Ni Alma nga Ub-ubing nga Agikaskasaba, ni Gary L. Kapp

Hunio 3–9: “Natibkerda ken Saan a Maisin”

Mosiah 29–Alma 4

Nalabit a makita ti dadduma ti singasing ni Ari Mosiah a mangsukat kadagiti ari iti nabutosan nga uk-ukom kas nainsiriban laeng a reporma iti pulitika. Ngem kadagiti Nephite, nangnangruna kadagiti nagbiag iti panangituray ni nadangkes nga Ari Noah, addaan pay daytoy a pannakabalbaliw iti naespirituan a kinapateg. Nakitada no kasano nga inimpluensiaan ti maysa a saan a nalinteg nga ari dagiti taona, ket “nalabes ti panagdanagda” a mawayawayaan manipud iti kasta nga impluensia. Daytoy a pannakabalbaliw ti mangpalugod kadakuada nga agbalin a responsable para iti bukodda a kinalinteg ken “mangsungbat iti bukod[da] a basol” (Mosiah 29:38).

Kinaagpaysona, ti gibus ti panagturay dagiti ari ket saanna a kayat a sawen ti gibus dagiti parikut iti kagimongan dagiti Nephite. Dagiti nasikap a tao a kas kada Nehor ken Amlici ket nangitandudo kadagiti palso a kapanunotan, indadanes dagiti saan a mamati dagiti Santo, ket nagbalin a napannakkel ken natnag iti basol dagiti adu a miembro ti Simbaan. Ngem nagtalinaed a “natibker ken saan a maisin” “dagiti napakumbaba a pasurot ti Dios” iti laksid ti napasamak kadakuada (Alma 4:15; 1:25).

Dagiti Kapanunotan para iti Pataengan ken iti Simbaan

Mosiah 29:26–27; Alma 2:1–7

Makapagbalinak a nasayaat nga impluensia iti komunidadko.

Lima laeng a tawen iti panagturay dagiti ukom, rimsua ti krisis a mangsubok iti impakdaar ni Mosiah a ti timek dagiti tao ket gagangay a pumili no ania ti umno (kitaen iti Mosiah 29:26). Adalen ti Alma 2:1–7 tapno maammuan no ania ti isyu ken no ania ti inaramid dagiti Nephite maipapan iti daytoy. Ania ti mabalin koma a napasamak no saan nga impangngeg “dagiti tao ti simbaan” dagiti timekda? Ania pay ti masursuroyo iti daytoy a pakaammuan maipapan iti no kasano a kayat ti Apo a makiramanka iti komunidadmo? (kitaen met iti Mosiah 29:26–27).

Ania dagiti napapateg nga isyu a sangsanguen ti komunidadyo? Ibilang no kasano a masiguradoyo, kas kadagiti Nephite, a mairaman ti timekyo iti “timek dagiti tao.” Iti ania pay a wagas a mabalinyo, kas maysa a pasurot ni Jesucristo, nga impluensiaan ti komunidadyo para iti naimbag?

Kitaen met iti Dallin H. Oaks, “Love Your Enemies,” Liahona, Nob. 2020, 26–29.

Alma 1

Makatulong kaniak ti balikas ti Dios a mangbigbig iti palso a doktrina.

Nupay impudno ni Nehor idi kamaudiananna nga ulbod ti insurona, nagtultuloy a nangimpluensia dagiti pannursurona kadagiti Nephite iti adu a tawen. Apay iti panagkunayon a nagustuan dagiti tao ti insuro ni Nehor? Iti Alma 1:2–6, sapulen dagiti kinaulbod kadagiti pannursuro ni Nehor—ken dagiti kinapudno nga inusarna a nangilemmeng kadagita a kinaulbod.

Nadaeran ni Gideon ni Nehor “kadagiti balikas ti Dios” (Alma 1:7,9). Adtoy ti sumagmamano a nasantuan a kasuratan a mangsupring kadagiti kinaulbod ni Nehor: Mateo 7:21–23; 2 Nephi 26:29–31; Mosiah 18:24–26; ken Helaman 12:25–26. Padasenyo a gupgopen ti tunggal binatog ti nasantuan a kasuratan. Ania ti nasursuroyo manipud kadagiti sibibiag a propeta a mangsupring kadagiti palso a pannursuro iti aldawtayo?

Alma 1:19–31; 4:6–15

Dagiti pudno a disipulo ni Jesucristo ket “napakumbaba a pasurot ti Dios.”

Agpada nga iladawan dagitikapitulo 1 ken 4 ti Alma maipapan kadagiti panawen idi rimmang-ay ti Simbaan, ngem nagduduma ti panagresponde dagiti miembro ti Simbaan iti dayta a panagrang-ay. Kas pagarigan, idilig ti Alma 1:19–30 iti Alma 4:6–15 tapno makita no kasano a nagbalbaliw dagiti miembro ti Simbaan iti sumagmamano laeng a tawen. Maibatay iti no ania ti nabasayo, kasano ti rikna dagiti pudno a pasurot ni Jesucristo kadagiti tao nga addaan kadagiti sabali a panamati? Ania ti kababalin dagiti pudno a pasurot ni Cristo maipapan iti kinabaknang ken kinarang-ay? Ania ti naparegta a nariknayo a mangbaliw iti bukodyo a galad?

Aramatenyo (wenno yarigyo) iti bagiyo dagiti nasantuan a kasuratan. Ibilangyo no kasano a mayaplikar iti biagyo dagiti estoria ken pannursuro iti nasantuan a kasuratan. Kas pagarigan, mabalin a masarakanyo dagiti pagpadaan dagiti parikut a makitayo ita ken dagiti parikut a nakaipasanguan dagiti Nephite iti Alma 1–4.

Alma 4:6–20

Ti pagwadan ken pammaneknekko ti mabalin a makapagbalbaliw kadagiti puso.

Nalabit a mariknayo ti ladingit a narikna ni Alma idi nakitana no ania ti mapaspasamak kadagiti taona. Sapulenyo dagiti parikut a naktana iti Alma 4:6–15. Adda kadi dagiti nakitayo nga umasping a parikut? Nalabit a madanagankayo iti maysa nga ay-ayatenyo nga agkarkarigatan kadagitoy a parikut. Pinampanunotyo kadi no ania ti mabalinyo nga aramiden a tumulong?

Mabalin nga isao ti dadduma a ni Alma, kas pangulo nga ukom, ti kasayaatan a tao a mangrisut kadagitoy a parikut. Ngem narikna ni Alma nga adda maysa a nasaysayaat a wagas. Bayat ti panangbasayo kadagiti bersikulo 16–20, ania ti makaawis riknayo maipapan iti pamay-anna a tumulong kadagiti tattaona?

Dakkel ti pammati ni Alma iti balikas ti Dios ken “natarnaw a pammaneknek” (bersikulo 19). Ania dagiti pagarigan a nakakitaanyo iti bileg ti natarnaw a pammaneknek? Bayat ti panangutobyo kadagiti nadumaduma a wagas a mabalinyo nga ibinglay ti pammaneknekyo maipapan ken ni Jesucristo ken ti ebangheliona, mabalin a basaenyo manen ti Alma 4:6–14. Ania ti ipalgak dagiti aramid dagiti miembro ti Simbaan kadagitoy a bersikulo maipapan kadagiti pammaneknekda ken ni Jesucristo ken dagiti pannursurona? Ania ti makitayo maipapan iti epekto dagiti tignayda—iti bagbagida ken iti dadduma? Mabalin pay a panunotenyo dagiti wagas a nabendisionankayo iti natarnaw a pammaneknek ti dadduma a tao, naibinglay man daytoy babaen kadagiti balikas wenno tignay.

Panunotenyo dagiti wagas a mabalinyo nga ibinglay ti pammaneknekyo maipapan ken ni Jesucristo—iti balikas wenno tignay. Siasino ti mairanud iti panagsaksiyo?

Kitaen met iti Gary E. Stevenson, “Nourishing and Bearing Your Testimony,” Liahona, Nob. 2022, 111–14; “Testimony,” Hymns, no. 137; “Alma the Younger Steps Down as Chief Judge” (video), Gospel Library; Gospel Topics, “Revelation,” Gospel Library.

Para iti ad-adu pay a kapanunotan, kitaen dagiti isyu ti Liahona ken para iti Pigsa dagiti Agtutubo a magasin iti daytoy a bulan.

Dagiti Kapanunotan para iti Panangisuro kadagiti Ubbing

Alma 1:2–9

Matulongannak ti Apo a mangbigbig kadagiti palso a pannursuro.

• Maysa a wagas a panangadal iti Alma Alma 1:2–4 a kaduayo dagiti annakyo ket ti panangtulong kadakuada a mangaramid iti true-or-false quiz nga us-usaren dagiti sasao nga insuro ni Nehor, maysa nga ulbod a mannursuro. Kalpasanna, mabalinyo a kasarita ida no apay a masansan a pagtiponen ni Satanas dagiti kinapudno ken kinaulbod. Tulonganyo dagiti annakyo nga agpanunot iti sumagmamano a pagarigan. Kadagiti bersikulo 7–9, kasano a naibturan ni Gideon dagiti kinaulbod ni Nehor? (Kitaen met iti “Kapitulo 20: Da Alma ken Nehor,” Dagiti Estoria iti Libro ni Mormon, 54–55.)

Alma 1:19–25

Kas maysa a miembro ti Simbaan ni Jesucristo, ayatek ken pagserbiak dagiti dadduma.

• Managparabur ken managited dagiti sumagmamano a miembro ti Simbaan iti aldaw ni Alma, ken natangsit ken napannakkel dagiti dadduma pay a miembro. Tapno matulongan dagiti annakyo a makasursuro kadagitoy a padas, mabalinyo nga aggigiddan a basaen ti Alma 1:27, 30 ken mangilista kadagiti kita ti tao a tinulongan dagiti miembro ti Simbaan ti Apo. Asino dagiti am-ammotayo a mabalin nga “[agtakder] a makasapul” (Alma 1:30) iti ayat ken tulongtayo? Aggigiddan nga agkansion iti kanta maipapan iti ayat ken panagserbi, kas iti “Kindness Begins with Me” (Children’s Songbook, 145), ken tulonganyo dagiti ubbing a mangpanunot kadagiti tignay a maigiddan iti kanta.

• Ania ti nasken nga aramidentayo no natangsit dagiti tao kadatayo? Ibilangyo ti panagbasa a kaduayo dagiti annakyo no kasano a natrato dagiti pasurot ni Cristo iti Alma 1:19–20. Isarita maipapan no kasano ti reaksionda kadagiti bersikulo 22 ken 25. Nalabit a mabalinyo a sanayen dagiti wagas a panangsungbat no natangsit dagiti dadduma.

Alma 4:8–20

Mabalin a mangpatibker ti pammaneknekko kadagiti dadduma.

• Masansan a ti “natarnaw a pammaneknek” (Alma 4:19) ti maysa nga ubing ti napigsa a makaimpluensia kadagiti dadduma. Tapno matulongan dagiti annakyo a mangtakuat iti daytoy, mabalinyo ti agbasa a kaduada ti Alma 4:8–12, 15, a mangtultulong kadakuada a mangilasin kadagiti parikut a mapaspasamak iti Simbaan. Ania ti mabalin nga aramiden ni Alma a mangrisut kadagitoy a parikut? Tulonganyo ida a mangammo no ania ti inkeddeng ni Alma nga aramiden iti Alma 4:16–20. Nalabit a mabalinyo nga ibinglay iti tunggal maysa no kasano a pinapigsanakayo ti pammaneknek ti sabali a tao maipapan ken Cristo.

• No kasapulan dagiti annakyo dagiti pagarigan ti no ania ti pammaneknek, ibilangyo ti panangipakita iti video clip ti maysa nga agsarita iti sapasap a komperensia a mangiburburay iti pammaneknek. Mabalinmo pay nga usaren ti panid daytoy nga aktibidad wenno aggigiddan a mangkansion iti maysa a kanta kas iti “Testimony” (Hymns, no. 137). Ania ti masursurotayo maipapan kadagiti pammaneknek manipud kadagitoy a resources? Pagsanayenyo dagiti annakyo iti panangiburay kadagiti pammaneknekda.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Da Alma ken Amlici, niScott M. Snow