen dagiti soldado a Nephite. Ngem idi immay dagiti mannakigubat a soldado, naragsakan dagiti Nephite. Inikkan ida ti agtutubo a buyot iti namnama ken pigsa. Naggigiddanda, nagsaganada a makiranget kadagiti Lamanite. Timmulong met dagiti nagannak dagiti agtutubo a soldado babaen ti panangiyegda iti taraon ken abasto kadakuada.

Alma 56:16–17, 19–20, 22, 27

Sinakup dagiti Lamanite ti adu a siudad ken pinagtalinaedda dagiti buyotda kadagitoy. Kayat dagiti lider a Nephite a pumanaw dagiti Lamanite iti maysa kadagiti siudad. Nangaramidda iti plano ket nagkiddawda iti tulong kadagiti agtutubo a soldado.

Alma 56:18–30

Nagpammarang dagiti agtutubo a soldado a mangipan iti taraon kadagiti Nephite nga agnanaed iti asideg a siudad. Idi nakita dagiti Lamanite ti bassit a grupo, pimmanawda iti siudadda ket kinamatda dagiti agtutubo a soldado. Impagarup dagiti Lamanite a nalaka laeng a matiliw ida.

Alma 56:30–36

Naglibas dagiti agtutubo a soldado manipud kadagiti Lamanite. Kalpasanna, rinugian ti maysa a buyot dagiti Nephite ti nangkamat kadagiti Lamanite. Kayat dagiti Lamanite a tiliwen dagiti agtutubo a soldado sakbay a makamakam ida dagiti Nephite. Nakita dagiti Nephite a mariribukan dagiti agtutubo a soldado ket naparpartak ti panagmartsada tapno tumulong kadakuada.

Alma 56:36–41

Kalpasan ti sumagmamano a kanito, saan a makita dagiti agtutubo a soldado dagiti Lamanite. Rinugianda a napanunot no nakadanon dagiti Nephite kadagiti Lamanite ken agririnnangetdan.

Alma 56:42–43

Nagdanag ni Helaman. Impagarupna a mabalin nga ikagkagumaan dagiti Lamanite nga ibalud ida. Dinamagna kadagiti agtutubo a soldadona no mapanda makiranget kadagiti Lamanite.

Alma 56:43–44

Nalagip dagiti agtutubo a soldado no ania dagiti insuro dagiti innada. Sinuruan ida dagiti innada nga agtalek iti Dios ken saan nga agduadua, gapu ta Isu ti mangsaluad kadakuada. Namati dagitoy nga annak a lallaki iti Dios ket kayatda a tungpalen ti karida a mangsalaknib kadagiti pamiliada. Imbagada ken ni Helaman a nakasaganadan a mapan makiranget.

Alma 56:46–48

Nasdaaw ni Helaman iti kinaturedda. Indauluana ida nga agsubli a mangranget kadagiti Lamanite.

Alma 56:45, 49

Nakita dagiti agtutubo a soldado nga agrangranget dagiti Lamanite ken Nephite. Nabannogen dagiti Nephite. Dandanin maabakda idi dumteng dagiti agtutubo a soldado.

Alma 56:49–52

Nakiranget dagiti agtutubo a Lamanite nga addaan iti bileg ti Dios. Nagbuteng dagiti Lamanite kadakuada ket nagsardengda iti pannakiranget. Nakatulong dagiti agtutubo a soldado a mangabak iti gubat!

Alma 56:52–54, 56

Iti gubat, adu a Nephite ken Lamanite ti natay. Nagdanag ni Helaman amangan ta natay met ti sumagmamano kadagiti agtutubo a soldadona. Ngem kalpasan ti gubat, binilang ni Helaman ti tunggal maysa. Naragsakan unay a nakakita nga awan kadagiti agtutubo a soldado ti natay. Sinalakniban ida ti Dios.

Alma 56:55–56

Ad-adu pay nga annak a lallaki ti kimmappeng kadagiti agtutubo a soldado. Nagtultuloy ti panangtulongda kadagiti Nephite a makiranget. Kadagitoy dadduma pay a gubat, nadangran amin dagiti agtutubo a soldado, ngem awan kadakuada ti natay. Nalagipda ti insuro kadakuada dagiti innada. Nagtalekda iti Dios, ket sinalaknibanna ida.

Alma 57:6, 19–27; 58:39–40