Ladawan da Alma ken Amulek a maisalsalakan manipud iti pagbaludan, ni Andrew Bosley

Hunio 24–30: “Sumrek iti Paginanaan ti Apo”

Alma 13–16

Iti adu a wagas, nasayaat ti biag iti Ammonihah para kada Amulek ken ni Zeezrom nga agpadpada. Ni Amulek ti “tao a bigbigen dagiti makaam-ammo kenkuana” nga “adu ti kakabsat ken gagayyem[na]” ken “nalabon a kinabaknang” (Alma 10:4). Ni Zeezrom ti “maysa kadagiti kalaingan nga abogado” ket isu ti “kaaduan iti pamastrekan” (Alma 10:31). Kalpasanna dimteng ni Alma a naawis nga agbabawi ket “sumrek iti paginanaan ti Apo” (Alma 13:16). Para kada Amulek, Zeezrom, ken dadduma pay, ti panangawat iti daytoy nga awis ket agkasapulan iti sakripisio ken uray pay no agbanag iti dumani saanen a maibturan a rigat.

Ngem kinapudnona saan pay a nalpas ti estoria dita. Iti Alma 13–16, masursurotayo ti maudi a mapasamak kadagiti mamati “iti bileg ni Cristo iti pannakaisalakan” (Alma 15:6). No dadduma adda pannakaisalakan, no dadduma pannakaagas—ket no dadduma saan nga agbalin a nalaklaka dagiti banag iti biag. Ngem kanayon, nga “awaten a mismo ti Apo [dagiti taona] iti ngato, iti gloria” (Alma 14:11). Kanayon, ikkannatayo ti Apo iti “bileg, a maibatay iti pammati[tayo] … ken ni Cristo” (Alma 14:28). Ket kanayon, a ti “pammati iti Apo” ti mangted kadatayo iti “namnama nga umawat[tayo] iti agnanayon a biag” (Alma 13:29). Bayat ti panangbasayo kadagitoy a kapitulo, makagun-odkayo iti liwliwa kadagitoy a kari, ket mabalin a nasaysayaat a maawatanyo no ania ti ipaawat ni Alma idi insaona ti “ paginanaan ti Apo” (Alma 13:16).

Dagiti Kapanunotan para iti Panagsursuro iti Pagtaengan ken iti Simbaan

Alma 13:1–19

Itudonak dagiti ordinansa ken katulagan ti priesthood ken ni Jesucristo para iti pannakasubbot.

Ipalgak dagiti balikas ni Alma iti Alma 13 dagiti nabileg a kinapudno maipapan iti bileg ti priesthood ti Dios ken ti panggepna—tapno isagananatayo a sumrek iti “paginanaan ti Apo,” wenno agnanayon a biag (Alma 13:16). Nalabit a mabalinyo nga isurat ti uray maysa laeng a kinapudno para iti tunggal bersikulo iti Alma 13:1–9. Adtoy ti sumagmamano a kapanunotan a pangrugianyo:

Bersikulo 1.Maawagan pay ti priesthood iti “ti urnos ti Anak [ti Dios]” (kitaen met iti Doktrina ken Katulagan 107:1–4).

Bersikulo 2.Ordenan ti Dios dagiti saserdote a tumulong kadagiti tao a mangkita iti Anakna para iti pannakasubbot.

Ania pay dagiti masarakanyo? Kasano ti mariknayo maipapan iti priesthood bayat ti panangutobyo kadagitoy a kinapudno?

Napanunotyo kadin ti maipapan kadagiti ordinansa ti priesthood kas sagut manipud iti Dios a tumulong kadakayo a “mangkita iti masakbayan iti Anakna para iti pannakasubbot”? (bersikulo 2; kitaen met iti bersikulo 16). Nalabit a mailistayo dagiti ordinansa a naawatyon, kas iti panagbuniag, kumpirmasion, ti sakramento, pannaka-set apart iti calling, bendision ti liwliwa wenno pannakaagas, bendision ti patriarka, ken dagiti ordinansa iti templo. Utobenyo dagiti padasyo kadagiti ordinansa a kas kadagitoy. Ibilangyo ti simbolismo a nairaman ken ti Espiritu a nariknayo. Kasano nga itudonakayo ti tunggal maysa kadagitoy nga ordinansa ken ni Jesucristo para iti pannakasubbot?

Sumagmamano a tattao ti sibibiddut a mamati a dagiti ordinansa—ken ti turay ti priesthood a mangannong kadagitoy—ket saan a kasapulan. Kasano koma a sungbatanyo daytoy a kapanunotan? Adtoy ti dua a mensahe ti sapasap a komperensia a mabalin a mangipakaammo iti panagpampanunotyo; pilien ti maysa, ket isuratyo ti aniaman a sungbat a dumteng kadakayo: Russell M. Nelson, “Spiritual Treasures,” Liahona, Nob. 2019, 76–79; Dale G. Renlund, “The Priesthood and the Savior’s Atoning Power,” Liahona, Nob. 2017, 64–67.

Kitaen met iti Doktrina ken Katulagan 84:19–22; Gospel Topics, “Covenant,” Gospel Library.

Tulongannatayo dagiti ordinansa ti priesthood a kumita ken ni Jesucristo para iti pannakasubbot.

Alma 13

Awisennatayo ti Apo a sumrek iti paginanaanna.

Ti awis a “sumrek iti paginanaan ti Apo” (Alma 13:16) ket masansan a maulit iti Alma 13. Nalabit a mabalinyo a sapulen ti tunggal bersikulo a pakakitaan iti balikas a “paginanaan” ket utobenyo no ania ti isuro kadakayo ti tunggal bersikulo maipapan iti mabalin a kaipapanan ti “paginanaan ti Apo.” Kasano a maigiddiat daytoy manipud iti pisikal a panaginana? Kasano a masarakantayo daytoy?

Kitaen met iti Russell M. Nelson, “Overcome the World and Find Rest,” Liahona, Nob. 2022, 95–98; “Come unto Jesus,” Hymns, no. 117.

Alma 14

Kadagiti panawen ti panagsagaba, nasken nga agtalektayo iti Apo.

Mabalin a masdaawkayo, kas iti ar-aramiden ti adu, no apay a mapasamak dagiti nakaam-ames a bambanag kadagiti tao a mangikarkarigatan ti agbiag a sililinteg. Mabalin a saanyo a masarakan amin dagiti sungbat iti daytoy narigat a saludsod iti Alma 14, ngem nakaad-adu ti masursuro manipud iti wagas a panagresponde da Alma ken Amulek iti trahedia. Ania ti isuro kadakayo dagiti balikas ken tignayda maipapan iti no apay a no dadduma ipalubos ti Apo nga agsagaba dagiti nalinteg a tao? Ania ti balakad a mabalin nga ited kadatayo da Alma ken Amulek no mapaspasarantayo dagiti narigat a pannubok?

Kitaen met iti Taga Roma 8:35–39; 1 Pedro 4:12–14; Doktrina ken Katulagan 122:5–9; Dale G. Renlund, “Infuriating Unfairness,” Liahona, Mayo 2021, 41–45.

Agbalin a kanayon a nakasagana. Alisto nga aglabas dagiti kanito iti panangisuro, isu a napateg a gundawayen dagitoy no dumtengda. Maysa a trahedia iti lubong, kas pagarigan, ket mabalin a maysa a gundaway a pangibinglayan kadagiti pagbatayan manipud iti Alma 14 maipapan iti no apay ipalubos ti Apo no dadduma nga agsagaba dagiti awan basolna.

Amin a Banag para iti Pagimbagantayo

Mangidiaya ni Elder Gong iti pammatalged nga iti plano ti Nailangitan nga Amatayo, uray dagiti trahedia ken dadduma pay a narigat a pannubok ket mabalin a para iti pagimbagantayo.

Alma 15:16, 18

Agkasapulan ti kinadisipulo iti panagsakripisio.

Mabalin a makaay-ayo nga ilista dagiti banag nga insuko ni Amulek tapno umawat iti ebanghelio (kitaen iti Alma 10:4–5; 15:16) ket idilig daytoy iti listaan ti no ania ti nagun-odna (kitaen iti Alma 15:18; 16:13–15; 34: 8). Ania ti sitatallugodyo nga isakripisio tapno agbalin a maysa a napudpudno a disipulo ni Jesucristo?

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti kapanunotan para iti Panangisuro kadagiti Ubbing

Gapu ta daytoy a Domingo ket maikalima a Domingo ti bulan, maparegta dagiti mannursuro iti Primary a mangusar kadagiti aktibidad iti panagadal iti “Apendiks B: Panangisagana kadagiti Ubbing para iti Tungpal Biag iti Dana ti Katulagan ti Dios.”

Alma 13:1–2, 16

Makatulong kaniak ti bileg ti priesthood nga ad-adda nga umasideg ken ni Cristo.

• Maysa a wagas tapno matulonganyo dagiti annakyo a makakita no kasano nga itudonatayo ti bileg ti priesthood ken ni Cristo ket ti panangipakita kadakuada dagiti ladawan dagiti wagas a pakausaran ti bileg ti priesthood (kitaen iti Libro ti Arte ti Ebanghelio, dagiti num. 103–110). Mabalin a tulongannakayo dagiti annakyo a mangpanunot kadagiti wagas a nangusaran iti bilegna nga agserbi kadagiti dadduma (kitaen, kas pagarigan, iti Mateo 26:26–28; Marcos 5:22–24, 35–43; Libro ti Arte ti Ebanghelio, dagiti num. 38–41). Kalpasanna mabalinyo a basaen ti Alma 13:2 ket pagsasaritaan no kasano a tulongannatayo ti bileg ti priesthood a “mangkita iti kasakbayan iti Anak [ti Dios]” ken agbalin nga ad-adda a kas Kenkuana.

  
  

• Apay nga inikkannatayo ti Dios kadagiti ordinansa iti priesthood? Tulonganyo dagiti annakyo a mangsapul iti sungbat iti Alma 13:16. No kasapulanda ti tulong a mangammo no ania ti kaipapanan ti ordinansa, adda dagiti listaan iti Sapasap a Handbook, 18.1 ken 18.2. Nalabit a mabalinyo ken dagiti annakyo a pagsasaritaan maipapan kadagiti padasyo iti panangawat kadagitoy nga ordinansa. Kasano a matulongandatayo dagitoy nga ordinansa a “mangkita iti masakbayan ken ni [Jesucristo] para iti pannakapakawan dagiti basol[tayo]”? Ti kanta kas iti “When I Am Baptized” (Children’s Songbook, 103) ket makatulong kadagiti annakyo a mangpanunot kadagiti dadduma pay a gapu tapno agyaman kadagiti ordinansa ti priesthood.

Alma 13:10–12

Mapagbalinnak a nadalus ni Jesucristo.

• Kalpasan ti aggigiddan a panangbasayo kadagitoy a bersikulo, panunotenyo dagiti wagas a pakatulongan kadagiti annakyo a mangiladawan iti panunotda no ania ti maisuroda. Nalabit a makapaggigiddankayo nga agugas. Ania ti mariknatayo no narugittayo? Ania ti mariknatayo no agbalintayo a nadalus manen? Kasano a maipada dagitoy a rikna iti no ania ti mariknatayo no makabasoltayo ket kalpasanna agbabawi ken agbalin a nadalus babaen ti Pannubbot ti Mangisalakan?

Alma 14:18–29

Papigsaennak ti Nailangitan nga Ama no adda pammatik ken ni Jesucristo.

• Ti panid ti aktibidad iti daytoy a lawas ti makatulong kadakayo—wenno kadagiti annakyo—a mangisarita iti estoria iti Alma 14:18–29 (kitaen met iti “Kapitulo 22: Ti Mision ni Alma iti Ammonihah,” Dagiti Estoria iti Libro ni Mormon, 58–63). Yunay-unay a naikkan da Alma ken Amulek iti pigsa gapu iti “pammati[da] nga [adda] ken ni Cristo” (Alma 14:26). Mabalinyo pay nga isarita ti maipapan iti maysa a panawen idi inikkannakayo ti Dios iti pigsa a “maibatay iti pammatiyo.” Kasano a makapagbalintayo a napudno a kas kada Alma ken Amulek?

  Chapter 22: Alma’s Mission to Ammonihah

Alma 15:3–12

Mabalbaliwan ni Jesuscristo dagiti puso.

• Makaparegta ti panagbalbaliw ti puso ni Zeezrom babaen ken ni Jesucristo. Ibilang ti panangrebyu kadagiti annakyo no ania ti nasursuroda maipapan ken ni Zeezrom itay napalabas a lawas. Kalpasanna mabalinyo ti aggigiddan a mangbasa iti Alma 15:3–12 tapno mangtakuat no kasano ti panagbalbaliwna. Ania ti masursurotayo manipud iti padas ni Zeezrom maipapan iti bileg ti Apo? (kitaen iti “Zeezrom Is Healed and Baptized” [video], Gospel Library).

  Zeezrom Is Healed and Baptized | Alma 15

  Zeezrom escapes from the leaders of Ammonihah and becomes very sick. Zeezrom thinks Alma the younger and Amulek have died because of his wickedness. Alma and Amulek heal Zeezrom, and he is baptized.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Da Alma ken Amulek iti Pagbaludan, ni Gary L. Kapp