Nagungaren, ni Del Parson

Agosto 5–11: “Ti Naindaklan a Plano ti Ragsak”

Alma 39–42

No nakaaramid iti nakaro a biddut ti maysa a tao nga ay-ayatentayo, mabalin a narigat a maammuan no kasano ti agresponde. Maysa a paset a mamagbalin iti Alma 39–42 a nakapatpateg ket ti panangipalgakna no kasano a ni Alma—maysa a disipulo ni Cristo a naminsan a naaddaan kadagiti bukodna a nadadagsen a basol a pagbabawyan—natengngelna ti kasta a situasion. Nakaaramid iti seksual a basol ti anak a lalaki ni Alma a ni Corianton, ket ni Alma, kas nasursurona nga aramiden iti panagministrona, nagtalek iti bileg ti pudno a doktrina a mangted iti anakna a lalaki iti agnanayon a pannirigan ken mangyallukoy iti panagbabawi (kitaen iti Alma 4:19; 31:5). Kadagitoy a kapitulo, mapaliiwtayo ti kinatured ni Alma a mangkondena iti basol ken iti kinadungngo ken ayatna ken ni Corianton. Ket iti kamaudiananna, nariknatayo ti panagtalek ni Alma a ti Mangisalakan ket “umayto a mangikkat iti basbasol [ken] mangipakdaar iti naragsak a damag ti pannakaisalakan kadagiti taona” (Alma 39:15). Ti kinapudno a nagbabawi ni Corianton ken iti kamaudiananna nagsubli iti aramid a panagministro (kitaen iti Alma 49:30) ket makaited kadatayo iti namnama ti pannakapakawan ken pannakasubbot no mariribukantayo maipapan kadagiti bukodtayo a basol wenno basbasol ti maysa a tao nga ipatpategtayo (kitaen iti Alma 42:29).

Kitaen met iti “Alma Counsels His Sons” (video), Gospel Library.

Dagiti Kapanunotan iti Panagsursuro iti Pagtaengan ken iti Simbaan

Alma 39

Maliklikak ti seksual a basol.

Ti balakad ni Alma iti anakna a ni Corianton iti Alma 39 ket mangipaay iti dakkel a gundaway a mangammo maipapan kadagiti makadadael nga epekto ti seksual a basol, agraman ti pornograpia. Nalabit napatpateg pay, matulongannakayo pay a makaawat iti diaya ti Mangisalakan iti pammakawan ken pannakaagas kadagiti tao nga agbabawi. Mabalin a makatulong dagitoy a saludsod ken aktibidad:

• Ania dagiti biddut a nangiturong ken ni Corianton a manglabsing iti linteg ti kinadalus ti dayaw? (kitaen iti Alma 39:2–4, 8–9). Ania dagiti bunga dagiti tignayna? (kitaen dagiti bersikulo, 5–13). Ania ti pakakitaan nga adda kadatayo a nagbabawi ni Corianton? (kitaen iti Alma 42:31; 49:30; 48:18). Ania ti masursuroyo maipapan iti Mangisalakan manipud iti daytoy a padas?

• Basaen dagiti panid 19–20 ti Para iti Pigsa dagiti Agtutubo: Maysa a Pangiwanwan iti Panagpili. Kalpasanna, isuratyo ti bukodyo a panangilawlawag no ania ti pornograpia, no apay a napeggad daytoy, ken no anianto ti aramidenyo no maipasangokayo iti daytoy. (Kitaen met iti Mateo 5:27–28 ken Doktrina ken Katulagan 63:16.)

• Kasano nga ilawlawagyo iti maysa a gayyem no apay a pilienyo a liklikan ti pornograpia ken agbiag iti linteg ti kinadalus ti dayaw? Ania dagiti nalawag a pannakaammo ken pannakaawat nga ibinglayyo manipud iti “Sagrado ti Bagiyo” iti Para iti Pigsa dagiti Agtutubo: Maysa a Pangiwanwan iti Panagpili (dagiti panid 22–29)?

• Ibilangyo ti panangbuya iti video “To Look Upon” (Gospel Library). Isardengyo ti video iti tunggal gundaway a mabalin a sabali ti pilien ni David. Kasano a maipada dagiti pili ni David kadagiti pili a mabalin a pakaipasanguanyo?

Agsardeng tapno utoben. No agbuybuyakayo iti video, mangisursurokayo man wenno agad-adalkayo a bukbukodyo, sagpaminsan nga isardengyo ti video tapno saludsodenyo, “Ania ti masursurok?” Mabalin a daytoy ti mangawis kadagiti nalawag a pannakaammo ken pannakaawat manipud iti Espiritu Santo.

Kitaen met iti Bradley R. Wilcox, “Worthiness Is Not Flawlessness,” Liahona, Nob. 2021, 61–67; “Pornography” iti “Life Help” collection ti Gospel Library.

Alma 40–41

Anianto ti mapasamak kalpasan ti ipapatayko?

Adda sumagmamano a saludsod ni Corianton maipapan iti no ania ti mapasamak kalpasan ti ipapatay. Dagiti pakaseknanna ti nangiturong ken ni Alma a mangisuro kadagiti pagbatayan a masarakan iti Alma 40–41. Bayat ti panagadalyo, ilistayo dagiti kinapudno a masarakanyo maipapan kadagiti banag a kas iti lubong dagiti espiritu, panagungar, ken panangukom. Ibilang ti panangbasa kadagitoy a kapitulo manipud iti pannirigan ti maysa a tao, a kas ken ni Corianton, kasapulanna ti agbabawi—ngamin, pudno dayta para kadatayo amin.

Alma 40

Masarakak dagiti sungbat kadagiti saludsodko iti ebanghelio nga addaan iti pammati ken ni Jesucristo.

No dadduma mabalin nga ipagaruptayo nga ammo dagiti propeta ti sungbat iti tunggal saludsod iti ebanghelio. Ngem kitaen dagiti saan a nasungbatan a saludsod ni Alma iti kapitulo 40. Ania ti inaramidna a mangsarak kadagiti sungbat? Ania ti inaramidna idi saan a nakaawat kadagiti sungbat? Kasano a matulongannakayo ti pagwadan ni Alma?

Ti kararag ti maysa a wagas a pakasarakantayo kadagiti sungbat dagiti saludsod iti ebanghelio

Alma 42

Ti Pannubbot ni Jesucristo ti mangaramid a posible ti pannakasubbot.

Namati ni Corianton a saan a nainkalintegan ti pannakadusa gapu iti basol (kitaen iti Alma 42:1). Iti Alma 42, kasano a tinaming ni Alma ti pakaseknanna? Mabalinmo nga urnosen dagiti binatog iti daytoy a kapitulo iti dua a grupo: “Nalinteg ti Dios” ken “Naasi ti Dios.” Kasano a pagbalinen ti Pannubbot ti Mangisalakan nga agpada a posible ti hustisia ken asi? Agbirokkayo kadagiti nayon a pannakaammo ken pannakaawat iti video a ““The Mediator” (Gospel Library).

Kitaen iti “How Great the Wisdom and the Love,” Hymns, no. 195.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Alma 39:1, 10–11

Ti nasayaat a pagwadak ti makaiturong kadagiti dadduma ken ni Cristo.

• Makatulong ti balakad ni Alma ken ni Corianton tapno maawatan dagiti annakyo ti kinapateg ti panagbalin a nasayaat a pagulidanan. Ibilang ti aggigiddan a panangbasa iti Alma 39:1. Kasano a nasayaat a pagulidanan ni Shiblon a kabsat ni Corianton? Mabalin a mangsarak dagiti annakyo kadagiti mainayon a sungbat iti daytoy a saludsod iti Alma 38:2–4.

• Mabalinyo pay ti agay-ayam iti maysa a game a pagsisinnublatanyo ken dagiti annakyo iti panangsurot wenno panangtulad iti tunggal maysa. Usaren daytoy nga ay-ayam a mangiladawan no kasano a makatulong dagiti tignaytayo iti dadduma nga agaramid kadagiti nasayaat a pili. Aggigiddan a mangkanta iti “I Am like a Star” (Children’s Songbook, 163), ken tulonganyo dagiti annakyo a mangpanunot kadagiti wagas a pakapagbalinanda a nasayaat a pagwadan.

• Babaen ti maysa a flashlight wenno ladawan ti init, mabalinyo nga idilig ti lawag iti bileg ti nasayaat a pagwadan. Mabalinyo pay ken dagiti annakyo a mangkita kadagiti ladawan ni Jesus nga agar-aramid kadagiti nasayaat a banag ken pagsaritaan ti maipapan iti pagwadan nga impakitana kadatayo. Dagiti video a “Shine Your Light So Others May See” ken “Lessons I Learned as a Boy” ket makatulong kadagiti annakyo a mangilawlawag no kasano a makaiturong dagiti pagwadanda iti tattao ken ni Cristo.

Alma 39:9–13

Gapu ken ni Jesucristo, makapagbabawiak no agbiddutak.

• Uray no saan a detalyado ti panangdakamat maipapan iti kasasaad dagiti basolna, ilawlawag a nakaaramid iti biddut a pili ni Corianton. Ania ti maisaotayo a mangtulong kenkuana? Ibilang ti panangibasa iti Alma 39:9 kadagiti annakyo, ken tulonganyo ida a makaawat no ania ti kaipapanan ti agbabawi ken mangtallikud . Paneknekam a posible ti panagbabawi babaen ken ni Jesucristo ken ti Pannubbotna.

• Adtoy ti maysa a banag nga adalen a mangiladawan iti rag-o ti panagbabawi: Ikkanyo ti maysa nga ubing iti maysa a nadagsen a banag a tenglenna bayat ti panangisaritayo iti estoria maipapan iti maysa a tao a nakaaramid iti dakes ken nakarikna iti madi. Ibagayo kadagiti ubbing a maipada ti banag kadagiti madi a rikna a mabalin nga adda kadatayo no agaramidtayo iti biddut. Alaem ti nadagsen a banag manipud iti ubing bayat iti panangipaneknekmo a maikkat ti Nailangitan nga Ama ken ni Jesucristo dagiti nadagsen, madi a rikna ken matulongandatayo nga agbalin a nasaysayaat no agbabawitayo.

Alma 40:6–7, 11–14, 21–23

Kalpasan iti ipapataytayo, mapan dagiti espiritutayo iti lubong ti espiritu agingga iti Panagungar ken Panangukom.

• Gagangay a masdaaw no ania ti mapasamak kadatayo kalpasan ti ipapataytayo. Ania iti maaramidanyo a makatulong kadagiti annakyo a makasarak kadagiti naparegta a sungbat? Mabalinyo nga isurat ti ipapatay, lubong ti espiritu (paraiso ken pagbaludan ti espiritu), panangungar, ken panangukom iti nagsisina a panid ti papel. Tulonganyo a mangipaawat kadagiti ubbing ti kayat a sawen dagitoy a balikas. Bayat ti aggigiddan a panangbasayo iti Alma 40:6–7, 11–14, ken 21–23, mabalin dagiti annakyo ti mangyurnos kadagiti balikas segun iti panakapasamakda kadagitoy a bersikulo.

• Mabalin a magunggonaan dagiti in-inauna nga ubbing no makasarakda kadagiti sungbat kadagiti saludsod babaen ti panagsukisok iti Alma 40:6–7, 11–14, 21–23. Ibilangyo ti panagdamag kadagiti annakyo kadagiti saludsod a mabalin a masungbatan kadagitoy a bersikulo, kas iti “Anianto ti kasasaad ti bagik no agungarak?” Awisem ida a mangsukisok kadagiti sungbat kadagiti maitutop a bersikulo.

  

  Ni Maria ken ti Nagungar nga Apo, ni Harry Anderson

• Adda kadi am-ammo dagiti annakyo a maysa a tao a natayen? Nalabit a mabalinyo ti agsarita biit maipapan iti dayta a tao. Iburayyo ti pammaneknekyo nga iti maysa nga aldaw—agungarto dayta a tao—ken ti tunggal maysa gapu ken ni Jesucristo. No kasapulan, usarenyo ti panid ti aktibidad a mangilawlawag no ania ti kaipapanan ti agungar.

Para iti ad-adu pay a kapanunotan, kitaen ti isyu ti magasin a Friend iti daytoy a bulan.

Daytoy ti Anakko, ni Elspeth Caitlin Young