Babai, ni Jen Tolman, saan a mabalin a kopiaen

Hulio 29–Agosto 4: “Kumitaka iti Dios ken Agbiag”

Alma 36–38

Idi nakita ni Alma ti kinadangkes iti aglawlawna, nakarikna iti napalalo a “leddaang,” “panagtutuok,” ken “sanaang ti kararua” (Alma 8:14). “Iti kasta a kinadangkes dagitoy a tao,” kinunana kadagiti Zoramite, “masaktan ti kararuak” (Alma 31:30). Nariknana ti kasta met la a banag kalpasan a nakasubli manipud iti misionna kadagiti Zoramite—ken iti pannakakitana a “nangrugi a mapatangken ti puspuso dagiti tao, ken nangrugi a nasaktan gapu iti kinaiget ti balikas,” ket daytoy ti namagbalin a “naglaplapusanan ti pusona iti leddaang” (Alma 35:15). Ania ti inaramid ni Alma maipapan iti no ania ti nakita ken nariknana? Saan a nalaka a naupay wenno saan a nakapanunot iti negatibo maipanggep iti kasasaad ti lubong. Ketdi, “imbilinna a maurnong dagiti annakna a lallaki” ket insurona kadakuada “dagiti banag a maipapan iti kinalinteg” (Alma 35:16). Insurona kadakuada nga “awan ti sabali a pamuspusan wenno wagas a pakaisalakanan ti tao, babaen laeng ken ni Cristo. … Adtoy, isu ti balikas ti kinapudno ken kinalinteg” (Alma 38:9).

Dagiti Kapanunotan iti Panagsursuro iti Pagtaengan ken iti Simbaan

Alma 36; 38:5–6

Mayanakak iti Dios.

Manmano kadatayo ti maaddaanto kadagiti padas a makatignay rikna a kas iti pannakapasurot ni Alma. Ngem nasken iti tunggal maysa a “mayanak iti Dios,” nupay gagangay a mapasamak daytoy nga in-inut (Alma 36:23; 38:6). Bayat ti panangbasayo iti Alma 36, panunotenyo ti maipapan ti kayat a sawen ti mayanak iti Dios. Kas pagarigan, iti proseso ti pannakayanak iti Dios, ania ti mariknayo maipapan iti basol? maipapan ken ni Jesucristo? Kasano nga apektuan ti pannakayanak iti Dios ti ar-aramidenyo a kas sungbat kadagiti bukodyo a biddut? Ania dagiti dadduma pay a panagbalbaliw a mapasamak kadagiti patpatien ken tignayyo? Utobenyo no kasano a mapaspasaranyo dagitoy a panagbalbaliw.

Kitaen met iti Mosiah 5:7; 27:25–26; Alma 5:14; 22:15; Helaman 3:35; “Alma the Younger Is Converted unto the Lord” (video), Gospel Library.

Alma 36:12-24; 38:8–9

Sukatan ni Jesucristo ti ladingit iti rag-o.

No dadduma mabuteng dagiti tao nga agbabawi gapu ta makitada ti panagbabawi kas maysa a nasaem a dusa gapu iti basol. Ania iti panagkunayo nga ibaga ni Alma maipapan iti dayta? Tapno maammuanyo, mabalinyo a paggidiaten no ania ti kayarigan ti biag ni Alma sakbay a nagbabawi (kitaen iti Alma 36:6–17) iti panangiladawan iti bagina kalpasan ti panagbabawina (kitaen dagiti bersikulo 18–27). Segun iti Alma 36:17–18, kasano nga inawat ni Alma daytoy a pannakapakawan?

Kitaen met iti Matthew S. Holland, “The Exquisite Gift of the Son,” Liahona, Nob. 2020, 45–47.

Alma 37

Nataginayon dagiti nasantuan a kasuratan “para iti nainsiriban a panggep.”

Ibilang ti milagro ken bendision ti kaadda dagiti nasantuan a kasuratan ita! Bayat ti panangbasayo iti Alma 37, sapulenyo dagiti bendision a sumangbay manipud iti kaadda dagiti nasantuan a kasuratan (kitaen, kas pagarigan dagiti bersikulo 7–10, 18–19, 44–45).

Iti Alma 37:38–47, indasig ni Alma “ti balikas ni Cristo” iti Liahona. Bayat ti panangutobyo iti daytoy a panangidasig, usigen maipapan kadagiti wagas a nakapadasanyon iti milagro ken bileg dagiti pannursuro ni Cristo iti “inaldaw” (Alma 37:40).

Kitaen met iti D. Todd Christofferson, “The Blessing of Scripture,” Liahona, Mayo 2010, 32 32–35;“As I Search the Holy Scriptures,” Hymns, no. 277; “Alma Testifies to His Son Helaman” (video), Gospel Library.

Isuro kadatayo dagiti nasantuan a kasuratan no kasano ti mangsurot iti Dios

Alma 37:1–14

“Babaen dagiti babassit ken gagangay a banag agbalindanto a naindaklan a banag.”

No maminsan mariknatayo a dadakkel ken komplikado unay dagiti problematayo isu a nasken a dadakkel ken komplikado met dagiti pangrisut. Ngem saan a kanayon a dayta ti wagas ti Apo. Bayat ti panangbasayo iti Alma 37:1–14, ibilang no ania ti makaawis iti riknayo maipanggep no kasano nga aramidenna ti trabahona. Kalpasanna mabalinyo nga utoben ken isurat dagiti wagas a nakitayon daytoy a pagbatayan iti biagyo.

No isuroyo daytoy a pagbatayan iti maysa a tao, ania dagiti pagarigan manipud iti nakaparsuaan wenno inaldaw a panagbiag nga usarenyonto a mangiladawan iti daytoy? Masarakanyo ti sumagmamano iti mensahe ni Presidente Dallin H. Oaks a “Dagiti Babassit ken Gagangay a Banag,” (Liahona, Mayo 2018, 89–92).

Ania ti sumagmamano a babassit ken gagangay a banag a mangyas-asideg kadakayo iti Nailangitan nga Ama ken ni Jesucristo?

Masansan, a dagiti “babassit ken gagangay” a pilitayo ti mangpadakkel kadagiti pagdumaan iti biagtayo. Ibilang ti panangpili iti maysa a topiko manipud iti Para iti Pigsa dagiti Agtutubo: Maysa a Pangiwanwan iti Panagpili ken panagdamag iti bagiyo kadagiti saludsod a kas kadagitoy: Kasano nga apektuannak ken dagiti tao iti aglawlawko dagiti pilik maipapan iti daytoy? Ania dagiti babassit ken gagangay a panagbalbaliw a mabalinko nga aramiden a mangiturong iti dakdakkel a talna ken ragsak?

Kitaen met iti Michael A. Dunn, “One Percent Better,” Liahona, Nob. 2021, 106–8; Gospel Topics “Agency,” Gospel Library.

Usaren dagiti babassit ken gagangay a banag. Kas iti adu a dadduma pay a banag iti biag, maaramid ti panangisuro ken panagsursuro iti ebanghelio babaen kadagiti babassit ken gagangay a wagas. Kas pagarigan, kasano a mausar ti sangkabassit nga asin wenno lebadura a mangisuro iti bileg dagiti babassit ken gagangay a banag? (kitaen iti Mateo 5:13; 13:33).

Alma 37:35–37

“Makiuman iti Apo.”

Iti Alma 37:35–37, sapulenyo dagiti awis ni Alma iti anakna a ni Helaman. Ania kadagitoy nga awis ti mariknayo a pakaguyugoyanyo nga agtignay? Kas pagarigan, mabalinyo nga utoben no ania ti kaipapanan ti “makiuman iti Apo” (bersikulo 37). Kasano a pinadasyon nga aramiden daytoy? Kasano nga inturongnaka para iti pagsayaatan?

Alma 38

Ti panangibinglayko iti pammaneknekko maipapan ken ni Jesucristo ket makapapigsa kadagiti tao nga ay-ayatek.

Dagit balikas ni Alma iti anakna a ni Shiblon ti mangted iti napintas a pagwadan no kasano a papigsaen ken allukoyentayo dagiti ay-ayatentayo iti panagbiag iti ebanghelio. Ti panangadal iti Alma 38 ti mabalin a mangted kadakayo iti sumagmamano a kapanunotan para iti panangtulong kadagiti miembro ti pamilia ken gagayyem a makasarak iti pigsa ken ni Jesucristo. Isuratyo no ania ti masursuroyo.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Alma 36:6–24

Ti panagbabawi ti mangyeg kaniak iti rag-o ken ni Jesucristo.

• Tapno matulonganyo dagiti annakyo a makaawat a mangyeg iti rag-o ti panagbabawi, mabalinyo nga ikkan ida iti maysa a papel nga addaan iti naragsak a rupa iti maysa a bangir ken iti naliday a rupa iti sabali pay a bangir. Idawat kadakuada a dumngeg bayat ti panangbasayo wenno pananggupgopyo iti Alma 36:13, 17–20 ket itag-ay ti maysa kadagiti rupa a mangipakita no kasano ti rikna ni Alma. Mabalin nga isurat dagiti in-inauna nga ubbing dagiti balikas wenno ragup ti balikas a mangiladawan no kasano ti nariknana. Ania ti nangpaladingit ken ni Alma, ken ania ti nangyeg kenkuana iti rag-o? Kalpasanna mabalinyo nga ibaga kadakuada maipapan iti rag-o a mariknayo no agbabawikayo.

Alma 37:6–7

“Babaen dagiti babassit ken gagangay a banag agbalindanto a naindaklan a banag.”

• Mabalin a magustuan dagiti annakyo ti agsapul kadagiti babassit a banag a mangaramid a mapasamak dagiti dadakkel a banag. Mabalin a pagarigan dagiti banag a kas iti maysa a bateria, tulbek ti kotse, wenno uray pay ti maysa nga ay-ayam a mangliwliwa kadakuada. Kalpasanna, mabalinyo ti aggigiddan a mangbasa iti Alma 37:6–7 ken mangpanunot iti sumagmamano a babassit wenno gagangay a banag a kayat ti Dios nga aramidentayo. Ania dagiti dadakkel a banag a mabalin a mapasamak no agtungpaltayo kadagitoy babassit wenno gagangay a bilin?

• Mabalin met a padasen dagiti annakyo ti kastoy: rugian ti panangpunno iti maysa a tasa iti danum, maysa a tedted iti maminsan. Kasano a mainaig daytoy iti Alma 37:6–7? Kalpasanna mabalinyo nga isarita no kasano a dagiti “babassit ken gagangay a banag” ti Apo, kas iti inaldaw a panagbasa kadagiti nasantuan a kasuratan, ket maipada kadagiti tedted ti danum iti maysa a tasa.

• Tulonganyo dagiti annakyo a mangpanunot kadagiti wagas nga isangbayda maipapan kadagiti naindaklan a banag iti pagtaengan, pagadalan, wenno simbaan. Iladawan pay ti kanta a “’Give,’ Said the Little Stream” (Children’s Songbook, 236) daytoy a pagbatayan.

Alma 37:38–47

Matulongannatayo dagiti nasantuan a kasuratan iti inaldaw.

• Kasano a matulonganyo dagiti annakyo a mangpadur-as iti panagayat iti balikas ti Dios, kas iti inaramid ni Alma ken ni Helaman? Ibilang ti panangipakita kadakuada iti maysa a ladawan ti Liahona (kas iti Libro ti Arte ti Ebanghelio, num. 68) wenno panangawis kadakuada a mangidrowing iti maysa bayat iti panangibinglayda no ania ti ammoda maipapan iti daytoy (kitaen iti Alma 37:38–47; 1 Nephi 16:10, 28–29). Kasano a mayarig dagiti nasantuan a kasuratan iti Liahona?

Para iti ad-adu pay a kapanunotan, kitaen ti isyu ti magasin a Friend iti daytoy a bulan.

Agparang ti Anghel ken ni Alma ken dagiti Annak a Lallaki ni Mosiah, ni Clark Kelley Price