Hulio 22–28: “Imulayo Daytoy a Balikas iti Puspusoyo”

Alma 32–35

Para kadagiti Zoramite, ti panagkararag ket buklen ti panagtakder iti lugar a pakakitaan ti amin ken panangulit-ulit kadagiti awan kaes-eskanna, mapagpannakkel a balikas. Nagkurang dagiti Zoramite iti pammati ken ni Jesucristo—inlibakda pay a sibibiag Isuna—ken indadanesda dagiti marigrigat (kitaen iti Alma 31:9–25). No pagdasigen, situtured nga insuro da Alma ken Amulek a ti kararag ket nangnangruna pay nga adda pakainaiganna iti no ania ti adda iti pusotayo ngem iti panagtakder iti maysa a plataporma tapno makita ti kaaduan. Ken no saantayo a mangipakita iti kinaasi kadagiti tao a makasapul, ti kararagtayo ket “awan kaes-eskan … ken awan ti maipaayna” (Alma 34:28). Ti kapatgan, agkararagtayo gapu ta adda pammatitayo ken ni Jesucristo, a mangidiaya iti pannakasubbot babaen ti “awan patinggana ken agnanayon a datonna” (Alma 34:10). Ti kasta a pammati, inlawlawag ni Alma, ket mangrugi iti kinapakumbaba ken “tarigagay a mamati” (Alma 32:27). Iti panaglabas ti panawen, nga addaan iti kanayon a pannakataraon, agramut ti balikas ti Dios iti puspusotayo agingga nga agbalin a “kayo nga agtubtubo nga agturong iti agnanayon a biag” (Alma 32:41).

Dagiti Kapanunotan iti Panagsursuro iti Pagtaengan ken iti Simbaan

Alma 32:17–43

Aramatek ti pammatik ken ni Jesucristo babaen iti panangimula ken panangtaraon iti balikasna iti pusok.

Bayat ti panangbasam iti Alma 32:17–43, kitaen dagiti balikas ken ragup ti balikas a makatulong kadakayo a makaawat no kasano nga aramaten ti pammati ken ni Jesucristo. Ania ti masursuroyo maipanggep iti no ania ti pammati ken no ania ti saan?

Adtoy ti sabali pay a wagas a panagadal iti Alma 32 ket agdrowing kadagiti ladawan a mangibagbagi kadagiti nadumaduma a paset ti panagdakkel ti maysa a bukel. Kalpasanna markaan ti tunggal ladawan kadagiti balikas manipud iti Alma 32:28–43 a mangtulong kadakayo a makaawat no kasano ti mangimula ken mangtaraon iti balikas ti Dios iti pusoyo.

Kitaen iti Russell M. Nelson, “Christ Is Risen; Faith in Him Will Move Mountains,” Liahona, Mayo 2021. 101–4.

Alma 32:26–43

Maammuak para iti bagik.

Kadagiti Zoramite a saan pay a sigurado maipapan iti pammaneknek ni Alma maipapan ken ni Cristo, insingasing ni Alma ti “padas” (kitaen iti Alma 32:27). Kasapulan dagiti padas ti tarigagay, panagusisa, panagtignay, ken uray sangkabassit laeng a pammati —ket mabalin nga agbanagda kadagiti nakaskasdaaw a pannakatakuat! Panunoten maipapan kadagiti pamadasan a nakitayon wenno nairamankayo. Segun iti Alma 32:26–36, ania a kita ti pamadasan a makaiturong iti pammati ken ni Jesucristo?

Kasano a “napadasanyo” ti balikas ti Dios ket naammuanyo a “naimbag ti balikas”? (Alma 32:28).

Dagiti Adigi ken Raya

Isuro kadatayo ni Elder Dushku a manmano dagiti nakaskasdaaw a naespirituan a padas ken gagangay nga ikkannatayo ti Apo iti maysa a raya ti lawag iti tunggal kanito.

Alma 33:2–11; 34:17–29

Makapagdaydayawak iti Dios iti kararag, ania man nga oras ken sadino man a lugar.

Ti pammagbaga da Alma ken Amulek maipanggep iti panagdaydayaw ken panagkararag ket nairanta a mangatur kadagiti nalawag a saan a panagkikinnaawatan nga adda kadagiti Zoramite. Ibilang ti panangilista kadagitoy (kitaen iti Alma 31:13–23). Sumaruno iti dayta a listaan, mabalin a makaaramidkayo iti listaan dagiti kinapudno maipanggep iti kararag iti Alma 33:2–11 ken 34:17–29. Kasano nga apektuan dagiti banag a masursuroyo manipud kadagitoy a bersikulo ti wagas a panagkararag ken panagdaydayawyo?

Masarakanyo met dagiti pannakaawat manipud iti himno maipapan iti kararag, kas iti “Sweet Hour of Prayer” (Hymns, no. 142).

Alma 34:9–16

Kasapulak ni Jesucristo ken ti Pannubbotna

Kitaen no mamim-ano nga inusar ni Amulek dagiti balikas nga awan inggana ken agnanayon a mangiladawan iti panangsubbot a sakripisio ti Mangisalakan iti Alma 34:9–14. Apay a napateg a maammuan nga awan patinggana ken agnanayon ti Pannubbot ti Mangisalakan? Sapulen dagiti balikas ken ragup ti balikas kadagitoy a bersikulo a mangiladawan pay iti Pannubbot ti Mangisalakan: Hebreo 10:10; 2 Nephi 9:21; Mosiah 3:13.

Uray no ammotayo nga awan patinggana ken agnanayon ti bileg ni Jesus a mangisalakan, mabalin nga agduaduatayo no dadduma a maaramat dayta kadatayo—wenno iti maysa tao a nakabasol kadatayo. Naminsan a nagsarita ni Elder David A. Bednar maipapan kadagiti tao a “kasla adda pammatida iti Mangisalakan, ngem saanda a mamati a sidadaan a magun-od dagiti naikari a bendisionna kadakuada” (“If Ye Had Known Me,” Liahona, Nob. 2016, 104). Ania ti mabalin a manglapped kadatayo iti naan-anay a panangawat iti bileg ti Mangisalakan? Utoben no kasano a maammuanyo nga awan patinggana ken agnanayon ti Pannubbot ni Jesucristo.

Tapno mautob no kasano ti kadakkel ti panagkasapulanyo iti Pannubbot ti Mangisalakan, makatulong ti panangpanunot iti maysa a banag a kasapulanyo iti inaldaw. Saludsodenyo iti bagiyo, “Ania ngata koma ti kayarigan ti biagko no awan daytoy?” Kalpasanna, bayat ti panagadalyo iti Alma 34:9–16, utobenyo no ania koma ti kayarigan ti biagyo no awan ni Jesucristo. Masarakanyo ti dadduma pay a pannakaammo ken pannakaawat iti 2 Nephi 9:7–9. Kasano a gupgopenyo ti Alma 34:9–10 iti maysa a binatog?

Kitaen met iti Michael John U. Teh, “Our Personal Savior,” Liahona, Mayo 2021, 99–101; Gospel Topics, “Atonement of Jesus Christ,” Gospel Library; “Reclaimed” (video), Gospel Library.

Alma 34:30–41

“Ita ti kanito ken aldaw ti pannakaisalakanyo.”

Panunotenyo a kayatyo ti makipaset iti maysa a marathon wenno pabuya iti musika. Ania ti mapasamak no inurayyo agingga iti aldaw ti pasken tapno agsaganakayo? Kasano a mainaig daytoy a pagarigan kadagiti pammallaag ni Amulek iti Alma 34:32–35? Ania ti peggad ti panangitantan kadagiti panagkagumaantayo nga agbabawi ken agbalbaliw?

Tibersikulo 31 addaan met iti mensahe para kadagiti tao a mabalin a madanagan a nabayagen a nagtantanda ken naladaw unayen tapno agbabawi. Ania koma ti masaoyo iti daytoy a mensahe?

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Alma 32:1–16

Maisuronak ti Apo no piliek ti agpakumbaba.

• Nagballigi da Alma ken Amulek iti panangisuro kadagiti Zoramite a napakumbaba. Ania ti kayat a sawen ti agpakumbaba? Tulonganyoi dagiti annakyo a mangsapul iti depinision ti napakumbaba iti Pangiwanwan iti Nasantuan a Kasuratan. Ania dagiti dadduma pay a pamugtuan maipapan iti kaipapanan dagitoy a balikas a masarakantayo iti Alma 32:13–16? Awisenyo dagiti annakyo a mangileppas iti maysa a binatog a kas iti “Agpakpakumbabaak no .”

Alma 32:28–43

Pumigsa ti pammaneknekko ken ni Jesucristo no taraonak daytoy.

• Pamiliar a banag dagiti bukbukel, kaykayo, ken bunga a makatulong kadagiti ubbing a makaawat kadagiti masinunuo a pagbatayan kas iti pammati ken pammaneknek. Bay-an nga iggaman dagiti annakyo ti bukel bayat ti panagbasayo iti Alma 32:28. Kalpasanna mabalinyo a kiddawen kadakuada a tulongandakayo a mangpanunot kadagiti wagas a ti panangpadakkel iti pammaneknek maipapan ken ni Jesucristo ket mayarig iti panagmula ken panangtaraon iti maysa a bukel (kitaen iti “Kapitulo 29: Mangisuro ni Alma maipapan iti Pammati ken Balikas ti Dios,” Dagiti Estoria iti Libro ni Mormon, 81). Nalabit a mabalinyo nga imula ti bukelyo ket pagsaritaan no ania ti kasapulan tapno matulongan ti maysa a bukel—wenno maysa a pammaneknek—a dumakkel.

• Maysa a ladawan ti kayo ti naipakuyog itoy a balabala; mabalinyo nga usaren a mangiladawan kadagiti balikas ni Alma kadagitoy a bersikulo iti Alma 32:28–43. Wenno mabalinyo ti mapan agpagnapagna tapno sapulen dagiti mula iti nadumaduma a tukad ti panagdakkel ken basaen dagiti bersikulo manipud iti Alma 32 a mangidasig ti dumakdakkel a mula iti pammaneknektayo. Wenno nalabit a mabalin nga idrowing dagiti annakyo ti maysa a kayo iti pisarra ken panayonanyo iti maysa a bulong wenno bunga tunggal mapanunotda ti maysa a banag a maaramidda a makatulong a mangpadakkel iti pammaneknekda ken ni Jesucristo.

• Mabalin a papadasyo kadagiti annakyo a mangiduron iti bukel (a mangibagi iti balikas ti Dios) iti bato (a mangibagi iti napannakkel a puso) ken iti nalukneng a daga (a mangibagi iti napakumbaba a puso). Aggigiddan a basaen ti Alma 32:27–28. Pagsasaritaan no ania ti mabalin a kaipapanan ti “mangted iti lugar” (bersikulo 27) para iti balikas ti Dios iti puspusotayo.

Agdrowing kadagiti ladawan. Makasursuro a nasaysayaat ti sumagmamano a tao no agdrowingda iti maysa a ladawan ti no ania ti masursuroda. Mabalin a magustuan dagiti annakyo nga idrowing ti maysa a bukel a dumakkel a maysa a kayo bayat ti panagadalda iti Alma 32.

Alma 33:2–11; 34:17–27

Makapagkararagak iti Nailangitan nga Ama iti ania man nga oras, maipapan iti ania man a banag.

• Tulonganyo dagiti annakyo a mangsapul kadagiti ragup ti balikas a mangiladawan kadagiti lugar a mabalin a pagkararagantayo (iti Alma 33:4–11) ken dagiti banag a maikararagantayo (iti Alma 34:17–27). Nalabit a mabalinda ti agdrowing kadagiti ladawan ti bagida nga agkarkararag kadagitoy a lugar. Agbibinninglaykayo iti padas idi dinengngeg ti Nailangitan nga Ama dagiti kararagyo. Aggigiddan nga agkansion iti maysa a kanta maipapan iti kararag, kas iti “A Child’s Prayer” (Children’s Songbook, 12–13).

Para iti ad-adu pay a kapanunotan, kitaen ti isyu ti magasin a Friend iti daytoy a bulan.

“Gapu iti kinaregta ken ti pammatiyo ken iti anusyo a nangtaraken iti balikas, … adtoy, iti saan a mabayag purosenyonto ti bungana, a kapatgan” (Alma 32:42).