Mosiah 25–28; Alma 36

Alma nga Ub-ubing

Naindaklan a panagbalbaliw

Inikkan ni Ari Mosiah ni Alma iti bileg a mangidaulo iti Simbaan iti Zarahemla Insuro ni Alma dagiti tao nga agbabawi ken maaddaan iti pammati iti Apo.

Mosiah 25:19–24; 26

Adda anak a lalaki ni Alma nga agnagan met iti Alma. Saan a namati ni Alma nga Ub-ubing iti insuro ti amana.

Mosiah 27:8

Adda annak a lallaki ni Mosiah a saan met a mamati iti Apo. Gayyemda ni Alma nga Ub-ubing. Kayatda amin a pumanaw dagiti tao iti Simbaan. Indauluan ni Alma ken dagiti annak a lallaki ni Mosiah ti adu a tao nga agaramid kadagiti banag a maibusor kadagiti bilin ti Dios.

Mosiah 27:9–10; Alma 36:6

Maysa nga aldaw, nangibaon ti Apo iti anghel a mangpasardeng kadakuada. Imbaga ti anghel kadakuada nga isardengdan ti panangpadas a mangdadael iti Simbaan. Nagbuteng unay ni Alma ken dagiti annak a lallaki ni Mosiah ta natuangda iti daga.

Mosiah 27:11–18; Alma 36:6–9

Tallo nga aldaw ken tallo a rabii a saan a makasao wenno makagaraw ni Alma. Talaga a dakes ti riknana gapu iti amin a biddut nga inaramidna. Madanagan pay ta adu ti inturongna a tao nga umadayo iti Apo.

Mosiah 27:19; Alma 36:10–16

Narikna ni Alma ti kasta unay a saem gapu kadagiti basolna. Kalpasanna, nalagipna ti amana a nangsarsarita maipapan ken ni Jesucristo, ti Anak ti Dios.

Alma 36:17

Inkararag ni Alma a pakawanen koma isuna ni Jesus. Kalpasan ti panagkararagna, saannan a malagip ti saem a nariknana. Ammona a pinakawanen ti Apo isuna. Nasayaaten ti riknana maipapan iti basbasolna. Ngem ketdi, narikna ni Alma ti nalaus a ragsak.

Mosiah 27:24, 28–29; Alma 36:18–22

Nagsubli ti pigsa ni Alma. Inkeddengna ken dagiti annak a lallaki ni Mosiah ti agbabawi ken mangpadas a mangatur iti amin a saem a gapuananda. Nagserbida iti Apo manipud iti dayta a kanito babaen ti panangtulongda iti dadduma nga agbabawi. Nagdaliasatda iti daga nga inturayan ni Mosiah ken insuroda dagiti tao maipapan ken ni Jesus.

Mosiah 27:20–24, 32–37; Alma 36:23–26

Kayat ni Alma ken dagiti annak a lallaki ni Mosiah nga ibinglayda ti ragsak nga insangbay dagiti pannursuro ni Jesus iti biagda. Nagtrabahoda a sipapasnek nga agserbi iti Apo ken kadagiti tao. Pinili dagiti annak a lallaki ni Mosiah ti pumanaw ken mangisuro kadagiti Lamanite maipapan ken ni Jesus. Pinili ni Alma ti agbati ken agtultuloy iti panangisurona kadagiti Nephite.

Mosiah 27:32–37; 28:1–10; 29:42–43