1 Nephi 3

Panagsubli iti Jerusalem

Panagdaliasat para kadagiti pinanid a gambang

Nagdaliasat ti pamilia da Lehi ken Saria iti langalang. Iti maysa a tagtagainep, imbaga ti Apo ken ni Lehi ti maipapan kadagiti nasantuan a kasuratan a naisurat kadagiti pinanid a gambang. Adda dagitoy iti maysa a tao nga agnagan iti Laban idiay Jerusalem. Kinuna ni Apo a nasken nga itugot ti pamilia ni Lehi dagiti pinanid a gambang iti panagdaliasatda.

1 Nephi 3:1–3, 19–20

Imbaga ti Apo ken ni Lehi nga ibaonna dagiti annakna a lallaki nga agsubli iti Jerusalem tapno mangala kadagiti pinanid a gambang. Nagdayamudom dagiti kakabsat ni Nephi. Imbagada ken Lehi a narigat daytoy a banag nga aramiden. Saanda a kinayat ti mapan.

1 Nephi 3:4–5

Narigat unay daytoy nga aramiden, ngem kayat ni Nephi ti agtulnog. Ammona a tulonganto ti Apo isuna ken dagiti kakabsatna a lallaki. Imbaga ni Nephi ken Lehi nga agsublinto idiay Jerusalem ket alaenna dagiti pinanid a gambang.

1 Nephi 3:6–8

Nagsubli da Laman, Lemuel, Sam, ken Nephi iti Jerusalem. Idi nakadanonda sadiay, inkeddengda a mapan ni Laman iti balay ni Laban a mangkiddaw kadagiti pinanid a gambang.

1 Nephi 3:9–11

Idi kiniddaw ni Laman dagiti pinanid a gambang, inawagan ni Laban isuna a mannanakaw. Kinuna ni Laban a patayenna ni Laman.

1 Nephi 3:11–13

Nagtaray ni Laman ken imbagana kadagiti kakabsatna no ania ti napasamak.

1 Nephi 3:14

Nagliday dagiti uppat nga agkakabsat a lallaki. Kayat da Laman, Lemuel, ken Sam ti agsubli kadagiti dadakkelda iti langalang, ngem adda napanunot ni Nephi. Kinunana a mabalinda ti makisinnukat ken ni Laban tapno maalada dagiti pinanid a gambang. Nagsublida iti pagtaenganda iti siudad ket innalada amin a balitok ken pirakda a pangisukatda.

1 Nephi 3:14–16, 22–24

Idi impakitada ken Laban ti balitok ken pirak, kayatna a tagikuaen amin daytoy. Ngem saanna latta nga ited kadakuada dagiti pinanid a gambang. Imbes ketdi, imbagana kadagiti katulonganna a patayenda dagiti agkakabsat tapno maalana ti balitok ken pirakda.

1 Nephi 3:16, 23–25

Nagtaray dagiti uppat nga agkakabsat a nangisalakan iti biagda ket pinanawanda ti balitok ken pirakda. Saan a natiliw ida dagiti katulongan ni Laban. Naglemmeng dagiti agkakabsat iti maysa a kueba.

1 Nephi 3:26–27

Kalpasan amin dagitoy a narigat a banag, nagpungtot da Laman ken Lemuel ken ni Nephi. Sinaplitda da Nephi ken Sam iti maysa a pannaplit.

1 Nephi 3:28

Pagammuan ta, immay ti maysa nga anghel ket dinamagna no apay a sinaplitda ni Nephi. Kinuna ti anghel a napili ni Nephi a mangidaulo kadakuada. Kalpasanna, imbaga ti anghel kadakuada nga agsublida idiay Jerusalem. Isagananto ti Apo ti dalan para kadakuada tapno mangala kadagiti pinanid a gambang.

1 Nephi 3:29