“Bendisionan ni Jesus dagiti Ubbing,” Dagiti Estoria iti Libro ni Mormon (2023)
Bendisionan ni Jesus dagiti Ubbing
Ipakitana ti ayatna kadakuada
Adu ti insuro ni Jesucristo kadagiti tao. Nakitana a kasapulanda ti panawen a mangutob iti nasursuroda. Kiniddawna kadakuada nga agawidda ken agkararagda iti Nailangitan nga Ama tapno maawatanda no ania ti insurona kadakuada. Kalpasanna, inkari ni Jesus a bisitaenna manen ida iti sumaruno nga aldaw.
Nagsangit dagiti tao gapu ta kayatda ti panagbayagna pay bassit kadakuada. Inayat ni Jesus dagiti tao. Makitana a natibker unay ti pammatida. Imbilinna kadakuada nga iyegda kenkuana ti asinoman a masakit wenno marigatan iti aniaman a wagas. Kayatna a paimbagen ti tunggal maysa kadakuada.
Immay Kenkuana dagiti tao a kaduada dagiti masakit a kameng ti pamiliada ken gagayyemda. Pinaimbag ni Jesus ti tunggal maysa kadakuada. Nakaragragsakda unay. Nagparintumengda ket inagkanda dagiti sakana.
Imbaga ni Jesucristo kadakuada nga iyegda dagiti babassit nga annakda kenkuana. Impan dagiti tao dagiti annakda ket pinagtugawda ida iti daga iti aglawlaw ni Jesus.
Idi adda dagiti ubbing a kaduanan, binilin ni Jesus dagiti tattao nga agparintumengda iti daga. Nagparintumeng met. Kalpasanna nagkararag isuna iti Nailangitan nga Ama. Nagsao iti adu a nakaskasdaaw a bambanag a saan a mabalin a maisurat dagiti sasaona. Napno iti rag-o dagiti tattao.
Imbaga ni Jesus kadagiti tao a nabendisionanda gapu iti pammatida Kenkuana. Narikna ni Jesus ti kasta unay a rag-o isu a nagsangit.
Kalpasanna, saggaysa a binendisionan ni Jesus ti tunggal ubing. Nagkararag iti Nailangitan nga Ama para iti tunggal maysa kadakuada. Kalpasanna, kiniddawna kadagiti tao a kitaenda dagiti annakda.
Immay dagiti anghel manipud iti langit ket naguummongda iti aglawlaw dagiti ubbing. Bayat ti panangbendision dagiti anghel kadagiti ubbing, adda nailangitan a lawag ti nanglikmut kadakuada. Iti sabali pay nga aldaw, nakisarita manen ni Jesus kadagiti ubbing ket binendisionanna ida. Binendisionanna pay dagiti ubbing tapno makapagsaoda. Uray dagiti maladaga ket nagsaoda. Insuro dagiti ubbing dagiti nakaskasdaaw a bambanag kadagiti nagannakda.