1 Nephi 4–5

Ni Nephi ken dagiti Pinanid a Gambang

Panangsursuro a mangsurot iti Espiritu

Nagsubli da Laman, Lemuel, Sam, ken Nephi idiay Jerusalem iti rabii. Napan ni Nephi iti balay ni Laban idinto a naglemmeng dagiti kakabsatna a lallaki iti ruar ti siudad.

1 Nephi 4:4–5

Nagpaiwanwan ni Nephi iti Espiritu. Saanna nga ammo no ania ti nasken nga aramidenna, ngem ammona a tulongan isuna ti Apo a mangala kadagiti pinanid a gambang.

1 Nephi 4:6

Idi asideg ni Nephi iti balay ni Laban, nasarakanna ni Laban a naudatal iti daga. Nabartek ni Laban. Nakita ni Nephi ti espada ni Laban ket innalana daytoy.

1 Nephi 4:7–9

Idi kitaen ni Nephi ti espada, imbaga ti Espiritu kenkuana a patayenna ni Laban. Ngem saan a kayat ni Nephi ti mangpatay kenkuana. Imbaga ti Espiritu ken ni Nephi a nasaysayaat a matay ni Laban ngem iti maawanan ti pamilia ni Nephi kadagiti nasantuan a kasuratan. Kasapulanda dagiti bilin ti Dios a naisurat kadagiti pinanid a gambang.

1 Nephi 4:10–11, 13–17

Ammo ni Nephi a pinadas ni Laban ti mangpatay Kenkuana. Tinakaw pay ni Laban dagiti sanikuada ket saan nga agtungpal kadagiti bilin ti Dios.

1 Nephi 4:11

Imbaga manen ti Espiritu ken ni Nephi a patayenna ni Laban. Ammo ni Nephi a nangisagana ti Apo ti dalan para kenkuana a mangala kadagiti pinanid a gambang. Pinilina ti agtungpal iti Espiritu. Pinatay ni Nephi ni Laban ken insuotna ti kawes ni Laban.

1 Nephi 4:12–13, 17–19

Kalpasanna napan ni Nephi iti pagidulinan iti gameng ni Laban ket nasabatna ti katulongan ni Laban a ni Zoram. Nagtignay ken nagsao ni Nephi a kas ken ni Laban.

1 Nephi 4:20–23, 35

Imbaga ni Nephi ken ni Zoram a kasapulanna dagiti pinanid a gambang. Kalpasanna imbaga ni Nephi ken ni Zoram a sumurot kenkuana. Impagarup ni Zoram a ni Laban ni Nephi, isu nga inaramidna ti kayat ni Nephi.

1 Nephi 4:24–26

Idi rimmuar da Nephi ken Zoram iti siudad, impagarup da Laman, Lemuel, ken Sam a ni Laban ni Nephi. Nagbutengda ket rinugianda ti nagtaray.

1 Nephi 4:28

Inayaban ni Nephi dagiti kakabsatna a lallaki. Idi ammoda nga isu ni Nephi, insardengda ti nagtaray. Ngem kalpasanna, nagbuteng ni Zoram ket pinadasna ti agsubli idiay Jerusalem.

1 Nephi 4:29–30

Pinagsardeng ni Nephi ni Zoram. Imbagana ken ni Zoram a ti Apo ti nangbilin kenkuana a mangala kadagiti pinanid. Inawisna ni Zoram a kumuyog kadakuada a mapan iti naikari a daga. Ammo ni Zoram a makapagbalin isuna a nawaya a tao, saan a katulongan, ket inkarina a makikuyog ken ni Nephi ken ti pamiliana.

1 Nephi 4:31–37

Nagbaniagada nga agsubli kada Lehi ken Saria. Naragsak unay da Lehi ken Saria a makakita kadagiti annakda a lallaki. Impagarup ni Saria a natayen dagiti annakna a lallaki. Gapu ta pinagtalinaed ti Apo a natalged dagiti annakna a lallaki, nagtalek itan a nabilin ti pamiliada a pumanaw iti Jerusalem. Nangidaton ti pamilia da Lehi ken Saria kadagiti sakripisio tapno agyamanda iti Apo.

1 Nephi 4:38; 5:1–9

Binasa ni Lehi dagiti pinanid a gambang Nakitana nga addaan dagiti pinanid kadagiti pannursuro dagiti propeta. Naammuanna pay a ti maysa kadagiti kapuonanna ket ni Jose, a nabayagen nga inlako dagiti kakabsatna idiay Egipto. Ammo ni Lehi a napateg unay dagiti pinanid a gambang. Ammona a kayat ti Apo a maaddaan ti pamiliana kadagiti bilin.

1 Nephi 5:10–22