“Da Abinadi ken Ari Noe,” Dagiti Estoria iti Libro ni Mormon (2023)
Da Abinadi ken Ari Noe
Mensahe manipud iti maysa a propeta
Inturayan ni Ari Noe dagiti Nephite nga agnanaed iti daga ni Nephi. Pinaited ni Noe dagiti taona iti adu a kuarta ket kalpasanna binusbosna daytoy kadagiti nasayaat a banag para iti bagina. Inayabanna dagiti saserdote a natangig tapno tumulong kenkuana nga agturay. Saan a nagtungpal ni Noe kadagiti bilin ti Dios. Ketdi, nagaramid iti adu a dakes a banag,
Indauluan ni Noe dagiti taona nga agbalin met a nadangkes. Saanda a sinurot ti Apo.
Nagnaed iti daga ti maysa a propeta ti Dios nga agnagan iti Abinadi. Imbaon ti Apo ni Abinadi a mangibaga ken ni Noe ken dagiti taona nga agbabawi.
Imbaga ni Abinadi kadagiti tao a kayat ti Apo nga agbabawida. No saanda nga agbabawi, palugodan ti Apo dagiti kabusor nga umay iti dagada ket mangituray kadakuada. Dagiti kabusorda ti mangparigat unay iti biag ni Noe ken dagiti taona.
Nagpungtot dagiti tao ken ni Abinadi gapu iti kinunana. Kayatda a papatayen, ngem pinagtalinaed ti Apo a natalged ni Abinadi ket tinulonganna a makalibas.
Kayat met a patayen ni Noe ni Abinadi. Saan a namati ni Noe iti Apo. Saan a nagbabawi isuna ken dagiti taona.
Kalpasan ti dua a tawen, imbaon ti Apo ni Abinadi nga agsubli tapno mangballaag kadagiti tao. Imbaga ni Abinadi kadagiti tao a sakupen dagiti kabusorda ti daga gapu ta saanda a nagbabawi. Nagpungtot dagiti tao ken ni Abinadi. Kinunada nga awan ti dakes nga inaramidda ken saanda nga agbabawi. Pinungoda ni Abinadi ket impanda ken ni Noe.
Nagaramid ni Noe ken dagiti saserdotena iti plano. Pinadas dagiti saserdote nga allilawen ni Abinadi babaen ti panangsaludsodda kenkuana iti adu. Situtured a sinungbatan ida ni Abinadi. Nasdaaw dagiti saserdote kadagiti sungbat ni Abinadi. Saanda a maallilaw isuna. Imbaga ni Abinadi kadagiti saserdote nga ad-adda a maseknanda iti kuarta ngem iti panangaramid iti umno.
Imbaga ni Noe kadagiti saserdotena a patayenda ni Abinadi. Ngem binallaagan ni Abinadi ida a saanda a sagiden isuna. Nagraniag ti rupana iti bileg ti Dios. Kinuna ni Abinadi a saan nga insuro dagiti saserdote dagiti linteg ti Dios. Insuro ni Abinadi kadakuada a mayanak ni Jesucristo, matay para kadatayo, ken agungar. Kinunana a pakawanen ida ni Jesus no agbabawida.
Inleppas ni Abinadi ti mensahena a nangibaonan kenkuana ti Apo nga itedna. Makapungtot pay laeng ni Noe. Imbagana kadagiti saserdotena nga alenda ni Abinadi ket patayenda.
Namati ti maysa a saserdote, a ni Alma, ken ni Abinadi. Pinadas ni Alma nga isalakan ni Abinadi. Ngem ita kagura met ni Noe ni Alma ket pinagtalawna isuna.
Imbaga dagiti saserdote ken Abinadi a mabalinna ti agbiag no ibagana a saan a pudno ti insurona. Ngem kinuna ni Abinadi nga insurona ti kinapudno. Nagpungtot manen ni Ari Noe ken dagiti saserdotena. Pinapatayda ni Abinadi babaen ti pananguram. Pinadas met a patayen dagiti guardia ni Noe ni Alma. Ngem naglemmeng ni Alma ket insuratna ti amin a balikas ni Abinadi.