Para kadagiti Bendision ti Wayawaya, ni Scott M. Snow

Agosto 12–18: “Makapagbayag iti Pammati ken ni Cristo”

Alma 43–52

No basaentayo dagitoy a balikas iti rugi ti Alma kapitulo 43—“Ket ita agsubliak iti pakaammuan iti gubgubat iti nagbaetan dagiti Nephite ken dagiti Lamanite”—gagangay a masdaaw no apay inraman ni Mormon dagitoy estoria ti gubgubat idinto a limitado ti espasiona kadagiti pinanid (kitaen iti Dagiti Balikas ni Mormon 1:5). Agpayso nga adu ti gubgubattayo kadagiti ud-udina nga aldaw, ngem adda pateg kadagiti balikasna a nalablabes pay kadagiti panangiladawanna iti istratehia ken trahedia ti gubat. Isagananatayo met dagiti balikasna para iti gubat a “nagpailistaantayo amin” (Hymns, no. 250), ti gubat a pakidangdangadangantayo iti inaldaw a maibusor kadagiti puersa ti dakes. Agpaypayso unay daytoy a gubat, ket ti nagbanaganna ti mangapekto kadagiti agnanayon a biagtayo. Kas kadagiti Nephite, naparegtatayo babaen ti maysa a nasantuan a gapu—“ti Diostayo, relihion, ken wayawayatayo, ken talnatayo, dagiti assawatayo, ken dagiti annaktayo”—nga inawagan ni Moroni iti “pagsayaatan dagiti Kristiano” (Alma 46:12, 16).

Dagiti Kapanunotan iti Panagsursuro iti Pagtaengan ken iti Simbaan

Alma 43–52

Matulongannak ni Jesuscristo kadagiti naespirituan a pannakidangadangko.

Bayat ti panangbasayo iti Alma 43–52, kitaen no ania ti inaramid dagiti Nephite a namagballigi kadakuada (wenno saan a nagballigi). Kalpasanna utobenyo no kasano a mausaryo ti masursuroyo a mangtulong kadakayo nga agballigi kadagiti naespirituan a dangadangyo. Isuratyo dagiti pampanunotenyo iti baba:

• Alma 43:19: Nakasagana dagiti Nephite nga addaan iti kalasag. (Makapagkagumaanak a mangisagana iti bagik nga addaan iti naespirituan a kalasag.)

• Alma 43:23–24: Kinalikagumanda a gun-oden ti pannarabay ti propeta.

• Alma 44:1–4:

• Alma 45:1:

• Alma 46:11–20:

• Alma 48:7–9:

• Alma 49:3, 12–14:

Kasta met, a kitaen no ania ti masursuroyo manipud kadagiti panagkagumaan dagiti kabusor dagiti Nephite. Utobenyo no kasano a mabalinnaka a darupen ni Satanas kadagiti kasta met la a wagas:

• Alma 43:8: Kinalikaguman ni Zarahemnah a gumura dagiti taona tapno adda bilegna kadakuada. (Mabalin a sulisogennak ni Satanas nga agtignay a buyogan ti pungtot.)

• Alma 43:29:

• Alma 46:10:

• Alma 47:10–19:

Kitaen met iti Russell M. Nelson, “Embrace the Future with Faith,” Liahona, Nob. 2020, 73–76; “A Mighty Fortress Is Our God,” Hymns, no. 68.

Minerva Teichert (1888–1976), Panangsaluad ti maysa a Siudad a Nephite, 1949–1951, oil on masonite, 36 × 48 inches. Brigham Young University Museum of Art, 1969.

Alma 46:11–28; 48:7–17

“Makapagbayag iti Pammati ken ni Cristo.”

Tarigagayam kadi a mangpabassit iti bileg ti kabusor iti biagmo? Maysa a wagas ket ti mangsurot iti ballaag iti Alma 48:17 tapno agbalin a “kas ken ni Moroni.” Ibilangyo ti panangilista kadagiti balikas a mangiladawan ken ni Moroni bayat ti panangbasayo iti Alma 46:11–28; 48:7–17. Ania ti masursuroyo manipud ken ni Moroni maipapan iti “[pan]agbayag iti pammati ken Cristo”? (Alma 46:27)

Mabalinyo nga adalen no kasano a pinaregta ni Moroni dagiti dadduma iti “panggep dagiti Kristiano” (kitaen iti Alma 46:11–22). Kasano nga iladawanyo dayta a panggep? Ania ti maaramidyo a makiraman iti daytoy? Kasano a maparegtayo dagiti dadduma a makiraman met?

Maysa a banag nga inaramid ni Moroni a mangparegta kadagiti dadduma ket ti panangparnuay iti wagayway ti wayawaya, a nangyunay-unay kadagiti pagbatayan a mangparegta kadagiti Nephite (kitaen iti bersikulo 12). Ania dagiti pagbatayan a yunay-unay dagiti lidertayo iti Simbaan iti aldawtayo? Masarakanyo dagitoy iti For the Strength of Youth: A Guide for Making Choices (booklet, 2022), “The Family: A Proclamation to the World,” the Young Women ken dagiti tema iti Aaronic Priesthood Quorum , wenno dagiti kallabes a mensahe ti sapasap a komperensia. Mabalinyo a gupgopen no ania ti isursuroda iti sumagmamano a simple a binatog tapno mangparnuay iti bukodyo a wagayway ti wayawaya—maysa a banag a mangipalagip kadakayo nga agbalin a napudno iti Mangisalakan ken iti ebangheliona.

Kitaen met iti Gospel Topic, “Faith in Jesus Christ,” Gospel Library.

Alma 47

In-inut a mangsulisog ken mangallilaw ni Satanas.

Ammo ni Satanas a saankayo a natallugod nga agaramid kadagiti dadakkel a basol wenno mamati kadagiti nabatad a kinaulbod. Ngarud, usarenna dagiti di madmadlaw a kinaulbod ken babassit a sulisog—kas kaadu ti pagarupenna nga awatenyo—tapno mayaw-awannakayo manipud iti kinatalged ti nalinteg a panagbiag.

Sapulenyo daytoy a pagtuladan iti Alma 47, ken utobenyo no kasano a mabalin a padpadasen ni Satanas ti mangallilaw kadakayo. Ibilangyo dagitoy a nalawag a pannakaammo ken pannakaawat manipud ken ni Elder Robert D. Hales:

“Ginuyugoy ni mangliliput nga Amalickiah ni Lehonti a ‘bumaba’ ket sumango kenkuana iti tanap. Ngem idi bimmaba ni Lehonti iti nangato a daga, nasabidongan ‘iti in-inut’ agingga a natay, ket natnag ti buyotna kadagiti ima ni Amalickiah (kitaen iti Alma 47). Babaen kadagiti sinnupiat ken pammabasol, sumagmamano a tao ti mangallilaw kadatayo a bumaba iti nangato a daga. Ti nangato a daga isu ti yan ti lawag. … Daytoy ti natalged a daga” (“Christian Courage: The Price of Discipleship,” Liahona, Nob. 2008, 74).

Ania ti masursuroyo manipud iti video “Temptation Fades as We Seek Christ in Every Thought” (Gospel Library) a makatulong kadakayo a mangkedked iti sulisog?

Kitaen met iti Nehemiah 6:3; 2 Nephi 26:22; 28:21–22.

Alma 50–51

Mangyeg ti panagkaykaysa iti kinatalged.

Iti laksid ti kabal ken dagiti trinsera dagiti Nephite, di nagbayag a sinakup dagiti Lamanite ti adu kadagiti siudadda (kitaen iti Alma 51:26–27). Kasano a napasamak dayta? Sapulenyo dagiti sungbat bayat ti panagbasayo kadagitoy a kapitulo (kitaen nangnangruna iti Alma 51:1–12). Utobenyo no ania dagiti ballaag a mabalin nga adda iti daytoy a pakaammuan para kadakayo ken ti pamiliayo.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Alma 43:17–21; 48:7–8; 49:1–5; 50:1–6

Masarakak ti naespirituan a pannakasalaknib iti ebanghelio ni Jesucristo.

• Ibilangyo ti panangusar iti “Kapitulo 31: Inabak ni Kapitan Moroni ni Zerahemnah” (Dagiti Estoria iti Libro ni Mormon, 85–88) tapno mangisarita kadagiti annakyo maipapan iti gubat dagiti Nephite ken Lamanite. Bayat ti panangbasayo maipapan iti kabal dagiti Nephite iti Alma 43:19, mabalinyo nga idilig ti kabal a mangsalaknib iti bagitayo kadagiti banag nga inted ti Dios kadatayo a mangsalaknib kadagiti espiritutayo. Nalabit a mabalinyo ken dagiti annakyo ti agdrowing iti ladawan ti maysa nga ubing ken mangnayon iti maysa a pedaso ti kabal iti ladawan para iti amin a mainaganan dagiti annakyo a mangsalaknib kadatayo iti naespirituan.

• Iladawan dagitoy a bersikulo dagiti trinsera nga imbangon dagiti Nephite: Alma 48:7–9; 49:1–9; 50:1–6. Kalpasan ti aggigiddan a panangbasa kadagitoy a bersikulo, mabalin a magustuan dagiti annakyo ti mangbangon iti maysa a sarikedked manipud kadagiti banag a kas kadagiti tugaw ken kubrekama. Ti video “Elder Stevenson on Fortifying Families” (Gospel Library) makatulong kadakayo a pagsaritaan no kasano a naespirituan a mapatibker ti pagtaenganyo.

Alma 46:11–16; 48:11–13, 16–17

Makapagbalinak a “natibker iti pammati ni Cristo” a kas ken ni Kapitan Moroni.

• Mabalin a kitaen dagiti annakyo dagiti ladawan iti daytoy a balabala tapno mangisarita iti estoria maipapan iti wagayway ti wayawaya (kitaen iti Alma 46:11–16; “Kapitulo 32: Ni Kapitan Moroni ken ti Wagayway ti Wayawaya,” Dagiti Estoria iti Libro ni Mormon, 89–90). Ania ti kayat ni Moroni a laglagipen dagiti Nephite? (kitaen iti bersikulo 12)? Ania ti kayat ti Nailangatan nga Ama a laglagipentayo? Nalabit a mabalin nga agdisenio dagiti annakyo iti bukodda a “wagayway ti wayawaya” nga addaan iti ragup ti balikas wenno ladawan a mangtulongto kadakuada a manglagip kadagitoy a banag.

• Tapno maisuro dagiti annakyo maipapan iti panagbalin a “natibker iti pammati ni Cristo” a kas ken ni Moroni (kitaen iti Alma 48:13), mabalinyo a tulongan ida a mangbirok ken mangsagid iti maysa a banag a natibker. Ania ti kayat na a sawen ti pammati nga agbalin a natibker? Basaenyo nga aggigiddan ti Alma 11–12 tapno ammuen no ania ti nangpatibker ken ni Moroni iti pammatina ken ni Cristo. Mabalinyo pay ti aggigidan a mangkanta iti “I Will Be Valiant” (Children’s Songbook, 162). Ania ti maaramidtayo tapno agbalin a “natibker iti pammati ken ni Cristo”?

Alma 47:4–19

In-inut a sulisogen ken allilawennatayo ni Satanas.

Aggigiddan a basaen dagiti napili a bersikulo manipud iti Alma 47:4–19. Ania koma ti napasamak no imbaga ni Amilickiah ken ni Lehonti no ania ti planona nga aramiden manipud pay idi damo? Ania ti isuro kadatayo dagitoy a bersikulo maipapan iti no kasano a padasen ni Satanas nga allilawennatayo?

Tulonganyo dagiti annakyo a maaddaan iti panagtalek. Mabalin a marikna dagiti sumagmamano nga ubbing a saanda a kabaelan ti agsursuro iti ebanghelio iti bukodda. Ti maysa a wagas tapno maaddaanda ti panagtalek ket ti panangdayaw kadakuada no makiramanda iti panagsursuro. Sadino ti mabalinyo a pangaramatan iti daytoy a singasing kadagiti aktibidad iti daytoy a balabala?

Para iti ad-adu pay a kapanunotan, kitaen ti isyu ti magasin a Friend iti daytoy a bulan.

Wagayway ti Wayawaya, ni Larry Conrad Winborg.

© 2018 ni Larry Conrad Winborg