“Da Alma, Amulek, ken Zeezrom,” Dagiti Estoria iti Libro ni Mormon (2023)
Da Alma, Amulek, ken Zeezrom
Panangpili a mamati ken agtungpal iti Dios
Nakita ni Alma nga adu a miembro ti Simbaan ti saan a mangtungtungpal kadagiti bilin ti Dios. Gapuna napan ni Alma iti tunggal siudad a mangisursuro iti balikas ti Dios. Adu a tattao ti nagbabawi. Kalpasanna dimteng ni Alma iti maysa a siudad a maawagan iti Ammonihah. Saan a dimngeg dagiti tao sadiay kenkuana. Tinupraanda ken kinamatda a rummuar iti siudad.
Nakarikna ni Alma iti liday bayat ti ipapanawna iti siudad. Madanagan isuna para kadagiti tao. Kalpasanna immay kenkuana ti maysa nga anghel. Kinuna ti anghel a makapagragsak ni Alma gapu ta nagtungpal iti Dios. Imbaga ti anghel ken ni Alma nga agsubli iti siudad ket pakdaaranna dagiti tao. No saanda nga agbabawi, madadaeldanto. Sidadaras a nagsubli ni Alma.
Idi dimteng ni Alma iti siudad, kasta unay ti bisinna. Nagayuno iti uneg ti adu nga aldaw. Nagkiddaw ni Alma iti maysa a tao nga agnagan iti Amulek para iti taraon.
Imbaga ni Amulek kenkuana maipapan iti maysa a parmata a nakitana. Iti parmata, imbaga ti maysa nga anghel ken ni Amulek a maysa a propeta ti Dios ni Alma. Kayat ni Amulek a tulonganna ni Alma.
Inyawid ni Amulek ni Alma ket inikkanna iti taraon a kanenna. Nagtalinaed ni Alma iti pagtaengan ni Amulek iti uneg ti adu nga aldaw. Binendisionan ti Dios ni Amulek ken ti pamiliana. Idi agangay, imbaga ti Dios kada Alma ken Amulek nga ibagada kadagiti tao iti siudad nga agbabawida. Nagtungpal da Alma ken Amulek. Inted ti Dios ti bilegna kadakuada a mangtulong kadakuada a mangisuro.
Maysa kadagiti tao a nakangngeg kadakuada a mangisuro ket agnagan iti Zeezrom. Nasirib unay ken kayatna nga allilawen da Alma ken Amulek. Imbaga ni Zeezrom ken ni Amulek a mangted kenkuana iti adu a kuarta no ibagana a saan a pudno ti Dios. Kayatna nga agulbod ni Amulek tapno saan a mamati dagiti tao iti insuro da Amulek ken Alma.
Alma 10:29–32; 11:21–25; 12:4–6
Ngem saan nga agulbod ni Amulek maipapan iti Dios. Kinunana a pudno ti Dios. Ammo da Amulek ken Alma dagiti pampanunoten ni Zeezrom. Nasdaaw ni Zeezrom ket adu ti saludsodna kadakuada. Insuroda ken ni Zeezrom nga adda plano ti Dios para iti amin a tattao. Namati ni Zeezrom iti insuro da Alma ken Amulek maipapan iti Dios ken ni Jesucristo.
Alma 11:23–46; 12:1–18, 24–34; 14:6–7; 15:6–7
Nagladingit unay ni Zeezrom kadagiti dakes a banag nga inaramidna. Nagsakit isuna. Simmarungkar kenkuana da Alma ken Amulek. Kinuna ni Alma a maagasan ni Zeezrom gapu iti pammati ni Zeezrom ken ni Jesus. Kiniddaw ni Alma iti Dios a mangagas kenkuana. Timmakder ni Zeezrom. Nalainganen isuna! Nabuniagan isuna ken nangisuro kadagiti tao iti nabati pay iti biagna.