“Ni Alma ken dagiti Taona,” Dagiti Estoria iti Libro ni Mormon (2023)
Ni Alma ken dagiti Taona
Pigsa manipud iti Dios kabayatan dagiti narigat a panawen
Nagnaed ni Alma ken dagiti taona iti napintas a daga. Nagmulada iti bukbukel ken nagbangonda kadagiti pagtaengan. Maysa a saserdote ti Dios ni Alma. Insurona dagiti taona nga agiinnayatda. Dimngeg dagiti tao ken ni Alma ket tinungpalda dagiti bilin ti Dios. Dimmakkel dagiti pamiliada, ken nangbangonda iti maysa a siudad.
Maysa nga aldaw, immay iti maysa a buyot dagiti Lamanite. Nayaw-awanda. Inkari dagiti Lamanite a dida biangan dagiti tao ni Alma no tulongan ida ni Alma a mangbirok iti dalanda nga agawid. Impakita ni Alma kadagiti Lamanite no kasano ti agsubli iti dagada.
Saan a tinungpal dagiti Lamanite ti karida. Ketdi, innalada ti daga ket pinagbantayda dagiti guardia kadagiti tao ni Alma. Pinagbalinda pay ti maysa a Nephite nga agnagan iti Amulon nga ari kadagiti tao ni Alma. Ni Amulon ket maysa a lider dagiti ulbod a saserdote. Isu ken dagiti nangato a saserdotena ti nangpapatay iti maysa a propeta ti Dios ken adu a dadduma pay a dakes a bambanag ti inaramidda
Mosiah 17:12–13; 23:31–32, 37–39; 24:9
Nagpungtot ni Amulon ken ni Alma. Pinarparigatna dagiti tao ni Alma nga agobra ken natangsit kadakuada. Narigat para kadagiti tao ni Alma.
Nagkararagda iti Dios para iti tulong. Imbaga ni Amulon kadakuada nga agsardengda nga agkararag. Kinunana nga asino man nga agkararag ket mapapatay.
Nagsardeng da Alma ken dagiti taona iti panagkararag iti napigsa. Ketdi, nagkararagda iti puspusoda. Dinengngeg ti Dios dagiti kararagda. Liniwliwana ida ken inkarina a tulonganna ida a makalibas. Pinalag-an ti Dios ti narigat a trabahoda. Naanus ken naragsak dagiti tao bayat ti panagdengngegda iti Dios. Ammoda a tultulongan ida ti Dios.
Nagtalek dagiti tao ni Alma iti Dios ken dakkel ti pammatida Kenkuana. Maysa nga aldaw, imbaga ti Dios kadakuada nga orasen a pumanaw. Dayta a rabii, nagsagana ni Alma ken dagiti taona. Inummongda ti amin nga ayup ken taraonda. Iti kabigatanna, pinaturog ti Dios dagiti Lamanite iti nauneg a turog. Kalpasanna naglibas ni Alma ken dagiti taona iti langalang ket nagdaliasatda iti agmalem.
Dayta a rabii, nagyaman iti Dios ti amin a lallaki, babbai, ken ubbing. Ammoda a ti Dios laeng ti makatulong kadakuada. Intultuloyda ti nagdaliasat iti uneg ti adu nga aldaw ket dimtengda iti daga ti Zarahemla. Naragsak a pinasangbay ida dagiti Nephite, ket nangisuro ni Alma iti tunggal maysa maipapan iti kaadda ti pammati ken ni Jesucristo. Namati ti adu a tao ken nabuniaganda.