Ni Alma nga Ub-ubing a mangisursuro kadagiti Zoramite.

Ni Alma nga Ub-ubing a mangisursuro kadagiti Zoramite.

Hunio 10–16: “Limmansad Kadi iti Pusoyo Daytoy Naisangsangayan a Panagbalbaliw?”

Alma 5–7

Saan a naammuan ni Alma maipapan kadagiti agdama a pangisalakan iti biag a pannakasukat ti puso nga operasion, a mangsukat iti maysa a nadadael wenno nagsakit a puso iti maysa a nasalun-at a puso. Ngem ammona maipapan iti ad-adda a nakaskasdaaw a “panagbalbaliw iti puso” (Alma 5:26)—maysa a pangtedan ti Mangisalakan kadatayo iti maysa a baro a naespirituan a biag, a kas iti “pannakaipasngay manen” (kitaen Alma 5:14,49). Makita ni Alma a daytoy a panagbalbaliw iti puso ti eksakto a kasapulan ti adu kadagiti Nephite. Sumagmamano ti nabaknang ken napanglaw dagiti dadduma, sumagmamano ti napannakkel ken napakumbaba dagiti dadduma, sumagmamano dagiti mangidaddadanes ken nagsagaba dagiti dadduma iti pannakaidadanes (kitaen iti Alma 4:6–15). Ngem kasapulanda amin ti umasideg ken ni Jesucristo tapno maagasan—kas met laeng iti aramidentayo amin. Kalkalikagumantayo man ti mangparmek iti kinapalangguad wenno mangibtur kadagiti rigat, maymaysa ti mensahe ni Alma: “Umaykayo, ket saankayo nga agbuteng” (Alma 7:15). Bay-an a ti Mangisalakan ti mangbalbaliw iti napatangken, napnuan basol, wenno nasugatan a puso iti maysa a napakumbaba, natarnaw, ken baro.

Dagiti Kapanunotan para iti Pataengan ken iti Simbaan

Alma 5:14–33

Nasken a mapadasak—ken agtultuloy a makarikna—iti naisangsangayan a panagbalbaliw ti puso.

Kinuna ni Presidente M. Russell Ballard: “Nasken a kanayon nga addaanak iti oras a mangdamag iti bagik, ‘Kumustan ti ar-aramidek?’ … Kas maysa a pangiwanwan kaniak bayat daytoy pribado, bukod a panangamiris, kayatko ti agbasa ken agutob kadagiti pangamiris a balikas a masarakan iti maikalima a kapitulo ti Alma” (“Return and Receive,” Liahona, Mayo 2017, 64).

Ibilangyo ti panangbasa iti Alma 5:14–33 a kasla kaum-umanyo ti bagiyo ken am-amirisenyo ti pusoyo. Mabalin a kayatyo nga isurat dagiti sungbatyo kadagiti saludsod. Ania ti masursuroyo maipanggep iti bagiyo? Ania ti mariknayo a makaparegta nga aramidenyo kas bunga ti pannakiumanyo?

Kitaen met iti Dale G. Renlund, “Preserving the Heart’s Mighty Change,” Liahona, Nob. 2009, 97–99.

ubing a babai nga agkarkararag iti abay ti katre

No umasidegtayo iti Dios, makapadastayo iti “panagbalbaliw iti puso.”

Alma 5:44–51

Magun-odko ti bukodko a panagsaksi iti Mangisalakan ken ti ebangheliona babaen ti Espiritu Santo.

Iti Alma 5, idi inlawlawag ni Alma no kasano a nagun-odna ti pammaneknekna iti Mangisalakan, dina dinakamat ti padasna a pannakakita iti maysa nga anghel (kitaen iti Mosiah 27:10–17). Kasano a naammuan ni Alma ti kinapudno para iti bagina. Nalabit a mabalinyo nga usaren no ania ti masarakanyo iti Alma 5:44–51 tapno agsurat iti maysa a “recipe” para iti pananggun-od iti pammaneknek ni Jesucristo ken dagiti pannursurona. Ania dagiti “paglaok” (dagiti kinapudno ti ebanghelio) ken “pangiturong” (bambanag a mabalintayo nga aramiden tapno agsapul iti kinapudno) nga inraman ni Alma? Ania dagiti “paglaok” ken “pangiturong” a mainayonyo iti recipeyo manipud iti bukodyo a padpadas wenno dadduma pay a padas kadagiti nasantuan a kasuratan?

Alma 7

“Maawatak nga addakayo iti dana ti kinalinteg.”

No dadduma kaslatayo kadagiti tao idiay Zarahemla, a nagkasapulan a maawagan nga agbabawi (kitaen iti Alma 5:32). Iti dadduma a panawen kasla ad-addatayo pay ngem dagiti tao ni Gideon, nga agpadpadas a magna “iti dana ti kinalinteg” (Alma 7:19). Ania ti masarakanyo iti mensahe ni Alma iti Gideon (iti Alma 7) a maipada iti no ania ti kinunana iti Zarahemla (iti Alma 5)? Ania dagiti pagdudumaan a makitayo? Sapulenyo dagiti banag nga insuro ni Alma a makatulong kadakayo nga agtalinaed “iti dana nga agturong iti pagarian ti Dios” (Alma 7:19).

icon iti seminary

Alma 7:7–16

Inawat ti Mangisalakan iti Bagina dagiti basol, saem, ken sakitko.

Nariknayo kadin nga awan maysa a makaawat kadagiti panagkarigatanyo wenno karit? No kasta, makatulong dagiti kinapudno nga insuro ni Alma. Bayat ti panangbasayo, utobenyo no ania ti insuro dagitoy a bersikulo maipapan kadagiti panggep ti sakripisio ti Mangisalakan. Mabalinyo ti agaramid iti tsart nga addaan kadagiti paulo nga Ania ti sinagaba ti Mangisalakan ken Apay a nagsagaba ken ilista no ania ti masarakanyo iti Alma 7:7–16 (kitaen met iti Isaias 53:3–5). Mapanunotyo kadi dagiti naisalsalumina a panawen a sinagabana ti sumagmamano kadagitoy a banag? Adtoy ti sumagmamano a pagarigan manipud kadagiti nasantuan a kasuratan: Mateo 4:1–13; 26:55–56; 27:39–44; Marcos 14:43–46; Lucas 9:58. Mabalin kadi nga inayonyo ti ania man iti listaanyo manipud kadagitoy a bersikulo?

Maysa a banag ti mamati a nagsagaba ti Mangisalakan para kadakayo Ngem kasano a ti panagsagabana ket mangaramid iti pagdumaan iti inaldaw a panagbiagyo? Adtoy ti sumagmamano a nasantuan a kasuratan a mangipakita no kasano a matulongan wenno “masuportarannakayo” ni Jesucristo: Enos 1:5–6; Mosiah 16:7–8; 21:15; 24:14–15; 3 Nephi 17:6–7; Ether 12:27–29; Doktrina ken Katulagan 121:7–10. Ania ti nasursuroyo manipud kadagitoy a padas? Ania dagiti sumagmamano a dadduma pay a wagas a pangtulonganna kadakayo? Kasano a napadasanyon ti tulongna?

Ti maysa a himno kas iti “I Need Thee Every Hour” wenno “I Know That My Redeemer Lives” (Hymns, nos. 98, 136) ket mabalin a paunegenna ti panangipategyo iti tulong ti Mangisalakan. Ania dagiti ragup ti balikas kadagitoy a himno a mangipeksa iti riknayo Kenkuana?

Kitaen met iti Gospel Topics, “Atonement of Jesus Christ,” Gospel Library; “His Grace” (video collection), Gospel Library.

Paneknekanyo ni Jesucristo. Ibilangyo dagiti wagas a pakaibinglayanyo ti pammaneknekyo maipapan iti Mangisalakan ken iti kinadiosan, parabur, ken ayatna. Mabalinyo a paregtaen dagiti tao a sursuruanyo a mangipaneknek Kenkuana babaen ti panagdamag kadagiti saludsod a mangtignay kadakuada a mangibinglay no kasano ti riknada maipapan Kenkuana.

Para iti ad-adu pay a kapanunotan, kitaen dagiti isyu ti Liahona ken para iti Pigsa dagiti Agtutubo a magasin iti daytoy a bulan.

Dagiti kapanunotan para iti Panangisuro kadagiti Ubbing

Alma 5:44–48

Magun-odko ti bukodko a pammaneknek babaen ti Espiritu Santo.

• Tapno matulongan dagiti annakyo a makasursuro a mangpadur-as iti bukodda a pammaneknek, mabalinyo nga ipakita kadakuada ti ladawan iti baba ken damagen kadakuada no kasano a tulongantayo dagiti maladaga nga ayup a dumakkel. Mabalinyo ngarud nga inaig daytoy iti panangaywan kadagiti pammaneknektayo. Ania a panangaywan ti kasapulan dagiti pammaneknektayo? Kasano a maibagatayo no dumurdur-as dagitoy?

  dua nga ubbing a lallaki nga addaan kadagiti urbon

  No awatentayo ti ebanghelio, kasla mangrugrugitayo iti baro a biag.

• Ania ti nagun-odan ni Alma iti napigsa a pammaneknekna maipapan ken ni Jesucristo? Mabalinyo a basaen ti Alma 5:44–46 a kaduayo dagiti annakyo tapno makasarakkayo kadagiti sungbat iti daytoy a saludsod. Nalabit mabalin nga isurat dagiti annakyo ti plano nga aramidenda ti maysa a banag iti daytoy a lawas tapno mapatibker ti pammaneknekda.

Alma 7:10–13

Inawat ti Mangisalakan iti Bagina dagiti basol, saem, ken rigatko.

• Kasano a matulonganyo dagiti annakyo a makaawat iti Alma 7:10–13 tapno maammuanda a ni Jesucristo ket maseknan kadakuada ken makatulong kadakuada? Kiddawenyo kadagiti ubbing a mangibinglay kadagiti padas idi nagsakit wenno nakariknada iti saem wenno naaddaanda iti sabali pay a problema a nagpaliday kadakuada. Kasano a nakatulong dagiti dadduma kadakuada a makarikna a nasaysayaat? Iburayyo ti pammaneknekyo a sinagaba met ti Mangisalakan dagita a banag, ken isaritayo ti maipapan iti maysa a panawen idi liniwliwana ken tinulongannakayo.

• Awisenyo dagiti ubbing a mangbasa iti Alma 7:11–13, nga agsapsapul kadagiti banag a nagsagabaan ni Jesucristo para kadatayo. Awisenyo dagiti annakyo nga agusar kadagiti balikas ken ragup ti balikas a nasarakanda a mangileppas iti daytoy a binatog: “Nagsagaba ni Jesus tapno matulongannak.” Kasano a matulongannatayo a mangammo a maawatan ni Jesus dagiti panagkarigatantayo? Kasano a maawattayo ti tulongna? Ibinglayyo ti pammaneknekyo maipapan ken ni Jesucristo.

Alma 5:14; 7:19–20

Ti panangsurot ken ni Jesucristo ti mangtaginayon kaniak iti nalinteg a dana nga agsubli iti Nailangitan nga Ama.

• Bay-anyo a kumita dagiti annakyo iti sarming bayat ti panangbasayo iti Alma 5:14 (kitaen met ti panid ti aktibidad ita a lawas). Ania ti kayat a sawen ti maaddaan iti ladawan ti Mangisalakan iti langatayo?

• Kasano a mausaryo ti panangiladawan ni Alma iti dana nga agsubli iti Nailangitan nga Ama tapno matulongan dagiti annakyo nga agsursuro nga agaramid kadagiti nasayaat a pili? Mabalinyo nga ibasa ti Alma 7:19–20 kadakuada ket payakem kadakuada a magmagnada kadagiti “killo a dana” ken magmagnada iti nalinteg a dana. Tulonganyo ida a mangpanunot kadagiti pili a tumulong kadatayo nga agtalinaed iti dana ken dadduma pay a pili a mangikkat kadatayo iti dana. Mabalinyo pay nga aggigiddan a kitaen dagiti ladawan ni Jesus ken pagsaritaan dagiti banag nga inaramidna a mangipakita kadatayo iti dana nga agsubli iti Nailangitan nga Ama. Maysa a kanta kas iti “I’m Trying to Be like Jesus” (Children’s Songbook, 78–79) ti makaipaay iti sumagmamano a kapanunotan.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Ni Jesus a nakakawes iti nalabaga a roba

Ti Mangibabaettayo, ni Jay Bryant Ward

panid ti aktibidad: Maaddaanak iti ladawan ti Mangisalakan iti langak