“Ni Ether a Propeta,” Dagiti Estoria iti Libro ni Mormon (2023)
Ni Ether a Propeta
Ti ballaag ti Apo iti maysa a nasion
Inyeg ti Apo iti lalaki a kabsat ni Jared ken ti pamiliana iti naikari a daga. Napakumbaba ken nagtungpalda kadagiti bilin ti Dios. Dimmakkel ti grupoda iti uneg ti adu a tawen, ken tinarigagayanda ti maysa nga ari a mangidaulo kadakuada. Binallaagan ida ti lalaki a kabsat ni Jared a ti kaadda ti ari ket mabalin nga agbanag iti riribuk, ngem binay-anna ida a mangpili iti maysa nga ari.
Iti uneg ti ginasut a tawen, nagnaed dagiti Jaredite iti naikari a daga. No dadduma indauluan ida dagiti arida nga agaramid iti naimbag, ngem no dadduma saanda nga inaramid. Ballaagan dagiti propeta ti Dios dagiti tao nga agbabawi. Idi dimngeg ken tinungpalda dagiti bilin ti Dios, binendisionanna ida. Agnagan iti Ether ti maudi a propeta a Jaredite.
Ether 7:23–27; 9:26–30; 10:16–17, 28; 11:1–8, 12–13, 20–22; 12:2
Saan nga agtungtungpal dagiti tao iti Dios. Ngem adda ti Espiritu ti Apo ken ni Ether. Insurona ida manipud agsapa agingga iti rabii. Kinunana a mamati iti Dios ken agbabawi wenno madadaelda. No adda pammatida, manamnamada a makipagnaed manen iti Dios ken maaddaanda iti pigsa nga agaramid kadagiti nasayaat a banag. Saan a namati dagiti tao.
Binuya ni Ether ti inaramid dagiti tao. Naglemmeng iti maysa a kueba kabayatan ti aldaw ken insuratna ti nakitana. Saan a nagbabawi dagiti tao ket nangrugida a nagririnnanget.
Nakita ni Ether a ti ari a Jaredite, ni Coriantumr, ket nasken a makiranget iti adu a tattao nga agtarigagay nga agbalin nga ari. Inusar ni Coriantumr ti buyotna a mangsalaknib iti bagina.
Maysa nga aldaw, imbaga ti Apo ken ni Ether a ballaaganna ni Coriantumr ken dagiti taona nga agbabawi. No agbabawida, tulongan ti Apo dagiti tao ken bay-anna a pagtalinaeden ni Coriantumr ti pagarianna. No saan, agdidinnadael dagiti tao. Agbiag ni Coriantumr iti napaut tapno makitana a pudno dagiti balikas ti Apo. Kalpasanna matayto met.
Saan a nagbabawi ni Coriantumr ken dagiti taona. Pinadas dagiti tao a patayen ni Ether, ngem naglibas ni Ether a napan iti kuebana. Maysa a lalaki nga agnagan Shiz ti nakiranget ken ni Coriantumr. Pinili dagiti tao ti makikadua iti buyot ni Shiz wenno iti buyot ni Coriantumr. Namin-adu a nagranget ti dua a buyot. Adu a tattao ti natay.
Ether 13:22–25; 14:17–20; 15:2
Nalagip ni Coriantumr ti kinuna ni Ether. Nagleddaang gapu ta nakaad-adu kadagiti taona ti natay. Nalagipna nga imballaag ti amin a propeta a mapasamak daytoy. Rinugianna ti nagbabawi ket nangipatulod iti surat ken ni Shiz. Kinunana nga isukona ti pagarian no maisalakan dagiti taona. Ngem kayat ni Shiz ti makiranget.
Nagpungtot dagiti tao ni Coriantumr ket kayatda ti makiranget. Nagpungtot met dagiti tao ni Shiz ket kayatda ti makiranget. Awan ti agtarigagay nga agbabawi. Nakita ni Ether a napan nakiranget ti tunggal maysa a tao. Ad-adu pay a tattao ti natay.
Kayat ni Coriantumr a pagsardengen ti gubat. Kiniddawna ken ni Shiz nga alaenna ti pagarian ket saanna a dangran dagiti taona. Ngem nagpungtot ti tunggal maysa. Awan kadakuada ti Espiritu ti Apo. Nakita ni Ether a nagtultuloy ti panagranget ti tunggal maysa agingga a ni Coriantumr laengen ti sabali a Jaredite a sibibiag. Kalpasanna naglusdoy ni Coriantumr.
Nakita ni Ether a natungpal ti amin nga insao ti Apo. Nalpas ni Ether ti panangisurat iti no ania ti napasamak. Kalpasanna, siniguradona a masarakan dagiti tao dagiti sinuratna kalpasan ti ipapanawna. Nagtalek ni Ether iti Dios ket pinadpadaananna ti makidenna Kenkuana iti maysa nga aldaw.