Mayo 27–Hunio 2: ‘Naawaganda iti Tattao ti Dios.’ Mosiah 25–28,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2024)
“Mayo 27–Hunio 2. Mosiah 25–28,” Umaykayo, Sumurot Kaniak—Para iti Pagtaengan ken Simbaan: 2024 (2024)
Pannakapasurot ni Alma nga Ub-ubing, ni Gary L. Kapp
Mayo 27–Hunio 2: “Naawaganda iti Tattao ti Dios”
Mosiah 25–28
Kalpasan ti dumani tallo a kaputotan a nagnanaed kadagiti nagsisina a pagilian, nagkaykaysa manen a tattao dagiti Nephite. Dagiti tao ni Limhi, dagiti tao ni Alma, ken dagiti tao ni Mosiah—uray pay dagiti tao ni Zarahemla, a saan a naggapu ken ni Nephi—ket “maibilang a Nephite” amin itan (Mosiah 25:13). Adu pay kadakuada dagiti agtarigagay nga agbalin a miembro ti Simbaan ti Apo, kas kadagiti tao ni Alma. Kasta met a nabuniagan dagiti amin a “nagtarigagay nga umawat iti nagan ni Cristo” “ket naawaganda iti tattao ti Dios” (Mosiah 25:23–24). Kalpasan dagiti tawen ti panagririri ken pannakaadipen, kasla agragragsak dagiti Nephite iti kamaudiananna iti panawen ti kappia.
Ngem idi agangay, nangrugi dagiti saan a mamatpati a mangidadanes kadagiti Santo. No ania ti namagbalin a nakalkaldaang daytoy ket adu kadagitoy a saan a mamatpati ti bukod nga annak dagiti mamatpati—dagiti “tumantanor a kaputotan” (Mosiah 26:1), agraman dagiti lallaki nga annak ni Mosiah ken maysa a lalaki nga anak ni Alma. Saritaen ti pakaammuan maipapan iti namilagruan nga isasarungkar ti maysa nga anghel. Ngem ti pudno a milagro daytoy nga estoria ket saan laeng a maipapan kadagiti anghel a nagparang kadagiti nasukir nga annak a lallaki. Ti pudno a pannakapasurot wenno kumbersion ket maysa a milagro nga, iti maysa a wagas wenno sabali, nasken a mapasamak iti amin kadatayo.
Dagiti Kapanunotan para iti Panagsursuro iti Pagtaengan ken iti Simbaan
Matulongak dagiti dadduma nga umasideg ken ni Jesucristo.
Personal ti pannakapasurot wenno kumbersion—saan a mabalin nga ipasa daytoy a kas iti tawid kadagiti annak ti maysa a tao. Bayat ti panangbasayo iti Mosiah 26:1–6, utobenyo dagiti mabalin a gapu ti pannakatnag ti “tumantanor a kaputotan”, ken kitaen dagiti bunga ti kinaawan ti pammatida. Mabalin pay a panunotenyo ti maipapan kadagiti tao a mabalin a kayatyo a mayasideg ken ni Cristo. Iti unos ti panagadalyo iti Mosiah 25–28, mabalin a yarasaas ti Espiritu dagiti banag a mabalinyo nga aramiden tapno matulonganyo ida a mangpadur-as iti pammatida ken ni Jesucristo.
Kalikaguman dagiti napudno a katulongan ti Dios nga aramiden ti pagayatanna.
No dadduma mabalin nga ipagaruptayo a kanayon nga ammo ti maysa a lider ti Simbaan kas ken ni Alma no ania ti umisu nga aramiden. Iti Mosiah 26 mabasatayo ti maysa a parikut iti Simbaan a saan pay a nakaipasanguan ni Alma iti kaano man. Ania ti inaramid ni Alma iti daytoy a situasion? (kitaen iti Mosiah 26:13–14, 33–34, 38–39). Ania ti isingasing ti padas ni Alma maipapan iti no kasano a sanguenyo dagiti narigat a parikut iti pamiliayo wenno ti panagserbiyo iti Simbaan?
Ania ti insuro ti Apo ken ni Alma iti Mosiah 26:15–32? Makita a sumagmamano kadagiti sungbat ti Apo ket saan a direkta a sungbat iti saludsod ni Alma. Ania ti isingasing daytoy kadakayo maipapan iti kararag ken panangawat iti bukod a paltiing?
Agnanayon dagiti pagbatayan. Ibilang no kasano a mayaplikar iti biagyo dagiti estoria ken pannursuro iti nasantuan a kasuratan. Kas pagarigan, mabalin a saludsodenyo iti bagiyo, “Ania dagiti padasko a maipada iti padas ni Alma?” wenno “Ania dagiti kinapudno nga insuro ni Alma a makatulong kaniak?”
Siwayawaya a pakawanennak ti Dios no agbabawi ken mamakawanak kadagiti dadduma.
Ti panagbabawi ken pannakapakawan ti madagdagullit a tema iti Mosiah 26–27. Sapulen dagiti balikas ken ragup ti balikas a mangisuro maipapan iti panagbabawi ken pammakawan iti Mosiah 26:22–24, 29–31; 27:23–37.
Mabalin a masdaaw ti sumagmamano a tao no talaga a pakawanen ida ti Dios. Kasano iti panagkunayo a balakadan ni Alma a laklakay ti maysa a miembro ti Simbaan idiay Zarahemla nga addaan iti dayta a pakaseknan? Ania ti nasursuro ni Alma manipud iti Apo iti Mosiah 26:15–31 a makatulong iti daytoy a miembro ti Simbaan? (kitaen met iti Moroni 6:8; Doktrina ken Katulagan 19:16–18; 58:42–43).
Babaen ken ni Jesucristo, makapagbalbaliwak para iti nasaysayaat.
Nabatad a kasapulan ni Alma nga Ub-ubing ti naespirituan a pannakayanak manen. Isu ken dagiti lallaki nga annak ni Mosiah “ti karugitan kadagiti managbasol” (Mosiah 28:4). Ngem saan a nabayag kalpasan ti pannakapasurotna, pinaneknekan ni Alma a kasapulan ti pannakapasurot—para iti tunggal maysa: “Dika masdaaw,” kinunana, “nga amin a sangkataw-an … nasken a maipasngay manen” (Mosiah 27:25; nainayon ti panangyunay-unay).
Bayat ti panangbasayo maipapan iti padas ni Alma iti Mosiah 27:8–37, ibilang ti panangikabil ti bagiyo iti estoriana. Mapanunotyo kadi dagiti banag maipapan iti bagiyo a masapul a mabalbaliwan? Asino, kas iti ama ni Alma, ti mabalin a mangikarkararagan kadakayo a “napnuan iti pammati”? Ania dagiti padas a nakatulong “tapno allukoyenna[kayo] iti bileg ken turay ti Dios”? (Mosiah 27:14). Ania dagiti “napintas a banag” nga inaramid ti Apo kadakayo wenno iti pamiliayo a nasken a “laglagipenyo”? (Mosiah 27:16). Ania ti masursuroyo manipud kadagiti balikas ken tignay ni Alma nga Ub-ubing maipapan iti no ania ti kayat a sawen ti maipasngay manen? Ania dagiti pagarigan a nakitayon?
Maaddaan iti kanito a mangirekord iti sumagmamano kadagiti wagas a pakatulongan kadakayo ti Mangisalakan nga agbalbaliw—wenno mayanak manen—uray no saan a kas nadramaan wenno kellaat dagiti padasyo a kas kadagiti padas ni Alma. Adda kadi himno a mabalinyo a kantaen wenno denggen a mangipeksa iti riknayo, kas iti “I Stand All Amazed”? (Hymns, no. 193). Siasino ti mabalin a mairanud manipud iti pannakangngeg maipapan kadagiti padasyo?
Indilig ni Elder David A. Bednar ti pannakayanak manen iti proseso ti panagbalin ti pipino nga atsara (kitaen iti “Ye Must Be Born Again,” Liahona, Mayo 2007, 19–22). Ania iti isuro kadakayo daytoy a panangidilig maipapan iti pannakapasurot?
Kitaen iti Gospel Topics, “Become like Jesus Christ,” Gospel Library; “Alma Testifies He Has Been Born of God” (video), Gospel Library.
Denggen ti Dios dagiti kararagko ket sungbatannanto ida a mayannurot iti pagayatan ken panagorasna.
Mabalin nga addakayo iti situasion ni Alma a Laklakay a kaduayo ti maysa a miembro ti pamilia nga agar-aramid kadagiti makadadael a pili. Ania ti masarakanyo iti Mosiah 27:8–24 a mangted kadakayo iti namnama? Kasano a makaimpluensia dagitoy a bersikulo kadagiti kararagyo a maipaay kadagiti dadduma?
Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.
Dagiti Kapanunotan para iti Panangisuro kadagiti Ubbing
Kayat ti Apo a mamakawanak.
-
Tapno matulonganyo dagiti annakyo a mangtakuat no ania ti insuro ti Apo ken ni Alma maipapan iti pammakawan, mabalinyo nga awisen ida nga agbasa iti Mosiah 26: 29–31 ken mangbilang no mamin-ano nga agparang ti balikas a “pakawanen.” Ania ti isuro kadatayo dagitoy a bersikulo maipapan iti panangpakawan kadagiti dadduma? (Kitaen met iti “Help Me, Dear Father,” Children’s Songbook, 99.)
-
Tapno mayunay-unay ti pagwadan ti Mangisalakan iti pammakawan, mabalinyo nga ipakita ti maysa a ladawanna iti krus ken aggigiddan a mangbasa iti Lucas 23:33–34. Ania ti indawat ni Jesus iti Nailangitan nga Ama nga aramidenna para kadagiti tao a nangilansa Kenkuana iti krus? Kalpasan daytoy a panaglilinnawag, mabalin a yakem dagiti annakyo iti panangpakawan iti tunggal maysa.
-
No dadduma, narigat a pakawanen ti bagitayo no agaramidtayo kadagiti biddut. Kasano a makatulong dagiti balikas ti Dios ken ni Alma? Mabalin nga agpammarang dagiti annakyo a makisarsaritada iti maysa a tao a saan a mangipagarup a pakawanento ida ti Dios. Awisenyo dagiti annakyo a mangsapul iti maysa a banag iti Mosiah 26:22–23, 29–30 a mabalin a makatulong iti dayta a tao.
Makatulong kaniak ni Jesuscristo nga agbalin a kas Kenkuana.
-
Mabalin nga ipakita ti pannakapasurot ni Alma nga Ub-ubing ken dagiti lallaki nga annak ni Mosiah kadagiti annakyo a, babaen ti pannakabalin ti Mangisalakan, mabalin nga agbaliw ti asino man. Mabalinyo ken dagiti annakyo nga usaren dagiti naipinta a ladawan iti daytoy a balabala, ti panid ti aktibidad iti daytoy a lawas, ken ti sumagmamano a kangrunaan a nasantuan a kasuratan manipud iti Mosiah 27:8–37 a mangisalaysay iti estoria (kitaen met iti “Kapitulo 18: Agbabawi ni Alma nga Ub-ubing,” iti Dagiti Estoria iti Libro ni Mormon, 49–52). Mangted iti naisangsangayan a panangyunay-unay iti bersikulo 24, tapno maisuro a nagbabawi ni Alma ken tinulongan ni Jesucristo a nagbalbaliw. Payakem kadagiti ubbing ti estoria no kayatda.
Nagrag-o ti Amana, ni Walter Rane
Makapagkararag ken makapagayunoak tapno bendisionan ti Dios dagiti tao nga ay-ayatek.
-
Aggigiddan a mangbasa iti Mosiah 27:8–24, ket kiddawenyo kadagiti annakyo a mangilasin no ania ti inaramid ni Alma ken dagiti taona a nakatulong ken ni Alma nga Ub-ubing. Nagayuno ken nagkararagkayo kadin para iti maysa a tao? Ibinglayyo ti padasyo kadagiti annakyo, ket paibinglayyo kadakuada dagiti padasda.
-
Am-ammoyo kadi wenno dagiti annakyo ti maysa a tao nga agkasapulan iti tulong ti Dios? Ti panangsurot iti pagwadan ni Alma, nalabit a mabalinyo ti aggigiddan nga agkararag para iti dayta a tao ket, no kabaelan dagiti annakyo, agayunoda met para kadakuada.
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
Ladawan ti maysa nga anghel nga agparparang ken ni Alma nga Ub-ubing, ni Kevin Keele