Panunotem ti amin a rason a mabalin nga ited dagiti tao iti saanda a panangibinglay iti ebanghelio: “Awan umdas nga ammok” wenno “Diak sigurado no interesadoda” wenno nalabit a “Mabutengak amangan no didakto awaten?” Nalabit a naammuam ti bagim nga agpampanunot kadagiti kasta met la a banag no dadduma. Adda nayon a rason dagiti Nephite iti saanda a panangibinglay iti ebanghelio kadagiti Lamanite: nailadawan ida kas “atap ken nasukir ken nakaam-amak a tattao; tattao nga agragsak iti panagpapatay kadagiti Nephite” (Alma 17:14; kitaen met iti Alma 26:23–25). Ngem dagiti lallaki nga annak ni Mosiah nga addaan iti napigpigsa pay a rason no apay nariknada a nasken nga ibinglayda ti ebanghelio kadagiti Lamanite: “Tinarigagayanda a nasken a maipakdaar ti pannakaisalakan iti amin a parsua, ta dida maawat a matay ti asino man a kararua” (Mosiah 28:3). Daytoy nga ayat a nangparegta ken ni Ammon ken dagiti kakabsatna ket mabalin a maparegtanaka met a mangibinglay iti ebanghelio iti pamiliam, gagayyem, ken kapulapolmo—uray dagitay mabalin a kasla saan nga umawat iti daytoy.
Dagiti Kapanunotan iti Panagsursuro iti Pagtaengan ken iti Simbaan
Dagiti simple, agtultuloy nga aramid ti kinapasnek ken Cristo ti mangtulong kaniak nga umawat iti bilegna.
Ania ti masursurom manipud iti Alma 17:1–4 maipapan iti no kasano a pagtalinaedem a natibker ti pammaneknek ken panagkumitmo ken ni Jesucristo? Ania ti inaramid dagiti annak ni Mosiah, ken kasano a binendisionan ida ti Apo?
Bayat ti panangbasam maipapan kadagiti padas dagiti annak a lallaki ni Mosiah iti Alma 17–22, kitaem no kasano a nangapekto ti naespirituan a panagsaganada iti panagserbida kadagiti Lamanite (kas pagarigan, kitaen iti Alma 18:10–18, 34–36; 20:2–5; 22:12–16). Ania ti mariknam a makaparegta nga aramidem a mangsurot iti pagwadanda?
Makapagbalinak a maysa a ramit kadagiti ima ti Dios.
Nupay dagiti pakaammuan maipapan iti pannakapasurot a mabasbasatayo kadagiti nasantuan a kasuratan ket masansan a makaawis-rikna a paspasamak, ngem iti kaungganda masansan a makitatayo dagiti indibidual nga addaan iti tured nga agsao ken mangibinglay iti pammaneknekda ken ni Jesucristo. Panunotem maipapan iti daytoy bayat ti panangbasam maipapan ken Abish ken dagiti annak a lallaki ni Mosiah iti daytoy a lawas.
Ania ti panagkunam ti kaipapanan ti agbalin a maysa a ramit kadagiti ima ti Dios? Mabalin a makatulong no panunotem maipapan dagiti ramit wenno alikamen a mabalin nga usarem iti inaldaw a panagbiagmo. Iti Alma17:6–12, sapulem no ania ti inaramid dagiti annak a lallaki ni Mosiah tapno makapagbalinda a ramit kadagiti ima ti Dios. Kasano a makapagbalinka nga ad-adda nga epektibo a ramit iti panangtulong iti dadduma nga umasideg ken Cristo?
Ania ti makaawis-rikna kenka maipapan ken ni Abish iti Alma 19:16–36? Ania ti masursurom kenkuana maipapan iti panangtulong iti dadduma a mangbangon iti pammati ken Cristo? Kas pagarigan, ania ti mariknam a makatulong kadagiti tao nga ay-ayatem a “mamati iti pannakabalin ti Dios”? (Alma 19:17).
Mabalinmo met nga idilig ti padas ni Abish kadagiti pagbatayan nga insuro ni Elder Dieter F. Uchtdorf iti “Missionary Work: Sharing What Is in Your Heart” (Liahona, Mayo 2019, 15–18). Kasano nga impagwadan ni Abish ti “Lima a Simple a Singasing” ni Elder Uchtdorf? Padasem nga isurat ti sumagmamano a banag a mabalin nga isaritam maipapan ken Jesucristo. Kas pagarigan, “Para kaniak, ni Jesucristo …” wenno “Tulongannak ti Mangisalakan …”
Kitaen met iti Gospel Topics, “Ministering as the Savior Does,” Gospel Library; “Brightly Beams Our Father’s Mercy,” Hymns, no. 335; “Come and See,” “Come and Help,” “Come and Belong” (videos), Gospel Library.
Agaramat kadagiti adalen a banag [object lesson]. Ania man a kanito a makita wenno masagid dagiti tao ti maysa a banag a mainaig iti masursuroda, napapaut la ketdi a malagipda daytoy. No mangisursuroka maipapan iti Alma 17:11, kas pagarigan, ibilang ti panangipakita kadagiti instrumento ti musika wenno ramit iti panagsurat tapno makatulong a mangparegta iti panaglilinnawag maipapan iti panagbalin a ramit iti ima ti Dios.
No ipakitatayo ti ayat kadagiti dadduma, matulongantayo ida nga umawat iti ebanghelio ni Jesucristo.
Kitaen kadagiti bersikulo iti Alma 17–19 a mangipakita no kasano a pinaregta ti ayat ni Ammon kadagiti Lamanite dagiti panagkagumaanna a mangibinglay iti ebanghelio ni Jesucristo. Ania dagiti dadduma pay a kinapudno maipapan iti panangibinglay iti ebanghelio a masursurom manipud iti pagwadanna?
Kitaen met iti “Ammon Serves and Teaches King Lamoni (video), Gospel Library.
Ladawan
Ni Ammon a mangisalsalakan kadagiti karnero ti ari
Minerva K. Teichert (1888–1976), Ni Ammon a Mangisalsalakan kadagiti Arban ti Ari, 1949–1951, oil iti masonite, 35 15/16 × 48 a pulgada. Museu ti Arte iti Brigham Young University, 1969.
Kalpasan ti panangisalaysayna manen iti pannakapasurot ni Lamoni ken dagiti taona, ginupgop ni Mormon ti pakaammuan nga addaan obserbasion maipapan ken ni Jesucristo. Ania ti isuro kenka ti Alma 19:36 maipapan iti kababalin ti Apo? Ania pay ti isuro kenka ti pakaammuan iti Alma 19:16–36 maipapan Kenkuana? Kaano a nariknam ti takiag ti Apo a nakatanggaya kenka?
Ti pannakaammo iti Dios ket maikari iti ania man a sakripisio.
Idilig ti no ania ti situtulok nga insuko ti ama ni Lamoni tapno maisalakan ti biagna (kitaen iti Alma 20:23) iti no ania ti situtulokna nga insuko idi agangay tapno umawat iti rag-o ti ebanghelio ken tapno maam-ammona ti Dios (kitaen iti Alma 22:15, 18). Utobem no ania ti situtulokmo nga isakripisio tapno ad-adda a naan-anay a maam-ammom ti Dios.
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Dumakkel ti pammaneknekko maipapan ken ni Jesucristo no agbasaak kadagiti nasantuan a kasuratan, agkararag, ken agayunoak.
Kasano a matulongan dagiti pagwadan dagiti annak ni Mosiah dagiti annakmo a mangbukel kadagiti pammaneknekda maipapan ken ni Jesucristo? Mabalinmo a tulongan dagiti annakmo a mangbirok iti no ania ti inaramid dagiti lallaki nga annak ni Mosiah a mangbangon iti naespirituan a pigsada iti Alma 17:2–3. Kalpasanna mabalinda pay ti agdrowing kadagiti ladawan wenno mangsapul kadagiti banag a mangibagi kadagitoy a banag. Tulongam ida a mangplano no anianto ti aramidenda a mangpapigsa kadagiti pammaneknekda maipapan iti Mangisalakan.
Maibinglayko ti ebanghelio ni Jesucristo kadagiti dadduma.
Tapno masursurom ti maipapan iti panagbalin a ramit kadagiti ima ti Dios, kas kadagiti lallaki nga annak ni Mosiah, mabalinmo ken dagiti annakmo ti mangsapul iti maysa nga instrumento wenno ramit ket pagsaritaan no ania ti pakausaranna. Kalpasanna mabalin nga aggigiddan a basaenyo ti Alma 17:11 ket paglilinnawagan no ania ti kayat a sawen ti agbalin a ramit ti Nailangitan nga Ama tapno makatulong kadagiti tao nga agsursuro maipapan ken ni Jesucristo.
Ti panid ti aktibidad ita a lawas ket addaan kadagiti ladawan a mangibagi kadagiti kinapudno nga insuro ni Ammon ken ni Ari Lamoni. Mabalinmo a tulongan dagiti annakmo a mangbirok kadagitoy a kinapudno iti Alma 18:24–40. Mabalin dagiti ubbing nga agpammarang a misionario ken ibinglayda no ania ti ammoda maipanggep kadagitoy a kinapudno.
Kalpasan a nabasam a kaduam dagiti annakmo ti maipapan ken ni Abish (kitaen iti Alma 19:16–20, 28–29), mabalinda ti agpammarang a kas ken Abish babaen ti panagtarayda iti lugarda, panagtuktokda kadagiti ridaw, ken panangisalaysay maipapan iti napasamak iti Alma 19:1–17. Kasano a makapagbalintayo a kas Abish ken mangibinglay no ania ti ammotayo maipapan ken ni Jesucristo ken ti ebangheliona? Mabalin nga agdrowing dagiti annakmo kadagiti ladawan ti bagbagida a mangibingbinglay iti ebanghelio iti maysa a tao wenno aggigiddan a mangkansion iti kanta maipapan iti panangibinglay iti ebanghelio, kas iti “Called to Serve” (Children’s Songbook, 174–75).
Matulongak dagiti dadduma nga umasideg ken ni Cristo babaen ti panangipakitak iti ayatko para kadakuada.
Idi damo, agpada a natangken ti puso ni Ari Lamoni ken ti amana iti ebanghelio. Idi agangay, nalukneng ti pusoda, ket namatida ken ni Jesucristo. Kasano a napasamak daytoy? Tulongam dagiti annakmo a mangtakuat kadagiti sungbat iti daytoy a saludsod bayat ti panangrebyum kadakuada dagiti padas ni Ammon. Mabalinda a yakem ti “Kapitulo 23: Ammon: Maysa a Naindaklan a Katulongan” ken “Kapitulo 24: Maam-ammo ni Ammon ti Ama ni Ari Lamoni” (Dagiti Estoria iti Libro ni Mormon, 64–68, 69–70). Wenno nalabit a mabalin nga agdrowing dagiti annakmo kadagiti ladawan dagiti nadumaduma a paset ti estoria ket usarem dagiti ladawan a mangisarita iti estoria. Ania ti inaramid ni Ammon a nangtulong ken ni Lamoni ken ti amana a manglukat iti puspusoda iti ebanghelio ni Jesucristo? (kitaen iti Alma 17:21–25; 20:8–27; 22:1–3).
Nalabit a mabalin nga agpanunotka ken dagiti annakmo iti maysa a tao nga agkasapulan a mangammo iti ad-adu pay maipapan ken ni Jesucristo. Tulongam ida a mangpanunot kadagiti wagas a pakapagbalinanda a nasayaat a pagwadan ken pangipakitaanda iti ayat iti dayta a tao, kas iti inaramid ni Ammon ken ni Lamoni ken iti amana.
Para iti ad-adu pay a kapanunotan, kitaen ti isyu ti magasin a Friend iti daytoy a bulan.